Lenkawl

Mizoram Board of School Education (MBSE) in kumin-a Higher Secondary School Leaving Certificate (HSSLC) Exam a buatsaih ah Serchhip District-a zirna In hrang hrang ten an titha thawkhat hle.

Serchhip Police te chuan tunhnaiah Whatsapp ah ‘RTO-E-Challan.apk’ tih thehdarh a nih thu sawiin, he thil hi inbumna a ni tih avangin mipuite chu fimkhur turin an chah.

Tunhnai ruahsur nasa leh thli tleh avanga P&E Department in Tuikum Pump House-a kawlphetha an pekna line chhia chu nimin tlai khan siamthat a ni leh ta a, nizan dar 6:30 atang khan dan pangngaiin tui pump pawh chhunzawm leh a ni. He Line chhia avang hian mipuite hnena tui sem pawh a khaihlak nasa hman hle a ni.

Mizoram Board of School Education (MBSE) chuan pawl 12 zirlaite tana kumin-a Higher Secondary School Leaving Certificate (HSSLC) Exam a buatsaih result chu nimin khan tichhuakin Zirlai exam 12,243 zinga 10,734 ten hlawhtlinna changin za zela 87.67 pass ang a ni a, Arts Subject bikah Serchhip District chu District titha ber a ni.

Sub-Hqrs. YMA Serchhip Inkhawmpui vawi 8-na chu zanin hian Thenzawl-ah neih tan a ni dawn a, naktuk zan-ah a tiak ang.

Gauhati High Court, Mizoram Bench a Registrar Signature lem ni ngeia hriat hmangin District Jail Lunglei-a Convict, Jail tang lai mi 15 te chhuah zalen an ni tih hriatchhuah a ni a, heng Jail tang chhuah te hi man khawm leh mek an ni.

Mizo Students’ Union (MSU) kum 25-na, Silver Jubilee lawmna chu nimin khan Dawrpui Multipurpose Hall-ah neih niin Chief Minister Lalduhoma chuan khuallian niin a hmanpui.

Mizoram sawrkar Planning & Programme Implementation Department buatsaih Mizoram Grand Challenge hmawr bawkna leh lawmman semna chu nimin khan neih a ni.

Disaster Management & Rehabilitation Department changtu Minister Porf. Lalnilawma chuan nimin khan Disaster Incident & Reporting Management System ‘Khuarel App’ chu a tlangzarh.

Mizoram Food & Allied Industries Corporation (MIFCO) in kum hnih kalta chhunga hma a lakna hrang hrang tarlanna, MIFCO Documentary Film chu nimin khan Commerce & Industry Department changtu Secretary Dr. H. Lianzela chuan a tlangzarh.

School Education Minister Dr. Vanlalthlana chuan kumin-a HSSLC result chu lawmawm a tih thu a sawi.

Mizoram Upa Pawl (MUP) General Assembly vawi 51-na chu nimin khan Aizawl-a Vanapa Hall-ah neih a ni a, Social Welfare, Women & Child Development Secretary Lalzarmawii chuan khualllian niin a hmanpui a ni.

Nimin khan Lunglei-ah District AIDS Prevention & Control Committee (DAPCC) chu Addl. DC Rochuangkimi Khenglawt kaihhruaiin an thukhawm a, he huna tarlan a nih danin April 2025 atanga March 2026 chhung khan Lunglei District chhungah HIV/AIDS hrik pai hmuhchhuah thar mi 105 awmin an zinga 67 chu mipa niin hmeichhia 38 an ni a; hmeichhia HIV/AIDS kai zingah hian naupai lai mi 6 an awm a ni. HIV kai thar zingah hian mipat hmeichhiatna atanga kai tam berin 66.67% an ni a, inchiuna hriau thianghlim lo atanga kai 31.31% awmin HIV bhri pai nu in a fate a kaichhawn (vertical transmission) 2.02% an awm bawk a. HIV/AIDS kai thar zinga 84.85% lai chu kum 15 leh kum 49 inkar an ni.

Tunkar Thawhlehni, Apruil 28 atang khan Tlabung bul-a Khawthlang Tuipui-ah Sangha Man Runpui-Community Fish Harvesting neih a ni a, nimin khan chhunzawm niin Fisheries Secretary Er. Lalrothanga chuan a telpui a ni. He Sangha man runpui-ah hian a ni khatna ah Sangha kg. 151 man a ni a, nimin khan lawmman semin Vawiin thlengin Sangha Man Runpui hi neih a ni ang.

Lawngtlai District Bawrhsap leh District Level Committee on Drug Free District-a Chairman Donny Lalruatsanga chuan nimin khan Sangau tlawhin Sangau BDO Conference Hall-a 'Drug Free District Campaign' neih a hmanpui a, NMBA hnuaiah ruihhlo do hna thawh mek a nih thu sawiin, Mizoram sawrkar pawhin 'Operation Jericho' chu chak takin a kalpui mek thu leh Sangau RD Block huamchhunga khaw hrang hrangte pawhin tha thlah lova thahnem ngai taka thawk zel turin a sawm nghal bawk a ni. Lawngtlai Bawrhsap hian nimin vek khan Sangau Primary Health Centre (PHC) tlawhin thawktute a kawm a. Damdawi In mamawh te enpuiin X-Ray Room leh Gate siam te an mamawh hmasa nia a hriat thu sawiin, reilote ah tih hlawhtlin a nih tur thu a sawi bawk.

Tunhnaiah thli leh ruah thawk avangin Mizoram-ah In chhia 80 chuang a awm. Disaster Manangement & Rehabilitation Department in a tarlan danin tunhnaia Mizoram chhunga thli leh ruah nasa tak thawk chuan Mizoram hmun hrang hrangah chhiatna nasa tak a thlen a, hriat theih chinah In 80 chuang a tichhia a, In thenkhat chu la luahzui theih ni mah se luah zui theih loh engemaw zat a awm a ni. Department thuchhuah in a tarlan danin thli leh ruahin a tihchhiat zingah hian chenna In bakah Zirna In 4 leh Kohhran Sunday School Hall leh In dang te a tel a. Tun dinhmunah chuan thi leh hliam an awm lo nia hriat a ni a, fimkhur thilah District hrang hrangah zirna In chawlh puan thin a ni bawk.

Tunhnaia ruahsur leh thli tleh avangin Serchhip-ah tui pump theih a ni lo a, Eng pekna chhia engemaw zat awmin siamthat hna thawh mek a ni.

