Mizoram-ah hri kai 364 hmuh belh leh an ni

Niminpiah khan Mizoram-ah Sample 5102 zet enfiah leh niin heng atang hian COVID-19 hri kai 364 hmuh an ni a, Sample enfiah atanga za zela 7.13 te chuan hri an kai a ni.

Niminpiah khan ZMC Laboratory-ah Sample 2004 enfiah niin heng atang hian COVID-19 hri kai 152 hmuhchhuah an ni a, heng zinga 148 te hi Aizawl District-a hri kai hmuh niin Phunchawng-ah hri kai 23 zet hmuh an awm a, Armed Veng South-ah hri kai mi 14 hmuh ni bawkin Ramhlun North leh Republic Vengthlang-ah hri kai 11 ve ve hmuh an ni bawk a, Dinthar Veng-ah hri kai mi 10 lai hmuh an awm bawk. Hei bakah hian Serchhip District atanga Sample thawn 25 te atangin hri kai mi 4 hmuh an ni a, BSF sipai te an ni.

Niminpiah khan District hrang hranga TrueNat Laboratory-ah Sample 182 enfiah ni bawkin heng atang hian COVID-19 hri kai mi 10 hmuh an ni a, an zinga mi 9 te chu Lunglei District-a hri kai hmuhchhuah niin an vai hian Lunglei khawpui chhung ami te vek an ni a, hri kai nen inkawmhnaihna nei an ni bawk. Kolasib District-ah hri kai pakhat hmuh a ni bawk a, Healthcare Frontline Worker a ni thung.

Mizoram hmun hrang hrangah niminpiah khan Rapid Antigen Test hmangin Sample 2916 enfiah a ni leh bawk a, heng atang hian hri kai 202 hmuhchhuah niin an zinga 124 te chu Aizawl District-a hri kai hmuh an ni a, Central Jail-a tang zingah hri kai mi 21 hmuh niin Dinthar Veng-ah hri kai mi 16 hmuh an ni a, Tuikual South-ah 12 lai hmuh an ni bawk a, hri kai hmuhchhuah zingah hian hri kaina hriatloh an awm nual a ni.

Heng bakah hian Kolasib District-ah hri kai mi 41 zet hmuh an ni a, Lunglei District-ah hri kai mi 18 hmuhchhuah niin Lunglei khawpui chhung ami vek an ni a, Lawngtlai District-ah hri kai mi 7 hmuh niin Mamit District-ah 4, Serchhip District-ah 3, Khawzawl District-ah 3 leh Siaha District-ah 2 hmuh an ni bawk.

Nimin thlenga Mizoram-a COVID-19 hri kai hmuhchhuah hi mi 19,819 an ni ta a, nimin khan Mizoram hmun hrang hrangah hri kai mi 217 te chu enkawl dam an ni ve leh thung a, heti hian nimin thlenga hri kai enkawl dam chu 15,512 niin tunah hian hri kai enkawllai 4215 an la awm a, hri kai hmuhchhuah atanga za zela 78.26 te chu enkawl dam an ni tawh a, nunna chan mi 92 an awm tawh bawk a ni.

Tun dinhmunah Mizoram District hrang hrang ah hri kai enkawllai an la awm vek a, Aizawl District chu hri kai enkawllai tamna ber la ni zelin mi 3299 enkawllai an la awm a, Kolasib District-ah mi 276 enkawl la niin Lawngtlai District-ah mi 257 enkawl an la ni bawk. Heng bakah hian Lunglei-ah 178, Siaha-ah 75, Mamit-ah 38, Serchhip-ah 33, Hnahthial-ah 31, Champhai-ah 14, Saitual-ah 10 leh Khawzawl District-ah 5 enkawl mek an ni.