Latest News

Sawrkar in Assembly Session zawhna a chhan danah thil fello tam tak a awm - ZLP

ZPM Legislature Party (ZLP) chuan sawrkar in Assembly Session zawhna a chhan danah thil fello tam tak a awm nia sawiin, MNF Party chu sawrkar aiawha MLA leh mipuite hnena thupha chawi zawk tur an nih thu an sawi.

Nimin-a thuchhuah an siamah ZLP chuan tunhnaia thuchhuah an siam-a Ambulance man chungchangah an rinhleh ang ngeiin Session-a chhanna an dawn leh a taka hmanna chu a lo danglam niin an sawi a. March 17, 2021-a Assembly Session ah Aizawl South-I bialtu MLA, C. Lalsawivunga zawhna Health Minister in a chhanna ah Ambulance leina manah cheng nuai 48 chiah chiah tarlan a ni tih tarlangin, “Kan ngaih a tih thatloh avangin sawrkar hotute kawm kan tum a, an remchan loh takah chuan sawrkar koh ei nan Press Release hial kan hman a ngai ta a, a man dik tak kan hre thei ta,” tiin Assembly Session lamah Ambulance 3 lei nan cheng nuai 48 hmang anga chhanna pek an nih laiin MNF thuchhuah atanga a man tak tak kan hriat theih tak chu Rs. 46,57,500 niin a inthlauhna pawh Rs. 1,42,500 a nih thu an tarlang a ni.

Hei bakah hian zawhna chhanna ah ‘Bullet Thermal Camera’ leh ‘Handheld camera for Fever detection with tripod’ tih bak tarlan a nih loh laiin MNF Party thuchhuahah chuan bungraw dang (accessories) – PoE switch leh Workstation, man to tak tak turte chu tarlan belh a ni thung niin ZLP chuan an sawi a, Infrared Thermal Sensor 475 (nos) an lei pawh Session chhanaah hian Rs. 31,43,003/- anga tarlan a nih laiin Finance Department-in Health Department an endikna ah erawh chuan Rs. 30,89,732/- niin Rs. 53,271/- laiin a inthlau niin an tarlang a ni.

Assembly Session chhanna ah vek hian NHM in NEC atanga sum dawn an hmanna ah Rs. 3,79,99,871/- (Grand Total) lai seng anga tarlan a nih laiin, an sum hmanna a mal te te a belhkhawm chuan Rs. 5,58,84,947 lai a tling thung nia sawiin, a tawpa sum an hman zat an ziah (Grand Total) leh an belhkhawm inthlauhna ringawt pawh cheng nuai 178.85 a tling niin an sawi a. Infrared Thermal Sensor leh Standard Q Covid19 Ag Test Kit an leina rate leh sen zat pawh eng tikawng mahin a inmil thei lo bawk niin an sawi.

ZLP chuan Assembly Session a chhanna an dawnah siamthat ngai a awm chuan a hnu lawkah a tihdikna an dawng thin nia sawiin, Health & Family Welfare Department atanga tun thlenga tihdikna an dawn theihloh laia June 18, 2021-a MNF thuchhuah ah sum hmanna dik tak, nikhat chhunga an hmu nghal thei leh si chuan an ngaih a ti tha lo tih an sawi a. “MNF party lam hian sawrkar sum hman dan an hre ta rau rau, cheng nuai 178 chuang laia sum hmanna inmil lo tihdikna leh sawrkar aiawha thupha chawina rawn tarlang nghal turin kan phut tlat a ni,” an ti bawk.

Comments

Chhiar Hlawhte