Packaged Drinking Water (ZoAqua) lalet turin ti

Directorate of Health Services-a Joint Director (Food & Drugs) chuan ZoAqua Packaged Drinking Water siamtu MZ Agencies chu December, 2020 hnu lama an thil siamchhuah te lalet leh vek turin a ti.

Hemi chungchanga Joint Director (Food & Drugs), Deputy Commissioner of Food Safety ni bawk in thuchhuah siama a tarlan danin Packaged Drinking Water (ZoAqua) thalo tunhnaiah hmuhchhuah a awm thu leh mit lawng-a hmuh theihin a nawi tam tak a awm thu an tarlang a. Hei hi Social Media-ah hmuh theihin thehdarh a nih bakah a siamtute pawhin Social Media-ah vêk thupha chawina an chhuah hmuh zui a ni bawk tih an tarlang.

Hemi chungchang hi FDA Mizoram chuan chhui nghalin, ZoAqua Packaged Drinking Water siamtu, MZ Agencies, Sihhmui hi an FSSAI licence a thih hnuah renew ni lovin FSSAI licence renew turin Bureau of Indian Standard (BIS) Certificate an renew a ngai a, chu pawh chu an renew lo bawk a. Food Safety & Standard Act, 2006 and Rules/Regulations angin, valid FSSAI licence leh BIS Certification nei lovin Packaged Drinking Water siamchhuah theih a ni lo, an ti.

Hetiang a nih avang hian MZ Agencies, Sihhmui hi Packaged Drinking Water siam thei an ni lova, Social Media lama April, 2021-a an siama thil thleng palh anga an sawi pawh an licence a thih hnu daih a nih avangin dan bawhchhia in an siam tihna a ni tho tih an tarlang a. April 2021 hnu lamah erawh an siam zawm tak loh thu leh, an licence renew a nih hma chuan an siam zui tawh tur a ni lo bawk tih an tarlang a. An siamsa Bazar-a la awm, December 2020 hnu lama siam zawng zawngte chu MZ Agencies hian a lalet leh vek tur a ni, an ti bawk.