 

Tunhnaia ruahsur leh thlipui thawk chuan Mizoram hmun hrang hrangah chhiatna a thlen a. Chief Minister Lalduhoma chuan chhiatna tuarte hi sawrkar chuan a thlahthlam dawn lo tih sawiin, Dan anga tanpuina awm theih apiang tih sak an nih tur thu a sawi bawk.

Thla thar May 14 leh 15-a Serchhip DC Pisa Tual-a ‘NMBA-Hriselna Kutpui’ neih tur chung-changa inbuatsaihna thlirin nimin khan mawhphurhna nei Department leh khawtlang hruaitute chu Serchhip DC Meeting Hall-ah an thukhawm.

Mizoram Board of School Education (MBSE) in ruahmanna a lo siam tawh ang chuan Vawiin April 29, 2026 (Nilaini) chhun dar 12:00 hian kumin a pawl 12 zirlaite tana Higher Secondary School Leaving Certificate (HSSLC) Examinations result chu tihchhuah a ni dawn a. Result hi MBSE Office, Chaltlang leh MBSE Regional Office, Lunglei leh www.mbse.edu.in leh www.mbseonline.com-ah te en theih a ni anga. A mamawh tan result bu lei theihin a awm bawk ang. Phone kaltlanga result ngaihven duh tan Phone No. 9366278842/9863722521 (Aizawl) leh 9863519718/9612226288 (Lunglei)-ah te Office hun chhungin Whatsapp leh Phone Call-a ngaihven theih a ni ang.

Nimin thleng khan Mizoram-ah COVID-19 hri kai enkawllai mi 8 awmin sawrkar chuan mipuite fimkhur turin a chah.

Aizawl Municipal Corporation (AMC) Inthlanna neih zawh a nih hnuah Ward No. IV atanga thlantlin H. Lalremtluanga chu Mayor a ni dawn.

Aizawl Municipal Corporation (AMC) Inthlanna neih zawh taka I/7- Zuangtui-II Polling Station-a Vote tlate chu nimin khan chhiar a ni.

Mizo Zirlai Pawl (MZP) General Hqrs. chuan High School Leaving Certificate (HSLC) Exam 2026 result chhuaka Top 10-a lang Mizo zirlai mi 18 te hnenah nimin khan chawimawina an hlan.

Mizoram Police te chuan sawrkar thuchhuah lem siamtu nia hriat chu darkar 24 chhunga man nghalin thubuai siam sak a ni.

ZPM Party chuan an Party Vice President atan Hrangturzo Bialtu MLA nilai Lalmuanpuia Punte chu an ruat belh. ZPM Party-a Vice President (Elected) W. Chhuanawma chuan April 22, 2026 khan taksa lama harsatna a neih avanga a banna a thehlut a, a banna hi ZPM General Hqrs. Executive chuan pawmpui lo mah se Vuice President ruat belh tha tiin ZPM Political Affairs Committee (PAC) Member nilai Lalmuanpuia Punte chu ruat belh a ni a, ani bakah hian VL. Zaithanzama leh C. Lalnunnema te chu Vice President atan hian ruat an lo ni tawh bawk a ni.

Nimin khan Hnahthial-ah District AIDS Prevention & Control Committee thutkhawm neiin April 2025 atanga March 2026 chhungin Hnahthial District chhungah HIV/AIDS hrik pai hmuhchhuah thar mi 18 an awm thu tarlan niin an zinga mi 10 chu mipa niin midang 8 chu hmei-chhia an ni a, Hmeichhia HIV hrik kai zingah hian naupai lai pathum (3) an tel a ni. Hnahthial District-a HIV positive thar zinga za zela 60 chu kum 35 leh kum 49 inkar niin kum 25 leh 35 inkar zaa 33.3 an awm a, an zinga za zela 73.3 te chu mipat hmeichhiatna atanga kai an ni.

Lawngtlai Bawrhsap Donny Lalruatsanga hovin nimin khan Lawngtlai-ah District Level Committee on Pradhan Mantri Ujjwala Yojana (PMUY) chu thukhawmin PMUY hnuaiah BPL- chhungkuaa hmeichhiate tan a thlawna LPG connection pek thin dinhmun an thlirho a. He huna tarlan a nih danin Lawngtlai District-ah Gas Agency pali awmin Nuteii Gas Agency, Chawngte chuan Free Gas Connection 2554 pe tawhin a pe tam ber an ni a, Khuma Gas Agency, Lawngtlai-in 654, Chhangte Indane, Bungtlang 'S' in 400 leh Blue Mountain Gas Agency, Sangau in 558 an pe tawh bawk.

Mizo Hmeichhe Insuihkhawm Pawl (MHIP) General Hqrs. chuan Aizawl Municipal Corporation (AMC) Inthlan zawhfel takah Seat 19 atanga Hmeichhia in Seat 9 lai an la chu lawmawm an tih thu sawiin, tling thar zawng zawngte an lawmpui thu an sawi bawk.

Environment, Forests & Climate Change Department-a Principal Chief Conservator of Forests (PCCF) Rajeev Kumar Tiwari IFS chuan April 24 leh 25 chhung khan Kawrthah Forest Division tlawhin Field-a hnathawh dan thlirletna te, harsatna awm zirchianna te, ramngaw humhalh leh enkawlnaa tha zawka a kal theih nan hmalak zel dan tur a sawipui a. Darlak Central Nursery te, Kawrthah-a Division Headquarters te, Kanhmun Range-ah Mualmam-a CAMPA ANR Plantation bakah Mizoram-Assam ramri Medili bial pawh tlawhin, ramri buai dinhmun leh a hmunhma te a enfiah bawk. Zamuang-a mimal Teak huan, Conditional Felling Scheme hnuaia ram surrender hmasa ber neihna hmun pawh tlawhin, he hmun hi Department Plantation atana siamthat leh thingphun lehna tura hmalak mek a ni.

Mizoram tlawha lo zin mek Union Minister of State for Home Affairs Bandi Sanjay Kumar chuan nimin khan Video Conference kaltlangin Siaha District chhunga sawrkar Department hotute chu Secretariat Conference Hall atangin a kawm a, he hunah hian Department hotuten District chhunga hmalakna hrang hrang tarlangin, an hnathawh meka harsatna an tawhte an thlen nghal bawk. Cross border chungchang bakah thenawm ram te nena insumdawn tawn chungchang te, Ruihtheih thil leh puakthei thil lakluh chungchangte bakah zirna leh hriselna lama District dinhmun leh chawikan zel dan tur te sawiho a ni. He hunah hian Siaha District Bawrhsap VL. Hruaizela Khiangte hovin Head of Office leh MADC Official te DC Mini Conference Hall atangin an tel a ni.

