Lenkawl

Mizoram sawrkar chuan National Bank for Agriculture and Rural Development (NABARD) sum hmangin Serchhip-ah hna pali thawk turin ruahmanna a siam a, heng hna thawktu turte hi thlan fel ni tawhin hna thenkhat chu thawk tan a ni tawh bawk.

Nimin khan Serchhip-ah ‘Viksit Krishi Sankalp Abhiyan’ hawnna chu Bawrhsap hova neih niin Awareness Campaign nei turte pawh vailiam nghal a ni.

Serchhip District chhunga Sawhthing lei leh hralh mek dan thlirhin nimin khan District Agriculture Marketing Committee (DAMC) chu an Chairman leh Bawrhsap Paul L. Khuma hovin an thukhawm.

LBS Suzuki 22nd Inter-Branch YMA Football Tournament khelh mekah nimin khan Semi Final khelh niin Final khel turte pawh hriat theih a ni ta a,Bethlehem Vengthlang leh Republic Veng ten Final hi an khel dawn a ni.

Aizawl Meteorological Centre-a Director Sudheer Kumar Dwivedi chuan nizan lam leh Vawiin lam hian Mizoram hmun hrang hrangah ruah tam tham tak sur chhuzawm thei ala ni tih a sawi a, Vawiin lam hian Mamit, Kolasib, Saitual leh Khawzawl District-ah ruah tam tak sur theia an hmuh thu sawiin, mipuite chu finkhur turin an chah a, In-a awm tam tur leh pawn chhuak tam lo turin a chah a ni.

MNF Party chuan nimin khan thuchhuah siamin ZPM sawrkarna hnuaia Ruling Party mi leh sate huat thu a chhe em em mai, chu thil vanduaithlak tak, nuihzatthlak takah an ngai tih an tarlang a, Thil ho te te-ah FIR thehluh an uar lutuk leh Court-a zualko an ching em em mai chuan ngaihdan dang neite reng reng an ngaihtheih loh zia leh an beidawn zia a lantir nia sawiin, India danpui hnuaia duh zawng leh vei zawng sawi chhuak thei tura mitinin zalenna kan neih nek chep an tuma a hlawhchham chho zel chu mualphona nasa tak a ni tih hre turin an chah bawk.

Zoram Infrastructure and Industrial Development Corporation (ZIDCO) leh Lushai Organics te tangkawp (PPP Mode) hmalakna a Aieng sawngbawlna hmun, Luangmual Industrial Growth Centre-a mi chu nimin khan Adviser to CM (Hand-holding) Dr. KC. Lalmalsawmzauva chuan a hawng a, he Project hi Banakaih (Hand Holding) hnuaia thlaithar sawngbawlna (processing) hlawhtling hmasa ber a nih thu a sawi. Adviser to CM chuan Aieng chu hralh duh tan Factory-a an phurh thlen a ngaih thu leh a hring Rs. 20/- (15+5), A ro zaihlep (slice dry) Rs. 130/- (125+5), a thlar chawpa tih ro (Finger dry) Rs. 150/- (140+10) a nih dawn thu a sawi bawk.

BJP Mizoram hruaitute chuan Mizoram-a rawn zin Union Minister of State for Women and Child Development Savitri Thakur-i chu Raj Bhavan-ah kawmin Mizoram Sawrkar-a Women & Child Development hnuaia hmalakna hrang hrang bakah a Ministry enkawlna hnuaia Mizoram tana sum an rawn pek te anihna tur taka hman anih theih nan leh Target Group ten an dawn theihna atan Ministry atanga Monitoring Team tir thin turin an hrilh a. BJP Mizoram pawhin heng hmalakna te hi tlawhin a tul anga Periodical Report an pek tur thu an hrilh bawk a ni.

Khawvel pum huap ruihhlo hmansual chung-chang zirhona, ‘International Conference on Substance Use Disorder' (ICSUD 2025) chu nimin khan Social Welfare Minister Lalrinpuii chuan MZU Auditorium-ah a hawng a, he zirhona hian ni 2 a awm ang. School of Medical and Paramedical Sciences, Mizoram University hnuaia Department of Clinical Psychology-ten an huaihawt he zirhona hunah hian India ramchhung leh pawn atangin mithiamte leh ruihhlo ngaite enkawlna lama thawktute chuan 'Global Perspectives, Local Challenges and Integrated Solution’ tih thupui hmangin zirtirna an pe dawn a ni.

Chief Minister Lalduhoma chuan niminpiah tlai khan Ministry of Road Transport and Highways changtu Nitin Gadkari chu a chenna In-ah kawmin Mizorama kawng dinhmun leh hmalakna tur an sawi dun a. He hunah hian Chief Minister chuan Mizorama kan kawng te chu a tlo zawk theihna turin Rigid Pavement-a siam nise tiin rawtna a thlen a. Hemi zirchiang tur hian Mizoram-ah Official an rawn tirh tur thu Union Minister hian a lo hrilh a. Mizoram-a kawngpuu pawimawh NH-52 Vairengte to Sairang, NH-306A Vairengte to New Vervek, NH-502 Lawngtlai to Siaha kawngpui siamthat dan tur leh hmalak zel dan turte an sawidun bawk. Chief Minister hi Lok Sabha MP Richard Vanlalhmangaiha, Chief Secretary Khilli Ram Meena leh sawrkar Official dangten an tawiawm a ni.

Pang Zirlai Pawl (PZP) General Hqrs. chuan sawrkar in Zirtirtu aikal la titawp tura hma a lakna chu tha an tih thu leh lawmawm an tih thu thuchhuah siama tarlangin, a tawp thlengin an thlawp tlat dawn tih an sawi a. Mizoram sawrkar leh Autonomous District Council hnuaia thawk tura lak Zirtirtute chu lak an nih ang ngeiin anmahni ngeiin thawk se an duh thu pawh tarlangin, “Hlawh tta tak sawrkarin a pêk, training engkim a buatsaih sakte ngeiin Pathian rawngbawlna ah ngaiin thahnemngai takin thawk se zirna pawhin hma a sâwn pui ngei kan ring,” an ti a. Mahni eizawnna leh hlawh tam tak la chunga rinawm lo taka thawk tha duh lote chungah action la tura Mizoram Sawrkar leh Autonomous Council hnuaia thuneihtute an ngen thu an sawi bawk a ni.

Mizoram-a rawn zin meik Union Minister of State for Women & Child Development Savitri Thakur-a chuan nimin khan Zoram Medical College & Hospital tlawhin Aibawk RD Block-a hnathawh thenkhat a en bawk.

Mizo Territorial Army dinna tura hmalakna kal mekah an awmna lai tur hmun thlan fel ala ni lova, reilote ah tihfel a nih an beisei tih Coordination & Land Search Committee Chairman leh MLA Lt. Col. Clement Lalhmingthanga chuan a sawi.

Nimin khan College of Veterinary Sciences and Animal Husbandry, CAU, Selesihah 'Pre-Kharif Viksit Krishi Sankalp Abhiyan Campaign' hawnna neih a ni.

Mizoram Universal Health Care Scheme (MUHCS)-a inziaklut mi 10,514 in he hamthatna hi an hmang tangkai tawh.

Mizo Zirlai Pawl (MZP) General Hqrs. chuan Phuldungsei khua Thaidawr tlang panna ah Police duty dah turin Mizoram sawrkar chu an ngen.

India Meteorological Department (IMD) chuan May 29, 2025 atanga June 3, 2025 thleng hian Mizoram-ah leh Hmarchhak State dangah te Thlipui leh Ruahpui rawn thawk thei tur angin thuchhuah a siam a, mipuite chu fimkhur tura chah an ni.

Serchhip District Narco Coordination Center (NCORD) chu nimin khan thukhawmin ruihhlo dona kawnga an hmalakna hrang hrang an thlirho.

New Delhi-a cham mek Chhief Minister Lalduhoma chu nimin khan Union Jal Shakti Minister CR Patil chuan a In-a leng-ah sawmin chhun thingpui a inpui a, he hunah hian Mat Lui-a Integrated Water Resources Management Project chungchang a sawipui a. Sawrkar thuchhuah in a tarlan danin Mat Lui Project hi Thlai chawmtu tur tuilakna leh mipuite tui tlan tur lakna atana ruahman a ni a. Brahmaputra Board nena hmalak tura tih niin Chief Minister leh Union Minister te hian chak taka bawhzui nise an ti a ni.

MNF Senior Vice President, Dr. R. Lal-thangliana chuan nimin khan Aizawl-a Sinlung Hills District Council (SHDC) Office tlawhin, Executive Member-te nen an inkawm a, he hunah hian Dr. R. Lalthangliana chuan tun tum Budget Session khan Demand No. 15-na ah SHDC budget cheng nuai 701.34 a ni tih sawiin, “In budget hi a bei tham si a, budget piah lam thil sawiho a hmalak chu thil tul tak a ni,” a ti a. “Mizoram sawrkara budget awmsa hi kan hriat theuh angin a hun leh hma chu han tihpun dan a awm tawh lo a. Nakum budget lo awm tur pawh khi an sual vang ni lovin a pun tam vak ka ring lo, a chhan chu anmahni tawngkam avangin central lamah an tlatlum si lo a. ZPM sawrkar hian chet ngaihna an hre vak lo ang,” a ti bawk.

