Lenkawl

Mizoram District 9-a Village Council leh Local Council te term chu thla thar February 19-ah a tawp dawn tak avangin thla thar February 12-ah VC leh LC Inthlanpui neih a ni dawn a, heng inthlan chuh tumte tan hian nimin atang khan hming pekluh hun pawh hawn nghal a ni.

Sawrkar in ruahmanna a siam angin thla thar February 2025 atang chuan Birth Certificate leh Death Certificate pekchhuah te chu Digitized tur niin tuna pekchhuah thin kut ziak-a Certificate te chu chu pek a ni tawh lo ang.

Village Council Inthlanpui neih hun tur puan a nih rualin Serchhip District-ah pawh Inthlanpui neih tur atan hian inbuatsaihna chak taka kalpui mek a ni.

Serchhip Leisang Veng atanga Serchhip Hmar Veng-a Sports Complex panna kawng PWD Serchhip Division ten an Blacktop thar chu nimin khan PWD Serchhip Division-a Sr. EE, Er. PC. Zokhuma chuan a hawng.

State Institute of Rural Development & Pan-chayati Raj (SIRD&PR) leh Serchhip Vengchung Village Council tangkawp buatsaihin ni hnih awh Village Health & Sanitation leh MGNREGA chungchang training chu nimin khan Serchhip Vengchung VC House-ah neih tan a ni a, he hunah hian Serchhip Vengchung VC huamchhunga YMA leh KTP hruaitute bakah VEC Member te telin SIRD Thingsulthliah atangin Faculty Lalmuan-puia leh Master Trainer Zonunsangi ten kalkhawm te hi zirtirna an pe a, sawihona hun hmangin zawhna leh chhanna hun hman a ni bawk.

Deputy Inspector General of Police (Southern Range) Altaf Ahmad Khan IPS chuan nimin khan Lunglei Luangmual-a 2nd Battalion MAP Headquarters tlawhin thawktute nen an inkawm a, DIG (Southern Range) chuan 2nd Bn. MAP te hmalakna chu fakin, Battalion chhunga hma an lakna - Firing Range sak hna, School compound wall leh School toilet siam zawh tak te chu tlawhin a en bawk a ni.

Saitual Saihmartlang-a Circuit House sakna tur hmun chu nimin khan Saitual Bawrhsap Dr. Lalngura Tlau chuan tlawhin Aizawl atanga PWD atanga kal Senior Architect leh Surveyor te nen drawing/design siam dan tur leh tul hrang hrang te a sawiho a. Circuit House hi cheng nuai 700 a sak tur niin Ngursailova Sailo chuan a pa Chhuanliana Sailo(L) hriatreng nan an ram a pe a, helai hmunah hian sak a ni dawn a ni.

State Bank of India (SBI) chuan an Corporate Social Responsibility (CSR) atangin Aizawl Traffic Police hnenah Road Sign leh a tarna, Police te hak tur Jacket chi hrang hrang, Computer set leh Convex Mirror te hlanin heng te hi a vaiin Rs. 10,97,190/- man a ni.

Tunhnaia Siaha-a damlo pakhat thihna thleng chungchang ah Health & Family Welfare Department-a Principal Director chuan he thil thleng a tul anga chhui turin Dr. Joseph L. Chawngthu (Ortho), Civil Hospital, Lunglei leh Ralhmingthanga, Deputy Director (Admin), Directorate of Hospital & Medical Education te chu a ruat a. Heng mi te hi ni nga (5) chhunga an thil chhui te zofel tur leh hemi hnua an report te a hnena thehlut turin a ti bawk a ni. Thudawn danin tun thla ni 10 khan New Siaha-a cheng Daniel Lalruatfela (24) chu a boral a, January 9 zan hian tum hnih damdawi In panpui niin Doctor On-Call chu hmuh tur a awm lo niin New Siaha-a NGO te chuan thuchhuah siamin an tarlang a ni.

 Mizoram Rural Bank (MRB) chuan Sawrkar laipui in faina chungchang inzirtirna a kalpui mek, Swachhata Pakhwada pualin nimin khan Aizawl-ah mipui zirtirna kawngzawh an buatsaih a. January ni 16 atanga January ni 31 thleng awh tur Awareness Rally bultanna ah hian MRB-a thawktu khawpui chhunga Branch tin atangin aiawh an kalkhawm a, MRB General Manager, Saibal Kanti Roy chuan kalkhawmte chu faina ngai pawimawh turin a chah a, vantlang hmun leh hnathawhna hmunte vawnfai kawnga tan la thar lehzual turin a chah bawk a ni. MRB hian Save the Riparians te nena thawkhovin Swachhata Hi Seva 4.0 Campaign-ah hma an lo la tawh a, Vawiin hian STR Phase III (Elimination of GVPs at World Bank Road) chu tan leh tumin Chite Lei atanga Trinity Hospital thlengin kawngdunga bawlhhlawhte an tifai ang.

Lawngtlai District Chawnhu-a Krishi Vigyan Kendra (KVK) chuan kawng hrang hrangin Buh leh thlai chin leh tharchhuah kawngah midang zirtir leh kawhhmuhin hmalakna an kalpui reng a, an hmalakna peng pakhat, Chuktuah huan (Nutri Garden) chu hlawhtling takin kalpui theih a nih thu an sawi. KVK, Chawnhu hian tun tuma Nutri Garden an siam hi School naupang chawchhun (Mid Day Meal) atan an ruahman a, Badam, Carrot, Brocolli, Parbawr, Tomato, Knolkhol leh Motor chana te an ching a, a seng theih ang seng nghalin School naupang chawchhun atan an pe nghal a ni. KVK Chawnhu, Lawngtlai ten Zirlai nau-pangte thlai chin danah kawng tha tak an kawhhmuh leh an thlai tharte an Zirlaite tan an pe chu lawmawm an tih thu an sawi a ni.