 

AMC Inthlan result puan tak atanga a lan danin Seat 17 latu ZPM Party Vote hmuh chu a vaiin 71,470 niin hei hi Vote tla zawng zawng atanga chhutin 47.44% a ni a. MNF Vote hmuh belhkhawm chu 46,131 niin 30.62% a ni a, Congress Vote hmuh belhkhawm chu 31,097 niin 20.05% a ni thung a. BJP Vote hmuh chu 880 niin za zela chhutin 0.58 a ni bawk.

Aizawl Municipal Corporation (AMC) inthlanpui neih-a Vote tla te chu nimin khan Aizawl-a Bawrhsap Pisapui-ah chhiar a ni ta a, Ward 19-a inthlanna neih ah ZPM party chuan Ward 17-ah hnehna changin party mal-a sawrkar siam thei khawpin hnehna an chang a, MNF leh Congress in Seat khat ve ve an la bawk a ni.

Mizoram sawrkar in Serchhip District-a Sawhthing leina tura a ruahman, Secondary Collection Centre (SCC) hrang hrangah tun thlengin Sawhthing hralh tur bag 42,216 dahluh ni tawhin tun thlengin hralh loh bag 7429 ala awm a, Sawhthing kg 11,06,608 chu hralh a ni tawh.

Serchhip District Table Tennis Association buatsaih ‘Season Ending Tournament’ chu kar kalta Zirtawpni leh Inrinni khan Serchhip District Table Tennis Hall, New Serchhip-ah khelh a ni.

Serchhip District Agriculture Marketing Committee (DAMC) leh Ropuiliani Women Farmers' Producer Company (RWFPC) te chuan nimin khan Sawhthing lei leh hralh chungchanga thawhho dan tur an sawiho.

Serchhip-a Excise & Naroctics Department chuan nimin khan Serchhip P&E Veng-ah Heroin nia hriat Hawng thum (3) an man a, heng ruihhlo kaihhnawih ah hian Biakthanpuia (27), Chawngtlai nia insawi chu man nghal niin mipa naupang pakhat pawh man tel a ni bawk. Heroin neitu nia hriat Biakthanpuia hi ND&PS Act hnuaiah thubuai siam sak niin nimin khan Serchhip District Court a hruai niin District Jail-ah dahluh nghal a ni a, kum tling lo an man pawh hi Observation Home ah dah a ni bawk. Nimin-a Heroin nia hriat an man hi gram 32.4-a rit niin ruihhlo an man theih nana puitu P&E veng Branch YMA te chungah END Serchhip chuan lawmthu an sawi bawk.

Zonet TV Pvt. Ltd. buatsaih ‘Miss Mizoram 2026’ thlanna-a Serchhip District aiawha tel leh 2nd Runner Up lawmman latu Serchhip Bazar Veng-a cheng Vanlaltanpuii chuan nimin khan Serchhip a rawn thleng a. MJA Serchhip District te chuan Vawiin chawhnu hian Serchhip Press Club ah sawmbikte nen lawmpuina thingpui an inpui dawn a ni.

Nimin tlai-a thli tleh avang khan Serchhip District chhung Bungtlang Chhim Veng-a Hmingthanmawia te chenna In chu luah zui tlak lohin a chhia a, bungrua pawh engmah chuh hman a ni lo. Bungtlang Chhim Veng-ah hian chhungkaw dang pathum te Inchung chhiain Thenzawl-ah pawh chenna In pahnih chu luahzui tlak lohin a chhe bawk nia thu-dawn a ni a, report kimchang ngaihchan mek a ni.

Mizoram Universal Healthcare Scheme (MUHCS)-ah inziahluhna hun hawn mek zel a la ni a, mipui nawlpui zingah kum 2025-26 aiin inziaklut chhungkaw 15,509-in an an tam tawh zawk.

Union Minister of State for Home Affairs Bandi Sanjay Kumar chuan ni hnih cham turin nimin khan Mizoram a rawn thleng a, sawrkar mi pawimawh te kawm nghalin Vawiin hian Saiha District-a sawrkar thuneitute a kawm leh ang.

Ministry of Social Justice & Empowerment, Government of India buatsaiha Zirtawpni kalta atanga ni thum chhung awh Review Meeting- Chintan Shivir neih chu zawhfel niin Mizoram atangin Social Welfare Minister Lalrinpuii chu a tel a ni.

Zoram People's Movement (ZPM) Party chuan AMC Inthlan-a an Election Manifesto hi Road Map atan an hmang dawn tih sawiin, AMC chu Party invulh nan ringawt hman an tum lo tih an sawi.

Kolasib District Bawrhsap H. Dolianbuaia chuan Kolasib District chhunga ruihhlo ngaite enkawlna leh naupang fahrah enkawlna (Homes/Centres) hrang hrang pali (4) hnenah Mizoram Governor's Discretionary Grant atanga tanpuina sum chu nimin khan a Pisa-ah a sem a, Director, TNT Kolasib; Superintendent, Audrene Scism, Kolasib; Officer In-Charge, The Salvation Army Enna In (Boys Home) leh Superintendent, Omega Centre, Bairabi te hnenah Rs. 25,000/- theuh a hlan a. Heng Home leh Centre hrang hrangte hian lawmthu sawiin, an harsatna leh mamawh te an thlen nghal bawk a ni.

Mizoram-ah kumin chhungin COVID-19 hri kai hmuh an awm zeuh zeuh a, nimin thleng khan hri kai enkawllai mi 13 an awm mek. Integrated Disease Surveillance Programme (IDSP) ten an chhinchhiahna atanga a lan danin kumin chhung hian Mizoram-ah COVID-19 hri kai mi 30 hmuhchhuah an ni tawh a, an zinga mi 17 te chu enkawl dam ni tawhin tun dinhmun ah hri kai enkawllai mi 13 an la awm a, kumin chhunga COVID-19 hri kai hmuhchhuah te hi Aizawl District-a hri kai hmuh te an ni.

