Lenkawl

Krishi Vigyan Kendra (KVK) Serchhip District, North Vanlaiphai chuan nimin July 25, 2024 khan 'PM 100 Days Programme on Diversification Programme on Oilseeds during Kharif 2024' pualin North Vanlaiphai-a Badam (Grountnut) chingtute nen Field Day an hmang.

Mizoram Police chhunga Rank hrang hrang a hna thawk tha mi 59 te hnenah Mizoram DGP chuan nimin khan Ati Utkrisht Seva Padak leh Utkrisht Seva Padak chawimawina tangkapui a hlan a, Serchhip District atang pawhin he chawimawina dawng hi an awm a ni.

Chief Minister leh Serchhip bialtu MLA, Lalduhoma chuan Serchhip leh a chhehvel-a Lo leh huan nei (farmers) te tan Community Radio Station din ve theih a nih chuan a tangkai a rin thu a sawi.

Nimin khan Serchhip-ah District Level Committee on Swachhata Green Leaf Rating on Hospitality Facilities chu thukhawmin an hmalakna tur hrang hrang an sawiho.

Serchhip Dinthar Veng leh Serchhip Kawnpui VC Area te chu African Swine Fever (ASF) hri lenna hmunah puan a ni ve leh ta.

Serchhip-a Fisheries Department chuan kar kalta lama Tuikum Cluster-a Sangha chi (note) an sem hnuah nimin khan Serchhip-ah Sangha chi hi an sem a, kumin hian Sangha note hi pakhat Rs. 1/- a khul tir niin Thenzawl leh Hrangturzo Cluster-ah sem leh tur a ni ang.

Mizoram Rural Bank (MRB) Baktawng Branch te hmalakna in nimin khan Chhuanthar Tlangnuam ah sum leh pai leh a enkawl dan chungchang inhrilhhriatna, Financial & Digital Literacy Campaign neih a ni a, MRB Chairman Sheryl L Vanchhong bakah RBI aiawh Pankaja Borah, DGM & OiC NABARD leh Zonunthari, Joint Secretary, Art & Culture ten an hmanpui a ni.

Mizoram sawrkar chuan Mizoram sawrkar hnuaia Contractor hniam ber, Class IV Contractor te hna thawh theih chin a tisang a, a hma lama cheng nuai 50 chin thawk thei khan cheng nuai 250 chin an thawk thei tawh dawn a, a punna hi za zela 400 lai a ni.

Champhai Police-te chuan niminpiah khan Khankawn Police Check Gate leh Zotlang inkar ah Myanmar atanga dan loa kuhva rah phurh bag 420 chu lirthei 8 atangin an man a, heng kuhva rah te hi kg. 28,900-a rit niin Rs.  87,88,500 man nia chhut a ni.

Zokhawthar kaltlanga Myanmar atanga India ram-a bungraw lakluh te chu nimin khan dan tan a ni ta a, Zokhawthar VCP Lalmuanpuia chuan Zokhawthar leh Khawimawi thlunzawmtu Lei chu nimin khan bungraw lut chhuak thei lo tura khar a ni tih sawiin, bungraw kai theihna dang pawh khar a ni bawk a. Engtia rei nge khar a nih dawn tih a hriat loh thu leh mihring veivak tur erawh dan an ni lo tih a sawi bawk.

Mizoram sawrkar in Minister, MLA leh Group 'A' Officer chin te Ration Buhfai dawng thei lo tura hma a lakna, 'Not Entitled for Ration (NER) Card' a kalpui mekah Kolasib DCSO Office ah Group 'A' Officer pahnih in an Family Ration Card an thehlut tawh a, Minister, MLA leh Group 'A' Officer te hian an Ration Card hi Supply Office ah thehlut mahse, pekchhuah leh an ni anga, Document pawimawh atan kawl in, a tulah an hmang leh thei ang. Ration Card ah chuan Sawrkar atanga Supply Buhfai leh thildang la ve theilo turin chhinchhiahna siam sak an ni ang. Ration Card thehluh hun hi tun thla tawp thleng hawn a ni.

Lok Sabha MP Richard Vanlalhmangaiha chuan nimin khan Delhi-ah Civil Aviation Minister Ram Mohan Naidu Kinjarapu chu hmuin Mizoram State mamawh te a thlen a. Mizoram-ah Airport pakhat chiah a awm avanga indaihlohna a nasat thu leh Mizoram hmun hrang hrang atanga a panna kawnga harsatna an tawh nasat thu a sawi a. A bikin Mizoram chhim lama Airport siam chu a tul thu leh a hmunhma vel pawh engemaw chen hmalakna a awm tawh tih a sawi a. Civil Aviation Minister hian a hmunhma a ngaihpawimawh thu sawiin, Airport hmun tur hi a awm thei a nih dawn chuan hmalak a inhuam thu a sawi a ni.