Women and Child Development hnuaia District Hub for Empowerment of Women, Hnah-thial District chuan National Girl Child Day, 2025 lawmna khuh hawn nan nimin khan Hnahthial-ah hmeichhe naupang pualin a huhoa ke-a kal buatsaih a. Hemi rual hian Beti Bachao, Beti Padhao kum 10 tlin lawmna neih nghal a ni. He hun hi Hnahthial CDPO LT Rose Mary Hnamte chuan kaihruaiin hmeichhiate venghim tur leh an dikna chanvo humhalh tura intiamna Pledge chu Bazar kawn-ah sawirual a ni a, Ke-a kal hi Bazar kawn atanga neiin Hnahthial khawchhungah hmeichhe naupang pawimawhna leh mipui ten hmeichhiate chawisan kawnga an tih tur te au rualin an puang a. District Mission Coordinator Lalrinpuii chuan National Girl Child Day lawmna tura atana ruahmanna an neih te a tarlan hnuah Hnahthial mipuite chu thawhho puiah a sawm nghal a ni. He hunah hian Anganwadi Workers leh Anganwadi Helper, Hnahthial khawchhung ami te, Accredited Social Health Activists te leh Staff te nen an vaiin mi 60 vel an tel a ni.

Prime Minister Narendra Modi kaihhruaina hnuaia Union Cabinet thukhawm chuan Central sawrkar hnathawkte hlawh leh pensioner te hamthatna tihpunna tur 8th Central Pay Commission din tura rawtna pawm a, Union Minister Ashwini Vaishnaw chuan hemi chungchang hi sawifiahin Central sawrkar hnuaia hnathawkte hlawh ennawn tur hian Commission Chairman leh Member 2 awmna ruat an nih thuai tur thu a sawi a ni. Heng bakah hian Union Cabinet chuan thu pawimawh hrang hrang an rel bawk a ni.

Kawlkulh Handloom Pocket leh Ngopa Handloom Pocket huam-chhunga puantah a eizawngte tan nimin khan National Handloom Development Programme (NHDP) hnuaia Puantah In sak tanpuina chu mi 48 te hnenah semchhuah a ni. Heng tanpuina semna hun hi Kawlkulh ah chuan Centenary Hall, Gatekawn-ah neih niin Kawlkulh Handloom Pocket hnuaia mi 27 te hnenah tanpuina sem a ni a, Ngopa Handloom Pocket hnuaia beneficiary mi 21 te hnena tanpuina chu Teikhang Community Hall-ah sem a ni thung a, National Handloom Development Prog-ramme (NHDP) hnuaia tanpuina hi mi pakhat tan Rs. 50,000/- theuh hlan a ni a, tanpuina hi mi pakhat tan Rs. 1,20,000/- pek tur niin tun tumah hian 1st instalment pekchhuah an ni.

Chief Minister Lalduhoma’n Mizoram-ah Bank ten huang an zauh a, hmun kilkhawr zawka mite ban phak-a an awm a tul hle tih a sawi.

India hmarchhak State-a Film Indistry tihhmasawnna tura Film Exhibition kalpui dan tur relin nimin khan Mizoram, Tripura, Arunachal Pradesh, Meghalaya, Nagaland, Manipur, Sikkim, Assam-a I&PR Nodal Officer-te leh NFDC-a thawktute chuan Video Conference an nei a, he hunah hian Film Exhibition kalpui dan tur ruahmanna siam te State hrang hrang atangin ngaihthlak a ni a. Mizorama kalpui dan tur pawh I&PR-a Deputy Director leh Film Promotion-a Nodal Officer Pratap Chhetri chuan a sawifiah a. Mizoram-ah thalai thahnem takin Film industry chu eizawnna atan an hman chhoh mek thu te, mumal taka kalpui a ngaih thu leh Film Exhibition buatsaih a nih chuan Film siam lama tui mite hnenah chona leh phurna nasa tak a thlen a beisei thu te a sawi a ni.

Kumin-a Chapchar Kut-ah ‘Zo nun ze mawi - Hawihhawmna’ tih chu thupui atan hman a ni dawn.

Mizoram Governor 25-na atan General (Dr) Vijay Kumar Singh, PVSM, AVSM, YSM (Retd) chu nimin khan rinawmna thu tiam tira lakluh a ni.

Asmita Khelo India Women National Weight-lifting League Youth, Junior leh Senior neih zawh takah Keitum nula Zosangzuali chuan +87kg huang ah Junior-ah Gold leh Senior-ah Silver Medal a la.

AH&Vety Minister C. Lalsawivunga chuan nimin khan Thenzawl-a AH&Vety Farm tlawhin, Department hmalakna leh hmalak dan turte a hmunah a enpui a. Helai hmun hi tun aia chhawr tangkai tura hma an lak zel dawn thu a sawi a ni.

Mizoram-a Village Council leh Local Council Inthlanpui neih tur atana inbuatsaihna kalpui zel niin Vawiin lamah inthlan hi puan a nih rin niin thu chiang erawh ala awm lo thung.

Kum kalta 2024 chhung khan District Hospital Serchhip Blood Bank-ah thisen Unit 703 lak niin heng zinga za zela 99 zet chu a thlawna pek a ni.

Ni 100 chhunga TB vei zawnchhuah hna chu Serchhip bakah Aizawl, Champhai leh Mamit District-ah te kalpui mek niin Mobile Medical Unit (MMU) te nen khaw hrang hrangah TB endik turin an kal kual a. Tun dinhmunah Mizoram-ah he Campaign tan tirh December ni 9, 2024 atanga January ni 15, 2025 inkar chhungin mi 7000 chuang endik an ni tawh a, TB vei mi 3 hmuhchhuah niin TB vei te hi Aizawl District chhunga hmuhchhuah an ni. Ni 100 chhunga TB zawnchhuah Campaign hi kum 2025-a India ram atanga TB umbo anih theihna tura sawrkar laipui hmalakna niin District ngaihpawimawh bik 347-ah kalpui mek a ni.

Serchhip kiang Mat lui khuah dan tur chungchang chu nimin khan Serchhip Bialtu MLA leh Chief Minister Lalduhoma chuan National Building Construction Corporation (NBCC)-a Executive Director, Head of Business Development, Pradeep Sharma a sawipui a, Chief Minister Pisa a an inkhawmna ah hian Mat lui Multipurpose Dam thawh dan tur sawin, 3D model an siam te an thlirho a. NBCC lam hian Mat lui hi State sawrkar sum leh pai seng lova an thawh theih an beisei a, a thawhna sum hnar (fund source) an lo dap zui zel tur thu leh aan hmu thei a nih chuan hna thawh chhung hi chu a rei loh tur thu te an sawi a ni. NBCC Executive Director hian India ram hmun danga an hnathawh thenkhat a sawifiah bawk a ni, CM hi Jonathan Lalremruata, OSD to CM leh Irrigation & Water Resources Department hotu ten an tawiawm a ni.

