BJP in mipui bum tumna ah an ngai tih an sawi

BJP Mizoram Pradesh chuan RT-PCR khawl chu thil bun harsa tak nia an hriat loh thu sawiin, Lunglei-a RT-PCR khawl bunna tur sawrkar in a buaipui dan chu mipui bum tumna ah an ngaih thu an sawi bawk.

BJP Mizoram Pradesh Spokesperson K. Laldinthara chuan Inrinni khan Aizawl a BJP Office, Atal Bhawan-ah thuthar thehdarhtute kawmin he thu hi a sawi a, RT-PCR bun mai a harsat thu State sawrkar lamin an sawi reng avangin, tunhnai khan Central Agriculture University (CAU) hnuaia College, Selesih-a RT-PCR an hman dan leh an bunna hmunte an tlawh thu sawiin, “Helai mithiam te’n an lo sawi danin RT-PCR hi Room zau pangngai ve deuhah chuan harsa lo taka bun mai theih niin a lang,” a ti a. “High Court lamin Lunglei RT- PCR dinna tur chungchang a thupek a tichhuah avangin chawpchilh takin RT-PCR bunna tur, insakna tur a han lai rum rum a. Ruahmanna state sawrkar in a siam ang hi chuan, a rang thei ang ber a chhun zan zawm a bei pawh nisela, hun a la duh rei dawn hle a. Hei hi mipui bum tumna mai niin alang a, a nihna takah chuan DoNER/ NEC-ah a sakna tur an dil mek chauh a ni,” a ti bawk. 

COVID sample lakte vawnthatna chungchanga harsatna awm nia sawi pawh thil harsa nia a lan loh thu sawiin, Sample an lak, -20C vela vawn reng ngai chu hautak hle anga tarlan pawh thu belhchian dawl lutuk lo nia sawiin, Mizoram chhunga Vety College-ah hian endik tur vawn thatna khawl, -80 C thlenga tih vawh theih engemaw zat an kawl a, corridor-ah te bun mai mai niin a sawi bawk.

BJP Mizoram spokesperson K. Laldinthara chuan Mizoram District hrang hranga sawrkar damdawi In 11 bakah ZMC leh Kulikawn Hospital-ah PM Cares Fund hmangin Oxygen plants bun a ni dawn tih pawh he hunah hian sawiin, he Oxygen Plants hi State sawrkarin a dil pawh a nih loh thu leh, Central sawrkar-in min rawn ruahman sak a nih thu a sawi a, State pachhiat leh harsatna tawk mai thei dinhmuna kan din vanga pek kan ni tih a sawi lang tel bawk.

PM Cares Fund atanga ruahman ang chuan khum 300 awmna ZMC tan hian minute tina Oxygen litre 300 (Litres Per Minute (lpm)) pechhuak thei khawl bun a ni dawn a, khum 270 Aizawl Civil Hospital tan minute tina litre 2000 Oxygen pe chhuak thei bun a ni ang. Heng bakah hian Kulikawn Hospital - 50 beds/300 lpm, Champhai - 100/500 lpm, Hnahthial - 30/250 lpm, Khawzawl - 30/250 lpm, Kolasib - 60/250 lpm, Lawngtlai - 50/250 lpm, Lunglei - 150/1000 lpm, Mamit - 100/500 lpm, Siaha - 100/500 lpm, Saitual - 30/250 lpm leh Serchhip -60/250 lpm theuh a bun dawn a. ZMC lam hian Oxygen Plant an neih sa avangin an Plant hmuh tur hi a tet phah niin a sawi bawk.