Posts

Showing posts from December, 2019

Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Serchhip-ah boruak muanawm tak hnuaiah Krismas hman a ni

Kum 2019 Krismas chu Serchhip-ah pawh boruak muanawm tak hnuaiah hman a ni.

Midangte tana malsawmna nen

Kum 2019 chu kan lo hmang liam ve leh dawn ta a, kan hma lawkah Kristian te hunpui, Krismas bakah kumhlui thlahna leh kum-thar lawmna hun kan hmang dawn a, heng kan hunpui neih te hi mitin ten hlim leh lawm leh thlamuang taka hman \heuh kan duh a. Kan sawrkar lam pawhin mipuite tan nasa takin hma a la bawk a, heng hunpui te hi kan vaia hlim taka kan hman theihna turin midang tana harsatna thlentu ni lova midangte tana malsawmna thlentu nih i tum \heuh ang u. Tunhnaiah Mizo mipuite-ah thil thar lian deuh awm chu, midangte tana inpekna nena Krismas hman hi a ni awm e. Mimal, pawl leh sawrkar Department hrang hrang ten miharsa zawk leh chhumchhia zawk te \anpuiin he hunpui hi kan hmang \hin a, hei hi a Kristian a, a Mizo a, a lawmawm em em bawk a ni. Amaherawh chu midangte tana malsawmna ni tura kan inpekna hi tute emaw tana sum leh pai kan va hlan ah khan tawp mai lo se, kan khawsak dan phung hrang hrang ah midangte tana harsatna thlentu ni lova midangte tana malsawmna thlentu nih z

KEIMAHNI

Kum 2019 chu kan lo hmang liam leh dawn ta reng mai a, thu chhuah tur pawimawh bik a awm a nih loh chuan Vawiin (Dec. 21, 2019) a LENKAWL tihchhuah hi kumin a tihchhuah hnuhnung ber tur a lo ni dawn ta a. Karleh lam atangin Krismas chawlh kan hmang ve tawh dawn a ni. LENKAWL chanchinbu chhiartute zawng zawng Krismas leh Kumthar hlim tak leh thla-muang taka hmang turin duhsakna kan hlan a che u.

Larsap in NDA-a Graduate leh Cadet kawm

Mizoram Governor, PS. Sreedharan Pillai chuan National Defence Academy (NDA) atanga Sipai Officer rawn training zo tawh leh la training mek Mizo tlangval 5 te a kawm.

Sumdawnna ah Hmeichhia tam

Serchhip Bazar leh a chhehvel-a sumdawnna dawr hrang hranga thawktu zingah Hmeichhia an tam hle a, Hardware dawr tihloh dawr dangah chuan a tam zawk hmeichhia niin Sa zawrhna zingah Ar leh Sangha zuartu ah a tam zawk Hmeichhia an ni bawk.

Mizoram State Games-a Serchhip bial aiawha Medal la te chawimawina hun hman a ni

Mizoram State Games neih zawh taka Serchhip bial aiawha Medal la te chawimawina leh lawmpuina hun chu nimin khan neih niin Serchhip bialtu MLA chuan Serchhip bial tana Madal la te tan hian Incentive Cash Award a buatsaih chu he hunah hian sem nghal a ni.

Sum leh pai enkawlna ah MNF sawrkar a hlawhchham - MPCC

Mizoram Pradesh Congress Committee (MPCC) chuan sum leh pai enkawlna ah MNF sawrkar a hlawhchham niin an sawi.

Infiammi chawimawi dawn

Mizoram State Games neih zawh takah Ser-chhip bial aiawha kal infiammi hlawhtlinna chang te lawmpuina hun chu Vawiin chawhnu dar 2:00 hian Serchhip DRDA Project Director chenna In ah neih a ni dawn a, he hunah hian Sport Discipline hrang hrang a\anga mimal leh Team anga Trophy leh Medal la te hnenah bialtu MLA hma-lakna in sumfai lawmman (Incentive Cash Award) hlan an ni bawk ang.

YMA in Thisen Unit 15 pe

Serchhip Chhim Veng Branch YMA chuan Serchhip Blood Bank-a dah turin nimin khan thisen Unit 15 an pe a, thisen petute hi Mipa 11 leh Hmeichhia 4 an ni a, heng mi tlawmngai te hi Blood Bank-ah kalin thisen hi an pe a ni. Tunlai hian Serchhip Blood Bank-ah thisen a tlem hle a, hunpui lai leh thisen mamawh san lai a nih avangin midangte tana tlawmngaia thisen pe turin AVBD Serchhip Branch chuan mipuite leh pawl hrang hrangte chu an ngen a ni.

Vawk lakluh khap zui zel

Serchhip District Magistrate chuan Serchhip District chhungah Vawk leh Vawksa a\anga thilsiam lakluh khapna thupek a chhuah thar leh.

Mei zu mi 16 man leh an ni

Serchhip District Anti-Tobacco Squad chuan nimin khan Serchhip Bazar leh a chhehvel hmun hrang hrangah Dan bawhchhiaa puipunna hmuna meizu an dapchhuak a, he hunah hian dan bawhchhia mi 16 zet manin heng mite hi Dan in a phut angin pawisa chawitir nghal zel an ni.

MHIP in Gutkha zuar hmu lo

MHIP Sub-Hqrs. Serchhip leh Serchhip Police te chuan nimin khan Serchhip-a Dawr then-khat tlawhin Sikhaar leh a kaihhnawih dang zuar an awm leh awmloh an enfiah.

Police ten tanpuina hlan

Serchhip SP Office a thawk te chuan nimin khan chhungkaw pathum te hnenah Krismas thilpek an hlan.

