ZMC-a bawlhhlawh senghawi dan tur Health Minister hova sawiho a ni

Mizoram-a COVID-19 hri kaite enkawlna hmun Dedicated COVID Hospital (DCH) awmchhun, Zoram Medical College-a bawlhhlawh tawih theilo (plastic waste) senghawi dan tur chungchang sawihona nimin khan neih niin hemi chungchanga hma la turin Task Force din nghal a ni.

He sawihona SAD Conference Hall-a neih ah hian Health Minister, Dr. R. Lalthangliana chuan ZMC-ah hian COVID-19 hri kaite enkawlna hmunah damlote leh anmahni awmpuitute bakah, thawktute leh volunteers tam tak an awm avangin loh theih lohin bawlhhlawh pawh a pung chak em em tih a sawi a. ZMC-a bawlhhlawh halna khawlpui (incinerator) hmanga hal theih chin hi chu a buaithlak loh laiin, incinerator-a hal theih loh, a bikin plastic bungrua te senghawia paihna tur ngaihtuah ran a ngai hle tih a sawi a. Mipuite tana him si hmun ngaihtuah a tul avanga he thutkhawm pawh hi koh a nih thu a sawi bawk a ni.

He Meeting-ah hian Muallungthu ram-a ZMC Plastic Waste sawngbawlna tur hmun siam mek chu reilote ah zawh mai tawh tur a nih thu sawilan niin, amaherawh chu tuna Plastic Waste inchhekkhawl tawhsa te a rang thei ang bera senghawi a ngaih vangin AMC Mayor, Lalrinenga Sailo kaihhruaina hnuaiah hma la nghal tur Task Force din a ni a. AMC Executive Councillor Laltlanzova Khiangte, SIPMIU Program Director, UD&PA Director, AMC Commissioner, Hmuifang bialtu PWD Executive Engineer leh ZMC aiawh mi pakhat te member-ah ruat an ni bawk.

Hei bakah hian Hualngohmun ramah bawhhlawh sawngbawlna tur cheng vbc. 35 man hu project siam mek a nih thu tarlan niin, Aizawl tlak lam leh hmar lamah pawh hetiang hmun tur hi mamawh a nih thu tarlan a ni bawk.

ZMC-State Referral Hospital, Falkawn hian an damdawi In bawlhhlawh paihna mumal tak neilovin khawchhunga ngaih kawrhah an paih tih tunhnai a helai hmun tlawhtu thuthar theh-darhtute chuan an lo sawi tawh a, hemi panna kawngah te pawh bawlhhlawh hi a tla darh nasa thin hle niin an sawi bawk a ni.