Save Chite Lui Coordination Committee leh PWD hotute chuan nimin khan Larsap leh Save Chite Lui Coordination Committee-a Patron General (Dr) Vijay Kumar Singh chu Lok Bhavan-ah kawmin Save Chite Lui Action Plan Phase-II (Lui cheibawl leh chei that) hnuaia project thar tur chungchang an hrilhfiah a. Larsap chuan Chite Lui humhalh leh cheibawl kawngah theihtawp chhuaha tanrual a pawimawh takzet thu sawiin, Chite lui chu khawpui thli luanluhna ber anih avangin checkgate/dam-te a khat tawka daha bawlhhlawh tangte thenfai zel a tul thu a sawi a. Lui kama awmze nei taka thingphun a tul thu sawiin, Department leh NGO te thawhhona mumal neih a pawimawh thu a sawi bawk.

Serchhip khawpui chhungah African Swine Fever (ASF) vanga Vawk thi leh suat awm belh zelin kumin chhung hian Vawk thi leh suat report 400 chuang a awm tawh.

Serchhip-a khelh ‘5th Inter-District Cricket Tournament’ chu Inrinni khan khelh zawh niin Saitual DCA chuan a thlengtu Serchhip DCA hnehin an Champion ta.

Zonet TV Pvt. Ltd. buatsaih ‘Miss Mizoram 2026’ thlanna chu Zirtawpni zan khan zawhfel a ni ta a, Serchhip District aiawh tura MJA Serchhip District ten ‘Miss Mizoram Serchhip District’ atana an thlan leh Serchhip District aiawha tel, Vanlaltanpuii D/o LP. Lalsanglura, Serchhip Bazar Veng chu 2nd Runner-Up niin ‘Miss Multimedia’ Title a la bawk. Tun tuma Miss Mizoram thlanna neih ah hian WCD Miss Mizoram 2026 atan, C. Lalthlamuanpuii, Bawngkawn South thlan niin 1st Runner up-ah Saitluangpuii Sailo, Pachhunga University College chu thlan a ni bawk.

Serchhip District chhung Bungtlang Chhim Veng-a cheng K Lalruatfela chu Zirtawpni zan (April 24, 206) khan Scooter-a chesualin a boral a, Inrinni khan vuiliam a ni. Thudawn danin kum 18-a upa K. Lalruatfela S/o K. Laltlanthanga hi Zirtawpni zan khan an leng tur Scooter-a a chhuak chuan a hmaa LPK Truck ding chu a su palh a, na taka hliam tuarin Serchhip damdawi In rawn panpui a ni a, amaherawh chu a hliam tuar lovin Zirtawpni zan dar 7:25 vel khan a boral zui ta a ni. A ruang hi Bungtlang-ah lak niin lumen a nih hnuah Inrinni khan vuiliam a ni.

Inrinni khan Salvation Army Youth (SAY) Serchhip Corps chuan District Hospital Serchhip Blood Bank-a dah turin thisen Unit 18 an pe a, thisen petute hi mipa 13 leh hmeichhia 5 niin Serchhip Blood Bank-ah kalin thisen hi an pe a, Blood Bank-a thawktu ten an lo lak sak a ni.

Nikum (2025) April thla atanga kumin (2026) March thla tawp thleng khan Mizoram-a Blood Bank hrang hrangah thisen Unit 36,152 lak a ni a, heng zinga Unit 33,690 chu mi tlawmngaite pek a niin pek bik awm lo (voluntary) a thisen pek zat chu thisen pek zawng zawng atanga chhutin za zela 93 (93%) a tling.

Mizoram mi Israel hnam bo ni nia inchhal mi 240 chuangte chuan Zirtawpni zing dar 12:30 vel khan Tel Aviv-a Ben Gurion tumhmun an thleng.

Mizoram sawrkar in Kuthnathawktute thlai tharchhuah leina tura Mizoram hmun hrang hranga Secondary Collection Centre (SCC) 64 zinga SCC 44-ah Sawhthing quintal 69,181 hralh a ni tawh.

Mizoram-ah Sikserh (Malaria) a la hluar em avangin sawrkar chuan a tihrem tumna kawngah theihtawp a chhuah mek zel a, Malaria vei zat tlahniam mah se Malaria chu Thosi seh atanga natna kai theih a nih avangin Malaria nei ve mang lo District-ah te pawh a pung leh hluai thei a, inven reng a tul tih mithiamten an sawi bawk.

Inrinni kalta April 25, 2026 kha 'World Veterinary Day 2026' niin Aizawl-ah chuan 'Veterinarians: Guardians of Food and Health' tih thupui hmangin he ni pual hian hun hman a ni.

Mizo Zirlai Pawl (MZP) General Hqrs. buatsaih ‘D-3 Inter College Debate Competition chu’ chu Ningani leh Zirtawpni khan Vaivakawn Cultural Centre cum Auditorium-ah neih a ni.

India rama Sports Minister te inkhawmpui, ‘Chintan Shivir of Ministers of Youth Affairs and Sports of States/UTs’ chu Inrinni leh Pathianni khan Srinagar-a Sher-i-Kashmir International Conference Centre (SKICC)-ah neih niin Sports Minister Lalnghinglova Hmar pawh a tel.

Mizoram Kuhva Chingtu Pawl (MKCP) chuan Mizoram Police ten Kuhva ro tawlhruk an man thin chu lawmawm an tih thu an sawi.

United Pentecostal Church of North East India (UPC-NEI) Inkhawmpui lian ber, General Conference vawi 58-na chu Ningani zan atanga nizan thleng khan Aizawl-ah neih a ni a, UPC-NEI hi District 12 leh Mission Field 11 awmin, Kohhran member 1,23,199 an awm a ni.

Bangalore Mizo Association chuan inbumna a lo awm tawh thin avangin Bangalore-a hna thawk tur emaw, lehkha zir tur emaw te chu an kal hmain a hmuna awm an chhungte emaw, khawtlang hruaitute emaw berawn hmasa tur leh a theih chin chin a BMA hruaitute be turin thurawn an pe.

Lawngtlai District Bawrhsap Donny Lalruatsanga chuan thupek tichhuakin Lawngtlai District thenawm ram Myanmar-ah Bawng/Lawi pul hri a leng mek nia thudawn a nih thu tarlangin, ranvulh te a lo him zawk theih nan Myanmar atangin Lawngtlai District chhungah Bawng leh Lawi lakluh khapna thupek a chhuah a, Myanmar-a Bawng leh Lawi pul hri leng hi Foot and Mouth Disease nia hriat a ni a, tunhmaa leng thin nen inang viau mah se a venna damdawi erawh a chi dang hman a ngai niin mithiam te chuan an sawi.