Chhiatrupna thleng palh thei lakah Mizoram dinhmun zirchiang turin Japan International Corporation Agency (JICA) leh National Disaster Management Authority (NDMA)-a mithiam te chuan Mizoram an rawn tlawh a, nimin khan Disaster Management & Rehabilitation Department changtu Minister K.Sapdanga chu a Office-ah kawmin JICA leh India hmarchhak-a State hrang hrang te nen kum 2026 thlenga thawhho dan turte an sawiho a. JICA-te hian Mizoram leh India hmarchhak State hrang hrang ten khuarel chhiatna hrang hrang an tawrhna a lo ziaawm theih nan Technical Support an pe dawn a ni. An cham chhung hian Aizawl leh a chhehvel a khuarel chhiatna/chhiatrupna thlenna hmun hrang hrangte leh hmun himlo laite an tlawh nghal ang.

Indian Oil AOD, State Office-a Chief General Manager (LPG) DP. Vidyarthy chuan nimin khan Chief Minister Lalduhoma hnenah Gas bur thar (composite cylinder) a hlan a. Heng bur a hlan te hi Cabinet Ministers te hman tur niin Chief Minister leh Supply Minister hnenah an hman tur bik an lo pe tawh a ni.

State Task Force for Immunisation (STFI) chu nimin khan thukhawmin Mizoram District hrang hranga hri danna pek (immunisation) kawnga hmalaknate leh programme hlawhtlinpui tawhna te an thlirho.

Union Minister of Information and Broadcasting Aswini Vaishnaw chuan IIMC Aizawl-a Apna Radio Station din thar chu India Act East Policy atana mellung pawimawh tak a nih thu a sawi.

Nimin khan Durtlang North-a ICFAI University-ah ‘International Seminar on Mizo Tobul Chhuina (Tracing the History and Origin of the Mizo People)’ neih a ni a, Art & Culture Minister C. Lalsawivunga chuan a hmanpui a ni.

Parliament thutkhawm neih mekah Mizoram Rajya Sabha MP K. Vanlalvena chuan rampawn atanga Kuhva leh Sawhthing lakluh tihtawp a phut thu a sawi.

Chief Minister Lalduhoma chuan mipui ten rilru thar puin sawrkar thar an siam tawh tih sawiin, “Huaisen takin, langtlang leh huapzo rorelna kalpui hi kan tum tlat a ni,” a ti a. Aikal lak an tihtawp dawn thu pawh sawiin, Non Practicing Allowances (NPA) pawh dan ang taka kal an tum thu a sawi bawk.

PARTY POLITICS LEH CORRUPTION - Rev. Dr. Zaichhawna Hlawndo

Mizo Zirlai Pawl (MZP) Sub-Hqrs. Thenzawl chuan kumin a HSLC leh HSSLC Exam a titha Mizo Zirlaite hnenah nimin khan chawimawina hlanin Supply Minister B. Lalchhanzova chuan he hun hi a hmanpui a ni.

Serchhip District-a Village Council pahnih, Serchhip Chhim Veng leh New Serchhip North VC-a by-election neih tur inbuatsaihna atan nimin khan Draft Electoral Roll tarchuah niin inthlanna neih hun tur erawh State Election Commission (SEC) Mizoram in a hranin a la rawn ruahman dawn a ni.

National Highway-54 laihzauh leh siamthat hna thawh mekah Furpui lo thleng in kawng a tihchhiat leh hemi avanga harsatna thleng te chu nimin khan District Bawrhsap hovin sawiho a ni.

Kumin chhungin Serchhip District-ah African Swine Fever (ASF) vanga Vawk thi 1629 awm tawhin Vawk 4219 suat a ni tawh bawk.

Serchhip District Cricket Association (SEDCA) President nilai HD. Lalhmachhuana (Tutea) S/o HD. Rosanga (L), Serchhip AOC Veng chu nimin zing dar 1:50 khan Lungphuchawl in a boral a, kum 50 mi a ni. Tutea hian a nupui leh a fa pakhat a kalsan a ni.

Serchhip IOC Veng atanga P&E Veng panna kawng, Addl. SP Quarters leh Tlangnuam peng inkar leimin avanga siamthat hna thawh mek chu Vawiin hian hna thawh chhunzawm a ni leh dawn a. Hei vang hian Vawiin, July 25, 2024 zing dar 10:00 atanga chawhnu dar 1:00 chhung hian he kawngah hian lirthei eng chi mah tlan phal a ni dawn lo a ni.

