Chanchin thar thenkhat :

Sample Test runpui nei

Mizoram-a COVID-19 hri kai hmuhchhuah tam berna Veng, Aizawl Saron Veng-ah nimin khan Containment Area-a chengte tan Covid Test runpui neih a ni a. He Test runpui hi Bialtu MLA, Robert Romawia Royte rawtna leh Health Department hriatpuina in  BN Hospital, Kuli-kawn ten an kalpui a, he thu buatsaih lai thleng hian mi 298 te Sample enfiah atangin hri kai mi 31 hmuhchhuah an ni. He hunah hian bialtu MLA chuan Saron Veng hian mi bakin Covid hripui an tuar tih sawiin, inchhanchhuah nan pawh mi baka chet a tul tih a sawi a, Health Minister leh Health Department te pawhin Test Runpui neih hi tha an tihpui angin LLTF te nen tangrualin Test Runpui hi buatsaih a nih thu a sawi bawk.

Health Deptt. in thuchhuah siam

Health Department chuan natna benvawn nei, COVID-19 hri kai te enkawl dam an nih hnua an natna enkawl zui dan tur thuchhuah siamin a tarlang a. Hemi ang hian natna benvawn nei COVID-19 hri kai, Covid veite enkawlna hmun atanga ni 10 hnua Exit Test tiha COVID-19 negative (hri vei tawh lo) tih hriatchian te chu Discharge Protocol ding lai angin ni 7 (sarih) chhung uluk taka inkhung hrang zui tur an ni, an ti a. Chumi hnua an natna chu enkawl a tul a nih chuan an inkhunghran hun chhung turah pawh hian Hospital pangngai khawiah pawh damlo dangte ang bawkin admit-a enkawl tur a nih thu leh hemi atan hian Covid veite enkawlna hmun viltu Medical Officer-in COVID-19 hri vei dam tawhte chu COVID-19 Negative Certificate a siamsak tur a ni tih an tarlang bawk.

YMA Day-ah thingtiak phun

Kolasib District-ah chuan nimin khan YMA Day pualin District chhung hmun hrang hrangah Deputy Commissioner, Addl. DC, SDO (S) leh Sub-Hqrs. YMA hruaitute chu inthendarhin VC te nen thingphun hnatlang an nei a, heng an thingtiak phun te hi DFO Kolasib in a tum niin thingtiak thahnem tak an phun a ni.

Lunglei South MLA in VLTF hruaitute a kawm

Lunglei South bialtu MLA, Dr.K.Pachhunga chuan nimin khan a bial chhung Lunglei Town Area Veng paruk (6)-a VLTF hruaitute chu Lunglei District Truck Owners Association Office-ah kawmin hri leng chungchanga an hmalakna te a sawipui a, an mamawh tur bungrua chi hrang hrang pawh a hlan nghal bawk.

SMATEE 2021 hriattirna siam

Higher & Technical Education (Technical Wing) chuan SMATEE 2021 chungchangah thu-chhuah siamin Covid-19 a ziaawm theihloh avangin SMATEE 2021 Application Offline-a submit tura tih chu cancelled a nih thu leh Online-a submit tur a ni tih an tarlang a.  Smatee2021@gmail.com leh smateeapplication2021@gmail.com-ah te application leh documents (pdf format-in) submit theih niin Fee (Rs. 900) pawh account holder : Joint Director, Technical Wing, Account No. 33016746139, Branch Code - 4809, IFC Code - SBIN 0004809, MIRC Code - 796002003-ah e-payment a transfer tur a ni a. Fee pekna receipt chu Mobile No. 8974211226-ah thawn tur a ni ang.