Lawngtlai District chhung Hmawngbuchhuah atanga Vaseikai pan tur Maxi Cab pakhat chu Inrinni (April 25, 2026) zing dar 9:40 vel khan Tuichawngtlang leh Vathuampui inkar, Vathuam-pui atanga Kilometre khat leh a chanve vela hla ah chesualin mi pahnih in nunna an chan. Thudawn danin he Maxi Cab-ah hian mipa 5 leh hmeichhia paruk, an vaiin mi 11 chuangin Vathuampui luh dawn Betsuri lui thlen hmain an chesual a, Maxi Cab khalhtu Nghapiang (Hmawngbuchhuah) leh Motor-a chuang Naimaru Varang (Myanmar) te chu a hmunah an boral a, he Motor-a chuang te hi Vaseikai-a bazar tura kal te an ni.

Aizawl Municipal Corporation (AMC) Inthlanpui neih mekah tun thla ni 21-a Vote thlak te chu tukin, April 27, 2026 zing dar 8:00 hian chhiar tan a ni dawn ta a, he Inthlanna a Vote tla te hi Aizawl DC Office-a Counting Hall-ah chhiar tura ruahman niin Vote chhiarna atan hian Counting Hall pali (4) siam niin chhun lai velah chuan result hi hriat theih beisei a ni. Ruahman lawk ang chuan Counting Hall No. I-ah Ward No. I atanga No. V thleng chhiarin Counting Hall No. II-ah Ward No. VI, X, XI, XII leh XIII te chhiarin Counting Hall No. III-ah Ward No. VII, VIII, IX, XVI leh XVII te chhiar a ni anga, Counting Hall No. IV-ah Ward No. XIV, XV, XVIII leh XIX te chhiar a ni bawk ang.

Serchhip Sports Complex-a ‘5th Inter-District Cricket Tournament’ khelh mekah Serchhip DCA chuan Final lutin Vawiin hian Saitual DCA nen Final an khel ang.

Mizoram Presbyterian Kohhran chuan nizan atang khan Pastor Bial hrang hrangah Bial In-khawmpui an nei a, naktuk Pathianni zan thleng a awh ang.

Nimin khan Govt. JM High School Serchhip chuan HSLC Exam 2026 result tihchhuah taka an School result lawmna leh Career Awareness Programme chu an School-ah an hmang a, he hun hi an School atanga HSLC pass thar tepuala buatsaih niin Headmaster, C. Lalrammuana chuan a kaihruai a, Resource Person atan DIET Serchhip-a Lecturer, John Zorammawia hmangin zirlaite tana an kal zelna tura an hriat tur pawi-mawh hrang hrang leh pawl 10 an pass hnua an Subject zir zel tur thlan kawnga an hriat tur thil chi hrang hrang te tarlan a ni. Govt. JM H/S Serchhip atang hian kumin khan HSLC Exam-ah zirlai naupang 35 te exam in an zinga 30 an pass a, zirlai za zela 85.71 ten an pass a ni.

Mizoram Board of School Education chuan pawl 12 zirlaite tana kumin-a Higher Secondary School Leaving Certificate Examinations a buatsaih result chu karleh Nilaini, April 29, 2026 khian tihchhuah a tum a, Result hi MBSE Office, Chaltlang leh MBSE Regional Office, Lunglei bakah www.mbse.edu.in leh www.mbseonline.com-ah te hian en theih a ni ang. Heng bakah hian Phone Call leh Whatsapp hmanga result zawt duhte tan Ph. No.  9366278842/9863722521 (Aizawl) leh 9863519718/9612226288 (Lunglei)-ah te zawh theih a ni anga, Result bu pawh a duh tan lei theih a ni ang.

Mizoram State Project Monitoring Committee (MSPMC) chuan nimin khan General Body Meeting vawi 8-na neiin an Project endikte umzui dan tur an rawtna ngaipawimawh lo Department hotulu ber te chu insawifiah tura koh thin tawh nise an ti.

Health Minister Lalrinpuii chuan nimin khan Post Graduate Institute of Medical Education and Research (PGIMER), Chandigarh tlawhin helai hmunah hian ZMC&H chuan Lung lam zaina, Cardio Thorasic-a thawk turin Training a tir mek a ni.

Rural Development & Administration Department changtu Minister Prof. Lalnilawma chuan ram tih hmasawnna tura pawimawh ber chu khawtlang tih hmasawnna a nih thu a sawi.

Tourism Minister Lalnghinglova Hmar chuan Mizoram tlawhtute rei zawk an châm theihna’n an tlawh tur leh tihtur tam zawk buatsaih kawngah hma an lak mek thu a sawi.

Mizoram-a RTI lama thuneitu sang, Mizoram Information Commission in Mizoram Universal Health Care Scheme (MUHCS) chungchanga Mizoram State Healthcare Society (MSHCS) leh Synod Hospital inremna RTI Act hmanga diltu hnena pechhuak tura a hriattirna chu MSHCS-in Gauhati High Court-ah a khing a, Mizoram chanchin ah State sawrkar hnuai ve ve Court-a an inkhin hmasak ber tum nia hriat a ni.

BJP National Spokesperson Shazia Ilimi-i chuan nimin khan Aizawl Press Club-a thuthar thehdarhtute kawmin Parliament-ah  'Women's Reservation Bill' pawm a ni lo chu pawi a tih thu a sawi a, Bill chu BJP thatna tur nilovin hmeichhiate chawi-kanna zawk tur a nih thu sawiin, Women's Reservation leh Delimitation chungchang chu BJP hamthatna tur anga ngaihna chu a dik lo tih a sawi bawk.

Tlabung Sub-Division huamchhung Tuichawng Health & Wellness Centre-a Health Worker hna thawk lai Lalenthangi Hnamte chu ‘National Florence Nightingale Nurses Award 2026’ dawng tura thlan zingah a tel a. National Florence Nightingale Nurses Award hi hriselna lama kawng hrang hranga thawk tha bikte hnena hlan thin, rampum huap chawimawina sang niin kumin May ni 12, International Nurses Day hian India President Droupadi Murmu-i’n amah leh State danga he châwimawina dawng tura thlante hnenah he chawimawina hi a hlân dawn a ni.