AH&Vety Department ten an chhinchhiah danin kumin chhungin African Swine Fever (ASF) avangin Mizoram District 4-ah Vawk 4435 zet thi tawhin Vawk 1345 suat a ni tawh bawk a, he hri leng hian khaw 60 a tuam tawh a ni. Kumin hian Siaha District in ASF hi tuar na berin khaw 35-ah Vawk thi 2574 awmin Vawk 857 suat a ni tawh bawk a, Lawngtlai District-ah Vawk 1614 thi tawhin 386 suat ani tawh a, Mamit District-ah Vawk 173 thiin 48 suat a nih bakah Lunglei District-ah Vawk thi 74 leh suat 54 a awm tawh a ni.

Nimin khan Kolasib-ah Operation Sindoor a India hnehna lawm nan 'Tiranga Yatra Rally' neih a ni a. Tiranga Yatra kawngzawh hi Kolasib DC Office tual atanga tanin Kolasib DRDO Project Director Lalmuanpuia chuan Tiranga Yatra kawngzawh huaihawt chhan chu Operation Sindoor a India ramin hnehna a chan lawmna leh hriatrengna ani tih sawiin, Operation Sindoor a India ramin hnehna an chan dan a sawifiah bawk. He kawngzawh-ah hian Kolasib District Ex-Servicemen League-te'n hmahruaiin hnehna lawm nan mipuite an au rual a, Kolasib Diakkawn-ah huntawp hmangin Bawrhsap Robert C. Lalhmangaiha chuan thu a sawi a ni. 

Mizoram Chief Minister leh Union Power Minister te niminpiah lama an inkawmna bawhzuiin nimin khan Power Ministry hnuaia awm Satluj Jal Vidyut Nigam (SJVN) Limited-a an Chairman & Managing Director, Sushil Sharma leh SJVN hotu dangte chuan Chief Minister hi New Delhi-a Mizoram House-ah an hmu a, Darzo Lui-a Pumped Storage Project, kawlphetha Megawatt 2400 pechhuak thei tur project an ruahman te hrilhfiahin hmalak zui zel dan turte an sawiho a ni. Chief Minister hi Lok Sabha MP Richard Vanlalhmangaiha leh Adviser to CM Lalmuanpuia Punte bakah Chief Secretary Khilli Ram Meena ten an tawiawm a ni.

Nimin khan Mamit District-a Bank hrang hrangte hmalakna thlirin District Consultative Committee (DCC), District Level Review Committee (DLRC) leh District Level Security Committee (DLSC) thutkhawm chu Mamit DC Office-a Taitesena Buk-ah neih a ni a. He hunah hian kumin March thla tawp Quarter thlenga an District chhunga Bank te hmalakna thlirho niin Mamit District chhunga Bank hrang hrangte March Quarter-a Credit Deposit Ratio chu 73.58% a ni a, December 2024 Quarter liamta ah khan 76.95% niin a tlahniam hret a ni.

Siaha District chhunga Bank hrang hrangte hmalakna leh hnathawh te thlirin nimin khan District Consultative Committee (DCC), District Level Review Committee (DLRC) leh District Level Security Committee (DLSC) chu Siaha DC Mini Conference Hall-ah an thukhawm a, he hunah hian March thla tawp Quarter thlenga Bank te hmalak dan thlirho niin Siaha District chhungah hian Public Sector Bank 1, Private Sector Bank 2, Regional Rural Bank 3 leh State Cooperative Bank 2 awmin ATM Booth 7 a awm thu tarlan a ni a. Bank-a mipuiin sum an dahluh (deposit) zat atanga Bank-in mipuia sum an puktir (credit) zat chhutna, Credit/Deposit Ratio-ah 86.02% a nih thu tarlan a ni bawk.

Mizoram Information Commission (MIC) chuan tunhnaiah mi thenkhatin RTI Online hman theih loh a nih avangin harsatna an tawk tih hriat a nih thu thuchhuah siama tarlangin, hemi chungchang hi a enkawltu Department (Department of Information & Communication Technology) hotute nena sawiho niin hmalak a ni tih thuchhuah siamin an tarlang a. Tunah chuan siamthat tawh niin a hman theih tawh a, amaherawhchu, lut thei lo an awm leh tih hriat a nih thu pawh tarlangin, internet lam fel loh vang te pawh a ni thei tih an sawi a. Pawisa in-cut vek si a zawhna lut lo an awm a nih chuan Phone no. 6033206128-ah in report turin an ngen a, pawisa in-cut in hmuhlet lehna turin hmalak mek a ni tih an sawi.

Labour, Employment, Skill Development & Entrepreneurship (LESDE) Department changtu Minister Lalnghinglova Hmar chuan nimin khan Indian Institute of Entrepreneurship, Guwahati tlawhin IIE Director Ishwar Chanabasappa Poojar nen an inkawm a, Mizoram-a Skill leh Entrepreneurship lama hmalakna awm theite an sawidun. He inkawmna ah hian LESDE Minister chuan IIE chu Mizoram-ah kan la chhawr tawk lo tih sawiin, “IIE kaltlanga Skill leh Entrepreneurship lama hma thar lak kan duh a, Mizoram nen inthlunzawmna tha kan mamawh a ni,” tiin Ministry of Skill Development and Entrepreneurship hnuaia awm a nih angin LESDE Department nen tankawp a tul dante a sawi a ni.

Union Minister of State for Women & Child Development Savitri Thakur-i chuan Mizoram-a sawrkar hmalakna te enfiah turin nimin khan Aizawl a rawn thleng. Union Minister hi Lengpui Airport-ah Social Welfare Minister Lalrinpuii leh Department hotu ten lo dawngsawngin nimin chawhnu khan Durtlang-a Women & Child Development hnuaia hmalakna hrang hrang - Hmeichhe dinhmun tleu leh harsatna hrang hrang tawk mekte awmna tur atana din ‘Shakti Sadan’ te, naupang thubuai tenau nei mekte dahna hmun ‘Observation Home’ te, naupang dan bawhchhia ten nun kawng dik an zawh leh theihna tura a bik taka din ‘Special Home’ te bakah naupang kum 16 chunglam, pawikhawhna lianthama inhnam-hnawihte dahna hmun ‘Place of Safety’ te a tlawh nghal a, hemi hnu hian Aijal Club-ah Department hmalakna thlirhona hun an hmang bawk. Union Minister hian Vawiin hian Khawzawl leh Champhai District a tlawh leh anga, naktuk-ah Chief Minister a kawm bawk ang.

New Delhi-a cham mek Chief Minister Lalduhoma chuan Union Railways Minister Ashwini Vaishnaw chu niminpiah khan kawmin Bairabi leh Sairang inkar Rel kawng hmasawnna tur thil pawimawh te an sawidun a. Chief Minister hian Rajdhani Express Service chu Sairang atanga New Delhi thleng tlantir tur leh Howrah Railway Service pawh Sairang atanga Kolkata thlenga tlantir a nih theih nana hma la turin Railway Minister hi a ngen a. Sairang atanga Tripura direct Rel Service a awm theih nana hma laksak turin a ngen bawk. Heng bakah hian Sairang Railway Station chu India ram hmun danga an kalpui mek ang bawkin World Class Railway Atation-a siam turin a ngen a, Railway Reservation Centre leh Parcel Management System din te, Sairang Railway Station-a Railway Internet Service dah ve turte in a ngen bawk. Union Minister chuan tihhlawhtlin mai theih thil a nih thu leh hma a lo lak ngei tur thu a sawi a ni.

Nimin khan School Education Directorate Conference Hall-ah ‘Meichher Award 2024’ sem a ni a, he hun hi School Education Minister Dr. Vanlalthlana chuan a hmanpui a ni.

Mizoram Larsap General (Dr) VK. Singh leh Chief Minister Lalduhoma te chuan Literature leh Education lama Mizoram atanga Padma Shri Award dawngtu R. Lalrawna, Aizawl Electric Veng chu an lawmpui thu an sawi.

Mizoram-a Women & Child Development hnuaia sawrkar hmalakna hrang hrang thlirletna hun chu nimin khan Union Minister of State for Women & Child Development (WCD) Savitri Thakur-i hovin neih a ni a, Union Minister chuan an Department hnuaia Mizoram-a hmalakna hrang hrangte chu lawmawm a tih thu a sawi a ni.

Serchhip District chhung Secondary Collection Centre (SCC) hrang hrang atangin loneitute tharchhuah Sawhthing quintal 34,027 tihral a ni tawh.

Mizoram Upa Pawl (MUP) Serchhip Din-thar Branch te chuan an huamchhunga kawngpui kam lungrem rawng hnawih hnatlang an neih tawh chu nimn khan chhunzawm lehin mi 38 zet an thawkchhuak a, hemi atana MLA Fund petu Lalduhoma chungah lawmthu an sawi bawk.

New Serchhip Lungrual ram-a Plastic Waste Management Centre-ah nimin khan Solid Waste Management kal zelna tur chungchanga PHE Department leh UD&PA Department thawdunna tur sawihona neih a ni a. He hmalakna hnuaia Serchhip-a inzirtirna kalpui dan turte pawh sawiho a ni bawk.

