Bawrhsap in hri leng dona a hmalakna sawipui

Kolasib District Bawrhsap, Dr. H. Lalthlangliana chuan nimin khan thuthar thehdarhtute kawmin hrileng dona kawnga hmalakna hrang hranga mipuite hriat tur pawimawh te a sawipui.

He inkawmna a Pisa a neih ah hian Kolasib District Bawrhsap chuan Kolasib District chhungah ni 20 kalta chhunga Covid-19 kai hmuhchhuah thar zat atanga chhutin nitin mi 17 vel kai thar ang vel a nih thu sawiin, inkharkhipna June 30 thleng pawhsei ah inkhaihruaina khauh leh zawka kalpui a nih theih nan ruahmanna siam a nih thu a sawi a. Inkaidarhna thenkhat chu nitin mamawh phur lirthei khalhtute khaw chhung a an din thin vang nia a lan thu sawiin, hetiang a thlen tawh loh nan khaw dai-ah inthiarna hmun leh tui te ruahman in nitin mamawh phur lirthei chawlhna tur hmun engemawh zat siam a nih thu a sawi bawk.

Mizoram sawrkar chuan Jordan Home, Sethawn, tuna Covid Care Centre atan a hman mek chu Covid-19 hri kai zinga ruihhlo ngaite enkawlna turin a ruahman tih pawh sawiin, tunah hian mi 178 awm mekin Sawrkar ruahmanna anga Mizoram chhunga hri kai zing a ruihhlo ngaite enkawlna bik tur a kalpui thuai tum a nih thu a sawi bawk.