Lawngtlai District chhunga sawrkar Department hrang hranga hotute tan nimin khan Lawngtlai District Legal Service Authority leh District Administration Office, Lawngtlai bultumin July 1, 2024 atanga hman tan The Bharatiya Nyaya Sanhita, 2023 (BNS), The Bharatiya Nagarik Suraksha Sanhita,2023 (BNSS) leh The Bharatiya Sakshya Adhiniyam, 2023 (BSA) chungchang zirhona neih a ni a, he hun hi Lawngtlai DC Cheemala Siva Gopal Reddy IAS chuan hmanpuiin Resource Person atan C. Lalremsanga, Judicial Magistrate 1st Class chu hman a ni.

ZPM Thalaite chuan PWD changtu Minister Vanlalhlana hmalakna a Darlak leh Tuidam inkar kawng siamtha tura chak taka hmalak mek a ni chu lawmawm an tih thu an sawi a. He kawng hi Ministry of Roads Transport & Highway hnuaia mi NH-44A/108 a nih thu sawiin, “He kawng  siam tur hian Contractor atan M/s Gayatri Project Limited te thlan an ni a, hnathawh muan avang leh hna a that tawk loh avangin nikum August 24 khan an Contract tihtawp sak a ni,” an ti a. He kawng a hna thawh tur la awm (balance work) thawh zawhna tur hian estimate siam that a nih thu leh One Time Improvement atan pawh thehluh a nih thu sawiin, hemi nghah chhunga kawng chhe zual siamna atan cheng nuai 101.90 ruahman a nih thu an sawi bawk.

Rural Development Minister Prof. Lalnilawma chuan niminpiah khan Union Minister for Rural Development Shivraj Singh Chouhan leh Jal Shakti changtu Minister CR. Patil te kawmin Mizoram mamawh hrang hrang a thlen a. Mizoram thlai tharte hralhna tha zawk a awm theihna tura hmalakpui tur te, Mizoram tan Centre of Excellence for Mushroom chungchang te, Huan leh zau inkalpawhna tur chungchang leh Saitual District tan a Krishi Vigyan Kendra din sak tur bakah MGNREGA - Cluster Facilitation Project (CFP) hnuaia hnathawkte hlawh la hmuh loh chungchang te a thlen a. Cyclone Remal in Mizoram a tui pump khawl a tihchhiat thu te leh harsatna hrang hrang thleng te chu Jal Shakti changtu Minister hnenah a thlen bawk.

Mamit District chhungah zirna kawnga hmasawnna an neih theih nan District Education Committee chu nimin khan an Chairman leh Mamit DC Jacob Lalawmpuia hovin DC office-ah an thukhawm a, Mamit District chhunga awm tur zirtirtu hmundanga Attach chungchang te, Aikal lak tihtawp chungchangte leh PMJVK hnuaia Sport Complex W. Phaileng leh Mamit Luangpawl-a sak mekte chu State Sport Council te biakrawn a, zirna kawnga hmasawnna atana hman tangkai tel dan zawn nise an ti a, hmasawnna tha zawk a awm theih na'n rawtna hrang hrangte chhawpchhuaha sawiho zui a ni bawk.

Lunglei Municipal Council (LMC) huam-chhunga bawlhhlawh tawih thei lo paih zinga plastic lam chi awm zat leh a chi hrang dinhmun endikna leh zirchianna chu kalpui tan a ni a, he zirchianna hi tun thla ni 29 thlengin neih a ni ang. Kum tina Plastic Waste Annual Report thehluh thin chu zirchianna mumal a awm lo thin nia a lan bakah, vawi khat lek hman chi sarang (single use plastic) thenkhat hman khap a nih tak bawk avangin Ministry of Environment, Forests and Climate Change chuan Solid Waste Management Rules a siam tha a. He dan thar kalpui tur hian Central Pollution Control Board chuan Standard Operating Procedure (SOP) duangin, Mizoram-ah pawh kalpui a ni a. He SOP zulzui hian Urban Local Body pahnih (Aizawl Municipal Corporation & Lunglei Municipal Council) leh Village Council/Gram Panchayat thlan bikahte bawlhhlawh atanga plastic hman dan endikna hi kalpui mek a ni.

Damdawi In bakah Clinic leh Healthcare Facility zawng zawngte Medical Waste sawng-bawlna hmun, Common Bio Medical Waste Treatment Plant chu nimin khan UD&PA Department changtu Minister K. Sapdanga chuan a hawng.