Serchhip Venglai-a PWD ram chu Vantlang kut-ah hlan tum a nih avanga a ram chin leh a bulhnaia mimal ram en mai-a hnawk deuh nia lang te chinfel sak tura Serchhip Town Development Committee in tunhnaia Bawrhsap hnena an thlen angin nimin khan helai ram hi enfiah a ni a. He hunah hian Serchhip Town Development-a tel pawl hrang hrang hruaitute leh Serchhip Kawnpui North VC te bakah PWD-a thawktute telin PWD ram bula Inhmun nei te chu an Pass/LSC neih te enfiah sak an ni a, hemi hmang hian PWD ram chin hi enfel niin a theih ang anga humhalh zui tura ruahman a ni.

Serchhip-a Excise & Narcotics Department chuan nimin chhun khan Thenzawl Kanan Veng ah Heroin nia hriat gram 10.37 an man a, a neitu nia hriat C. Lalbiakzuali (29), Thenzawl Kanan Veng nia insawi pawh manin thubuai siam sak nghal a ni a, Vawiin hian Serchhip District Court ah hruai tur a ni ang. Serchhip-a END te chuan ruihhlo manna kawnga Thenzawl Joint YMA te thawhpuina ah lawmthu an sawi bawk.

President Droupadi Murmu chuan nizan dar 6:00 khan New Delhi-a Rashtrapati Bhavan-ah India ram Civil mite chawimawina sang, Padma Awards a sem a, Mizoram atangin R. Lalrawna chuan he chawimawina hi a dawng a ni.

National Fisheries Development Board (NFDB), North East Regional Centre, Guwahati leh Fisheries Department thawkhoin an buatsaih sawrkar laipui atanga Sangha khawi tihhmasawnna tura tanpuina leh program hrang hrang awmte inhrilhhriatna hun. 'One Day Awareness Prog-ramme on Promotion of PMMKSSY, GAIS, NFPD, FIDF, PMMSY, KCC etc' chu nimin khan Aizawl-a Fisheries Directorate Conference Hall-ah neih a ni a. He hunah hian Aizawl District chhunga Sangha khawitu mi 50 telin National Fisheries Digital Platform-ah heng Sangha khawitu te hi ziahluh nghal an ni a, Mizoram puma kalpui chhunzawm tum a ni bawk.

New Delhi-a cham mek Chief Minister Lalduhoma chuan nimin khan 16th Finance Commission Chairman Arvind Panagariya chu a Pisa-ah kawmin kum lo kal leh tur atana Mizoram in 16th Finance Commission hnena Mizoram mamawh a thlen hrang hrangte a sawipui a, heng zingah hian Thenzawl-a Peace City Project te, Bana Kaih (Handholding) Scheme bakah Village Council ten Fund tha zawk an hmuh theihna tura rawtna te chu ngaipawimawh sak turin a chah a ni.

Power & Electricity Department chuan thla thar June 9, 2025 atang khian Mizoram chhunga Electric connection endik runpui a nei dawn a, consumer ten electric an hman dan ah felhlel a awm a nih chuan lo in siam tha tura an ngen thu thuchhuah siamin an tarlang bawk.

Hnahthial DC Office buatsaihin nimin khan Hnahthial DC Conference Hall-ah District chhunga School naupangte hna zawnna kawnga pui theitu tur ‘Programme on Career Awareness and Guidance Programme’ hman a ni a, mithiam hrang hrangte thu sawi tura sawm an ni.

Welfare Institutions & Hostel Scheme (WI&HS) kaltlanga Mizoram-a Welfare Institutions, a bikin sawrkar Dan zawma din De-addiction leh Rehabilitation Centre te hnena buhfai man tlawma pek thin chungchang ah SWWCD leh FCS&CA Department te chuan nimin khan thawhdunna thuthlung an ziak.

Mizoram-ah Urban Primary Health Centre (UPHC) 10 awm mekin thawktu mi 157 an awm mek.

Mizo Zirlai Pawl (MZP) General Hqrs. chuan nimin khan Aizawl-a MZP Conference Hall-ah MZP chhungkua atanga hlawhtlinna chang mi hrang hrangte lawmpuina hun an hmang a, mi 9 te hnenah lawmpuina hi hlan a ni.

Nimin khan Saitual-ah District Evaluation Committee chu thukhawmin Sawrkai laipui Scheme hrang hrang kalpuina kawnga VC te intihsiakna tur chungchang an ngaihtuah.

Mizoram Remote Sensing Application Centre (MIRSAC)-in tunlai thiamna geospacial technology hmanga Mizoram chhunga leilet hman mek leh la hman theih tur (potential area) ri chhinchhiahna, map leh report an buatsaih chu nimin khan Agriculture & Farmers Welfare Department hnenah hlan a ni.

Ruihhlo ngawlveite enkawlna pakhat atana Short Stay Centre (OSC) din chungchanga inrawnkhawmna chu niminpiah khan Social Welfare Lalrinpuii ho hian Aijal Club Conference Hall-ah neih a ni.

Nimin chawhnu atanga nizan lam thleng khan Serchhip-ah ruah thahnem tak a sur a, he ruahsur avang hian hmun thenkhat ah leimin tenau deuh te awmin chhiatna liantham thleng erawh a awm thu dawn a ni lo thung. Heng ruahsur avanga leimin te hi a theih ang angin thenfai hna pawh thawh nghal niin Vawiin lamah chuan khua tha tura beisei a ni.

Power & Electricity Department chuan thu-chhuah siamin Electric Billing Software thar hman a nih avangin hmun thenkhat ah Electric Bill semchhuah hma theih a ni lo tih sawiin, hei vang hian mipui ten Electric Bill pekna hun tam zawk an neih theih nan May thla Electric Bill pek hun (Due date) May 27, 2025 thleng an lo bituk sak tawh te tan May 29, 2025 thleng pawhsei a nih thu an tarlang bawk.

Mizoram sawrkar in Police Training School (PTS) Thenzawl-a Principal hna chelh tura a ruat Lalthakima MPS chuan nimin khan a hna thar hi a zawm a, Mualvum-a 1st IR Batallion Commandant hna a chelh mek atangin a rawn insawn a ni.

Nimin khan Saitual-ah Bana Kaih (Hand-holding) Scheme hnuaia an hmalakna te thlirho a ni a, he hunah hian an District-ah Progress partner diltu mi sang khat chuang an awm thu leh an zingah hian mi 36 thlangchhuakin heng mite tan hian  Orientation training bakah Line Department atang briefing kalpui a nih thu tarlan a ni.

Nimin khan Champhai District Level Narco Coordination Center (NCORD) Committee chu thukhawmin ruihhlo dona kawnga hmalakna thlirho a ni a, May thla chhung khan Police ten Heroin kg 1.112 leh Methamphetamine kg 297.714 manin END ten Heroin gram 232.41 an man thu tarlan a ni bawk.

Sawrkarin Sawhthing hralh leh lei kawnga hma la tura a din, Mizoram Agriculturral Marketing Board (MAMB) hotute chuan Sawhthing an lei sa chu an hralh zo tep tawh tih an sawi a, an hralhchhuahna rate erawh a tlawm rih hle tih an sawi.

Social Welfare Minister Lalrinpuii’n nikum September ni 1 atangin sawrkarin ruang 666 a phurh man Rs. 70,88,126 pek a ni tawh tih a sawi. Minister Lalrinpuii hian Social Media kaltlanga he thu hi tarlangin, nikum September ni 1 atangin Sawrkarin ruang a phurh tawh zat chu mi 666 a ni a. hemi atan hian Rs. 70,88,126 pek a ni tawh tih sawiin, mi 84 phurhna man Rs. 10,26,550 chu tunkar-ah pek leh tura ruahman a ni tih a sawi. Tarlan tawh angin Mizoram sawrkar hian nikum September ni 1 atanga ruang phurh man bill a pek sak theih hnuah dilna a lut tam tawh hle a, sawrkar chuan budget a siamah cheng vbc. 5 chu ruang phurhna atan ruahmanin ruang phurh man chu mithi chhungten buaipui tawh lovin a phurtu Motor ten Social Welfare Directorate ah an buaipui tawh dawn a, Department hotute sawi danin online a dil theih turin Ruang phurh Application buatsaih mek a ni bawk.

Zoram Energy Development Agency (ZEDA) hmalaknain Mizoram pum-a District tina khaw pakhat theuh chu ‘Solar Model Village’ atana thlan a ni dawn a, Hnahthial District-ah chuan Thingsai khua thlan a ni. Thingsai khua ‘Solar Model Village’ a siamna turah hian ZEDA chuan cheng vbc. khat a ruahman a, he sum hmang hian Thingsai khuaah khawtlang mamawh chi hrang hrang – Solar Street Light te, mimal In chung Solar (rooftop System) te, leh thil pawimawh dangte kalpui tum a ni a. Khawtlangin Eng an hmuh that phah bakah kawlphetha renchem kawngah nasa takin a puih beisei a ni a. ZEDA hian Thingsai khia hi an tlawh tawh bawk a ni.

Chief Minister Lalduhoma chuan nimin khan Defence Minister Rajnath Singh chu kawmin thil pawimawh hrang hrang an sawidun.

Ruahtui tam zawk a tlak hunah NH-302 zawh thin Tlabung leh a thenawm khaw mipuiten kum liamta anga harsatna an tawh loh nan thlaleh atang khian Lunglei leh Tlabung inkar kawng laih hna thawh mek chu chawlhsan a ni tawh dawn a, cheng vbc. 849 senna NH-302 laihzauh hna thawktute chuan tun dinhmunah hna thawh tur 60% vel zo thuak tawha an inngaih thu leh thlaleh atangin lei laih chhunzawm an tum tawh rih loh thu an sawi a ni. Hetihlai hian tunhnaia a ruhrel pawimawh a auh hnu-ah Tuichawng lei chu Lunglei Bawrhsap ngenna angin nimin thleng khan NHIDCL leh BRN Infrastructure Pvt. Ltd. ten siamthat hna an la thawk bawk a ni.