Lunglei khawpui laili, Chanmari Veng-a ‘War Memorial’ chei that thar chu nimin khan Assam Regiment 3 Corps General Officer Commanding (GOC) Lt. Gen. Abhijit S. Pendharkar chuan biakhmuh theihna kaltlangin a hawng a, helai hmuna a hmaa lungphun pahnih awm thin chu pakhat ah dah niin Indopui II-na a ram tana nun hlantu sipai martar mi 103 te leh hel beihnaa martar mi 5 te hming a chuang a, Lunglei DSW&RO Office-in an enkawl a ni.

Commerce & Industries, Geology and Mining Department leh Raising and Accelerating MSME Performance (RAMP) te tangkawp chuan nimin khan Aizawl-a I&PR Conference Hall-ah Train Carriage Booking System leh UNNATI Scheme chungchang Workshop an buatsaih a. He hunah hian UNNATI Scheme nihphung leh a dil dan kal hmangte sawifiah niin Rel (train) hmanga bungraw lakluh leh thawnchhuah dan te mithiam ten an zirtir a, Industries Association-te leh Entrepreneurs thahnem tak an tel a ni.

Nimin khan Lawngtlai-a District Agriculture Marketing Committee chu an Chairman leh Bawrhsap Donny Lalruatsanga hova thukhawmin kumin-a Sawhthing lei dinhmun an thlirho a, he huna tarlan a nih danin kumin-ah Sawhthing lei thawhkhatna chu February ni 2 atanga tanin May ni 30 thleng Lawngtlai District-ah hian lei tum niin tun dinhmuna Sawhthing tharchhuah hi quintal 7200 niin Sangau SCC atangin quintal 4200 hralh a ni tawh a, Lawngtlai SCC, Siachangkawn SCC leh Bungtlang SCC-ah quintal 3000 la hralh tur a awm mek tih tarlan a ni bawk. Mizoram sawrkarin Bâna Kaih (Handholding Policy) a kalpui mekah Lawngtlai District chhunga Sawhthing chingtuten harsatna leh buaina liam sawi tur awm lova hlawk leh man man zawka an hralh thei chu lawmawm a tih thu Bawrhsap chuan a sawi bawk.

 

Mizoram Board of School Education (MBSE) chuan kumin-a pawl 10 zirlaite tana High School Leaving Certificate (HSLC) Exam a buatsaih result chu nimin khan tichhuakin zirlai Exam zawng zawng 18,257 atangin 14,663 an pass a, za zela 80.31 ten pass in a pumpui-ah Rachael Biakthapari, St. Joseph HSS, Aizawl chu pakhatna a ni.

Serchhip District Information & Public Relations Officer (DIPRO) R. Vanneihtluanga chuan nimin khan a Pisa-a leng-ah MJA Serchhip District Member te sawmin an inkawm a, nimin tlai khan MJA Serchhip District hian Serchhip Press Club-ah DIPRO thar lawmna hun an buatsaih bawk.

Serchhip-a awm Assam Rifles ten Aizawl, Silchar, Shillong leh Cherrapunji-te tlawha an hruai Shalom Special School, Serchhip-a zirlaite chuan Aizawl an rawn thlen hnuah Larsap General (Dr) Vijay Kumar Singh chuan nimin khan kawmin an zinna chungchang a sawipui.

Serchhip in a thlen ‘5th Inter-District Cricket Tournament’ chu nimin khan khelh chhunzawm niin Vawiin hian Semi Final khelh a ni dawn a, Serchhip District in Vawiin hian Semi Final an khel ang.

New Serchhip Venglai-a cheng C. Lalrema (74) chu nimin khan New Serchhip chhuahlam ramhnuai-ah a ruang hmuh a ni a, nimin vek khan vuiliam nghal a ni. Thudawn danin C. Lalrema hi nupui sun tawh niin a fapa (JCB Operator) chu hnathawkin khaw dangah a awm a, a fanu chuan pasal neiin New Serchhip-ah vek hian an khawsa a. Amah hmu hnuhnungtu te chuan tunkar Thawhlehni khan New Serchhip chhuahlam, Khawtetlang atanga Tuikum lam panna lamah ram riak turin a kal nia sawiin, hemi hnu hian a chin hriat zui a ni ta lo a. Nimin khan a ruang hi hmuh a ni ta a ni. C. Lalrema ruang-ah hian mi kutthlakna hnuhma emaw a awm hriat a ni lova, mahni-a chesual palh nia rin niin Police ten tih tur tulte an tih hnuah nimin vek khan a ruang hi a fanu te In-ah lain vuiliam nghal a ni.

School Education Minister Dr. Vanlalthlana chuan HSLC Exam result chhuak chuan zirlaite tan Govt. School a belhtlak tih a tarlang niin a sawi.

Cooperation Department, National Bank for Agriculture and Rural Development (NABARD) leh Mizoram Cooperative Apex Bank (MCAB) Ltd., hotute chuan nimin khan Larsap, General (Dr) Vijay Kumar Singh chu Lok Bhavan-ah hmuin tunhnaia ‘Scheduled Bank’ dinhmuna Mizoram Cooperative Apex Bank (MCAB) Ltd. hlankai anih chungchang bakah hmalakna dangte an sawipui.

Mizo Thu leh Hla Inpui (Mizo Academy of Letters) chuan nimin khan Aizawl-a I&PR Auditorium-ah an pawl din champha lawmin he hunah hian ‘Book of the Year 2025’ hlanna neih nghal a ni bawk.

ZPM Party-a Vice President (Elect) leh Tuichang Bialtu MLA nilai W. Chhuanawma chuan ZPM Party-a Vice President a nihna atanga banna chu niminpiah khan a thehlut a, W. Chhuanawma hian taksa hrisel lohna a neih avangin Assembly Session hnuhnung berah pawh khan a tel thei tawh lo a ni. ZPM Party-ah hian Vice President pathum awm mekin W. Chhuan-awma hi thlan niin VL. Zaithanzama leh C. Lalnunnema te chu ruat an ni bawk. Tarlan tawh angin ZPM President nilai Lalliansawta pawh taksa lama harsatna a neih avangin President charge hi Chief Minister Lalduhoma chuian a lo la tawh bawk a ni.

