Hri leng karah chhuanchham an awm lohna turin sawrkar in theihtawp a chhuah zel dawn

Rural Development Minister, Lalruatkima chuan hri leng karah chhuanchham kan awm lohna turin sawrkar in theihtawp a chhuah zel dawn tih sawiin, ni 100 inhlawhna tur sum hmuh belh a nih thu a sawi a. Kumin hian ‘Jal Shakti Abhiyan - Catch the Rain Campaign’ chu nasa lehzuala kalpui a nih thu a sawi bawk.

Rural Development Minister, Lalruatkima chuan COVID-19 hripui leng vanga harsatna, a bik takin thingtlang lam mi ten harsatna an tawhte chhawk zangkhai a nih theih nan Rural Development Department-in theihtawpin an chhuah reng tih sawiin, sawrkar laipui pawh theihtawp-a an dawr thu leh kum 2021-22 chhunga MGNREGS hnuaia inhlawhna turin Ministry of Rural Development chuan April, 2021 khan cheng nuai 7788.34 lai a rawn sanction bakah June 14, 2021 khan cheng nuai 14502.84 lai chu mipui inhlawh nan an rawn sanction leh tih a sawi a. Heti hian kum 2021-22 chhung hian mipui inhlawhna atan cheng nuai 22291.18 an rawn sanction tawh tih sawiin, Lockdown leh COVID-19 hripui avanga mipui harsat vang lai taka mipui inhlawhna tur sum kan hmu hi a lawmawm takzet a ni, a ti bawk.

RD Minister chuan kumin atang hian Job Card Holder pakhatin nikhatah Rs. 233/- zel an hlawh tawh dawn thu leh kum kalta aiin Rs 8 in a tam zawk tih a sawi a. Tun dinhmunah Mizoram pumpui ah Active Job Card Holder mi 2,05,607 an awm mek thu sawiin, kan pawisa hmuh tawh hmang hian  District hrang hrangte kumin April, May, June, July leh August thla-ah ni 47 in an inhlawh hman a beisei thu leh hetiang a nih chuan kum 2021-22 chhung hian ni 100 kan inhlawh theih ngei a beiseiawm tih a sawi bawk.

RD Minister chuan MGNREGS hnuaiah hian tuihna tipung tam thei tura kum 2019 atanga ‘Jal Shakti Abhiyan - Catch the Rain Campaign’ kalpui tawh pawh kum 2021-ah hian nasa leh zual a kalpui a ni tih a sawi a. He Campaign hnuaiah hian tuihna tipung thei tur leh ruahtui tla luanral tir mai lova lo dawng khawl thei tur Tuizem, Farm Pond leh Dug-Out Pond te siam tum a ni, a ti a, bawlhhlawh sawngbawlna turin Compost Pit leh Soak Pit te chu Job Card Holder chhungkua te siam tir tum a ni tih a sawi a. Hemi piah lamah hian ei leh bar a hma kan sawn nan leh kan thlai thar te a lo pun zelna turin hmun hrang hrangah a theih ang angin hmalak mek a nih tih a sawi bawk.