Sports Minister Lalnghinglova Hmar chuan nimin khan Union Minister for Youth Affairs & Sports Dr. Mansukh Mandaviya chu New Delhi-a a chenna In-ah hmuin Mizoram in Sports leh Skill Development kaihkawp a tum chungchang leh Football infrastructure tihhmasawn dan tur chungchang an sawidun.

Ruihhlo leh a kaihhnawih chungchanga hmalak zel dan tur inrawn-khawmna chu nimin khan Social Welfare, Women & Child Development Minister Lalrinpuii hovin Aijal Club-ah neih a ni.

Mizoram Larsap, General (Dr) Vijay Kumar Singh chuan nimin khan Prof. Laltluangliana Khiangte lehkhabu ziak pathum te chu a tlangzarh.

New Delhi-a cham mek Chief Minister Lalduh-oma chuan Union Minister hrang hrangte kawmin Mizoram tana thil pawimawh hrang hrang te a sawipui.

Health Minister Lalrinpuii’n Mizoram Universal Health Care Scheme (MUHCS) chu thil tha tak a nih thu sawiin, natna a awm chiahin a pawimawh zia leh a thatzia a langchhuak thin tih a sawi.

Adviser to CM (Hand Holding) Dr. KC. Lalmalsawmzauva chuan Thlai thar lei chungchangah harsatna hrang hrang avangin Sawrkar chuan Full mark hmu lo mahse, Pass Mark tha tak erawh a hmuh thu sawiin, Entrepreneurship Handholding hnuaiah mi 23 te Loan pekchhuah an nih tawh thu a sawi bawk.

Chhattisgarh RKM Ashrama Ground-a khelh Swami Vivekananda U-20 Men’s National Football Championship 2025-ah Mizoram Team nimin khan Meghalaya chu si li fai-a hnehin Final an lut ta a, Semi Final lehlama si li fai-a SAI hnehtu Delhi nen Thawhlehni-ah Final hi an khel dawn a ni. Tarlan tawh angin Mizoram Team-ah hian Stephen Ngurchhuanmawia S/o Robert Zodinsanga, Serchhip Bazar Veng chu telin nimin-a Semi Final Match ah pawh hian a inlan a ni.

India leh Myanmar ramri-a venhimna hna thawka awm leh Serchhip-a Battalion hmunpui nei 42nd Assam Rifles te chu Serchhip-a an awm hun chhung a zawh dawn tak avangin an awmna thar tur Nagaland panin an insawnchhuak mek a, tunah hian a kal hmasa turte hlawm hnih chuan Serchhip hi chhuahsan fel tawhin a hnuhnung ber tur te chuan thla thar June 8 khian Serchhip an chhuahsan fel dawn a ni. 42nd Battalion Assam Rifles te hi December 5, 2022 khan Serchhip-ah hian rawn awm tanin India leh Myanmar ramri-a venhimna hna thawkin khaw hrang hrangah Duty Post an nei a, ramri kan-a dan lova bungrua rawn lakluh leh dan lova che te dapchhuah leh manchhuahna kawngah hna pawimawh tak an thawk a. 14th Battalion in an rawn thlak dawn a ni.

Mizoram Civil Services (Combined Competitive) Examinations-2024 a Serchhip atanga Mizoram Police Service (MPS) atana tling thar Lalthlamuana S/o J. Salemthari, Serchhip Veng-chung chuan a hna a zawm ta a, Deputy Superintendent of Police niin Aizawl-a Police Headquarters-ah a awm rih dawn a ni. Hemi hmalam hian MCS tura tling Samuel Malsawmzuala S/o JH. Laldingliana, Serchhip Tuikhuah Veng leh R. Lalrinhlua S/o R. Lalbiaknunga, North Vanlaiphai te pawhin an hna zawmin SDC hna an chelh rih dawn a ni.

Serchhip a\anga Mizoram Information Service (MIS)-a tling thar R. Vanneihtluanga S/o RV. Lallara chuan a hna thar a zawm ta a, ani hi Serchhip a\anga MIS tling hmasa ber niin a rual hian Lalchungnungi Lakher, Tlangnuam leh Teresa Vanmalsawmi, Mission Veng te pawhin an hna hi an zawm tawh a ni. Kumin a MIS-a tling thar te hi Directorate-ah awm tura tih an ni rih a, kumin August thla ah Foundation Course Training neiin hemi hnu hian an awmna tur siamfel a ni ang.

Aizawl-a Inter Branch YMA Football 2025 khelh mekah Serchhip Sub-Hqrs. huamchhung a\anga tel zinga thleng sang ber Serchhip Vengchung Branch chu Quarter Final thleng zo lovin an tla a, Inrinni khan Round of 16 inkhel ah Sialhawk Branch lakah 7-3 in an tlawm a, Quarter Final an thleng zo ta lo a ni.

Mizo Students’ Union (MSU) General Hqrs. hruaitute chuan Mizoram-a rawn zin Union Minister of State for Minority Affairs George Kurian chu nimin khan hmuin Tribal Scholarship 2024-a 4th Installment cheng nuai 870 tun thlenga Central in pawisa ala pekloh vanga zirlaiten harsatna an tawh chungchang an lo thlen.

Inrinni khan Lunglei Zobawk BNRGSK Hall-ah Zobawk leh Lungpuizawl-a tlawmngai pawl hrang hrang hruaitute chu thukhawmin Lunglei Municipal Council (LMC) atanga an chhuah theihna tura hmalatu tur Joint Action Committee an din a, June 2025 atangin hmalak tan nise an ti. Hemi hmalam hian Pukpui leh Hauruang te pawhin LMC atanga chhuah an duh thu hi an lo sawi tawh a ni.

Hnahthial District Agricultural Marketing Committee (DAMC) hmalaknain Hnahthial District chhung Secondary Collection Centre (SCC) pali te chuan Sawhthing an lei chhun-zawm mek a, Hnahthial SCC-ah quintal 3,708; Cherhlun SCC-ah quintal 2,000; Chhipphir SCC-ah quintal 928 leh Pangzawl SCC-ah quintal 1,600 chuang an lei tawh a ni.

Chief Minister Lalduhoma chuan, “NITI Aayog te tanpuina hmu zel chungin kan ram hi ram changkang ah kan siam ngei ang,” a ti.

New Delhi-a zin Chief Minister Lalduhoma chuan sawrkar laipui-a mi pawimawh hrang hrangte kawmin Union Home Minister Amit Shah chuan Aizawl-a Assam Rifles ram chhuahsan tura building hlui man cheng nuai 520 vel peksak an inhuam thu a hrilh a ni.

Health Minister Lalrinpuii chuan Inrinni khan Aizawl Ramhlun North-ah Health Centre Building thar a hawng a, Ramhlun North mipuite tana Health Clinic tha tak an nei chu lawmawm a tih thu leh thawktu tur pawh sawrkarin a ngaihtuah tur thu a sawi a. Mipui Health Care registration chu Sub -Centre ah tih tur a nih avangin theihtawpa mipui-ah awareness neihpui tura sawmin, June thla thleng chauh registration hun hawn a nih dawn avangin theihtawp chhuahpui turin a sawm nghal bawk a ni. Health Centre sak nan hian Sawrkar atanga Rs 2,90,000/- an hmuh bakah Corporator C. Lalchhandami chuan Property Tax Return atangin cheng nuai 4 lai thawh belhin building tha leh changtlung tak hi sak a ni.

Kolkata-a hmunpui nei, Manipal Hospitals a thawk Doctor-te chuan Inrinni khan Aizawl Press Club-ah thuthar thehdarhtute kawmin Civil Hospital nena thawk tlang tur leh Association of Physicians of India Mizoram nena CME hmanga inthlunzawmin, Mizoram mipuite tan Specialty hrang hranga inenkawlna an chhawpchhuak dawn tih an sawi a. Kum 15 chuang chu Mizoram atangin damlo 15,000 chuang an enkawl tawh thu leh an zingah hian Manipal Hospitals Network Unit pakhat, Medica Superspecialty Hospital-a Kal thlak hlawhtling 70 chuang an awm thu sawiin, Cardiology, Cardiac Surgery, Neurosurgery, Orthopaedics, Oncology, Nephrology ang chi Specialty hrang hrangah Mizoram mipuite hlawkna tur atan Aizawl-ah Outpatient Department (OPD) kalpui tum a nih thu an sawi bawk.

Agriculture Department hmalakna in Khawzawl District chhunga awm, Tualpui khuaah chhungkaw 80 chuan kumin hian Tung chin tumin hma an la mek a. Khawzawl DAO Lallawmzuali sawi danin heng mite hian Ralzawn leh Tek den Mual-ah te hma an la a, Tung chinna tur hian ram Tin 128 hmun a zau chu buatsaih mek niin Tung hi an chin hunah kum 3 chhung chu Sawrkarin a enkawlpui ang a, a kum 4-na ah Sawrkarin Tung Chingtu Society kutah a hlan dawn a ni. Tunhmaa ‘Thing anchhe dawng’ tia hriat lar Tung hi tunah chuan a hralhna tur a awm reng tawh a, a kawr khehsa Tung rah Kg.1 chu Rs. 50/- in lei tur an awm reng a ni.