Mizoram State Legal Services Authority-a Member Secretary, Vincent Lalrokima chuan nimin khan Central Jail tlawhin Jail tang te dinhmun a enfiah a, tun dinhmunah Central Jail-ah hian tang mi 818 an awm mek a, chung zingah mi 458 chu an thubuai ngaihtuah mek an ni a, tang 311 erawh chu an thubuai chinfel tawh leh thiamloh chang te an ni a, damchhung tang tur mi 49 an awm mek a ni. Mizoram State Legal Services Authority hian Central Jail, Aizawl-ah hian Legal Awareness Campaign an nei a. Jail tang ten an hriat tur tul Dan pawimawh inhrilhhriatna hun hman a ni a, Jail tangte harsatna chi hrang hrangte pawh ngaih-thlak niin an sawiho bawk a ni.

School Education Department hnuaia State Level Anti-Drugs Committee chu nimin khan School Education Minister Dr. Vanlalthlana hovin a Pisa-ah an thukhawm a, ruihhlo in School naupangte a tihbuai dan chungchang zirchianna awm tawhte thlirho niin ruahmanna siam a ni a. Hmalakna atan ‘School Drug Policy’ buaipui turin Drafting Committee din a ni bawk. He hunah hian Ruihhlo laka fihlim lo Zirtirtute lakah na taka hmalak a nih tur thu leh School leh a chhehvela ruihhlo ti leh zuarte dim dawi an nih loh tur thu te sawi a ni.

Mizoram Chief Secretary Khilli Ram Meena IAS hovin niminpiah khan Secretariat Conference Hall-I ah '12th State Level NCORD Meeting' neiin hmalakna thlirlet a nih bakah hmalak zel dan tur sawiho a ni a. He thutkhawm ah hian Mizoram chhunga 'Drug Free Village' (Ruihlo laka fihlim khua) zawn chhuah leh puan dan tur 'Standard Operating Procedure (SoP)' pawh pharh a ni. Hemi bakah hian New Delhi-a 9th  Apex Level NCORD Meeting neih hnua 'Action Point' 15 tarchhuah te pawh sawiho a ni a, he hunah hian District tina DC leh SP te bakah ruihhlo do kawnga thawktu hrang hrangte an tel a ni.

Nimin khan Lawngtlai-ah District Bawrhsap leh Principal Census Officer Donny Lalruatsanga kaihhruaiin an District-a Chhiarpui kalpui mek thlirletna hun hman a ni a, Chhiarpui Thawh-khatna hnuaiah hian April ni 1, 2026 atanga April ni 15, 2026 chhung khan mahni inziahluh 'Self-Enumeration' neih a ni a, tun dinhmunah Lawngtlai District hian 92.82% completion neiin, District zingah a sang ber a ni. April ni 16, 2026 atanga tanin May ni 15, 2026 thleng hian Houselisting and Housing kalpui a ni ang. Lawngtlai District-ah hian House Listing Block 270 awmin, tun dinhmunah Block 147-ah Census hi kalpui tan tawh a ni. He hunah hian Chhiarpui kalpui meka harsatna an neih te sawiho a ni bawk.

Serchhip-a AH&Vety Department chuan African Swine Fever (ASF) avanga Vawk thi te chu uluk taka phum tura chahin, thupek zawm lo te chu Dan anga hrem theih an nih thu an sawi.

Nimin khan Serchhip-ah District Level Committee on Gyan Bharatam Mission chu thukhawmin Ministry of Culture kaltlanga India ram pum huapa kutziak (manuscript) hluite zawnchhuah leh vawn that (digitalized) kawnga hmalak mek chungchang an sawiho.

Serchhip-a ‘5th Inter-District Cricket Tournament’ khelh mekah nimin khan Serchhip District te chuan hnehna changin Vawiin-ah Kolasib DCA an hmachhawn leh ang.

Food, Civil Supplies & Consumer Affairs Department chuan tun dinhmunah eirawngbawlna Gas leh tuialhthei-ah harsatna a awm lo tih nimin khan thuchhuah siamin an tarlang a, thuchhuah-a an tarlan danin LPG bikah nimin thleng khan Distributor ten Domestic Cylinder bur 13,613 an chhekkhawl bakah kawng laka thang mek bur 29,252 a awm thu an sawi. Petrol leh Diesel pawh tunah hian a dinhmun a that thu sawiin, Retail Outlet-ah Petrol KL 1171.90 leh Diesel KL 1396.70 a awm thu sawiin, kawng laka thang mek petrol KL 456 leh Diesel KL 595 a awm thu sawiin, mipuite tan chi-ai na tur a awm loh thu an sawi a ni.

Mizoram Rajya Sabha MP K. Vanlalvena chuan Mizo hnahthlak tam takte ti hrangtu chu tawng inang lo a nih thu sawiin, Mizo hnahthlak te chu insuihkhawm a, inpumkhat tak tak tur chuan tawng inhriat tawn a pawimawh thu a sawi bawk.

Mizoram State Election Commissioner Dr. H. Lalthlangliana chuan duhthusam ang thlap ni lo mah se Aizawl Municipal Corporation (AMC) Inthlan-a Vote tla zat zaa 62.77 chu a tha thawkhat tih a sawi.

Mizoram-a Political Party hrang hrangte chuan Aizawl Municipal Corporation (AMC) Inthlanna tluang taka neih a ni chu lawmawm an tih thu an sawi.

Kolasib District Bawrhsap thar H. Dolianbuaia chuan nimin leh niminpiah khan an District chhunga sawrkar hmun pawimawh leh ramri te tlawhin an dinhmun a enfiah.

Mizoram Larsap, General (Dr) Vijay Kumar Singh chuan, “Tun hi Library hlutna tharthawh leh hun chu a ni,” a ti.

Mizoram chuan Banking Sector-ah bung thar kaiin tunhnai khan Mizoram Cooperative Apex Bank (MCAB) Ltd. chuan ‘Scheduled Bank’ Status a hmu thar.

Khawhai Playground-a neih ‘Tuichangral Games 2026’ chu nimin khan zawhfel niin a kharna hun hi South Tuipui Bialtu MLA, Jeje Lalpekhlua chuan khuallian niin a hmanpui a ni.

ICFAI University leh Tourism Department tangkawp buatsaih ‘Youth Festival (Univoyage) 2026’ chu nimin khan Durtlang North-a ICFAI University Mizoram Campus-ah hman niin he hun hi Mizoram Larsap General (Dr) Vijay Kumar Singh chuan a hmanpui a. Thalaite tih phur nana topic pawimawh tak tak zirna hun, Youth Festival 2026 buatsaih a ni chu lawmawm a tih thu sawiin, an hlawkpui ngei a beisei thu a sawi a. Thalaite chu kan ram nghahfak an nih thu leh ngaihven an tul thu sawiin, hna zawn leh siam nana pawimawh tak, thiamna inzirtirna leh peipunna lam hawi zirtirna ngaih pawimawh a tul thu a sawi bawk. He hunah hian mithiam hrang hrang ten thu sawiin, sawihona leh zawhna leh chhanna hun te hman a ni bawk a, Vawiin hian chhunzawm lehin zawhfel tur a ni ang.