KRISMAS LEH ZORAM THAR  - Rev. Dr. Zaichhâwna Hlâwndo

Nimin khan Chief Minister Lalduhoma hovin CM Conference Hall-ah Aizawl, Sairang leh Lengpui inkar thlunzawm Ropeway siam theih dan a awm em tih sawiho a ni a, Aizawl, Sairang Rel Station leh Lengpui inthlunzawmna Ropeway hi, Tourism Development atan mai bakah Aizawl - Lengpui via Sairang inkar inthlunzawmna neih belhna atan siam thaa hriatna a awm a. Externally Aided Project hmanga UD&PA in a kalpui mek Aizawl Sustainable Urban Transport Project (ASUTP) hnuaiah emaw, Tourism Department kaltlanga kalpui theih dan a awm em tih te he hunah hian sawiho a ni.

Lunglei Municipal Council (LMC) Chairman Lalzuithanga leh Vice Chairman K. Lalrinawma te chuan niminpiah khan Chief Minister Lalduhoma kawmin Lunglei khawpui hmasawnna tura an mamawh an sawi rang taka a ngaihtuah sak thin vang leh LMC tana Grant-in-Aid cheng nuai 185 sawrkarin a release avanga an lawm thu an sawi.

Nimin May 29-a Cyclone Remal in Chhimphei Road a tihchhiat te chu nimin khan MNF Thalaite chuan a hmunah an tlawh tih sawiin, “Mizoram Sawrkar kan hrawn mek in Chhimphei Road kawngpui mai ni lo, chhiattawk te a ngaihthah zia kan hmuhin mipui zah lohna ah kan ngai a ni,” an ti.

India rama hmeichhe naupangte chanvo hum-halh a nih theih nana inzirtirna hun atana kumtin January ni 24-a hman thin, 'National Girl Child Day' puala kumin-a ni 10 awh beihpui thlak tur chu nimin khan Lunglei-ah Addl. DC Ro-chuangkimi Khenglawt chuan a hawng a, Kumin NGCD thupuiah hian hma hun eng tak nei tura hmeichhiate chawi kan pawimawhna, ‘Empowering Women for a Bright Future’ tih chu thlan niin ni 10 chhungin hmeichhia te chawikanna atan hmalakna hrang hrang kalpui a ni ang.

Thingtlang leh District khawpui-a cheng ten Online hmanga Road Cutting an dilna tur 'Road Cutting Online Portal for Rural and District Hqrs.' https://pwdroadcutting.mizoram.gov.in/ chu nimin khan Aizawl Tuikhuahtlang-a PWD Conference Hall-ah PWD Commissioner & Secretary K. Lalthawmmawia chuan a tlangzarh a, Aizawl khawpui huamchhungah chuan kum 2021 khan hman tan a lo ni tawh a ni. He hmalakna in a tum ber chu PWD Office hrang hranga kal kual kher ngai lovin, Road cutting mamawhte chu Online hmang in dilna (application), phalna (permission) leh a man chawi (payment) te hi a tih theih vek tawh a ni.

Guwahati leh Aizawl inkar-a tlan Maxi Cab pakhat chu nimin zing khan chesualin Mizo pahnih in nunna an chan.

Mizoram University chuan nimin khan Mizoram chhunga College zirlaite result an tichhuak.

Mizoram Samagra Shiksha-in Interactive flat panel an lei chu nimin khan School Education Minister Dr Vanlalthlana hovin sem a ni.

Chief Minister Lalduhoma chuan sawrkarna an chan hnuah Lengpui a NIT Campus sak meka harsatna an tawh, Forest Clearance chu rang takin an umzui tih sawiin, an chinfel chuan sak chhunzawm hna rang taka thawh an duh tih a sawi.

Mizoram Governor tura ruat Gen. (Dr.) Vijay Kumar Singh chuan nimin khan Aizawl rawn thlengin Vawiin hian Mizoram Governor tura lakluh a ni ang.

Serchhip District Road Protection Squad Team B te chuan nimin khan Serchhip Vengchung, Field Veng leh Dinthar VC area-a kawngpui dinhmun an endik.

Mizoram sawrkar in Serchhip District Hospital sak hna thawh tura ruahmanna a siam anga a building hlui thiata a hmunhma tur laih hna te zawh a nih hnuah nimin atang khan a bankhur laiin Damdawi In sak hna chu thawh tan a ni a, Dam-dawi In satu turte hian an bungrua te pawh rawn dah tanin mipui nawlpui tlawhpawh theih loh turin damdawi In area hi hung a ni tawh bawk a ni.

Zo Re-Unification Organisation (ZORO) chuan zalen taka thenawm ram Myanmar nena inkalpawhna Sawrkar laipui thupeka khar a ni chu pawi an tih thu an sawi a, ramri khar mek chu hawn anih theih nan theihtawp an chhuah dawn tih a sawi.

All Mizoram Village Council Association (AMVCA) chuan VC term pawhtawi avanga Mizoram Sawrkar khinna chu nimin khan Gauhati High Court, Aizawl Bench-ah an thehlut leh a. AMVCA hian registration an tih loh avangin an President K Lalngaizuala hmingin an thehlut a ni. AMVCA President K. Lalngaizuala chuan GHC, Aizawl Bench-ah Writ Petition thehluh fel a nih thu leh High Court hian January 16-ah a list anga, hemi ni hian sawi nghal beisei a nih thu a sawi a ni.

Tuirial Bialtu MLA K. Laldawngliana chuan nimin khan a Bial chhunga Kawnpui khua ah Khualbuk a hawng a, hemi hnu hian Kawnpui VC-I House a hawng nghal bawk. Tuirial Bialtu MLA chuan khawtlang tana rotling leh Infrastructure te hi hlutna chang hriaa a enkawl leh vawn danah pawh uluk taka enkawl a, vawnghim tlat turin mipuite chu a chah a ni.

Mizoram Public Service Commission (MP-SC) hnuaia thawktute chuan nimin khan Finance Department (Taxation) Auditorium, Aizawl-ah Kumthar-a inhlantharna leh infuihtharna hun an hmang a, he hun hi MPSC Secretary Dr. H. Lianzela IAS chuan kaihruaiin MPSC Chairman R. Lalramnghaka IAS (Retd.) chuan MPSC hnuaia thawktute chu Kumthar a nih anga thahnem ngaihna thar nen dik tak leh tha taka hna thawk turin a fuih a. MPSC Member PB. Lianthangpuii MIS (Retd.) leh K. Lalhmingliana MCS (Retd.) te pawhin thawktute fuihna thu an sawi a. MPSC hnuaiah thawktute chuan a huhovin Kumthar Thutiam an la bawk a ni. Chawhnu lamah MPSC Officer-te'n MPSC hnuaia section hrang hrang; Establishment, Accounts, Store & Vehicle, RTI & Record, Confidential, Direct Recruitment leh Promotion-te kaltlanga hna an thawh hrang hrang te bakah an hlawhtlinna leh hmasawn ngaihna laite an tarlang bawk a ni.