Sports Minister Lalnghinglova Hmar chuan Sumdawng lian ho chu Mizoram lam rawn hawi tura sawmin, Northeast India, a bikin Mizoram chuan Tourism, Sports leh Entertainment-ah te theihna sang tak a nei tih a sawi a, Investor te chu Mizoram-a zin tur leh sumdawnna kawng rawn zawng turin a sawm bawk.

Union Minister of State for Minority Affairs leh Fisheries, Animal Husbandry & Dairying George Kurian chuan Inrinni khan Mizoram rawn thlengin Fisheries Department hnuaia hmalakna hrang hrangte a en nghal.

Kumin May ni 13-a Council of Ministers thukhawmin Civil Services (Combined Competitive) Examination-ah Optional paper awm tawh lo tura a rel angin MCS (Combined Competitive) examination neih hmasak berah hman nghal a ni dawn.

Power & Electricity Department changtu Minister F.Rodingliana'n Eng chhit man kalpui dan tharah a man tihsan a awm lo tih sawiin, Electric bill pek dan System thar, Pro rata basis hnuaiah fixed charge chu thla khat (1) anga kal lovin nitin a kal tawh dawn avangin mipuiten tunhmaa an chawi thlawn thin ang kha a awm tawh dawn lo tih a sawi.

Mizoram-ah tunhnai kum ruk chhungin lirthei chesuala thi mi 465 an awm a, hemi kum ruk chhung hian kum 2022 kha lirthei chesuala thi awm tam ber kum niin zirchianna atanga a lan danin khaw that (sunny/clear) laia lirthei chesuala thi an tam bawk.

Serchhip District-a ‘Viksit Krishi Sankalp Abhigyan Agriculture Campaign’ neih dan tur relin nimin khan Bawrhsap Paul L. Khuma hovin thutkhawm neih a ni. Serchhip DC Meeting Hall a thutkhawm ah hian Bawrhsap chuan he beihpui thlak tur hian loneitute nasa taka a nghawng dawn avangin leh an tangkaipui dawn avangin theih-tawp a thatho leh phur taka Campaign hi kalpui turin Department aiawh kalkhawmte chu a ngen nghal a. Serchhip District KVK North Vanlai-phai-a Senior Scientist and Head, Dr. T. Vanlal-ngurzauva chuan Campaign kalpui dan tur sawiin, hemi atana sum hmuh chungchang te sawiho a ni a. Viksit Krishi Sankalp Abhigyan Agriculture Campaign hi May 29, 2025 atanga June 12, 2025 chhung hian Serchhip District-ah hman tur a ni a, Viksit Krishi Sankalp Abhigyan Agriculture Campaign atan hian Team pathum-ah insiamin Campaign hun chhung hian Serchhip District chhunga khaw hrang hrangah Awareness Campaign hi neih tur a ni ang. He beihpui thlak turah hian Agriculture leh a kaihhnawih depa...

Nimin khan Serchhip-ah ‘Tithi Bhojan Awareness Campaign’ neih a ni a, he hmalakna hnuaia chak zawka hmalak theih dan turte pawh sawiho nghal a ni bawk.

Nimin khan North Vanlaiphai-a Lersia Hall-ah College of Vety. Sciences & Animal Husbandry (CVSc&AH), CAU, Selesih, Aizawl; ICAR-DPR, Hyderabad; Project Director, DRDO, Serchhip District; AH&Vety Department Mizoram leh KVK, North Vanlaiphai te tangkawp chuan Animal Health Camp cum Input Distribution an buat-saih a, he hun hi North Vanlaiphai-a Veterinary Officer Dr. MS, Dawngliana chuan kaihruaiin North Vanlaiphai SDO (Civil) Dr. Peter Malsawmtluanga chuan a hmanpui a ni. He hunah hian a thlawna ran entirna leh hri danna pekna hun hman nghal niin ran 886 (Ui - 20, Vawk - 35, Zawhte - 1, Ar - 824, Bawng - 6) te entirin Ui a hri danna Dose 18 pek a ni bawk.

United Pentecostal Church of North East India (UPC-NEI) Aizawl East District huamchhunga Pastor Bial hrang hrangte chuan nizan atang khan an Kohhran-a Hmeichhe pawl, Ladies Auxiliary Department (LAD) Bial Inkhawmpui an nei a, naktuk Pathianni zan thleng a awh ang. Serchhip Pastor Bial LAD Inkhawmpui vawi 57-na chu UPC Biak Inpui, Serchhip-ah neih niin Speaker atan Serchhip UPC-a Secretary, Evan Lalthan-kima Ralte chu hman a ni a. Serchhip Dinthar Bial LAD Inkhawmpui vawi 24-na chu Bung-tlang Bazar Biak In-ah neih niin Speaker atan Pastor Lallawmsanga (Lunglei District) chu hman a ni bawk.

Swami Vivekananda U-20 Men’s National Football Championship 2025 khelh mekah Mizoram Team chuan Punjab hnehin Semi Final khel turin an tling a, Mizoram Team-ah hian Serchhip mi pakhat a tel a ni.

Mizoram Legislative Assembly-a Public Accounts Committee (PAC) chuan nimin khan Khawzawl tlawhin District Hospital inenkawl dan leh inkaihhruai dan chungchang an enfiah a, Khawzawl DC Auditorium-ah Damdawi In thuneitute nen inkawmin Hospital hmalakna te, damlo enkawlna khawl leh damdawi neih zat leh an enkawl dan te, Staff an neih zat leh Office inkaihhruai dan te an zawt a. Hospital hotute chuan heng zawhna hrang hrangte hi chhangin, an mamawh te leh an veizawng te pawh an thlen bawk a ni. PAC hi an Chairman leh Leader of Opposition Lalchhandama Ralte chuan hovin Assembly-a Officer leh thawktu thenkhat ten an tawiawm bawk a ni.

Nimin khan Hnahthial-ah District Consultative Committee (DCC), District Level Review Committee (DLRC) leh District Level Security Committee (DLSC) te chu thukhawmin kumin January atanga March thla chhunga an District chhunga Bank hrang hrangte hnathawh dan leh hmalak dan te an thlirho a. He hunah hian Cash Deposit (CD) ratio chu quarter hmasa nen khaikhinin a tlakhniam thu tarlan a ni.

Ministry of DoNER chuan Northeast State 8 te tan nimin khan New Delhi-a Bharat Man-dapam-ah ‘Rising Northeast: Investors Summit 2025’ buatsaihin Prime Minister, Narendra Modi chuan he Summit hi a hawng a. He hunah hian Chief Minister Lalduhoma pawh telin India hmar-chhaka Investors te tana hmalak theihna awm te phochhuah a ni a, Agriculture & Allied Sector, Food Processing, Textile, Handloom & Handicraft, Entertainment & Sports, Education & Skill Development, Healthcare, IT & ITES, Tourism & Hospitality leh Infrastructure & Logistics lam te chu an insawrbingna (focus sector) a ni. He Summit-ah hian Planning & Programme Implementation Department kaihhruaina hnuaia Mizoram pawhin Stall pakhat hawngin Commerce & Industries Department leh Horticulture Department hnuaia Mizoram product hrang hrang te phochhuah a ni a, Mizoram atangin entrepreneur pali an thu bawk a ni.

Nimin khan Social Welfare Minister Lalrinpuii hovin LGBTQI+ chungchangah thutkhawm neih a ni a, Sawrkarin LGBTQI+ chungchang a buaipui dan leh helam kawnga hmalak chhoh zel dan tur te sawiho niin, Central sawrkarin transgender chungchang a ngaihpawimawh avângin an tan Portal a siam thu te pawh sawi a ni. An dinhmun tak tak hre tûr leh anmahni tanpui thei tur chuan data chu sawrkarin a neih a tul thu sawichhuah niin, a bultanna atan hemi survey nei turin Mizo-ram Psychological Association (MPA) leh Mizoram Professional Social Workers' Association (MPSWA) te thiamna leh thachakna hman nise an ti a, hemi atân hian proposal mumal tak Department-in siam se an ti bawk a ni.

Nimin khan Hnahthial-a District Consultative Committee (DCC), District Level Review Committee (DLRC) leh District Level Security Committee (DLSC) te chu thukhawmin kumin January atanga March thla chhunga an District chhunga Bank hrang hrangte hnathawh dan leh hmalak dan te an thlirho a. He hunah hian Cash Deposit (CD) ratio chu quarter hmasa nen khaikhinin a tlakhniam thu tarlan a ni a, chutih rual chuan an phak chin tura tuk, cheng nuai 60 an khum thu tarlan a ni bawk a, hei bakah hian Financial Literacy Camp vawi 15 neih tura tih chu vawi 14 chiah neih a nih thu tarlan a ni bawk.

