Lockdown avanga eizawnna khaihlak te chhawmdawlna tur siam vat a tul - Lalduhoma

Zoram Peoples’ Movement (ZPM) Leader, Lalduhoma chuan Chief Minister chu hri leng avangin Special Assembly Session nei turin a ngen nawn leh tih sawiin, Lockdown avanga eizawnna khaihlak te chhawmdawlna tur ‘Special Economic Package’ siam vat a tul thu a sawi bawk.

Nimin-a thuchhuah a siamah ZPM Leader, Lalduhoma chuan COVID-19 chuan March 2020 atangin Mizoram pawh min rawn nuai ve tih sawiin, mithiam ten an lo puan lawk tawh angin April 2021 atangin a thawh hnihna chuan nasa lehzualin min rawn nuai ta tih a sawi a. Kum 2019-20 Budget kha hripui a lo leng dawn tih hre lova siam niin kum 2020-21 Budget pawh hri lo len tirha siam ni mahse, inbuatsaih hman a nih vangin Hripuiin min rawn nuai tak avangin ennawn ni se tia an rawt thu a sawi a. Amaherawh chu an rawtna chu hnawlin, kum tawpah Supplementary Demand hmangin an inpalzut ta niin a sawi a. Kum 2021-22 Budget chu hripuiin min nuai lai leh, a thawh hnihna a lo thleng leh dawn tih hresa a siam a nih avangin, beiseina sang tak nen lo thlir mah se Budget hman lai hian hripui dona lam a hawi ta chuang hauh lo nia sawiin, duhsak ber tura ngaih Health Department Budget chu a hma aiin a lo tlem ta hlauh zawk niin a sawi bawk.

ZPM Leader, Lalduhoma chuan tunah hian hripui thawh thumna kan hmabak mek nia sawiin, naupang lam a hrut zual dawn nia sawi a ni tih pawh a sawi a, “He hripui hi ruahmanna fel tak nena kan hmachhawn theih tawh nan Budget hi ennawn a tul a, ngaih pawimawh hmasak tur (priority) kan thlan fel a ngai,” tiin “Hemi atan hian kan Chief Minister zahawm tak hi Special Assembly Session nei turin ka ngen nawn leh a ni. A tlachawpa kal a, Session-a pharh si lova duh ang anga Budget siksawi a, kum tawpa Supplementary Demand hmanga inhrut leh thin thlakhlelhna hi kalsan ngam a hun tawh a ni,” a ti bawk.

Tuna kan mamawh ber pakhat chu thawktu lakbelh a nih thu pawh sawiin, Mizoram-ah hian Nurse post ruak 170 chuang awm mekin, ZMC bik-ah post ruak 85 zet a awm niin a sawi a. “Nikum January ah daih tawh khan Nurse 50 la turin Advertisement chhuah a ni tawh a, hei hi tun thlengin lak a la ni lova, tunah Staff Nurse 26 lek lak tum mek a ni chauh a ni. ICU leh Khumte neih belh zel tura ruahman nimahse, thawktute an pun chuan si loh avangin an hah em em a ni. NHM hnuaia nghet lova thawkte hi vawiin thleng a min tung ding hram hramtute an ni a, an dinhmun ngaihtuah a ngai hlein ka hria,” a ti bawk.

ZPM Leader chuan Random Test pawh nei zui ngamlo khawpa Sawrkar a harsa emaw an tih laia Restricted Tender za chuang inpek reng si te leh, mipui mimir pawhin a hmutu tur an hriat sa reng Tender chhuah te chuan mipui rilru, a bik takin Frontline-a thawktute rilru a tihnual nia sawiin, sawiho a tul thu pawh a sawi a. A pangngaia Office kal theih a nih tak loh avangin Office Expense atana sum dahte pawh a tihtlem theih bawk tur thu a sawi a. “Health Care Scheme hnuaia damlo te Bill a tang thep thuap a. Damlo ten an rulh tlak vek phawt a ngai a. Tunhmaa Golden Card hman lai kha a ngaihawm ta rum rum mai, chinfel vat a ngai,” a ti.

Lalduhoma chuan Lockdown avanga eizawnna khaihlak tam tak an awm ta tih pawh sawiin, heng mite chhawmdawlna tur Special Economic Package hi siam vat a ngai tih a sawi a. Lockdown chhungin khawpuia miten thlai thar lei tur an nei lova, thingtlanga miten hralhna tur an nei lo bawk nia sawiin, Vegetable Supply Chain mumal tak duan a ngai tih a sawi a. “Kan Sawrkarin ruahmanna a siam ang ang te hi, rilru na deuh chung pawha zawm hram hram hi kan zavaia thatna tur a ni tih hriain, thuawih taka awm zel turin mipuite ka sawm a che u,” a ti bawk.