MJA Advance Krismas hmang

MJA Serchhip District chuan nimin khan Advance Krismas hmangin Krismas thilpek hlan tur an thawhkhawm.

Zangnadawmna pe tam tawh

Silchar, Aizawl, Serchhip, Lunglei, Lawng-tlai leh Siaha pawhtu National Highway No. 54 kawng thuang hniha sialna hna thawhna tur kaih-hnawihah mi 5,069 hnenah zangnadawmna cheng vbc. 727 chuang pek a ni tawh.

CWC in Krismas thilpek hlan

Serchhip District Child Welfare Committee (CWC)-a Member te chuan an sum leh pai thawhkhawm atangin nimin khan Krismas thil-pek an sem a. Child Welfare Committee hian Unity Orphanage Home-ah Washing Machine hlanin Zoar Deprived Children Home-ah Refrigerator an hlan a, hei bakah hian Home nau-pang harsa bik chhungkaw pakhat hnenah pawh Rs. 2000/- an hlan bawk a ni. Child Welfare Committee (CWC) hi Social Welfare Department in Integrated Child Protection Scheme (ICPS) a kalpui hnuaia din niin naupangte hma-khua hrang hrang ngaihtuahtu an ni.

Police ten thubuai lut chhui zawh ngah tawh

Serchhip Police te chuan kumin chhungin thubuai 60 ziaklut tawhin heng zinga 50 te chu chhui zawh a ni tawh.

Andaman Thliarkar-ah

Andaman Thliarkar-ah - Zonuna Kawlni, Editor LENKAWL

Winter Festival hmang

Mizoram sawrkar-a Tourism Department buatsaihin nimin khan Aizawl Sipai Lammual ah Winter Festival neih a ni a, Deputy Chief Minister, Tawnluia chuan khuallian niin a hman-pui a ni.

Union Finance Minister hova Pre-Budget Meeting ah Mizoram tana pawimawh te thlen a ni

Nimin khan Union Finance Minister, Nirmala Sitharaman-i hovin India rama States and Union Territories a Finance Minister te chuan Pre-Budget Meeting an nei a. He hunah hian Mizoram a\angin Taxation Minister, Lalchamliana pawh telin Mizoram tana thil pawimawh pathum a thlen.

Nitin mamawh ah harsatna a awmlo tih sawi

Food, Civil Supplies and Consumer Affairs Department Director, Dr. Lalhriatzuali Ralte chuan hunpui a ruaithehna atan buhfai leh eirawngbawlna Gas hman turah harsatna a awm lo tih a sawi.

MNF sawrkar-in kum khat a tling ta; mipui beisei an pha lo nasa hle - MPCC

Mizoram Pradesh Congress Committee (MPCC) chuan December 15, 2019 khan MNF sawrkar chuan kum khat a tling ta tih sawiin, kum khat chhung hian ram tana thil pawimawh, hmasawnna lian tham pakhat mah tih an la nei lo mai ni lovin, mipui hnena an thutiam tam tak an bawhchhiat avangin beidawnna nen mipuiin sawrkar an thlir mek niin an sawi.

Advance Krismas hmang dawn

MJA Serchhip District chuan Vawiin hian Thenzawl-ah Forest Department hmun-ah Advance Krismas an hmang dawn a, he hunah hian Krismas thilpek sem turin Member ten sum leh pai an thawhkhawm nghal bawk ang.

Ruahmanna inhrilhfiah

Serchhip-III Village Council chuan Serchhip Tuikhuah Veng-a lei tlahniam thin dawlna tura hmalakna kal mek tha tawklo nia an ngaih chu tunhnai khan PWD Serchhip Division-a EE te nen sawihona neiin hna thawh dan turte inhrilh-fiah a ni a, sawrkar ruahmanna chu tha an tih thu sawiin, Tuikhuah Veng leikhi siam hnathawh chu tluang takin kal se, tha taka thawh a nih theih nan thuneitu ten uluk takin vil se an duh thu an sawi bawk.

Tuialhthei khuahkhirh mek

Mizoram puma tuialhthei harsatna thleng mek ah Serchhip-ah pawh Petrol leh Diesel pek-chhuah dan khuahkhirh mek a ni.

Serchhip ZPM in pawi tih thu an sawi

Serchhip Block ZPM chuan sawiselna leh nasa taka dodal chunga Parliament House pahnih a Citizenship Amendment Act (CAA) pawm a lo ni dawn ta chu pawi an tih thu sawiin, he dan pass a nih avanga dodalna leh lungngawi lohna hrang hrangte an thlawp thu an sawi.

Hunpui lo thleng turah Serchhip Police ten mipuite tan theihtawp chhuah an tum

Serchhip Police te chuan kan hma lawka hunpui lo thleng tur mipui ten hlim leh thlamuang taka an hman theih nan theihtawp chhuaha hmalak an tum thu an sawi a. Nimin atang khan lirthei document fello enfiah leh manchhuah hna pawh ngawrh taka thawh tan a ni.

State Games thlirletna nei

Mizoram State Games neih zawh taka Ser-chhip bial Organising Committee chuan nimin khan Working Chairman, H. Dolianbuaia Pisa-ah OB Meeting neiin he infiamna hunpui neih zawh tak an thlirlet a. Mizoram State Games neih zawh taka Serchhip Bial tana infiammi che tha te chawimawina hun chu tunkar Zirtawpni khian neih relin Medal la te chu Incentive pek nise an ti bawk.