Kolkata-a AMRI Hospitals tia hriat thin te chuan tun thla ni 21 atang khan Day Care division chu ‘AM Medical Centre’ tiin Aizawl Chanmari West-ah an rawn hawng thar a, nimin khan Aijal Club-ah a hawnna leh an damlo tana inenkawlna an kalpui chungchang te sawifiahna neih a ni. He huna tarlan a nih danin tunah hian Dental (Ha), Dermatology (Skin), Opthalmology (Eye) leh IVF (Fertility)-ah te rawn theih an ni a. AM Centre hi Mizoram sawrkar hnuaia Empanelled an ni mek a. Phai-a sum tamtak seng a kal ngai tawh lovin an tih theih dawn a ni. Ha (Dental) enkawlna atan Tooth Iimplant, Laser Treatment leh CBCT-3D a ka chhung leh ha enna khawl pawh hman theih in an bun tawh a. Vun (skin) enkawlna bikah botox leh plastic Surgery te an kalpui thei a. Mit (eye) enkawlna huangah Laser an hmang thei tawh dawn bawk a. Fa neih harsatna nei te tan IVF (Fertility)-ah te an rawn theih tawh bawk dawn a ni.

Mizoram Pradesh Congress Committee (MPCC) chuan nimin khan Aizawl-a Congress Bhavan-ah Friday Political Session neiin he hunah hian MPCC President Lal Thanzara chuan tuna sawrkar mek chu Financial Management lamah an hlawhchham chiang hle nia sawiin, “Hei vang hian mipui sum lengvak a harsat phah,” a ti a. “Chhiah hrang hrang an lak avang hian mipui tan khawsak harsatna a thlen a. He sum harsatna avang hian rukruk a hluar phah a, sum duh avanga ruih-theih thil tawlh a hluar em em a, ruihhlo ti mi pawh an pung chho hle a. Vawiin-ah chuan kuhva lei ang maia awlsamin drug a hluar a, hausa thar thut te an pung zel a, thalai boral an tam phah hle a, Kohhran pawh a mangan phah hle a ni,” a ti a, “Hmunphiah leh sawhthing chingtute mai ni lovin mipui zawng zawng hian kan tuar mek,” a ti bawk.

Mizoram Journalists’ Association (MJA) Khawzawl District chu nimin khan MJA General Hqrs. President C. Lalrambuatsaiha chuan Khawzawl DC Auditorium-ah a hawng a, he hun hi MJA General Hqrs. Vice President C. Lal-hmachuana chuan kaihruaiin Khawzawl DC K. Vanlalthiana, Khawzawl SP F. Lalbiakzauva, Khawzawl IPRO Lalzara, KhawzawI District-a Department hrang hrang leh NGO aiawhten an hmanpui a, Aizawl atangin MJA Member ten an hmanpui bawk a ni. MJA hian tunhma lam chuan Aizawl-ah chauh dingin District hrang hrang ten Journalist Association hran an nei thin a. Kum 2006 atang khan heng te hi MJA-ah inchhung-khawm vekin tunah hian Saitual tihloh District dang zawngah chuan District MJA hi a ding ta a. MJA Khawzawl District-ah hian Lalthla-muani Ralte chu President atan thlan a ni.

MNF Party chuan nimin khan Aizawl-ah Mizo Hnam Run Chhung Inkhawm neiin he hunah hian Minister hlui Er. Lalrinawma chuan thu a sawi a, Sawrkar kum liamta 2024-2025 ah Mizoram hmasawnna hnathawhna tur (Capital Expenditure) hnuaia ‘Other Capital Expenditure’ atan cheng vbc. 1209.7 (BE) ruahman a ni tih sawiin, cheng vbc. 72.04 chauh hmanral niin Revised Estimate (RE)-ah a lang si niin a sawi a, cheng vbc. 1137.66 chu hman loh niin a lang ta niin a sawi bawk. Er. Lalrinawma chuan, “Budget-a sum beisei hi an hmu pha lo nge ni a, an ti lapse zawk? Hetiang taka ram leh hnam hmasawnna tura sum tam tham hman loha a awm hi a chhan dik tak mipuite min hrilhfiah turin kan beisei a ni,” a ti a. “He pawisa cheng vbc. vbc 1137.66 hman loha lang hi Mizoram Budget ‘Capital Expenditure’ (2024-25) pumpui cheng vbc. 2455.08 atanga chhutin 46.3% a tling pha hial a ni,” a ti bawk.

Kumin January ni 1 atanga tun thla (May) ni 16 thleng khan Central YMA-a Kumpuan Sub-Committee leh Central Anti-Drugs Squad (CADS) te chuan ruihhlo cheng nuai 317 chuang man an man tawh.

Indian Railway Catering & Tourism Corporation (IRCTC) hotute chuan Mizoram-a Tourism ti hmasawn turin Mizoram sawrkar nen an thawkho dawn tih an sawi.

Gauhati High Court, Aizawl Bench chuan naupangte chunga mipat hmeichhiatna lam hawia hleilenna thleng thin chungchanga thutlukna a siam zulzuiin thupek a chhuah.

Tunhnaiah India ram hmun thenkhat ah COVID-19 hri kai hmuhchhuah awm leh mah se he hri lakah hian Mizoram chu ala him nia ngaih a ni.

Supply Minister B. Lalchhanzova chuan nimin khan Mualkhang-a Gas Bottling Plant Construction Site leh Sairang Dinthar Veng-a Buhfai Godown sak mek te tlawhin Gas Metric Ton 900 dah theihna tura ruahman Mualkhang Gas Bottling Plant hi December 2027 a zawhfel tura ruahman a ni.

Serchhip District Hospital-a Doctor thawk lai Dr. K. Lallawmzuala (Medicine) chu IPGMER Kolkata-ah DM Hepatology zir turin a tling a, hemi tur hian nimin khan Serchhip a chhuahsan nghal a ni. Hetianga Serchhip a chhuahsan tak avang hian Serchhip District Hospital-ah hian Medicine Specialist an awm ta rih lo a ni.

Mizoram Pradesh Congress Committee (MPCC) Sr. Vice President Lalnunmawia Chuaungo chuan nimin khan Serchhip rawn tlawhin Congress Party-in NLUP a kalpui atanga Tung ching hlawhtling Rualzakhuma hmalakna chu a tlawh bakah Serchhip-a Congress Party hruaitute nen an inkawm bawk a ni. 

Nimin May 22, 2025 kha ‘Public Library Day’ niin hmun hrang hrangah he ni pual hian hun hman a ni. Public Library Day pual hian Mizoram-a Veng leh khaw hrang hranga Library dinna hmunah te chuan hun hman niin Library tangkaina leh a pawimawhna te tarlan a ni a, hei bakah hian Library te dinhmun leh lehkhabu an neih dan te pawh tarlangin Serchhip-a YMA Branch thenkhat, Library nei te pawhin he ni pual hian hun an hmang a ni.

State Election Commission (SEC) Mizoram chuan Mara Autonomous District Council (MA-DC) hnuaia Village Council 13-ah te June 17, 2025 khian by-election nei turin nimin khan hriattirna a tichhuak a, heng VC 13-ah hian VC Seat 29 hnawhkhat turin inthlanna hi neih a ni dawn a, an zinga VC 4 te chu VC puma-a inthlanna neihna tur niin VC dang 8-ah chuan Seat ruak pakhat theuh awmin VC pakhat-ah chuan Seat ruak 2 a awm a ni. Heng inthlan chuh tumte tan hian tun thla ni 29 thlengin hming pekluh theih a ni ang. Heng inthlanna neihna turah te hian MCC chu hman nghal tura tih a ni bawk.

NITI Aayog Governing Council leh Raising NE: Investors Summit 2025-a tel tur leh sawrkar laipui hruaitute dawr turin Chief Minister Lalduhoma chuan nimin khan New Delhi a pan a, Commissioner & Secretary to CM Vanlaldina Fanai bakah sawrkar mi pawimawh dang ten an tawiawm a ni. NITI Aayog hi Union Cabinet in kum 2015-a a din a ni a. Prime Minister chu Chairman niin State leh UTs zawng zawng Chief Minister te chu Member an ni. NITI Aayog bultum hian Viksit Bharat 2047 kalpui mek a ni a, kum 2047 hmaa India ram chu ram changkang a hlankai tumna a ni.

Aizawl Zarkawt Veng-a dawr pakhatah niminpiah khan nausen thla khat mi vel chu mi tu tih hriat lohin dahin a kalsan a, nausen kalsantu hi Police ten zawng nghalin tun thlengin hmuh a la ni lo. Aizawl Police Station atanga Doordarshan thu dawn danin, niminpiah khan Aizawl Zarkawt-a Dominos dawr panna step-ah nausen hmeichhia thla khat bawr vel chu chhar a ni a, a tirah a dahtu hriat mai a ni lo a, Police ten dawr hrang hranga CCTV footage atanga an chhuizui hnuah nausen hi hmeichhe pakhatin a dah a ni a, a dahtu hi a hmel hmuh chian theih a nih loh avangin tunge a ni tih hriat a ni lo. Police ten an chhui zui zelna ah he hmeichhia hi Lunglei Maxi Cab Service atanga Aizawl pan niin Motor khalhtu pawh hian tunge a ni tih a hre bik lo a, Police te chuan ngawrh takin an chhui zui zel a, he chanchin buatsaih lai thleng hian tunge a ni tih hriat a la ni lo a ni. Thudawn danin, he nausen hi a hriselna dinhmun a tha a, Durtlang-a Hmangaihna In-ah dah a ni.