Chief Minister Lalduhoma chuan nimin khan a Office-ah World Bank Water Resource Specialist Dr. Anju Gaur kawmin Irrigation and Water Resources Department ten National Hydrology Project an kalpui mek chungchang leh World Bank kaltlanga hmalak theih chite a sawipui a. India ram pum Water Resource Data neih tumin sawrkar laipui chuan Ministry of Jal Shakti kaltlangin World Bank nena tangdunin National Hydrology Project a kalpui mek a. Mizorama he hmalakna enpui turin Dr. Anju Gaur hi a rawn zin mek a ni. Dr. Anju Gaur hian Mizoram sawrkar hmalakna chu lungawithlak a tih thu Chief Minister hi a hrilh a. Chief Minister hian, ruahtui khawl-khawm theihna lian tham tak kalpuina tur Mizo-ram a a awm thu lo hrilhin, National Hydrology Project an kalpui mekah duhsakna hlanin tuihna humhalh leh tui lam kaihhnawih hmalakna, World Bank hnuai kalpui theih tur chi te a sawipui  bawk.

Tunhnaia an sahimna zawnga Bangladesh atanga Lawngtlai District-a lut mi 28 te chu Inrinni khan Zorinpui, Lawngtlai District atangin thawnkir an ni a, heng mite hian tun thla ni 5 khan Mizoram rawn lutin an zingah puitling mipa 8 leh hmeichhia 5 an awm a, naupang 15 awmin naupang 15 zinga 9 chu nausen an ni. Heng Bangladesh Refugee te hi hun engemawchen kawl an nih hnuah Zorinpui bul, Sekulh lui atangin Samang (Bangladesh) ah thawnkir an ni. Assam Rifle ten an sawidanin Refugee te thawnkirna ah hian Bungtlang South BDO bakah Bungtlang South leh Vaseikai Police te pawh an tel a ni.

I&PR Minister Dr. Vanlalthlana leh he Department-a Officer-te chu nimin khan I&PR Director Room-ah inkawmin, Department hma-lakna kallai leh Department hmasawnna turte an sawiho.

Co-operation Department-a Officer leh Staff te chuan nimin khan kumthar 2025 atana inhlantharna hun Aizawl-a RCS Office-ah hmangin Co-operation Minister PC. Vanlalruata chuan a telpui a, he hunah hian Minister chuan Pathian kaihhruainaa 2025 kumthar dam taka an chuangkai thei chu a lawmawm hle tih sawiin, thawktute chu kawng hrang hranga fuihin tanlak a ngaih thu leh rinawm taka hna thawk turin a chah a. Co-operation Department chu Department lian vak ni lo mahse sawrkar flagship programme-ah hmun pawimawh tak a chan tur thu a sawi a. Co-operation Department hnuaia enkawl mek Society zawng zawngte tichak turin tanlak a ngaih thu a sawi bawk. He hun hi RCS John LT. Sanga chuan a kaihruai a ni.

Toyota Technical Education Program (T-TEP) chu nimin khan Labour, Employment, Skill Development & Entrepreneurship (LESDE) changtu Minister Lalnghinglova Hmar chuan Industrial Training Institute (ITI), Aizawl-ah a hawng.

Tun thla ni 25 thleng awh tur Tuipuiral Annual Sports Meet vawi 52-na chu nizan hmasa khan Samthang Community Hall-ah Kick-Off Programme hmangin East Tuipui bialtu MLA Ramthanmawia chuan khuallian niin a hmanpui a ni. Tuipuiral Annual Sports Vawi 52-na hi Samthang-ah nghah niin January ni 13 atang ni 25 chhung hian neih tur a ni a. Mipa Football Team 21 telin Match 41 a awm ang a. Volleyball Mipa Team 18 awmin match 39 a awm dawn bawk a ni. Kumin hian kum danga awm ngai lo Individual Items Boxing, Feikhawh, Thalkah te telh belh a ni a, Thalkah ah mi 16 leh Feikhawh ah mipa 24 leh hmeichhia 5 an tel dawn bawk a. Boxing a tel tur zat erawh hriat theih ala ni lo thung.

Ministry of Earth Sciences hnuai India Meteorological Department din champhaphak kum 150-na chu nimin khan Aizawl-a Administrative Training Institute (ATI) Conference Hall-ah Chief Secretary Khilli Ram Meena hovin hman a ni.

Mizo Zirlai Pawl (MZP) General Hqrs. President chuan hna lak hrang hrang an enzui zel dawn tih a sawi.

India Sawrkar in Vision 2047 ti hlawhtling tura hma a lakna, Viksit Bharat Young Leaders Dialogue, Youth Festival 2025 neih zawh takah Mizoram atanga tel Grace Lalrinpari Hauzel chu Prime Minister hmaa presentation nei thei tura thlan a ni.

Home Minister K.Sapdanga hovin halpuah leh halmawi khuahkhirhna kalpui dan thlirletna chu nimin khan neih a ni.

Information & Public Relation Minister Dr. Vanlalthlana chuan Social Media-a Journalistic ethics engmah awm lova duh duh an sawi mai thin chu kan vei a ngai tih a sawi.

Supply Minister B. Lalchhanzova leh FCS&CA Department hotute chuan nimin khan an Department hmalakna hrang hrang an thlirho. Supply Minister Pisa-a he hun hmanah hian Minister chuan Ration Card dik nei tura hmalakna chu mipuiten hrethiamin tawiawm se, kan ram in Economic Statistics dik a neih theihnan thil pawimawh tak a ni, a ti a, Card Var-a dinhmun harsa la awmte tan sawrkarin October 20, 2024-a a thuchhuah, Buhfai kg khat Rs. 20-a an khul theihna tur Mizoram State Special Ration Package chu inthlahrung lo a dil turin a mamawh te an hriattir nawn leh tih a sawi a, Ration Card Sen-a ziak lut mi 11570 an awm mek tih a sawi bawk. Supply Minsiter chuan tun dinhmunah Card Eng hmang mi 63,626, Card Pawl hmang mi 6,36,265, Card Sen hmang mi 11,570 leh Card Car hmang mi 4, 61,09 an awm mek tih a sawi bawk.

