Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

COVID-19 hri kai hmuh belh zel an la ni

Mizoram-ah COVID-19 hri kai hmuh belh zel an la ni a, Inrinni a Sample enfiah 2886 atangin hri kai mi 267 zet hmuhchhuah belh leh an ni.

Inrinni khan ZMC Laboratory-ah Sample 901 enfiah niin COVID-19 hri kai 101 hmuhchhuah an ni a, an vai hian Aizawl District atanga Sample lak vek niin an zingah hian Central Jail a mi 43 an tel a, Ramhlun South atangin mi 12 leh Electric Veng atangin mi 8 an tel bawk.

District hrang hranga TrueNat Laboratory-ah Inrinni khan Sample 449 enfiah niin heng atang hian hri kai mi 35 hmuhchhuah an ni bawk a, an zinga mi 19 te chu Kolasib District ami niin Champhai District atangin mi 4, Siaha District atangin mi 3 hmuh an nih bakah Aizawl, Lunglei, Lawngtlai leh Saitual District atangin hri kai pahnih theuh hmuh an ni a, Mamit District atangin hri kai pakhat hmuh a ni bawk.

Rapid Antigen Test hmangin Inrinni khan Sample 1536 enfiah ni bawkin hri kai mi 131 hmuhchhuah an ni a, an zinga 99 te chu Aizawl District-a Sample lak te an ni a, Lunglei District-ah hri kai mi 14 hmuh an nih bakah Kolasib District-ah hri kai mi 10 hmuh niin Lawngtlai District-ah 3, Serchhip leh Champhai District-ah mi 2 ve ve leh Mamit District-ah hri kai pakhat hmuh an ni. Heti hian nimin thleng khan Mizoram-ah COVID-19 hri kai mi 13,567 hmuhchhuah an ni tawh a ni.

Hri kai dam tam ber ni thleng; Sing chuang dam ta :

Inrinni kalta, June 5, 2021 khan Mizoram-ah COVID-19 hri kai mi 335 enkawl dam niin nikhat-a hri kai enkawl dam an tam ber ni a ni. Inrinni-a Mizoram-a hri kai enkawl dam zinga 266 te hi Aizawl District-a hri kai hmuhchhuah leh enkawl te an ni a, Serchhip District atangin mi 19 enkawl dam niin Lawngtlai leh Lunglei District atangin mi 15 ve ve enkawl dam an awm bawk a, heng bakah hian District hrang hrangah enkawl dam an awm bawk a ni.

Nimin khan Mizoram-a COVID-19 hri kai enkawl zingah mi 194 te chu enkawl dam an ni ve leh bawk a, heti hian nizan dar 10:00 thlenga Mizoram-a COVID-19 hri kai enkawl dam chu mi 10,345 an ni ta a, hei hi hri kai hmuhchhuah atanga chhutin za zela 76.25 a ni a, tunah hian hri kai enkawllai 3168 an la awm mek bawk a ni.

Mizoram-a hri kai hmuhchhuan zing ami C. Parchhingi (70), Electric Veng Aizawl chu Inrinni chawhnu dar 1:00 khan ZMC-ah a boral a, Parchhingi hi a pasal Hauhnuna chuan June 1 khan COVID-19 vangin a lo boralsan tawh a ni.

Inrinni zan dar 10:30 vel khan R. Ralkunga (92), Vairengte boralin nizan dar 8:10 khan Lalhmunliani (30), Saron Veng Aizawl chu ZMC-ah boral ve leh bawk a, ani hi nau pai lai a ni thung. Heti hian Mizoram-a hri kai zingah nunna chan mi 54 lai an awm ta a ni.

Comments

Chhiar Hlawhte