Mizoram Truck Owners Association (MT-OA) leh Mizoram Truck Drivers Association (MTDA) ngenna angin Vawiin atang hian Buichali leh Sairang inkar kawng chhe zual lai hnawh that hna chu Contractor ten an thawk dawn a, MTOA hotute sawi danin niminpiah-a PWD Minister Vanlalhlana hova Buichali leh Sairang inkara kawng chhe zual lai an enfiahna ah Contractor te chu kawng chhe zual lai thawm that hna thawk turin an ngen a, an ngenna angin Contractor ten thawh an inhuam angin Vawiin atang hian an thawk tan dawn a, truck neitu leh khalhtute hian Vawiin chawhnu dar 2:00-ah kawng chhe zual lai an thawm that hi an enfiah tur thu leh an duh ang anih chuan an tlan chhunzawm dawn tih an sawi a ni. MTOA Secretary Dina Tlau chuan Truck neituten chak zawka kawngpui siam a nih theih nan kawng siam chhung, zing dar 9:00 atanga tlai dar 5:00 thleng lirthei din tir an inhuam thu a sawi bawk a ni.

India-in mi firfiakte laka beihpui a thlak, Operation Sindoor-a India in hnehna a chan lawmna kawngzawh, ‘Operation Sindoor, Tiranga Yatra’ (Victory Rally) chu nimin khan Lawngtlai khawpuiah neih a ni a, hemi pual hian Lawngtlai Areopagy-ah inkhawm tawi neiin he hunah hian MLA hlui, Sapliana Vandir leh ZPM Lai District Hqrs. Vice President F. Lalluia te chuan thu an sawi a, he hunah hian mipui thahnem tak an tel bawk a ni.

Lunglei District Deputy Commissioner (Bawrhsap) hma aknaa Lungsen Aspirational Block huamchhunga nu leh naupangte hriselna leh chawikanna kawnga beihpui thlakna tur, Project BLOOM (Beter Living through Outreach, Optimal Maternal & Child Health) kalpui tur chu nimin khan Lunglei-ah Bawrhsap Navneet Mann-i hovin sawiho a ni a. NITI Aayog hnuaia Aspirational Block Programme-in hriselna leh chaw tha (health & nutrition) chungchanga hmasawnna tehfung atana thlan bik, Key Performance Indicator (KPI) a duan hrang hrangah Lungsen Block-in hma a sawn theihna tur leh zaa za (100%) tihhlawhtlin a nih theihna atan Project BLOOM hi ruahman niin, raipuarte a hun taka chhinchhiah (register) an nih a, chaw tha (supplementary nutrition) pawh tha taka an dawn theih nan leh damdawi In-ah ngei nau an neih theih nan te, nausen leh naupangte'n an thanlenna atana mamawh khawp chawtha an hmuh a, an lo hrisel zel theih nan leh nu leh naupangte tana sawrkar ruahmanna hrang hrang awmte a chhawr turte...

Aizawl Mualpui-a Rajiv Gandhi Stadium leh a chhehvel ram chu nimin khan Mizoram sawrkar Home Department kut atangin Sports and Youth Services Department kutah hlan a ni.

Mizoram State Commissioner for Persons with Disabilities (PwD) a Commissioner Vanlaldiki Sailo chuan Sugamya Yatra hnuaiah Accessible India Campaign neiin nimin khan Hnahthial a tlawh a, 'Accessibility India Campaign' hnuaiah hian rualbanlote thlen/pan theih lohna a awm em tih zirchian a nih thu sawiin, “All India Campaign a nih angin State hrang hrangah hmalak mek a ni,” a ti a. Mizoram-ah pawh chak taka hmalak a nih thu sawiin, Zirna In leh sawrkar building zawng zawng chu rualbanlote tana thlen phak a ni tur a ni a, toilet/bathroom-ah pawh rualbanlote hman tur bik siam a tul hle, a ti. He hunah hian Deputy Commissioner Office, District Hospital, Govt. Hnahthial College leh Govt Higher Secondary School te chu enfiah a ni.

Nimin May 22, 2025 khan ‘Harmony with Nature and Sustainable Development’ tih thupui hmangin ‘International Day for Biological hrangah hun hman a ni.

Mizoram State Museum enkawltute chuan Museum a dah chi hnam rohlu neite chu ti riral mai lovin, mipuite hmuh theih tura Museum-a dah zel turin an sawm.

Mizoram Synod chuan Union Public Service Commission (UPSC) hnuaia Exam hrang hranga tlin tumte tanpuina tur chu Synod Resource Centre-ah tun thla tawp atanga June thla laihawl thleng enrollment a la dawn a, eng Kohhran tan pawh dil theih a ni.

Chief Electoral Officer (CEO), Mizoram thar Dr. Lalrozama chuan nimin khan New Delhi-ah Election Commission of India a mi pawimawh te a kawm.

LBS Suzuki Inter Branch YMA Football Tournament 2025 khelh mekah nimin khan Round of 32 khelh zawh niin a thiam zual 16 la awm te zingah Serchhip Vengchung Branch chu an tel a ni.

Serchhip District Agriculture Marketing Committee (DAMC) chu nimin khan thukhawmin sawrkar in Sawhthing a lei meka harsatna awm te an sawiho.

Mizoram sawrkar General Administration Department (GAD) chuan Serchhip-ah Circuit House leh General Pool Accommodation (GPA) sak hna a thawk tan mek a, heng hna thawh mek chungchang hi nimin khan Bawrhsap Paul L. Khuma hovin sawiho a ni.

Mizoram Upa Pawl (MUP) Serchhip Dinthar Branch te chuan nimin khan an veng-chhung cheimawina atana hmalakna atan Serchhip Dinthar Veng-a Lungrem sei ber chu rawng hnawihin hnatlang an nei tih an sawi a, hemi atan hian Bialtu MLA leh Chief Minister Lalduhoma chuan MLA Fund atangin sum engemaw zat an pek thu an sawi a, Bialtu MLA chungah an lawm hle tih an sawi bawk. He hnatlang-ah hian MUP Member mi thahnem tak thawkchhuakin an zingah hian kum 90 chunglam mi pakhat leh kum 80 chunglam mi pathum an tel tih an sawi bawk.

Ministry of Housing and Urban Affairs, Govt. of India hnuaia AMRUT Mitra Initiative (AMRUT 2.0 in convergence with DAY NULM)-a ‘Ek Ped Maa Ke Nam’ campaign kal zelah Thingphun Campaign, ‘Women for Trees’ chu nimin atang khan Aizawl leh District khawpui-ah te kalpui tan a ni.

Vawiin May 22, 2025 hian Combined Group B (NG) Examination for Recruitment of Sub Inspector under FCS&CA and Receptionist under H&FW Departments te chu Serchhip-ah pawh neih a ni dawn a, he Exam neih tur atan hian Serchhip-ah chuan Marian High School P&E Veng, Serchhip chu Examination Centre a ni ang. He Exam hi Vawiin chawhma dar 10:00 hian neih tur niin Candidate te chu zing dar 9:00-ah Examination Centre thleng tura beisei niin Centre luh dawnah hian Security Personnel-ten Examination Hall-a kenluh phal loh dapna (frisking) an nei dawn a, chuvangin frisking paltlang thei lo tur chu keng lo tura hriattir an ni bawk.

Mizo Zirlai Pawl (MZP) General Headquarters chuan Zirtirtu aikal la mi 22 an la awm nia sawiin, sawrkar in Zirtirtu aikal la titawp tura a hmalakna chu tha an tih thu leh an thlawp thu an sawi a. Kumin June ni 13 ralhma ngeiin Zirtirtu aikal la te lakah sawrkar chu action la tura an phut thu an sawi bawk.

Baptist Church of Mizoram (BCM) Administrative Committee in a lo rel tawh angin nimin atang khan Christian Hospital Serkawn-ah pawisa pek lawk ngai lo, Mizoram Universal Health Care Scheme chu hman tan a ni.

Food, Civil Supplies & Consumer Affairs Department chuan thuchhuah siamin Central sawrkarin project thar, SMART-PDS chu a taka kalpui a tum avangin mipui ten ration an lak dawn apianga hman ngei ngei ngai software pathum (3)- RCMS, FEAST leh AePDS software-te chu a hranga awm tawh lovin hmunkhata chhunfin a tum avangin heng software-te hi tihtawp lailawk rih a nih thu an sawi a. Ration Card siamna ber, RCMS phei chu Central sawrkar hian a tih thih (deactivated) tawh avang leh a thar tur a la hman theih bawk si loh avangin hun engemaw atang khan Ration Card a siam theih tawh loh thu leh eng chen nge a awh dawn hriat theih loh mah se a rei tawh loh beisei a ni tih an sawi a. Mipuite chu lo hrethiam tur leh software thar peih hun lo nghak hram tura an ngen thu an tarlang bawk.

Phullen Rural Development Block Office hmalaknain nimin khan an Block huamchhunga khaw pali- Daido, NE. Tlangnuam, Khawlian leh Phuaibuang khuaah mipui ten an kawtkaia Sawrkar Pisa an dawr theihna turin ‘Doorstep Delivery of Government services programme’ hlawhtling takin an hmang a, he hunah hian Phullen BDO J. Lalhmahruaia leh a thawhpui mi 27 te chu kalin Phullen BDO chuan mi tam tak tan BDO Office dawr tura a hmuna kal a hautak thin avangin mipuite ban phakah sawrkara thawktute chu an kawtkaiah an rawn inchhawp hnai tih a sawi a, mipuite chu a tangkai thei ang bera hmang turin duhsakna a hlan nghal bawk. Phullen RD Block-a thawktute hian nimin khan MGNREGA hnuaia VEC hnathawh hrang hrangte a that tawk leh tawk loh enfiah nghal bawk.