Infiammite Bana Kaih Programme (Hand Holding Empowering Mizoram Sports) chu nimin khan Chief Minister Lalduhoma chuan hawngin he hmalakna bultanna atan hian sawrkar chuan cheng vbc. 2.5 a ruahman a, infiamna chi thenkhat ah chuan hmalakna kalpui chhoh mek a ni.

Mizoram sawrkar in Mizoram-a Village Council dinglai te term a pawhtawi sak avangin Political Party hrang hrangte chu Village Council Inthlanpui hmachhawn turin an inbuatsaih mek.

Kumin March 7 atanga Thenzawl khuaa Mi-zoram Presbyterian Kohhran hnuaia Kohhran Hmeichhe Inkhawmpui Lian vawi 51-na neihna tur Pandal sak hna chu nimin khan thawh tan a ni.

Serchhip Bazar Welfare Association chuan nimin khan Zotawna Park, Serchhip-ah Assembly neiin kum 2025 chhunga an pawl hruaitu tur an thlang a, President-ah Ramlawmthangi; Vice President-ah Laltlanthangi; Secretary-ah Lal-engzami; Asst. Secretary-ah K. Vanlalmuani; Treasurer-ah Lalbiaktluangi leh Fin. Secretary-ah Laldintluangi te thlan an ni. Serchhip Bazar Welfare Association Assembly-ah hian kum 2024 chhunga an Member boral mi 4 te sunna hun hmangin chawhnu lamah intihhlimna hun an hmang bawk. Serchhip Bazar Welfare Association-ah hian Member mi 280 an awm mek a ni.

Mizoram State Central Library chuan nikum 2024 chhung khan tlawhtu mi 2700 chuang a nei.

Mizoram Board of School Education (MB-SE) buatsaihin nimin khan Aizawl-ah ni 5 awh tur High School Zirtirtute tana zawhna siam chung-changa Workshop chu neih a ni a, he hunah hian MBSE Officer-te bakah District hrang hrang atanga Zirtirtu 63 an tel a, Azim Premji University atangin mithiam 8 an rawn kal a ni.

Lok Sabha MP Richard Vanlalhmangaiha chuan nimin khan Aizawl-a Central YMA Office tlawhin Central YMA President Lalhmachhuana leh hruaitu dang ten an lo dawngsawng a. Lok Sabha MP hian YMA-in ruihhlo do a kalpui mek chungchang leh thil pawimawh dang te Central YMA hruaitute sawipuiin, kumin October thla a Sakawrdai-a YMA Inkhawmpui Lian neih tur chungchang an sawipui bawk. Lok Sabha MP Richard Vanlalhmangaiha hian Central YMA in ruihhlo do a kal pui mek atan Rs. 10,000/- a hlan bawk a. Central YMA hian MP a thlan a nih lawmpuina leh duhsak nan Ipte Chei an lo hlan ve bawk a ni.

Nimin January 13, 2025 khan GD Madgulkar Auditorium, Pimpri-Chinchwad, Pune (Maharastra)-ah Entrepreneurship Development Conclave 2025 neih niin he hunah hian Zorinpuia, SR Piggery Farm, Lengte chuan Piggery Entrepreneurship lama titha lawmman a dawng a, India rama National Livestock Mission Scheme hnuaia Piggery Farm dinna tura Insak atanga ranvulh thlengin Monitoring leh Inspection zawng zawngte tha taka a paltlang hnuah subsidy thlenga dawng tawhte zingah a zo hmasa leh titha ber zingah thlan a ni. Mizoram chu India rama National Livestock Mission-Entrepreneuship Programme (NLM-EDP) a titha zual Top 10 a thlan zingah telin, North East State-te zinga titha ber a ni bawk. National Livestock Mission Scheme hian Sa, bawnghnute, artui leh ranchawa intodelhna tura hmalatute tanpui nan subsidy a pe thin a ni.

Lawngtlai District Level Committee on Border Protection Grid chu nimin khan District Bawrhsap Cheemala Siva Gopal Reddy IAS hova thukhawmin thenawm ram Myanmar leh Bangladesh atanga raltlan lo lut vanga ramchhung himna leh ralmuanna a derthawn loh nana ramri venhimna kawnga tan lak lehzual a pawimawh thu Bawrhsap chuan a sawi a. Lawngtlai District mipuite, a bik takin International border bula awm khuate chu ramri venhim kawnga thahnem ngai taka thawhpui tura sawmin, ramri vengtu Assam Rifles leh BSF te pawh uluk zawka hna thawk turin a chah bawk a ni.

Mamit Officers' Club (MOC), Mizo Zirlai pawl (MZP), Mamit leh Mizoram Youth Commission (MYC) tangkawp buatsaihin nimin khan Govt. Mamit College Seminar Hall-ah MOC-Rahbi Combined Coaching Centre hawn a ni a, MOC-Rahbi Combined Coaching Centre-ah hian zirlai mi 27 an inziak lut a, Group B Exam hmachhawn turin Course hi thla thum chhung kalpui a ni dawn a ni. MOC-Rahbi Combined Coaching Centre hi Mamit DC K. Laltlawmlova chuan hawngin Coaching Centre-a kal turte fuihna thu a sawi a, Jenny Thanhlupuii, TO Mamit chuan an kalpui dan tur tlangpui a sawi bawk a ni.

All Mizoram Village Council Association (AMVCA) ten VC term pawh tawi chungchang a Mizoram sawrkar Gauhati High Court-a an khinna chu High Court in a ngaihtuah tur ni, nimin khan AMVCA te an inhnukdawk. AMVCA President K. Lalngaizuala chuan nimin khan an inhnuhdawh chhan thuthar thehdarhtute hnenah sawiin, AMVCA chu kum 1986 atanga ding tawh ni mahse dan ang takin sawrkarah an in register lo a, hei vang hian an Case chu High Court in a hnawl a hlauhawm tih a sawi a. An Ukil ten inhnuhdawh mai thaa an hriat avangin an inhnukdawk ta tih a sawi a, Vawiin-ah a tharin High Court-ah case thar an thehluh leh nghal dawn thu sawiin, AMVCA member ten inlungrual takin hma thar an lak leh dawn thu a sawi a ni.

