Latest News

Vawk thi 500 tling dawn hnai

Nimin khan Serchhip District-ah Vawk hri leng mek, African Swine Fever avangin Vawk thi 35 lai chhinchhiah thar a awm leh a, ASF vanga Vawk thi pawh 500 a tling dawn hnai tawh a ni.

AH & Vety Department in nimin-a ASF vanga Vawk thi an chhinchhiah thar 35 zinga 20 te hi Chhiah-tlang khua ami niin New Serchhip-ah Vawk 8 lai a thi leh bawk a, Thenzawl-ah vawk 5 thiin Serchhip P&E Veng-ah Vawk thi 2 a awm leh bawk a ni. Heti hian Serchhip District-a ASF hri lenna khaw 7-a Vawk thi chu 499 a tling ta a, New Serchhip-ah Vawk 215 a thi tawh a, Ser-chhip P&E Veng-ah Vawk 118 thi tawh bawkin Chhiahtlang-ah 57, East Lungdar-ah 51, Then-zawl-ah 48, Keitum-ah 9 leh Vanchengte-ah Vawk pakhat an thi tawh a ni.

Nimin khan Serchhip District-ah chhan hriatloh a Vawk thi 24 chhinchhiah belh a ni leh bawk a, heng zinga 14 te hi Chhingchhip Mual-pui ami te niin Zote South-ah Vawk 5 a thi leh bawk a, Serchhip Dinthar Veng-ah Vawk 2 thiin Serchhip Vengchung, Chhim Veng leh Bungtlang ah Vawk pakhat theuh a thi bawk a. Serchhip District-a chhan hriatloh a Vawk thi hi khaw 22 ah 136 zet a awm tawh bawk a ni.

Comments

Chhiar Hlawhte