Hri kai hmuhchhuah tam ber ni a thleng leh ta

Mizoram-ah nikhat-a COVID-19 hri kai hmuhchhuah tam ber ni thleng lehin niminpiah khan Sample 3337 enfiah atangin COVID-19 hri kai 346 hmuh leh an ni a, Sample enfiah atanga za zela 10.39 te chuan hri an kai a ni.

Niminpiah khan ZMC Laboratory-ah Sample 890 enfiah niin hri kai mi 105 hmuhchhuah an ni a, an vai hian Aizawl District-a Sample lak vek niin an zinga mi pathum tihloh chu hri kai tawh nen inkawm-hnaihna neih avanga inkhunghrang lai an ni a, midang pathum te hi tunhnaia State pawn atanga rawn haw, inkhunghrang lai an ni thung.

District hrang hranga sample enfiah 322 atangin COVID-19 hri kai mi 9 hmuh an ni bawk a, an zinga mi 6 te chu Kolasib District ami niin an zinga mi 5 te chu hri kaina hriatloh leh chhui zui ngai an ni a. Saitual District atangin hri kai mi 2 hmuh niin Khawlian atanga hri kai hmuh chu hri kaina hriatloh leh chhuizui ngai a ni a. Siaha District-ah hri kaina hriatloh mi pakhat hmuh thar a ni bawk.

Niminpiah khan Mizoram-ah Rapid Antigen Test hmangin Sample 2126 enfiah ni bawkin heng atang hian COVID-19 hri kai mi 233 zet hmuhchhuah an ni a, an zinga 141 te chu Aizawl District-a hri kai hmuhchhuah niin heng zingah hian hri kaina hriatloh leh chhui zui ngai 83 an awm a, midang 58 te chu hri kai tawh nen inkawmhnaihna nei an ni thung. Kolasib District-ah hri kai mi 44 zet hmuh an ni a, Lawngtlai District-ah hri kai 31 hmuhchhuah niin Lunglei District-ah hri kai mi 12 hmuh an ni bawk a, Saitual District-ah mi 3 hmuh an nih bakah  Khawzawl District-ah hri kai pakhat hmuh an ni bawk.

Heti hian nimin thlenga Mizoram-a COVID-19 hri kai hmuh-chhuah chu 14,533 an ni ta a, nimin khan hri kai mi 150 te enkawl dam leh niin heng mite nena tun thlenga Mizoram-a hri kai enkawl dam chu 11,041 an ni ta a, hei hi hri kai hmuhchhuah atangin za zela 75.97 niin tunah hian hri kai enkawllai 3431 an la awm mek a ni.

Mizoram-a hri kai zingah mi 60 aia tam an boral tawh

Mizoram-a COVID-19 hri kai enkawl zingha nimin khan mi 3 lai an boral leh a, Mizoram-a COVID-19 hri kai hmuhchhuah zingah mi 61 chu an boral tawh a ni. Nimin zing dar 5:00 khan Malsawmdawngliani (25), Mualkhang chu ZMC-ah a boral a, amah hi natna benvawn neisa niin June 5 khan hri a kai tih hmuhchhuah a ni a. Nimin chawhnu dar 2:50 khan Remruatdiki (15), Hlimen chu boral ve lehin ani hi natna khirh tak vei sa a nih avangin nimin-a hri a kai tih hmuhchhuah a nih rualin ZMC-ah dahluh a ni thung. Nimin vek chawhnu dar 3:00 khan Hav. Lalramliana (52), Tuithiang Veng Aizawl chu ZMC-ah a boral ve leh bawk a, ani hi PTS Staff niin May 20-a hri kai hmuhchhuah a ni thung.