Mizoram State Sports Council leh Samagra Shiksha chuan Mizoram Sports tihhmasawnna tura Inremna thuthlung (Memorandum of Understanding) chu nimin khan an ziak.

Mizoram-ah Jail 10 awm mekin heng Jail hrang hrangah hian mi tang 1591 an awm mek a ni.

Mizoram State Commission for Protection of Child Rights chuan Naupang kum tlinglo, Dan nena inrem lova che te thlalak leh hming te Social Media a pholangtu YouTuber leh Facebooker te lakah FIR a thehlut.

Reiek tlang-a khualzin chevel chungchangah Tourism Minister Lalrinpuii hovin Tourism Department leh Reiek Tlang Tourism Development Board hotute tun thla ni 15-ah an thukhawm dawn.

Kum kalta 2024 chhung khan Mizoram-ah Dengue vei mi 751 hmuhchhuah an ni.

MNF President Zoramthanga chuan MNF chu Lalpa’n Mizo hnam chanchintha hrilhna kawnga hruai turin party dang zawng zawng zinga a thlan bik a nih thu a sawi.

Mizoram Pradesh Congress Committee (MPCC) President Lal Thanzara chuan Congress an sawrkar leh anih chuan NLUP an tharthawh leh dawn tih a sawi.

ZPM President Lalliansawta chuan Mizoram-ah Kalphung thar mipui Sawrkar a lo dingchho ta tih sawiin, “Thawk lehkhatah kan duh leh beisei ang zawng zawng hi thleng vek thei lo mah se, Pathian in min hruai zel anga, kan tum ram hi kan la thleng ngei dawn a ni,” a ti.

Inrinni kalta zing dar 3:00 vel khan Serchhip Police, CID (Special Branch) leh Serchhip Sub-Hqrs. YMA Anti-Drug Squad te chuan Chhingchhip Venglai-a Vanlalchhuma te In ah Heroin nia hriat Hawng hnih an man a, In neitu Vanlalchhuma (59) leh a mikhual Thanliana (33), Falam (Myamar) nia insawi, tuna Aizawl Falkland Veng nia insawi pawh manin thubuai siam sak nghal an ni. Tun tuma Heroin an man hi gram 23.73 a rit niin hemi chungchang hi chhui zui mek a ni.

Kum kalta 2024 chhung khan Serchhip District-ah nau piang 429 chhinchhiah an nih laiin mitthi 343 chhinchhiah an ni bawk a, mitthi aia naupiang an tamna hi 86 niin nikum chhunga Serchhip District-ah mitthi chhinchhiah zingah hian hmeichhia aiin mipa an tam zawk a ni.

Inrinni kalta January 11 kha Missionary Day vawi 131-na niin Mizoram hmun hrang hrangah urhsun taka hman a ni a, Serchhip-a Baptist Church of Mizoram (BCM) Kohhran hrang hrang 7-ah pawh he ni hi urhsun taka hman niin chawhma, chawhnu leh zan-ah Inkhawmna hun hman a ni a, Kohhran 6 te chuan ruai nen he ni hi an hmang bawk a ni. Kumin-a Missionary Day-ah hian 'Lalpa’n thil ropui tak te min tihsak a' tih chu thupui-ah hmangin zan lamah zaikhawmna hun hmang te an awm bawk a ni.

Nimin Pathianni khan Mizoram Presbyterian Kohhran chuan hmun hrang hrangah Pastor leh Pro. Pastor dahnghehna hun an hmang a, Serchhip Bialtu Pastor tura ruat Pastor K. Ramdinthara pawh Serchhip Kawnpui Kohhran Biak In-ah dahnghehna hun hman niin Rev. Zothan-sanga chuan Bialtu Pastor thar hi a dahnghet a ni. Presbyterian Serchhip Bialtu Pastor thar hi Lungdai Pastor Bial atanga rawn awm a ni.

Directorate of Economics and Statistics in a chhinchhiah danin nikum 2024 chhung khan Mizoram pumpuiah naupiang 16,136 awmin mitthi 6536 an awm a, nikum chhunga mitthi aia naupiang an tamna hi 9600 a ni.

Nikum 2024 a Mizoram sik leh sa chawhrual chu 21.5 degree celcius a ni a, kum dang nena ngaihtuahin sik leh sa-ah danglamna lutuk a awm lo.

Nikum December ni 31 zan-a kumhlui thlah leh kumthar lawmna a Halpuah, Halmawi leh a kaihhnawih hal chungchangah thubuai 56 ziahluh a ni tawh.

Nikum 2024 chhung khan Mizoram Police-te chuan cheng vbc.211.64 chuang hu ruihhlo an man.

Kar kalta Nilaini-a Tuiruang lui-a Sangha man tura kal chin hriatloh a awm ta Vanlalhnuaia (28) leh Lalditsaka (32), Vaitin khua te chu nimin thleng khan zawn chhunzawm zel niin nimin chhun dar 1:30 vel khan Lalditsaka ruang hi Tuiruang lui-ah hmuh a ni a, Vanlalhnuaia chin erawh hriat a la ni lo thung. Lalditsaka ruang an hmuhna hi an thawmhnaw an hmuhna atanga meter 100 vela hla ah niin nimin khan Postmortem tura lak nghal a ni a, hemi hnu hian vui tur a ni ang. Vanlalhnuaia hi mi tlawmngai ten an la zawng zui thung a ni.

Fire & Emergency (Home) Deparment chuan nikum (2024) chhung khan kangmei chhuak kaih-hnawih ah Phone Call dawn leh an bawhzui tum 179 neiin hemi hun chhung hian kangmei avanga nunna chan mi pakhat awmin hliam tuar mi pali an awm bawk. Nikum chhung khan kangmei chhuak avanga In leh lo bakah bungraw kangchhia hlutna chu Rs. 12,34,45,932-a chhut niin bungraw chhan hman hlutna chu Rs. 48,35,61,846/- a ni thung. Mizoram-ah hian Fire & Emergency Services Department hian Station 12 an nei mek a ni.

UD&PA Department changtu Minister K. Sapdanga chuan Inrinni khan Zemabawk Multi Sports Complex a hawng a, Infiamna lamah chauh lo eizawnna kawng hrang hrangah Sawrkar chu mipui tan a ding zel dawn tih a sawi a ni. He hunah hian bialtu MLA leh Minister Lalthansanga pawhin Multi Sports Complex chu Khawvel thang chho zelah kan thalai te khawvel tukverh-ah an dah ve theih nan tangkai taka hman thiam a ngai tih sawiin, mi hmantlak chherchhuahna nise a duh thu a sawi bawk.

