‘Online Solo Competition’ lawmman hlanna nei

Mizo Zaimi Inzawmkhawm (MZI) Headquarters Serchhip chuan ‘Online Solo Competition’ an buatsaih a lawmman dawngtute hnenah nimin khan lawmman hlanna an nei.

I&PR Conference Hall, Serchhip-a ‘Online Solo Competition’ lawmman hlanna hun hi MZI Hqrs. Serchhip President, Lalramnghaka Kawlni chuan kaihruaiin hripui leng avanga inkharkhip kan neih avanga kan nitin khawsak phung a khaihlak chhoh mek lain zai mi inchherchhuahna hun buatsaih tura ruahmanna an siam tih hlawhtlin a nih theihna tura an President kalchhuak ta, Otto K. Lalchhuanawma lawmman tur a tum sak chu lawmawm a tih thu a sawi a. MZI-in zaithiam tharlam tak an neih belh ta chu lawmawm a tih thu pawh sawiin, tun aia sang zawk thleng tur theihtawp chhuah zel turin a chah bawk.

‘Online Solo Competition’ hi Serchhip District huap-a neih niin mi 26 telin heng mite hian an zai chu Phone hmang-a record in an thawn khawm a, heng atang hian a tha zual mi 10 thlan hmasak an ni a, heng mite atang hian Top 5-ah mi 6 thlanchhuah an ni leh a, chuta tang chuan lawmman pakhatna dawngtu chu K. Malsawmkimi, Chhingchhip Mualpui niin Rs. 4000/- leh thuziak a dawng a, Lalruatpuii, E. Lungdar chu pahnihna niin Rs. 2000 leh thuziak a dawng bawk a. Heng lawmman te hi MZI Hqrs. Serchhip Vice President Lalengliana Ralte leh Sr. Vice President, K. Saitluanga ten an hlan a ni.