Health Minister hovin COVID-19 hri kai damlote enkawl dan leh an dinhmun thlirhona neih a ni

Mizoram-a COVID-19 hri kaite dinhmun leh anmahni enkawl dan kalpui mek thlirhona chu nimin khan Health Minister Dr. R. Lalthangliana hovin neih a ni a. Hripui leng mek Third Wave lo thleng turah naupang hovin an tuar na dawn nia sawi a awm vangin ZMC-ah Neo-natal Intensive Care Unit (NICU) ruahman mek a nih thu sawilan a ni bawk.

He sawihona SAD Conference Hall-a neih ah hian Health Minister chuan Hripui leng mekah India ram leh khawvel hmun hrang hrangah Healthcare Frontline Workers nunna chan tam tak an awm tawh tih sawiin, Mizoram-ah erawh Pathian venhimna dawngin tun thlengin Healthcare Frontline Workers te leh Doctor ten hna an la thawk thei chu kan vannei takzet tih sawiin, an inpekna leh thahnemngaihna a fakawm hle tih a sawi a. Hripui in min chamchilh thuk tawh em avangin kan beisei loh thil kan tawng chho ta mawlh mawlh tih sawiin, “Nunna chan te kan nei zing tial mai hi anmahni enkawltute rilru a nat ang bawkin kan rilru a na ve a, theihtawp in chhuah tak meuh tih kan hriatpui che u avangin kan thlamuanpui reng che u a ni,” a ti. Minister chuan thalai hrisel tha tura ngaihte pawhin nunna an chan ta mek tih sawiin, “A damdawi tun thlengin hmuhchhuah a la ni si lo bawk nen, damlo enkawl dan (treatment protocol) sawiho a, a tha thei ang ber tur ni a kan hriat ang kan ngaihtuah tlan a ngai a ni,” a ti bawk.

ZMC-a COVID-19 hri kaite enkawltu Doctor te chuan damlo te zingah nunna chan an awmin an rilru a nat thu leh hreh-awm an tih thin thu sawiin, theihtawp an chhuah tak meuh tih an sawi a. Natna benvawn neilo zingah pawh nunna chan an awm tak thu sawiin, “Kan taksa in natna hrik a lo do theihna (immunity) chak tawk dan hi a hriat theih si loh a, immunity nei tha ni a kan hriatte pawh an thi ta zel mai hi a pawi takzet a ni,” an ti.

ZMC-a Doctor te chuan Home Isolation, CCC leh CCCC atanga damlo na zual deuh ZMC a an phurh thlen te chu an dinhmun a lo thalo hman viau zel tih sawiin, a bik takin Home Isolation/Home Quarantine, CCC leh CCCC-a awmte chu Pulse Oxymeter hmanga a zing thei ang bera an Oxygen Level check thin tura an duh thu an sawi a. Oxygen Level (SPO2) 94% hnuailam a nih chuan rang taka Doctor te hnena in report nghal thin tura an duh thu an sawi bawk.

Home Isolation/Home Quarantine, CCC leh CCCC-a awmte Doctor ten tun aia uluk zawk leh mumal zawka vil dan kawng ruahman a tul thu pawh sawilan niin COVID-19 hri kai te Chuap chu damlo dang aia a chhiat nasat thin avangin Ventilator nazawngin a pui thei lova, sawrkarin Ventilator tha chi 25 lai a chah thleng chu lawmawm an tih thu an sawi a, tuna an neih sa nen Ventilator chung-changah chuan thlaphanthlak rihlo ah an ngai a ni.

COVID-19 hri kaite enkawl an nih dan chipchiar taka sawiho niin, damdawi hmuhchhuah a la nih loh avangin tuna inenkawl mek dan baka hmalak dan tur sawiho a ni a. Central sawrkarin Treatment Protocol a tihchhuah chu lo zirchianga, kan dinhmun en chunga ruahmanna (Treatment Protocol) thar siam turin Principal Director, H&FW Department kaihhruaina hnuaiah Team din a ni bawk.

He hunah hian Third Wave lo thleng turah naupang hovin an tuar na dawn nia sawi a awm vangin ZMC-ah Neo-natal Intensive Care Unit (NICU) ruahman mek a nih thu sawi a ni a. NICU-a Nurse Duty tur te chu Aizawl Civil Hospital NICU-ah training pek an rel bakah, ZMC ICU-a duty turin Nurse nazawng tan tih theih a nih loh avangin ICU experience nei nurse mamawh belhna a nasat thu sawi a ni a, sawrkarin theihtawp chhuahin hma a lak mek thu sawilan a ni bawk.

He huna Doctor rual kalkhawmte chuan Mizoram mipui 70% in vaccine an lak fel chuan Herd Immunity kan neih theih an rin thu an sawi bawk.