BJP Mizoram State Office, Mipui Rûn chu Zirtawpni khan kumin atan hawn tan a ni leh ta a, Office hawnna hunah hian BJP President Vanlalhmuaka chuan thuchah sawiin, State Core Group Member Lalrinliana Sailo leh K. Beichhua MLA te pawhin thu an sawi bawk a ni.

Central YMA chuan nikum December ni 28 leh kumin January ni 10 inkar chhung khan ruihhlo thahnem tak manin a kaihhnawih ah mi 47 man an ni bawk. Central YMA Kumpuan Committee thuchhuah tarlan danin nikum December ni 28 leh kumin January ni 10 inkar chhung hian Heroin No. 4 Hawng 7 bakah Tictac bur 65 manin Chlonozepam tablet 12 an man a, Ganja kg 18 leh gram 72 leh Trama tablet 5430 bakah Nap-10 tablet 10 an man bawk. Thuchhuah a an tarlan danin ruihhlo kaihhnawih ah hian mi 47 man an ni a, Home-ah leh De-Addiction Center-ah mi 3 dahluh niin Excise & Narcotics Department-ah mi 9 hlan an ni bawk.

Gauhati High Court-a Chief Justice leh Mizo-ram State Legal Services Authority-a Patron-in-Chief, Justice Vijay Bishnoi chuan Inrinni khan Lawngtlai tlawhin District Jail Lawngtlai-a Special Campaign for Old Prisoners & Terminally ill Prisoner & Skill Development buatsaih chu a hmanpui a, Chief Justice chuan Tan In-a tang ten hriselna tha tak an neih theih nan theihtawp chhuah reng a ni tih sawiin, a thlawnin an hriselna endik sakte, enkawl ngaite a thlawna enkawl an nih thin dante leh damdawi pawh ngaihtuahsak thin an nih thu a sawi a. Tan In-a tang te’n kutthem-thiamna an neih theih nan hmalakna pawh kalpui a nih thu sawiin, rintlak leh hmantlak thiamna an neih theih nan anni pawhin theihtawp an chhuah a tul tih a sawi a ni. Justice Vijay Bishnoi chuan Tan In-a tangte hman tur Mistiri bungrua pein Jail-a tang te pawhin an thil siam hrang hrang an hlan bawk.

Mizoram Sawrkar-in kut hnathawktute khaichhuahna tura 'Bana kaih policy' a duan chu party inthliarna awm lova rualkhai taka kalpui tum a nih thu Adviser to Chief Minister (Political) Lalmuanpuia Punte chuan a sawi.

Khawzawl District-a awm Sialhawk khuaa Lakhuihthei chingtute chuan nikum khan Lakhuihthei quintal 13,000 vel an tharchhuak a, an Lakhuihthei tharchhuah atang hian quintal 9,000 vel hralh chhuakin quintal 4,000 vel chu hralhna tur an hriat loh avangin a tawihral a ni.

Mizoram sawrkarin nikum September ni 1 atanga Petrol leh Diesel man atanga Chhiah a tihpun atangin, December thla thleng khan Road Maintenance Cess leh Social Infrastructure & Services Cess atangin Rs. 452,32,600 a hmu tawh.

India rama sawrkar damdawi In tha bik thlan zingah Khawhai Primary Health Centre chu a tel ve leh ta.

Reiek tlang chu tunhnai thla hnih kalta, November leh December, 2024 chhungin tlawhtu mi 11,115 an awm a, hetihlai hian Reiek tlang panna a lirthei service rate chu ennawn zel theih tur a ni tih Reiek Tlang Tourism Development Board hotute chuan an sawi thung a ni.

Mizoram sawrkar hnuaia zirna In hrang hrang te chu Thlasik chawlh hman zawh a nih hnuah nimin khan hawn tan a ni leh ta.

North East Initiative Development Agency (NEIDA) chuan nimin khan Serchhip Press Club-a dah turin MJA Serchhip District hnenah Water Filter an hlan. Filter inhlanna hun NEIDA (TATA Trust) Office, Serchhip AOC Veng-a neih ah District Coordinator Jacob Lalrammawia chuan MJA (SD) Joint Secretary Lawmhlira Ralte hnenah Water Filter hi a hlan a ni. NEIDA (TAT Trust) te hian kuthnathawktute hmasawn leh chawikanna atan kawng hrang hrangin hma an la thin a, kuthnathawktute hriselna enfiah sak bakah anmamawh hmanrua leh bungrua te semin, Training te pawh an buatsaih thin bawk a ni.

Mizoram Chief Secretary Khilli Ram Meena IAS chuan zan khat riak turin Vawiin hian Serchhip District a rawn tlawh dawn a, ruahman lawk ang chuan chawhnu dar 2:30-ah Serchhip District a mi pawimawh te DC Pisa Pui Meeting Hall-ah a kawm anga, hemi hnu hian Thenzawl-ah chhukin hmun pawimawh hrang hrang a tlawh leh dawn bawk a, zan a riak nghal dawn a ni.

Serchhip Kawnpui Village Council-a Treasurer nilai K. Laldaihvela (56), Serchhip Bazar Veng chu nimin khan Serchhip Damdawi In-ah Cancer vangin a boral a, a ruang hi lumen a nih hnuah Vawiin hian vuiliam a ni ang. K. Laldaihvela hi Serchhip Kawnpui South Branch YMA a hruaitu hlun niin Mizoram Aero-Sports Association (MASA) Sub-Hqrs. Serchhip-ah Sr. Vice President nilai a ni bawk.

Nikum December 13-a State Transport Authority Meeting chuan Mizoram-a Ambulance leh Hearse/ Morgue Van hmanna man (rate) a siam thar a, Ambulance hi District Hqrs. leh Town-ah chuan rate hniam ber Rs. 500/- leh rate sang ber Rs. 1500/- a ni anga, khawpui pawnlam ah chuan KM khat ah Rs. 45/- (Advance Life Support) leh Rs. 40/- (Basic Life Support) niin hei hi Garage to garage a ni ang. Hearse/ Morgue Van pawh khawpui chhungah chuan hetiang bawk hi niin khawpui pawnlam ah chuan Garage to garage-a chhiarin KM khat-ah Rs. 40/- a ni ang.