Lirthei 1171 ziaklut tawh

Kumin January thla atanga nimin thlengin Serchhip-a DTO Office-ah lirthei 1171 register a ni tawh.

PHE in Poor Fund an hlan

PHE Serchhip WATSAN Division-a Staff Welfare Committee chuan nimin khan Serchhip District Hospital leh Mercy Hospital-ah te Poor Fund an pe.

Excise Department in hma la

Serchhip-a Excise & Narcotics Department te chuan hunpui lo thleng turah lirthei chetsualna laka mipuite an him theihna turin Serchhip chhim lam kawtchhuah ah khualzin phur lirthei khalhtu te, bungraw phur lirthei leh mimal motor khalhtute chu Zu leh ruihtheih thildanga an fihlim leh fihlim loh an endik a, lirthei khalhtute hi ruihtheih thil hrang hrang lakah hian an fihlim tlangpui a ni. Hei bakah hian Serchhip khawpui leh a chhehvel ah Zu leh ruihtheih thil dap hna ngawrh takin an thawk chhunzawm mek bawk a ni.

Hunpui lo thleng tur atan inbuatsaihna sawiho a ni

Nimin khan Serchhip District Bawrhsap Pisa ah Krismas leh kumthar lo thleng tur mipui ten hlim leh ralmuang taka an hman theih nana dan leh thupek kenkawh dan tur sawihona neih a ni.

I&PR buatsaih Press Study Tour-a kal ten Mizoram an rawn thleng leh ta

Mizoram Sawrkar Information & Public Relations Department buatsaiha Andaman and Nicobar Islands-a Press Tour a zin mi 12 (I&PR Department Official 3 leh Mizoram Journalists Association member mi 9) te chuan Pathianni khan Aizawl an lo thleng leh ta a. Press Tour neih chhung hian Andaman a Sawrkar mi pawimawhte an hmuh bakah hmun pawimawh te an tlawh bawk a ni.

Mizoram pumah Draft Electoral Roll tarchhuah a ni

Nakum January 1-a kum 18 tling chin te Electoral Roll a thunna tura Special Summary Revision of Photo Electoral Roll, 2020 neih tur atan nimin khan Mizoram District tinah Draft Electoral Roll chu tarchhuah a ni.

CAB in Mizoram a huam ve loh avangin Mizoram Lok Sabha MP chu CAB vote tir a ni

Chief Minister leh MNF President, Zoramthanga chuan Citizen Amendment Act, 2019 chu Political party, Kohhran, NGO leh zirlai pawl-ten an ngenna ang taka Mizoram huam ve lova an rawn tihpuitlin tak avangin Mizoram Lok Sabha MP, C. Lalrosanga chu vote turin a ti tih a sawi.

Hospital Empanelment Suspend

Health and Family Welfare Secretary, H. Lalengmawi chuan Sawrkar damdawi In nilo, Health Care Scheme zawm duhlo damdawi In te chu an Hospital Empanelment Suspend a nih thu a sawi a, tun dinhmun ah damdawi In 14 in Health Care Scheme an zawm tawh thu sawiin, a zawm duhlo te chu Chief Minister hova Committee sang berin thu alo dah tawh angin an Hospital Empanelment Suspend a nih thu a sawi a, Empanelment suspend damdawi In te chuan Sawrkar-ah an Bill a remchang tawh dawn lo tih a sawi bawk.

KEIMAHNI

Mizoram sawrkar-a I&PR Department chuan Vawiin (Dec. 9, 2019) atanga Dec. 15, 2019 chhung khian Andaman & Nicobar Island (Port Blair & Havelock Island)-ah Press Study Tour a buatsaih dawn a. Mizoram-a Journalist kal tur mi 9 thlan zingah kan Editor a tel ve avangin naktuk (Dec. 10, 2019) atang hian LENKAWL a rawn chhuak thei rih dawn lo a. Tlawmngaia chanchinbu min chhiar sak thin te htiat-thiamna kan ngen e.

MZP in naktuk-ah Total Bandh huaihawt an tum

Mizo Zirlai Pawl (MZP) chuan India hmarchhak State thenkhata Citizenship Amendment Bill (CAB) hman tum duhloh entirnan naktuk, December ni 10, 2019 (Thawhlehni) zing dar 6:00 atanga tlai dar 4:00 inkar hian Aizawl khawpui ah Total Bandh an nei dawn a. District khawpui dangah chuan Bandh hi nei lovin zirlai ten a remchan angin Sit in Protest an nei ang.

Private Hospital ten Permanent Registration neih ngai

Sawrkarin Clinical Establishment Act, nakum January ni 17 atanga Mizoram-a a hman tan turah Private Hospital te chu Sawrkar-ah Permanent Registration nei vek tura tih an ni.

Ruihhlo vangin kumin ah mi 52 an thi tawh

Kumin kumtir atang khan Mizoram-ah damdawi hmansual/drug kaihhnawiha thi mi 52 an awm tawh a. Drug vanga Mizo thalai te thihna thlentu tam ber chu Heroin (No.4) a ni.

Serchhip khawpui Bawlhhlawh paihna hman lai thlakna tur buaipui mek a ni

Image
Serchhip leh Keitum inkara UD&PA Department in bawlhhlawh paihna hmun an hman mek thlakna tur ruahman mek niin hun reilote ah bawlhhlawh paihna thar hi hman theih beisei a ni.

