Latest News

COVID-19 Hri hi engvanga kai nge kan nih?

COVID-19 Hri hi engvanga kai nge kan nih?

Kum 2019 kumtawp atanga China atanga khawvelin a hmel hriat tan; Novel Carona Virus (Covid 19 ) chuan a rawn lan tirh atanga Vawiin thlengin khawvel a la ti buai mek zel a. He Hripui leng hian nikum 2020, January ni 3 atanga kumin May 13 thleng khan khawvel pumah WHO chhinchhiah danin mihring nunna 3,507,477 a la tawh a. India ramah a vei mi 27,555,457 awmin, mi 318,895 in an thihpui tawh bakah Mizoram-ah pawh mi 34 in kan thihpui tawh bawk.

He natna hri lo chhuahna hi tun thlengin a bulbal tak tak hriat a la ni lova, a lo chhuahna ni a puh, China ramah hian mithiam ten han chhui ve thin bawk mahse, China-in thil thup a ngah avangin mithiamte hian an chhui thui thei lutuk lo nia hriat a ni. January ni 3, 20220 atanga kumin May ni 13 thleng khan a lo chhuahna China-ah hian mi 109,693 in an vei tawh a, mi 4905 in an thihpui ve tawh bawk. Chutiangin a tuar ber USA-ah chuan mi 32,869,009 in an vei a, mi 586,890 an thihpui tawh a ni.

Nikum 2020 March thla khan he hri leng hi Mizoram chuan a hmelhriat ve tan a, March thla tawp lamah State dangte chet ve hauh hmain Partial Lockdown kalpui a ni a. He Partial Lockdown avang hian State dang angin hri hi a darh chak loh phah ni pawhin a hriat a. He hri leng hi tumahin kan la hriatchian loh avangin mipui kan ralkhel a. March 24, 2020 khan Mizo zinga a hmasa ber ni turin rampawn atanga rawn haw in a kai palh hlauh a, hemi hnuah phei hi chuan kan ralkhel lehzual a nih kha.Tichuan sawrkar chuan March  26, 2020 khan Total Lockdown puangin, khawng leh khauh taka kalpui a ni a. Hetih rual hian Mizo zinga Covid-19 kaihhnawiha thi hmasa ber chu May 3, 2020 khan Kolkatta-ah a boral a ni. Hetiang hi kan boruak a nih avang leh Hri awmzia, a hnathawh dan kan la chian tawk loh bawk avangin mipuiin kan tihin, Total Lockdown pawh kan thlawp tha tlang hle a nih kha.

Tichuan, hri kai hi kan pung chho ve zel a. Amaherawhchu, mipuite thuawihna leh tanrualna avangin State dangte fak tlakin kan inkhuahkhirh tha a. Tlema boruak a ziaawm hnuah Total Lockdown hlipin, Partial Lockdown hnuaiah kum 2020 chu kan hmang zova. Khawtlang leh Kohhran thil zawng zawngte pawh khatih chhung zawng khan a chawl thuap a ni.

Kum khat dawn inkharkhip leh inkhuahkhirhna hnuaia kan awm hnuah kum tharin, kum 2021 bul kan tan chhova. Hri leng te pawhin ziaawm lam a pan a, nunphung pangngai kan zawm leh tan mek a, India sawrkar chuan ramdangte awh khawpin Covid-19 hri danna chu January 16 khan ram pumaah kan hmang tan a. Amaherawhchu, hri lengin ziaawm lam a pan mek lai leh Vaccine chungchangah insawithaihna a tam avangin khua leh tui tam zawkin kan ngaihven lova, State thenkhat phei chuan Vaccine thahnem tak an dah chhe nghe nghe. Hetiang hi kan dinhmun a nih mek laiin hri leng thawh hnihna chuan India ram a rawn thleng leh ta a, la thei reng si hri danna la ve lote chu mimawl hmuhin kan hmu leh ta thung a ni. May thla a lo herchhuah leh meuh chuan Hri leng thawh hnihna tia an sawi chuan Mizoram pawh a rawn nuai leh tak avangin May ni 10 khan lockdown puan a ni leh a, hemi hnu hian May thla pumpui chu Hri leng mek darh zel tur chhutchah nan Total Lockdown chu a ni zui ve leh ta!

Hetianga sawrkar-in khua leh tuite hmakhaw thlir chunga Total Lockdown a puang hi hri leng taidarh zel tur chhutchahna atana thil tangkai ber a nih laiin, nikum lama Total Lockdown kan kalpui aia kan lak nat loh deuh zawk vang ni maw? Inkharkhip a nih mek laia tualchhunga Hri kai thar kan la hmuh belh zel hi chu engemaw fel hlel a awm deuh niin a lang.

Tuna a lan dan hi chuan State pawn atanga rawn haw te aiin kan tualchhung theuhvah hian he Covid hri hi kan kuitiak ta zawk niin a lang a. Thuneitute ruahman anga inkharkhipna pumhlum kalpui a nih avanga vantlang punkhawm chi hrang hrang, Pathian biak inkhawm leh thildangte kan tihtawp mek lai hian a lang lo lamah Hri hi kan inkaichhawng tih a langchiang ta hle.

Total lockdown avanga kan reh thuap ni anga a lan lai hian Task Force Duty te hmuh phak loh - thenawm In-a chuankai, chawhmeh inpek leh insuah, tul leh pawimawh vang lam aia ram leh Lui lama vahchhuah etc. te hi kan tih rihloh hram hram tul a. A pawimawh berah chuan sawrkar in inkaihhruaina hi siam lo pawh nise, mahni chhia leh tha hriatna hmanga mahni himna tur hi chu kan ngaih pawimawh a tul a ni. 

He Hri leng hi a mizia leh awm dan tlangpui chu kan hre tawh a. He kan hriatna hi a tha zawnga kan hman pawh a tul a. He Covid hri hi amaha a awm ngawt chuan engmah lo mai ti pawhin a sawi theih ang a. Amaherawhchu, keini mihringte bawk hian kan chawk nungin, kan thehdarh mai chauh zawk a ni. Mizoram hi ramngaw a siam turin thil tih a ngai vak lo, a awmsa thing leh maute humhalhin, kum reilote hnu ah ramngaw ah a lo chang mai ang hian he Covid hri pawh hi thildanga do chiam a theih loh.... mahni Inah tawm ila, sawrkar-in SoP a siamah hian kan himna tur leh tha tur a awm vek a, chuvangin thu awih taka zawm mai hi Hri leng kan do theihna leh himna tur a ni.

Tin, hri leng avanga kan inkhuahkhirh mek lai hian SoP dan hnuai atanga kan thlir chuan vanduai avanga hri kai ai mahin Dan zawmloh avanga hri kai tih tur ang chi hi kan tam zawk ang em? Chutihlaiin he Hripui leng aia Task Force Duty te zawk hlau ni awm a khawsa mi tam tak hmuh tur kan awm bawk.

Hetiang hi Covid -19 hri leng kara kan awm dan a nih avangin kan himna hi keimahni kutah theuh a awm a tih a chiang a, chuvangin thuawihna hmang chauhvin nang leh kei hian he Hripui leng hi kan do hneh thei a ni.

- C.Ramengmawia

Lamkal  Daily Newspaper, Serchhip

Comments

Chhiar Hlawhte