Vawiin January 11, 2025 hi Mizoram-a Chan-chin tha thlen ni, Missionary Day a ni a, Sawrkar Pisa chawlh a nih angin sawrkar Pisa te khar a ni ang. Missionary Day hi Kohhran hrang hrang ten urhsun takin an hmang leh dawn a, Presbyterian Kohhran chuan January 11 hi an Kohhran dintan ni-ah an hmang thung a ni.

PU BUANGA LEH SAP UPA TE KHA - Zirsangkima

Mizoram Science, Technology & Innovation Council Governing Body chu nimin khan an Chairman leh Chief Minister Lalduhoma hova thukhawmin an hmalakna hrang hrang an thlirho a, Patent Information Centre hnuaia an hmalakna te pawh he hunah hian tarlan a ni.

Lunglei District Magistrate Navneet Mann chuan Lunglei District chhungah tuialhthei (petrol leh diesel) indaihlohna a thlen loh nan te, mipui (consumer)-te'n harsatna an tawh lohna tur leh tuialhthei phur lirtheite'n chhiatna (kang) an tawh loh nan Storage Licence nei lo te'n Filling Station/Petrol Pump atangin emaw, hmundang atangin District pawna hralhchhuah tur tuialhthei an lachhuak tur a ni lo tiin thupek a chhuah.

Cheng vbc. 18 senga Siaha District Court Building sak thar chu nimin khan Gauhati High Court Chief Justice, Vijay Bisnoy chuan a hawng a, Dikna in ro a relna hmun nih tir theuh tura theihtawp chhuah zel turin a fuih bawk. He building hi September 10, 2018 khan sak tan niin April ni 22, 2023 khan sak zawh a ni a, hemi hnu hian a chhung cheimawi hna thawh leh a ni.

Vaitin khuaa cheng Vanlalhnuaia (28) leh Lalditsaka (32) te Nilaini-a Tuiruang lui-a Sangha man tura an kal chu chin hriatloh in an awm mek a, Ningani atang khan zawn niin tui-ah chesualin an tla nia rin a ni a, nimin thleng khan zawn an la ni.

SASCI sum hmanga Vaphai to Chawngtui East kawng chhuat phah thar chu East Tuipui bialtu MLA Ramthanmawia chuan niminpiah khan a hawng a, he kawng hi SASCI 2023-2024 Fund atanga siam niin, Black Topping hna hi PWD Champhai Division hnuaia thawh a ni a. Black Topping thui zawng hi Kilometre 3.4 niin Hume Pipe Culvert 3 siam a ni bawk. Chawngtui East-ah hian an feh kawng pawimawh, Dilkawn to Thilte Fartlang Agriculture Link road MLA Fund atanga laih chu Bialtu MLA hian a hawng nghal bawk a, Farkawn kawtchhuah kulh kawngka (Farkawna Gate) siamna tur Lungphum a phum bawk a, Farkawn Gate hi cheng nuai 30 senna tur niin, Farkawn Heritage Preservation Society, Aizawl te ruahmannaa siam tur a ni.

Nimin khan Chief Minister Lalduhoma kaihhruaiin Mizoram State Policy Coordination Committee chu CM Conference Hall-ah thukhawmin Hand Holding Pilot Phase atana thawhpui tur, Progress Partner thlan chu kumin February ni 20-ah peih hman nise an ti. Pilot Phase atana thawhpui tur (Progress Partner) thlan kawngah Detail Project Report (DPR) neih tel zel a tul avangin hun a duh deuh a, CM Special package hmanga pekchhuah tur zat (allotment) chu an tipung bawk a. Heng tihfel nan hian hun tlem a la ngaih avangin Line Department te chu February ni 20 hmaa an lehkhate Planning Department-a thehlut fel turin an ti a ni. Pilot Phase atana dilna hun hi khar tawh a ni a, dilna lut tawh zinga hnawl (rejected) ni lo ho zawng chu Phase lo awm leh tur atana rin zui theihin Line Department ten an dah tha (shelved) a ni.

All Mizoram Village Council Association (AMVCA) in Village Council term pawh tawi chungchanga High Court-a sawrkar an khinna chu Thawhtanni lo awm tur, January ni 13-ah High Court in a ngaihtuah dawn.

Transport Minister Vanlalhlana chuan Mizoram chu tlangram a nih avanga mihring phur leh bungraw phurhluh lamah harsatna an tawh thin thu a sawi.

Land Revenue & Settlement Department changtu Minister B. Lalchhanzova chuan an Department chu dawrtu ngah tak Department a nih angin anmahni dawrtute hmachhawn kawngah hmel hmuh nuam pu turin leh hawihhawmna chhawm nung zel turin a chah.

Nikum (2024) chhung khan Mizoram-a Cyber Crime Police Station CID (Crime)-ten thubuai 41 an ziaklut a, heng zingah hian pawisa vanga thubuai ziahluh (financial crime) a tam ber.

Tun thla ni 26-a India Republic Day lo thleng tur chu Pathianni a nih avangin Serchhip-ah chuan zingkar-ah he ni pual hian hun hman a ni ang.

Mizoram-a sawrkar damdawi In pali (4) te chuan National Quality Assurance Standards (NQAS) an paltlang a, heng zingah hian Serchhip District atangin East Lungdar PHC chu an tel a ni.

Thla kalta December 2024 chhung khan Serchhip District-ah naupiang 40 chhinchhiah niin mitthi 29 chhinchhiah an ni bawk.

Mizoram sawrkar in Academic Session kal mek 2024-2025 atana School Calendar a siam angin School Education Department hnuaia zirna In hrang hrangte chuan Thlasik chawlh an hman hnuah Vawiin, January 10, 2025 hian zirna an chhunzawm leh dawn t a. Zirna In hrang hrangte hian nikum December 14 atang khan Thlasik chawlh hi hmang tanin ni 27 zet an chawlh hnuah zirna hi an chhunzawm leh dawn a ni.

Tunkar Nilaini tang khan Asmita Khelo India Women's National Weightlifting Championship 2025 chu Ganjam Weightlifting Academy, Berhampur (Odisha)-ah neih a ni a, he intihsiakna ah hian Mizoram atang pawhin Khelo India State Centre of Excellence (KISCE), Sports & Youth Services (SYS) atangin Zosangzuali (+87), Keitum leh Cindy Lalparmawii (76 kg), Kolasib Saidan te an tel a, Official mi pahnih in an hruai a ni. Keitum nula Zosangzuali hian nikum July thlaa East Zone inelnaah khan Youth Category-ah Silver, Junior Category-ah Gold leh Senior Category-a Bronze a lo la tawh a ni.