Serchhip District-a Accredited Journalist te Press Accreditation Card pek an ni

Serchhip District-a Press Accreditation pek thar mi 12 te hnenah nimin khan Serchhip DIPRO, K. Saitluanga chuan Press Accreditation Card a hlan.

Serchhip DIPRO Pisa-a Press Accreditation Card semna hunah hian Serchhip DIPRO, K. Saitluanga chuan tunlai khawvel ah mitin ten Media hna kan thawk ta emaw tih mai theih turin media hmanrua a tha tawh a, chutihrual chuan tuna Accreditation pek thar te erawh chu sawrkar hriatpui thlap Journalist an ni tih lanna a nih avangin a hlu hle a ni, a ti a. Accredited Journalist an nihna chu midangte chunga inlekna hmanrua leh an harsatna thlen nana hmang lova, mipui rawngbawlna atana hmang tlat tura chahin, Accredited an nih ang ngeia an rintlak zia tilang thin turin a sawm a ni. Serchhip DIPRO chuan sawrkar in kawng hrang hrangin thuthar thehdarhtute tan hma a lak thu pawh sawiin, tunah hian Pension Scheme chungchang ah te pawh hmalakna a awm mek thu te a sawi bawk a ni.

He hunah hian MJA Serchhip District President, Kapliana Pachuau pawhin Press Accreditation Card sawrkar in a semchhuak leh thei ta chu lawmawm an tih thu sawiin, Accreditation Card te chu an hnathawhna kawngah tangkai taka an hman thin thu a sawi bawk.

Serchhip District-ah hian kumin hian mi 12 te chu Press Accreditation pek an ni a, heng mite hnenah hian Accreditation Card hi semchhuah niin an zinga mi 10 te hi Serchhip khua niin midang pahnih te hi Thenzawl khua an ni a, tun tuma Card pek te hi March, 2023 thleng a nung a ni.