Sawrkar in thuneihna a pek piah lamah Dan leh thupek siamchawp tur a ni lo tih sawi

Serchhip District Bawrhsap chuan Guwahati High Court Aizawl Bench in Judgement & Order a siam angin mi tumahin sawrkar in thuneihna a pek ang piah lamah dan leh thupek an siamchawp tur a ni lo tih a sawi.

Hemi chungchanga Zirtawpni kalta-a thuchhuah a tihchhuah ah Serchhip District Bawrhsap, Kumar Abhishek IAS chuan Guwahati High Court-in WP(C) 37 of 2020 chungchanga June 9, 2021-a Judgment & Orders (Thutlukna leh thupek) a chhuah angin COVID-19 hrileng dona kawnga inkaihhruaina kenkawh kawngah Mizoram State Sawrkar in inkhuahkhirhna Dan a siam piah lamah Local Level Task Force/Village Level Task Force-ten inkhuahkhirhna dang lo siam a rem loh thu hi a tarlang a. Guwahati High Court thupek, Mizoram Sawrkar-a Disaster Management & Rehabilitation Department-in lehkha (No.B.13021/121/2020-DMR, dt.11.06.2021) hmanga DC/Chairman, District Disaster Management Authority a hriattir angin High Court thutlukna leh thupek hi Serchhip District huamchhunga VLTF zawng zawngten zawm nghal tur a ni tih a tarlang bawk.

Hei bakah hian District Bawrhsap thuchhuah chuan State Disaster Management Authority (SDMA)/District Disaster Management Authority (DDMA)-in thupek an chhuah kalh zawngin Village Level Task force (VLTF) ten an thuneihna piahlamah Curfew leh Lockdown te puan loh tur a nih thu pawh tarlangin, Tu te emaw COVID-19 test luih tirte pawh High Court chuan Sawrkar Dan siam kalh a nih chuan tih loh tur a nih thu a sawi bawk a. Hnam bil, Chi leh Sakhaw dang vuante inkara inthliarhranna leh innghirnghona awm thei zawnga sawrkar thupek kal pel-a khuahkhirna siam loh tur a nih thu leh hetiang hi India Danpui Article 14-na bawhchhiatna niin, Indian Penal Code (IPC) section 153-A hmanga hrem theih a nih thu a tarlang a. Tumahin Sawrkarin thuneihna a pek ang piah lamah dan leh thupek an siamchawp tur a ni lo tih pawh tarlangin, “Curfew leh Lockdown te lo puan ngawt tur a ni lova; VLTF zawng zawngten State Sawrkar-in inkaihhruaina Dan a siam ang chauh zawma kenkawh tur a ni,” tiin hetiang laka fihlim turin Serchhip District chhunga VLTF te chu a hriattir nghal bawk a ni.