STP hmalakna hlawhtling

Serchhip Thalai Pawl (STP) chuan kumin a Serchhip khawpui-a BSNL Line thatloh avanga mipui ten ni 24 zet inbiakpawhna an hman that theihloh avanga hma an lakna ah hlawhtlinna an hmuh thu sawiin, he an hmalakna avang hian he harsatna tuartu an hnena in hriattir tura an tih te chuan December, 2019 hian an chawi tur zatve chauh an chawi dawn tih an sawi a. Hetianga mipui harsatna tawh hi Consumer Court-ah lo thlen tawh mah se hetianga an Bill tihtlem a nih tak avang hian an thu thlen chu an hnuklet leh tih an sawi bawk.

Zirlai rawn zin te kir leh ta

Serchhip-a awm Assam Rifles Battalion leh Headquarter 23 Sector Assam Rifles/ Headquarter Inspector General Assam Rifles (East) te bultuma ni 15 zet National Interactive Tour nei Sainik School Chhingchhip naupang te chuan Inrinni khan Aizawl an rawn thleng a. He Tour-ah hian zirlai 14 leh zirtirtu pahnih bakah Serchhip Battalion atangin anmahni buaipuitu atana ruat ten an ho a, November 19, 2019 khan Chhing-chhip an chhuahsan a, Inrinni khan Aizawl an lo thleng ve leh a ni.

Man tur awmlo ah lawm

Serchhip District Anti-Tobacco Squad te chuan puipunna hmuna meizu an awm leh awm-loh an enfiahna ah man tur an awmlo thin chu lawmawm an tih thu an sawi.

Police ten halmawi man

Serchhip Police te chuan Inrinni tlai khan District Magistrate thupek bawhchhiaa halmawi kawl thahnem tak an man.

Serchhip-ah PMVVY Week kharna neiin he Hapta pual Rally neih a ni bawk

Social Welfare Department hnuaia Pradhan Mantri Matru Vandana Yojana (PMMVY) kalpui mek puala kar kalta Thawhtanni atanga Serchhip-a PMVVY Week-Matru Vandana Saptah hman chu Inrinni zing khan a kharna neiin he Hapta puala Rally neih nghal a ni bawk.

District Jail-a tang enfiah

Social Welfare Department hnuaia din, Child Protection Unit hnuaia Jail Inspection Team te chuan nimin khan Serchhip District Jail tlawhin naupang tang mek te dinhmun an enfiah.

Sports Minister in 'Red Kettle’ hawnna nei

Chhandamna Sipai Pawl (The Salvation Army)-in riangvai leh chanhaite tana thawhlawm khawnsakna hun kumtina an neih thin 'Red Kettle' hawnna hun chu nimin khan Millenium Centre kawt zawl-ah neih a ni a. He hun hi Sport & Youth Services Minister, Robert Romawia Royte chuan hmanpuiin a hawng a ni.

Armed Forces Flag Day hmang

Nimin khan Sainik Welfare & Resettlement Department bultumin Armed Forces Flag Day hman a ni a. Indona a nun chan nupui fanaute, hliam tuar a ramtuileilo a awmte leh Ex-Servicemen leh hmeithai harsa zualte tan mi tlawmngaite hnen atangin tanpuina khawn niin Rs.21,630/- hmuh a ni a. Armed Forces Flag Day hi India Rampumah kum 1949 atang khan kumtin December ni 7-ah hman thin a ni a, kumin hian December ni 7 hi Sawrkar chawlh (Inrinni) ah a tlak avangin nimin khian hman a ni ta zawk a ni. He ni pual hian Lottery Ticket siam a ni bawk a, Lottery hi December ni 15, 2019 ah vawr a ni ang.

NGO ten lawmthu sawi

Mizoram-a tlawmngai pawl hrang hrangte telna, NGO Co-Ordination Committee chu nimin khan thukhawmin Citizenship (Amendment) Bill, 2019 chungchangah tunhnaia Union Home Minister an hmuhnaah ILP nei State leh Scheduled Area te chu a huamloh tur thu a lo hrilh avangin lawmawm an tih thu an sawi a. CAB chungchanga Mizo mipuite tanhonaah lawmthu a an sawi bawk.

Home Guards & Civil Defence Raising Day lawm

Home Guards & Civil Defence Raising Day vawi 57-na chu nimin khan Sesawng-a Central Training Institute (CTI)-ah lawm a ni a, Home Minister, Lalchamliana chuan khuallian niin a hmanpui.

Veterinary, Fishery & Sericulture Board thukhawm

Mizoram sawrkar-a Veterinary, Fishery & Sericulture Board chu nimin khan an Chairman leh AH&Vety Minister, Dr. K. Beichhua hovin a Pisa-ah an thukhawm.

New 132KV Grid Power Sub-Station hawn a ni

Power and Electricity Department changtu Minister, R. Lalzir-liana chuan Mizoram-a Power Transformer Sub-Station lian ber - New 132KV Grid Power Sub-Station, Zuangtui chu nimin chawhnu khan hman theih turin a hawng.

Serchhip District-a Damdawi In leh zirna In-ah kawlphetha hmang tlem chi bungrua sem a ni

Mizoram sawrkar P&E Department-a State Designated Agency for Energy Conservation, Chief Electrical Inspectorate buatsaihin nimin khan Serchhip District-a Damdawi In leh Zirna In thlanchhuah ah te kawlphetha hmang tlem chi bungraw chi hrang hrang semchhuah a ni.

SPA in hruaitu thlanna nei

Serchhip Photographers Association (SPA) chuan nimin khan kum 2019-2020 chhunga an hruaitu tur thlanna an nei.

Serchhip Police ten Heroin nia hriat an man

Serchhip Police te chuan nimin chhun khan Keitum khua ah Heroin Hawng thum (3) manin a kengtu leh an pek tur nia an sawi te chu man nghal an ni.