Siaha leh Lawngtlai inkar Tuipui Ferry-a Chhimtuipui (Kolodyne) Lui-a Lei dawh turin harsatna a thlen te chu Mara Autonomous District Council (MADC) CEM, M. Laiko chuan niminpiah tlai khan a enpui.

Nimin khan Lunglei-ah Bawrhsap Navneet Mann-i hovin National Highway 54A leh 302 (Hrangchalkawn - Tlabung) kawngpui leh National Highway 54 (Aizawl - Tuipang) kawngpui laihzauh hna leh siam that hna thawh mek dinhmun leh lirthei tlan dan ruahmanna sawiho a ni.

Buichali leh Sairang inkara kawng chhe zual lai te chu nimin khan PWD Minister Vanlalhlana hovin enfiah a ni.

Sports Minister Lalnghinglova Hmar chuan Khelo India Youth Games 2025 neih zawh taka Boxing-a Gold Medal latu Samuel Zadeng leh Football (Boys) a Bronze Medal latu Mizoram Team te lawmpuina hun nimin khan a buatsaih.

Mizoram-a rawn zin Union Minister of State for Skill Development & Entrepreneurship and Education Jayant Chaudhary te nupa chuan nimin khan Aizawl Chanmari-a PM Shri Govt. Model English Primary School an tlawh.

Social Welfare Minister Lalrinpuii chuan nimin khan a Pisa-ah Operation Kingdom Ministry (OKM) hotute kawmin Tawngtai Bethel Camping Centre (TBCC) Founder Zohmingthanga leh TBCC Advisory Board hotute a kawm bawk.

Serchhip District Sports Committee (SDSC) chu nimin khan thukhawmin an hmalakna tur thil chi hrang hrang an sawiho.

P&E Department chuan Sawrkarin mipui tana Electric bill a pek sak zat (electric bill subsidized) mipuiin an chhut chhuah ve theihna tur Bill body ah tilang ngei turin Commission-in P&E Department chu a hriattir tih sawiin, May thla Bill-ah mipuiin Sawrkar atanga subsidy an dawn zat an lo hriat ve theih nan Slab rate zawnah  subsidy tello rate (un-subsidized rate) tarlan a ni tih an sawi a, hei hi mipui chawi zat tur rate a ni lo tih sawiin, Sawrkarin Electric Bill a ti sang lo tih an sawi bawk.

Serchhip Town Land Committee chu nimin khan an Chairman leh Bawrhsap Paul L. Khuma hovin Serchhip DC Meeting Hall-ah kumin-a a vawi khatna turin an thukhawm a, he hunah hian In hmun leh pass hrang hrang dilna lut 33 te chu ngaihtuah a ni a, heng dilna te hi Chanmari, New Serchhip North, New Serchhip South, Ser-chhip Kawnpui North leh Serchhip Hmar Veng VC atanga lut a ni a. Serchhip Town Land Committee chuan heng dilna lut te hi ngun taka a ngaihtuah hnuah dilna 29 chu pawmin dilna 4 hi chhan hrang hrang avangin an hnawl thung a ni.

Nimin khan Serchhip Bawrhsap Paul L. Khuma hovin NHIDCL hnuaia National Highway Contractor te chu Serchhip DC Meeting Hall-ah thukhawmin Furpui lo thleng turah National Highway laih thar a leimin avanga harsatna thleng thei te an sawiho a. Serchhip District chhunga National Highway kaltlang hi hlawm thum-ah then niin heng te hi NHIDCL hnuaiah Contractor pathumin chan bik neiin an enkawl a. Heng an huam chin kawng laih thar dinhmun te thlirho niin kan hma lawka Furpui lo thleng turah lung lum leh leimin avanga harsatna thleng thei te sawiho niin, leimin leh chhiatna nasa zawk a thlen lohna turin a hmunhma enho a, thenfai hna thawh chhunzawm dan tur ngaihtuah nise an ti a ni.

Nimin khan Siaha-ah District AIDS Prevention and Control Committee (DAPCC) chu thukhawmin sawrkar kum liamta 2024-2025 chhung khan an District-ah sample enfiah 2203 atangin mi 155 leh raipuar enfiah 952-ah mi 7 ten HIV hrik an kai thu tarlan a ni.

Aizawl South-I Bialtu MLA C. Lalsawivunga chuan kumin-a HSSLC Exam Result chhuaka a Bial chhung atanga Top 10-a lang zirlai pathum Kristin Laldinpuii Ralte, Lalmuankimi leh Juliet VL. Hriatzuali te chu nimin khan a Pisa-ah lawm-puina atan Laptop a hlan.

Mizoram Agricultural Marketing Board (MAMB) hmalakna in nimin khan CMERI, CDAR Post Harvest Processing and Research Centre, Airfield-ah Sawhthing sawngbawl dan (Ginger processing) chungchang inzirtirna hun buatsaih a ni a, he hun hmanpuitu Adviser to CM (IHHP) leh MAMB-a Co-Chairman Dr. KC Lalmalsawmzauva chuan Sawhthing chu a hring ringawt a hralh lovin hmun hla zawkah kan thawnchhuah theih nan leh hnamdangin Mizoram Brand an lo hmelhriat theih nan hmalak mek a ni tih a sawi a, kumtluan a sumdawnna ngelnghet kalpui tura tang tlang zel turin a sawm bawk.

Environment, Forest and Climate Change Department Minister Lalthansanga kaihhruaina hnuaiah nimin khan State Level Sub-Committee on Green Mizoram chu Aizawl-a Chief Wildlife Conference Hall-ah thukhawmin kumin-a Green Mizoram Day hmandan tur an rel a. Kumin June ni 11-a hman tur 'Green Mizoram Day' thupui atan 'Plant trees and catch the rain' (Ruahtui khawl nan thing i phun ang u) tih an thlang bawk. State pum huapa Green Mizoram Day hawnna inkhawm chu Thenzawl-ah neih a ni anga, he hunah hian Chief Minister Lalduhawma chu khual-lian atana beisei a ni. Kumin hian thingtiak sem-chhuah leh phun tur zingah Mizoram State Plant 'Herhse' chu uar leh zual tura tanlak nise an ti a. Kangmei venhim kawnga titha zual District-te leh ramngaw leh nungcha humhalh kawnga titha zual khua (community) te thlanchhuah an ni ang.

India hmarchhak State-a thalaite’n eizawnna tlak thiamna chi hrang hrang an neih theihna tura a bik taka hmalakna atana bultanna tur chu nimin khan Chief Minister Lalduhoma leh Union Minister of State for Skill Development and Entrepreneurship Jayant Chaudhary ten a rualin an hawng.

Chief Minister Lalduhoma chuan Mizoram chu ziak leh chhiar thiam vekna State atan nimin khan a puang a, India ramah Mizoram chu ziak leh chhiar thiam vekna State hmasa ber a ni.

Mizoram-ah danglamna (transformation) a thlen theihna tura a tul anga hma la turin nimin khan pawl thar, Mizoram Transformation Movement (MTM) chu Aizawl-a Donum Dei Restaurant-ah tlangzarh a ni.

Tuberculosis (TB) natna umbo tura beihpui thlakna pawimawh tak, 100 days Campaign, Nikshay Shivir chu nimin khan Kolasib-ah leh Lawngtlai-ah te a hawnna hun hman a ni.

Ni thum chhung awh tur ‘Capacity Building Programme for Medical Officers on AYUSH De-Addiction Programme’ chu nimin khan Zarkawt Community Hall-ah neih tan niin Health Minister Lalrinpuii chuan he hun hi a hmanpui a. National AYUSH Mission, Directorate of AYUSH leh Mental Health Programme, Social Welfare Department te bultuma Mental Health leh AYUSH lama thiamna hmanga tunlaia Mizoram puma kan buaipui ruihhlo ngawlveite enkawl tura Medical Officer-te tuaitharna hun buatsaih a ni chu lawmawm a tih thu sawiin, Mizoram hmun hrang hranga Allopathy leh Ayush Medical Officers thlanbik kalkhawm te chu an training hlawk taka an hman tangkai theih nan uluk tak leh rilru pe taka training turin a chah a ni.

Public Health Engineering Department changtu Minister Prof. Lalnilawma chuan nimin khan 'Alternate Gravity Water Supply Scheme of Aizawl' chu Muallungthu-ah a hawng.

Ephatha Society of Mizoram for the Deaf and Hard of Hearing (ESOMDHH) buatsaih Ephatha Special School for the Deaf and Hard of Hearing dinchamphaphak vawi 9-na lawmna chu nimin khan Aizawl College Veng-ah neih a ni a, he hun hi Governor General (Dr) Vijay Kumar Singh chuan khuallian niin a hmanpui a ni.

Kumin-a High School Leaving Certificate (HSLC) leh Higher Secondary School Leaving Certificate (HSSLC) Exam-a Top 10-a tling hmeichhe naupangte lawmpuina hun chu nimin khan Aizawl-a I&PR Office Lianchhiari Run-ah neih a ni.

Serchhip District Consumer Association (SDCA) hruaitute chuan nimin khan Serchhip DC Paul L. Khuma chu hmuin Serchhip-a ATM hmangtu thenkhat ten harsatna an tawh chungchang an sawipui.