Kaladan Multi Modal Transit Transport Project (KMMTTP) leh Sairang thlenga Rel lo lutin mipui min nghawng dan tur zirhona chu nimin khan Aijal Club-ah neih a ni a, he hun hi Home Minister K. Sapdanga chuan a hmanpui a ni. He zirhona ah hian Home Minister bakah Adviser to Chief Minister Lalmuanpuia Punte leh TBC. Lalvenchhunga te, MLA Lt.Col. Clement Lalhmingthanga bakah sawm bik mithiam hrang hrang leh NGO bakah Mara leh Lai Zirlai pawl atangin mi thahnem tak an tel a. He hun buat-saihtu Study Committee Chairman T. Lalhlimpuia MLA chuan Committee chu Chief Minister-in a ngaih pawimawh vanga din anih thu sawiin, he hunah hian KMMTTP leh Rel avanga lo in puahchah dan tur te bakah a thatna leh a that lohna te sawiho a ni a. Ramdang te tawnhriat atanga inzir finga, Hnam inchimralna thleng thei laka fimkhur ngaihna lai te sawi ho a ni.

Nimin khan Saitual-ah District Bawrhsap Srinivas Sadi hovin Saitual District-a Indo-Myanmar Border hungna leh Entry/Exit Point panna tur kawng siam chungchang ngaihtuahin District Border Coordination Committee chu an thukhawm a, Saitual District Indo-Myanmar Border hungna leh Entry/Exit Point panna tur kawng (approach road) Hrianghmun khuaa siamna tur hmun chu endik relin, endik hunah hian Border Roads Organisation aiawh, Assam Rifles aiawh leh Hrianghmun khuaa VC leh YMA hruaitute tel se an ti a, endikna report hi BRO chuan ziakin DC hnenah a thehlut ang.

ZPM Legislature Party Leader leh Chief Minister Lalduhoma chu ZPM President charge la tura tih a ni a. Hemi chungchanga nimin-a ZPM Party thuchhuah chuan an President Lalliansawta chu taksa lama harsatna avangin hun engemaw chen a chawlh a ngai dawn tih tarlangin, “A chawlh chhunga President dinhmun lo luah tura Legislature Party Leader Pu Lalduhoma chu charge a pek angin Vawiin, April 22, 20226 atangin thu leh awm hma chuan Pu Lalduhoma, ZPM Legislature Party Leader hian President charge a la dawn a ni,” an ti.

Aizawl-Thenzawl-Lunglei (ATL) Road siam-that hna thawh meka Lunglei Pukpui leh Mausen dai thlenga hnathawh mek chu nimin khan Lunglei a thuthar thehdarhtu ten a hmunah tlawhin an enfiah a, he kawng hi SLT Infracon Pvt. Ltd Hailakandi ten a siamtha hna an thawk mek a ni.

Khawzawl leh Champhai District a Tomato chingtu Tomato Growers Association te chuan kum 2025 leh 2026 chhungin Tomato cheng nuai 90 chuang man an hralh. Niminpiah khan KVK Khawzawl Training Hall-ah Tomato chi semna hun hman niin he hun hi KVK Khawzawl-a Sr. Scientist & Head Dr. Malsawmkimi chuan a kaihruai a, Khawzawl leh Champhai District-a khaw hrang hrang Tuipui, Neihdawn, Rabung, Khawhai, Chawngtlai, Kawlkulh leh Chawngtlai Phai Veng atanga Tomato Growers Association hruaitute kalkhawmin, Tomato an chin dan leh an tharchhuah zat report ngaihthlak a ni a. Report atanga a lan danin Tomato chingtute hian kum 2025 leh 2026 chhungin Tomato hi Rs. 9,03,82,500 man an hralh chhuak tawh a ni. 

Mara Autonomous District Council (MA-DC) a Board of School Education bultumin nimin khan MADC Golden Jubilee Hall-ah Model Student Scholarship 2025-2026 semna hun hman a ni a, he hun hi MADC-a Chief Executive Member (CEM) M. Laikaw chuan khuallian nia hman-puiin Model Student Scholarship dawng tura thlan te chu tehna hrang hrang hmanga thlanchhuah an nih thu sawiin, a dawngtute chu an nu leh pa bakah zirtirtute an zahna leh thu an awihna rah atanga dawng an nih thu a sawi a. Tunlai khawvel chu zirna hmanga intlansiakna khawvel a ni tawh tih sawiin, zirna chu mi zawng zawng in an ngaih pawimawh a tul takzet tih a sawi bawk. Model Student Scholarship 2025-2026 dawngtute hi mi 96 niin Siaha District chhunga zirna In hrang hrang atangin Class 4 atanga class 7 zirlai te an ni.

Copyright Law i hmelhriat tan ang u aw… - Dr. K. Remruatfela Chamber of Liberty

Aizawl Municipal Corporation (AMC) Inthlanpui atan nimin khan tluang taka Vote thlak niin Party hrang hrang ten beiseina sang tak an neih thu an sawi.

Kumin chhungin Serchhip-ah African Swine Fever (ASF) vangin Vawk 214 thi tawhin Vawk 109 suat a ni tawh bawk a, ASF hri hi hmun dang ah chuan a darh rih lo nia ngaih a ni.

Kumin-a sawrkar in Secondary Collection Centre (SCC) te kaltlanga Sawhthing thar a lei mekah Chhiahtlang-a SCC-ah Sawhthing bag 1589 hralh a ni tawh a, hei hi kg 55,006 nia chhinchhiah a ni.

Nimin khan Serchhip-ah ‘5th Inter-District Cricket Tournament’ chu khelh tan niin a thlengtu Serchhip District chu an match hmasa berah an tlawm nghal.

Aizawl Municipal Corporation (AMC) Inthlanpui atan nimin khan tluang taka Vote thlak niin thil duhawm lo thleng a awm hriat a ni lo a. He Inthlanna ah hian hriat theih chinah Vote za zela 61.14 tlain Vote tla tla te hi karleh Thawhtanni, April 27 khian chhiar a ni ang.