ZDU General Assembly nei

Zoram Drivers’ Union (ZDU) Sub-Hqrs. Serchhip chuan nimin khan General Assembly neiin hruaitu thlanna an nei.

Baktawng khua ah awlsam leh thianghlim zawka Balhla um-na tur, Ripening Chamber hawn a ni

Kuthnathawktute tharchhuah Balhla te tuihnai, hrisel leh awlsam zawka um hminna tur hmun, Ripening Chamber chu nimin khan Mizoram sawrkar-a Horticulture Development Board Vice Chairman, Prof. F. Lalnunmawia MLA chuan Baktawng-ah a hawng.

SOC in Advance Krismas hmangin hruaitu thlang

Serchhip Officers Club (SOC) chuan nimin khan District Panchayat Resource Centre (DPRC), Serchhip Tarpi tlang-ah Advance Krismas hmangin kum 2019-2020 chhunga an hruaitu tur thlanna neiin President-ah H. Dolianbuaia PD, DRDA; Vice-President-ah R. Laldinsanga Asst. Commissioner of Excise & Narcotics; General Secretary-ah Vanlalchhana SDEO; Secretary Information-ah Samuel Sai\huamliana, Lecturer, GHSS; Secretary Games & Sports-ah John Zorammawia, Lecturer, DIET; Treasurer-ah Dr. Lalhlunpuii DIO leh Fin. Secretary-ah PC. Lal\anpuia, Addl. SP te thlan an ni.

South Zone M/S Sports zo

Tunkar Thawhlehni atanga DC Playground, Khawtetlang-a neih Serchhip South Zone Middle School Sports chu nimin khan zawhfel a ni ta a.

Hnathawh tum dan duhlo

Serchhip-III Village Council chuan Serchhip Tuikhuah Veng-a NH. 54 tlahniam thin venna atana hnathawh tum dan chu an duhloh thu an sawi.

KVK in World Soil Day hmang

Nimin khan khawvel pumah 'World Soil Day' hman niin KVK North Vanlaiphai, Serchhip District chuan KVK Training Hall-ah he Ni pual hian hun an hmang a. He hun hi Dr. T. Vanlal-ngurzauva, Senior Scientist & Head chuan kai-hruaiin Jenny Sailo, Divisional Forest Officer, EF&CC Department, N. Vanlaiphai Forest Division chuan Khuallian niin a hmanpui a. Khual-lian chuan Soil erosion (lei chunglang luangral) tih tawp a pawimawh zia leh buh leh bal, ramngaw leh tuihna siam nana thingphun pawimawh zia te sawiin, an department hmalaknate a sawi bawk. He hunah hian KVK-a mithiam ten thupui hrang hrang hmangin thu an sawi bawk a ni.

EMRS tan PHE Department in Tui pump sak thei ta

PHE Department-in Serchhip Kawlri tlang-a Eklavya Model Residential School (EMRS) tana tui pump-na an siam chu zawhfel niin nimin khan hlawhtling taka tui pump a ni.

HIV/AIDS do dan tur sawiho

Ministry of Health and Family Welfare hnuaia National AIDS Control Programme leh Mizo-ram sawrkar tangkawp chuan HIV/AIDS dona kawnga hmalak dan tur duangin Review Meeting of Integrated HIV/AIDS Action Plan, Mizoram an buatsaih a, he hun hi Health Minister, Dr. R. Lalthangliana chuan hmanpuiin Mizoram chhunga HIV/AIDS darh nasa lutuk do turin hemi kawnga hma latu mithiamte ngun leh zuala Mizote mizia, nunphung leh rilru puthmang zirchiang turin a sawm bawk. He hun hi Ministry of Health and Family Welfare hnuaia National AIDS Control Organisation-a Special Secretary leh DG (NACO & RANTCP), Sanjeeva Kumar pawhin rawn hmanpuiin Mizoram sawrkarin HIV/AIDS do na tur budget-ah sum dah a tum leh hma a lak mek dan te thlirin HIV/AIDS dona kawngah State Sawrkarin theihtawp a chhuah tih a lang a ni, a ti bawk.

Chief Minister in Prime Minister leh Union Minister pawimawh dang te a kawm

Image
New Delhi a cham mek Chief Minister, Zoramthanga chuan nimin khan Prime Minister, Narendra Modi chu a pisa-ah a kawmin Mizoram mamawh hrang hrang a sawipui a. Hei bakah hian Minister hrang hrangte kawmin Mizoram mamawh hrang hrangte a sawipui bawk.

Deputy Chief Minister in cheng nuai 2418 senga sak ‘Lena Sports Stadium’ a hawng

Ministry of Housing and Urban Affairs kaltlanga cheng nuai 2418 senga sak Lena Sports Stadium, Lunglei chu nimin khan UD&PA Department changtu Deputy Chief Minister, Tawnluia chuan a hawng.

SARAS Fair vawi 6-na tan

Mizoram State Rural Livelihoods Mission (MzSRLM) leh Rural Development Department buatsaih, thingtlanga kut hnathawktu hmei-chhiate kut chhuak zawrhna, Sale of Articles of Rural Artisans Society (SARAS) Fair vawi 6-na chu nimin khan Assembly Annexe Conference Hall-ah Rural Development Minister, Lalruat-kima’n a hawng.

Khawvel pumah World Soil Day hman a ni

Nimin December 5 kha World Soil Day a ni a. Mizoram sawrkar-a Agriculture Department (Crop Husbandry) buatsaihin World Soil Day hi hman a ni a, Farmers Workshop neih nghal a ni bawk.

