Latest News

Hand Santizer hman turah fimkhur turin chah

Controlling & Licensing Authority, Directorate of Health Services chuan Hand Sanitizer hi a chi hrang a tam hle tih sawiin, tunlaia hri leng (COVID-19) laka inven nan erawh a hman tlak vek lo tih hriat tur a ni tih an sawi.

Hemi chungchanga thuchhuah a siamah Controlling & Licensing Authority, Directorate of Health Services, Lalsawma chuan COVID-19 hripui leng laka invenna hmanraw pawimawh tak pakhat, Hand Sanitizer chu India ramah a lem (spurious/Sub-Standard) a darh nasa hle tih hriat a ni tih tarlangin, product thalo dapchhuah hna hi Mizoram FDA chuan a thawh reng thu leh, hmuhchhuah pawh engemawzat a nei tawh tih an tarlang a. Tunhnaiah Hand Sanitizer chikhat, a hming 'Reenee' tih chu Mizoram hmun thenkhatah a darh leh nual tih hriat a ni tih pawh tarlangin, he Hand Sanitizer (Reenee) hi RBM Herbal Care, Shyam Estate, Changodar District, Ahmedabad, Gujarat siam a nih thu leh a Label siam dan a dikloh bakah, hawrawp ziak sual a awm nual tih an tarlang a. Hetiang Label fello product zawrh chhuah hi Drugs & Cosmetics Rules, 1945 in a khap tlat a ni, an ti.

Reenee chungchangah hian Gujarat State FDA hnenah thil awmzia hriattir anih thu leh anni lam pawhin rang takin hma la nghalin, a siamtuten thil diklo awm chu pawmin, an hralhchhuah tawh koh kir lehna (product recall letter) an chhuah zui nghal tih an sawi a. Chuvangin he Hand Sanitizer (Reenee) kawlte chuan hralh zawm tawh lovin an laknaah an thawnkir leh vek tur a ni tih an tarlang a ni.

WHO-in Coronavirus laka kut silfai nana Sanitizer a recommend chu 80% Ethyl Alcohol emaw, 75% Isopropyl Alcohol emaw pai a ni tih pawh an thuchhuah ah hian tarlangin, “Hripui leng kara awm kan nih avangin Hand Sanitizer hman tur thlan chungchangah mitin kan fimkhur a ngai hle,” an ti bawk.

Comments

Popular News (Last 30 Days)