Bank hnathawh dan thlirlet

Nimin khan Kolasib District Bawrhsap, Dr. H. Lalthlangliana hovin an District-a Bank hrang hrangte hmalak dan thlirhona neih a ni.

Kolasib DC Conference Hall-a he thlirhona hunah hian District Bawrhsap chuan Bank chu mipuite ban phak leh indawrtawnna hmun zalen leh nuam tak a siam chhunzawm zel turin thawktute chu a ngen a. Bank dawrtute dawnsawnna kawng a inelna thianghlim nei thin turin a fuih bawk.

He hunah hian January - March, 2021 chhunga Kolasib District chhunga Bank hrang hrangte sum dawn khawm atanga pekchhuah dan khaikhinna (Credit Deposit Ratio) khaikhawm chu 56.29% a ni tih tarlan a ni a, PMMY hnuaia loan pek chhuah chu account 596 atangin 727 ah a pung a, Stand Up India Scheme hnuaiah mi 8 hnenah loan pekchhuah a ni bawk. Kumin hian Self Help Group (SHG) 313 te nen Bank hi inthlunzawm mekin khawsak harsa zual ( Economically Weaker Section) account 5,211 ah cheng nuai 8,609.60 sem chhuah a nih thu tarlan a ni bawk.

Kolasib District chhunga Bank hrang hrang in loan a pekchhuak, thla 3 chuang rul tawh lo, Non-Performing Account anga ngaih, Priority Sector hnuaiah 1,955 leh Non-Priority Sector hnuaiah 210 a awm mek a. March 2021 thleng khan PMSBY dil thei account 55,213 awm zingah 10,558 ziahluh a ni a, PMJJBY dil thei 39,849 zingah 6,969 chiah diltu an awm thung a ni. Mipuite hamthatna tur a duan Scheme-te hi a zau thei ang ber a mipuite hnen a thlen theih nan inzirtirna uar zawk a kalpui ni se tih rel a ni bawk.

He thutkhawm ah hian Annual Action Plan 2021-22 pharh niin Kolasib district chhunga Bank hrang hrangte chu cheng nuai 12,873.69 sem chhuak tur a bituk an ni a. Heng zingah hian Agriculture leh a kaihhnawih a loan pekchhuah tur a bituk hi tam berin cheng nuai 5,794.99 a ni.