Leitlangpui Rahbi Award semna neih a ni

Niminpiah tlai khan Deputy Chief Minister, Tawnluia chuan Lunglei HPC Conference Hall-ah Lunglei District huam chhunga Business Idea intihsiakna ‘Leitlangpui Rahbi’ Competition ti tha tlanchhuah Entrepreneur sawmpanga (15) te hnenah lawmman a hlan.

Vanapa hriatrengna lung phun a ni

Mizo Pasaltha hmingthang Vanapa (Thangzachhinga) hriat-rengna lung, a tuchhuan kalzel ten an buatsaih chu nimin khan Hnahlan ram-a Tuithoh lui kamah phun a, he hun hi Hnahlan khaw mipuite chuan an hmanpui a ni.

Aizawl Special Handloom Expo 2019 tan a ni

Tunkar Inrinni thleng awh tur Aizawl Special Handloom Expo 2019 chu nimin khan Zarkawt Recreation Centre-ah neih tan niin Commerce & Industries Minister Dr. R. Lalthangliana chuan a hawng a ni.

MZP in CAB dodalna kalpui zui zel nise an ti

Mizo Zirlai Pawl (MZP) chuan Citizenship Amendment Bill chu kan ram leh hnam tana himlo anih avangin dodalna kalpui zel nise an ti.

Mizoram State Health Care Scheme kalpui dan thlirin MSHCS rate zawm theilo te Empanneled suspend a ni

Mizoram sawrkar-a Health & Family Welfare Board chu nimin khan thukhawmin ‘Mizoram State Health Care Scheme, 2019’ kalpui a nih dan leh dinhmun te an thlirho a. Mizoram sawrkar chuan MSHCS zawm theilo damdawi In te chu Empanelled Hospital an nihna atanga suspend an nih tur thu nimin khan thupek a chhuah bawk.

Literacy rate sang tak nei siin hnathawk thei thalai kan tlem hi a vei awm - H&TE Minister

Higher and Technical Education Minister, Dr. R. Lalthangliana chuan Literacy rate sang tak nei si a hnathawk thei thalai kan tlem chu veiawm a tih thu a sawi.

Leivung paih Motor chesual

Nimin chawhma dar 11:00 vel khan Ser-chhip Chanmari Veng-ah leivung paihtu Truck pakhat chu chesualin kawngthlang ah a tla a, mihring thi leh hliam an awmlo thung.

Naupang hriselna enfiah

Mizoram sawrkar Directorate of AYUSH hnuaia National AYUSH Mission chuan nimin khan Public Health Outreach Activity at Children's Home hnuaia Zoar Deprived Children Home, Serchhip-a awmte tan a thlawna inentirna an buatsaih.

MLP Act hman hnuah Rakzu man nasa takin pung

Kumin chhungin MLPC Act hman chhung aiin MLP Act hman a nih hnuah Excise & Narcotics Department in tualchhung siam Rakzu an man chu nasa takin a tam zawk.

Chief Minister zinchhuak

Chief Minister, Zoramthanga chuan nizan hmasa khan Union Home Minister, Amit Shah chu New Delhi-a a chenna In-ah kawmin, Citizenship Amendment Bill chungchang leh thu pawimawh dang hrang hrang a sawipui.

Pi pu zai thluk-a Hla inphuahsiakna neih a ni

Mizo Pi pu zai (tlar thum zai) thluka Pathian Fakna hla inphuah-siak lawmman semna hun chu nimin khan Art and Culture Department buatsaihin Vanapa Hall, Aizawl-ah neih a ni.

Industrial Development Board thutkhawm neih a ni

Nimin khan Minister Dr. R. Lalthangliana kaihhruai Industrial Development Board Meeting Vawi 4-na chu Secretariat Conference Hall, MINECO-ah neih a ni.

Zirna lama harsatna hrang hrang sawihona nei

Federation of Mizoram Government School Teachers (FMGST) buatsaihin nimin khan School Education Department hnuaia harsatna leh chinfel ngaite sawihona neih a ni.

Kumin chhungin Civil Hospital Aizawl Out Patient Department pantu nuai 3 tling tawh

Kumin chhung hian Mizoram-a damdawi In lian ber, Civil Hospital Aizawl-a Out Patient Department-ah mi nuai thum chuang inentir an awm tawh a, heng zinga nuai 2.5 chu inentir thar an ni. He hospital-a khum awm hi mi zaa 84.53 in an luah reng ang a ni.

Lalbiakhlua lo hmuak

LPS Vision buatsaih, LBS Suzuki Youth Icon 2019-a Serchhip atanga tel leh Top-6 thleng, Lalbiakhlua, Serchhip Vengchung chu nimin khan Serchhip-ah rawn hawin mipui ten lirthei nen ropui takin an lo hmuak a. Serchhip Bazar-ah amah lawmna hun hi hman zui niin thilpek chi hrang hrang hlan a ni bawk.

Serchhip DC sawn dawn

Mizoram sawrkar chuan MCS Officer mi thenkhat awmna sawnin Serchhip DC, Sangchhin Chinzah chu Kolasib DC hna chelh tura sawn niin a aiah Commerce and Industries Department-a Addl. Secretary nilai, V. Lalsangliana chu dah a ni bawk. Heng bakah hian Kolasib DC nilai, Zoengsanga chu LAD-ah Director hna chelh tura sawn niin Thenzawl SDO (Civil) hna chelhtu Lalnunmawii chu DM&R-ah Deputy Director hna chelh tura sawn a ni bawk.

