Pathianni-ah COVID-19 hri kai 98 hmuh a ni

Niminpiah Pathianni khan Mizoram-ah Sample 951 enfiah niin heng atang hian COVID-19 hri kai mi 98 hmuhchhuah leh an ni a, Sample enfiah atanga za zela 10.30 te chuan hri an kai a ni.

Niminpiah khan ZMC RT-PCR Laboratory-ah Sample enfiah awm lovin District hrang hranga TrueNat Laboratory-ah Sample 101 enfiah niin hri kai mi 6 hmuh an ni a, Lunglei District-ah hri kai tawh nen inkawmhnaihna nei mi 6 leh Siaha District-ah State pawn atanga rawn haw inkhunghrang lai mi 2 niin taksa-a hri kai lanchhuahna neilo an ni.

Rapid Antigen Test hmangin nimin khan Sample 850 enfiah niin hri kai mi 92 hmuhchhuah an awm bawk a, heng hri kai hmuh te zinga 85 hi Aizawl District ami te niin Phunchawng leh Sairang Dinthar-ah hri kai mi 12 ve ve hmuh an ni a, Armed Veng South-ah hri kai mi 10 hmuh an ni bawk. Heng bakah hian Kolasib District-ah hri kai mi 4 hmuh niin Lunglei District-ah 2 leh Hnahthial District-ah hri kai pakhat hmuh an ni bawk.

Heti hian nimin thleng khan hri kai hmuhchhuah chu 15,363 an tling tawh a, nimin khan hri kai zingah mi 131 te chu enkawl dam niin anmahni enkawlna hmun atanga chhuahtir an ni leh a, heti hian nizan thleng khan Mizoram-a hri kai zingah 11,879 te chu enkawl dam an ni tawh a, hei hi hri kai hmuhchhuah atangin za zela 77.32 niin tunah hian hri kai enkawllai 3414 an la awm mek bawk a ni.

Mizoram-ah hri kai boral mi 70 an tling ta :

Nimin khan Mizoram-a COVID-19 hri kai zingah mi 5 lai an boral a, Mizoram-ah hri kai mi 70 zet an boral ta a ni. Nimin zing dar 12:10 khan Rochhingvungi (91), Aizawl Electric Veng chu ZMC-ah boralin nimin vek zing dar 4:10 khan H. Hrangkima (84), Chhinga Veng Aizawl pawh a boral ve leh bawk a, ani hi hri a kai tih hriat a nih hnuah In lama enkawl a ni thung.

Nimin chawhma dar 10:45 khan Elizabeth Lalrinpuii (32), Dawrpui Vengthar chu ZMC-ah a boral ve leh bawk a, hemi hnu nimin chawhnu dar 3:30 khan Rohlupuii (62), Khawzawl (Aizawl District case) chu ZMC-ah a boral ve leh bakah nimin tlai dar 5:15 khan H. Lalthlamuani (59), Tuithiang Veng Aizawl chu ZMC-ah a boral ve leh bawk a ni.

Heti hian nimin tlai thleng khan Mizoram-a COVID-19 hri kai zingah mi 70 an boral tawh a, tun thla chhung bikah mi 30 zet an boral tawh a ni. Tun thla ni 4 khan hri kai zingah mi 5 boralin hei hi nikhat-a hri kai boral an tam ber tum a ni thin a, hei hi nimin khan a rawn nih rual leh ta chiah a ni. Mizoram-a hri kai boral mi 70 zinga 60 te hi Aizawl District ami an ni a, Serchhip leh Kolasib District-ah mi 3 ve ve boral tawhin Mamit District-ah mi 2 boral awm tawhin Champhai leh Saitual District-ah mi pakhat ve ve an boral tawh bawk a ni.