M/S Zonal Sports nei tan

Serchhip South Zone Middle School Sports chu nimin khan DC Playground, Khawtetlang-ah neih tan niin tunkar Ningani-ah zawh hman beisei a ni.

NSS training neih tan a ni

Serchhip District chhunga NSS Volunteer te tana ‘Training on Capacity Building of Leadershhip and Personality Development through Life Skill’ chu nimin khan Govt. Serchhip College-ah neih tan niin tunkar Inrinni thleng a awh ang.

International Day of Person with Disabilities pualin Serchhip-ah hun hman a ni

Nimin Dec. 3, 2019 khan Serchhip-ah Zoram Entu Pawl (ZEP) leh Serchhip ICDS Project tangkawp buatsaihin 'International Day of Person with Disabilities' hman a ni a, Serchhip-a pianphunga rualbanlote leh anmahni enkawlna kawnga thawktu thahnem tak an tel.

Mamit District tana thawhdunna tur ziakfel

Nimin khan Mamit DC, Dr. Lalrozama leh Rural Electrification Corporation Limited (REC) a CEO, Dr. SV. Srivinas te chuan Navratna Enterprise, Corporate Social Responsibility (CSR) atanga Mamit Aspirational District zirna leh hriselna kawnga chawikanna atana hmalakna turin inremna an ziak.

CAB na taka do tur thu-a an inthlah thu sawi

ZPM Secretary General, K. Sapdanga chuan Union Home Minister chu CAB na taka do tur thuin an thlah tih a sawi.

JV. Hluna’n CAB-a hun pe theilo hruaitu a dem

Mizoram State BJP President, Prof. JV. Hluna chuan Citizenship Amendment Bill (CAB) chungchang Meeting-ah MNF leh Congress atanga an hruaitu lian ten hun an pe thei lo chu a dem thu a sawi.

Dr. R. Lalthangliana’n Party insiamremna dan a pawm thlap thu a sawi

MNF Vice President atanga chawl ta, Dr. R. Lalthangliana chuan tunhnaia an party insiamremna chungchangah an President-in hruaitu lu ber a nih anga ruahmanna a neih chu a pawmpui thlap thu a sawi.

MJA Executive Meeting nei

MJA Serchhip District chuan nimin tlai khan Serkhawpui Office-ah Executive Meeting neiin tun thla ni 18 khian Advance Krismas hman nise an ti a, he hunah hian Charity Fund thawhin Kris-mas thilpek sem leh nise an ti bawk. MJA hian kumin Krismas leh Kumthar vuakvet-a tualchhung chanchinbu chawlh chu chanchinbu enkawltu ten mahni remchan anga kalpui nise an ti a. PHE Serchhip WATSAN Division-a Sr. EE, Er. F. Lalsanglura’n Charity Concert an buatsaih tura phungbawm-a MJA te a sawmna chu a theih anga telpui nise an ti bawk.

District Advisory Committee on School Safety thukhawm

Serchhip District Advisory Committee on School Safety te chu nimin khan an Chairman, Sangchhin Chinzah, Serchhip Bawrhsap hovin a pisa-ah an thukhawm a, chhiatrupna a lo thlen palha District chhunga School te inbuatsaihna leh hmalakna te an thlirho.

Drivers' Week hman tan a ni

Zoram Drivers’ Union (ZDU) Sub-Hqrs. Serchhip buatsaih Fimkhurna Hapta, Drivers' Week Vawi 39-na chu nimin khan Mizoram pumah hman tan leh a ni a. Serchhip-ah pawh he Hapta hawnna hi Serchhip Bazar-ah neih a ni.

Mizoram State Games atan Serchhip bial Jersey tlangzarhin infiammi te fuih an ni

Mizoram State Games neih tur atana Serchhip Assembly Constituency aiawha kal turte fuihna leh an Jersey tlangzarhna chu nimin khan Serchhip Bazar-ah neih a ni a, bialtu MLA, Lalduhoma chuan a hmanpui a ni.

PMVVY Week-Matru Vandana Saptah hawnna neiin Anganwadi Workers tha chawimawi an ni

Social Welfare Department hnuaia Pradhan Mantri Matru Vandana Yojana (PMMVY) kalpui mekah kumtin PMVVY Week-Matru Vandana Saptah hman tura tih angin kumin atan PMVVY Hapta hawnna chu nimin khan Serchhip-ah District Bawrhsap, Sangchhin Chinzah hova neih a ni a. PMVVY hnuaia hma la tha Anganwadi Workers pathum te hnenah chawimawina hlan a ni bawk.

Ram 2 insumdawnna tur en

Lawngtlai atanga chhimthlang hawi a Myan-mar ram pawh tur a kawngpui sial mek, Kaladan Multi Modal Transit Transport kawngpuiin Myanmar ram a pawhna tur, Zochachhuah piah, Zorinpui-a India leh Myanmar insumdawntawnna tur hmun atan a ruahman chu Inrinni khan ram pahnih aiawh ten a hmunah an enfiah a.

Ramri venhimna sawiho

Mizoram DGP, SBK. Singh ruahman angin Inrinni khan Silchar-a Police Guest House-ah Kolasib District SP leh Police hotu dangte leh, Mizoram leh Assam ramri depa awm - Cachar, Karimganj leh Hailakandi District SP theuhte chuan Co-Ordination meeting an nei a.

Doctorate Degree hlan

Mizoram Chief Minister hlui leh Mizoram Pradesh Congress Committee (MPCC) President nilai, Lal Thanhawla chu Serampore College (University) Convocation Inrinni kalta-a neih ah Senate of Serampore chuan Kohhran leh khawtlang tana a thawhhlawk (Contribution for Church and Society) avangin Doctor of Divinity ( Doctorate Degree) a hlan. Serampore College (University) hi India rama Pathian thu zirna hlun ber te zing ami, Theological College hrang hrangte pawhin affiliation an tihna a ni a, Mizorama Kohhran hrang hrangte nena inzawm nghet tak a ni bawk.

Infiammi phochhuak dawn

Tun thla ni 9 atanga Mizoram State Games neih tur atana Serchhip Assembly Constituency aiawha tel tur infiammi te phochhuahna leh an Jersey tur tlangzarhna hun chu Vawiin chawhma dar 11:00 hian Serchhip Bazar-ah neih a ni dawn a, bialtu MLA leh Organising Committee Chairman, Lalduhoma MLA chuan a rawn hmanpui dawn a, Serchhip DC, Sangchhin Chinzah chuan infiammi te fuihna thu a sawi bawk ang.

Meizu mi 3 man leh an ni

Serchhip District Anti-Tobacco Squad te chuan Inrinni zing khan Serchhip Bazar hmun hrang hrang leh damdawi In te tlawhin puipunna hmuna meizuk khapna Dan bawhchhia an awm leh awmloh an enfiah a. Heng hmun an enfiahna ah hian puipunna hmuna meizu mi 3 man leh niin heng mite hi Dan in a phut angin pawisa chawitir nghal an ni.

Sa bukna enfiah a ni

Serchhip-a Legal Metrology Enforcement Staff te chuan Inrinni zing khan Serchhip Bazar a Sa zawrhna hrang hranga bukna an hman te chu a hmunah kalin an enfiah a, bukna an hman te chu a dik tha tih finfiah niin Sazuartu ten Sa an buk te pawh a tling tha viau tih an sawi. Legal Metrolgy Enforcement Staff te chuan bukna leh tehna chungchanga rinhlelh nei te chuan an hnena hriattir zel turin Serchhip mipuite chu an ngen nghal bawk.

KTP in thisen Unit 20 pe

Serchhip Hmar Veng Branch KTP te chuan Inrinni khan Serchhip Blood Bank-a dah turin thisen Unit 20 an pe. Damlo thisen mamawh ten an mamawh hun taka thisen an dawn theihna tura Association for Voluntary Blood Donation (AVBD) ten ruahmanna an siam angin Serchhip Hmar Veng Branch KTP te hian Blood Bank-a dah turin thisen hi an pe a, thisen petute hi mipa 13 leh hmeichhia 7, an vaiin mi 20 niin Blood Bank-a thawk ten an Kohhran Hall-ah kalchilhin mi tlawmngai te thisen hi an lak sak a ni.

PMVVY Hapta hawng dawn

Social Welfare Department hnuaia Pradhan Mantri Matru Vandana Yojana (PMMVY) kal-pui mekah kumtin PMVVY Week-Matru Vandana Saptah hman tura tih angin kumin atan pawh he Hapta hi Vawiin atang hian hman leh a ni dawn a, chawhnu dar 1:00-ah Bawrhsap hovin CMO Conference Hall-ah a hawnna neih a ni ang.

State Level Mathematics Competition neih a ni

Mizoram Mathematics Society leh Mizoram Science, Technology and Innovation Council (MISTIC) tangkawp buatsaihin Inrinni khan Mizoram hmun hrang hrangah State Level Mathematics Competition chu a vawi 11-na atan neih a ni a. Serchhip-ah pawh he inelna hi neih a ni.

Mizoram-ah HIV+ 17,897 hmuhchhuah an ni tawh

Mizoram State AIDS Control Society (MSACS) chhinchhiah danin Mizoram-ah HIV positive 17,897 hmuhchhuah an ni tawh a, an zinga 11,828 hi mipa an ni a, hmeichhia 6069 an awm bawk.

Union Home Minister hovin CAB sawihona neih a ni

Union Home Minister, Amit Shah chuan sawrkar laipui in Citizenship Amendment Bill (CAB) pass a tum chungchang chu Zirtawpni zan khan Mizoram-a Political hrang hrang leh tlawmngai pawl hruaitute New Delhi-ah a sawipui a. CAB chu kaltlangpui tum a nih thu a sawi rualin, Mizoram himna tura hmalak a tiam a, Mizoram atanga kal te erawh chuan sawiho leh phawt an duh thu an thlen thung a ni.

Bru hruaikir hna tihtawp niin chhungkaw 289 atangin mi 1165 hruaikir an ni

Tripura Camp hrang hrang atanga Bru hruaikir hna thawh vawi 9-na chu Inrinni khan ruahman lawk angin tihtawp a ni ta a, Bru hruaikir hna thawk tura sawrkar mi pawimawh kal te leh Bru hruaikirna tura Motor chhawp te pawh Inrinni khan an awmna hmun atangin an kir leh a ni.

Contractor ten hleih neiah MTDA an puh

Mizoram Carrying Contractor Association hruaitute chuan Mizoram Truck Driver Association chu rualkhai taka buhfai phur duhlo leh kal duhna bik neiah an puh.

Truck Driver te lungawilohna karah sawrkar in Vawiin atangin Buhfai phurh a tum dawn

Mizoram-a buhfai phurtu lian Carrying Contractor te leh Mizoram Truck Driver Association (MTDA) te inkar buaina kal zel avangin ni 20 chhung zet chu retailer te sem turin buhfai phurh mumal a ni tawh lo a. FCS&CA changtu Minister, K. Lalrinliana chuan engti kawng zawng pawhin buhfai an phur dawn tih sawiin, buhfai a tam thu a sawi bawk.