Environment, Forests & Climate Change (EF&CC) Department chuan dan lova Sawkar hmunhma tichhe zawnga Bethlehem Vengthlang mi thenkhatte hmalakna chu an dem thu an sawi.

Mizoram State Board for Wildlife (SBWL) thutkhawm chu Chief Minister Lalduhoma hovin nimin khan neih a ni.

Disaster Management & Rehabilitation Department (DM&R) Aizawl in a chhinchhiah danin, kumin a khuarel chhiatna hrang hrang thleng avangin Aizawl khawpuiah chenna In chhia 1087 a awm.

Information Technology (IT) hmang tangkai Department leh Office te hnena nimin khan ‘Government Online Excellence Awards, 2024’ hlan a ni a, he hun hi Chief Minister Lalduhoma chuan hmanpuiin Serchhip DC Office pawhin lawmman a dawng a ni.

Mizoram-a Village Council 16-a by-election neih tur atan Vawiin hian Electoral Roll ennawn hna thawh tan a ni dawn a, heng VC 16 zingah hian Serchhip-a Village Council pahnih a tel a ni.

Serchhip District-a Vawk hri, African Swine Fever (ASF) leng chuan ziaawm lam ala pan thei tak tak lo niin a lang a, nimin khan ASF vanga Vawk thi 32 lai a awm leh a ni.

Thenzawl leh Chalkhankawn inkar World Bank Road-a leimin thenfai hna chu Vawiin hian PWD ten an thawk chhunzawm leh dawn a, hei vang hian lirthei kaltlang theih hun tur pawh ruahman leh niin zing dar 7:00 atanga chawhma dar 10:00 thleng kawng hi khar a ni anga, Chawhma dar 10:00 atanga chawhma 11:00 thleng kawng hawngin dar 11:00 atanga chawhnu dar 1:00 thleng khar leh a ni ang. Chawhnu dar 1:00 leh dar 2:00 inkar-ah he kawng hi hawngin chawhnu dar 2:00 atanga tlai dar 5:00 thleng khar leh a ni anga, tlai dar 5:00 hnu lamah hi chuan kawng hawn chhunzawm a ni tawh ang.

Thla thar August 15-a India Independence Day lawmna Serchhip-a neih turah khuallian ni turin LAD Minister C. Lalsawivunga chu ruat a ni a, Serchhip-a he ni hman dan tur chungchang hi tunkar Zirtawpni khian ngaihtuah tur a ni ang.

Mizoram Electricity Regulatory Commission (MERC) din thar lawmna chu nimin khan Aijal Club-ah neih niin P&E Minister F. Rodingliana chuan a telpui a, Electricity Act 2003-in a sawi angin Electricity Regulatory Commission chu State ah din ngei a ngaih thu a sawi. Mizoram sawrkar thuchhuak angin nimin, July 23, 2024 atang khan State Commission thar, Mizoram Electricity Regulatory Commission (MERC) hi a ding tan a, kum 2004 atanga Manipur State nena thawhhona Joint Electricity Regulatory Commission (JERC) chu inremna awmsa anga a tawp tak avangin nimin atang khan State mal angin MERC hi a ding tan a ni.

ZPM Party chuan Chief Minister Lalduhoma hmalakna a Mizoram-a khuarel chhiatna tuarte leh kan thenawm ram atanga Mizoram a inhumhimna zawnga lo kal mi 45,000 vel ei tur buhfai leina atan Central sawrkar in cheng vbc. 5 a rawn pe chu lawmawm an tih thu nimin khan thuchhuah siamin an tarlang a, heng mite hi sawrkar chuan a ngaihsak zel dawn tih an tarlang bawk.

Hachhek Constituency Development Committee (HCDC) chuan Hachhek Constituency huamchhunga Darlak leh Tuidam inkar kawng chhe lutuk chu lungawi thlak an tih loh thu sawiin, a chhe lai te a rang lama siamsak turin Mizoram sawrkar chu an ngen a. Tun thla chhung ngeia hmalakna leh siamthat tumna a awm lo a nih chuan a tul anga hmalak an tum thu an sawi bawk.

Indo-Myanmar Border Trade Point, Zo-khawthar-a bungraw lut leh chhuak te chu naktuk, July 25, 2024 atang hian khuahkhirh a ni dawn nia thudawn a ni a, mihring vei vak khuahkhirh tumna leh dan anga bungraw lakluh te erawh dan tumna a awm lo nia thudawn a ni bawk.

Aizawl West-II bialtu MLA leh Sports Minister Lalnghinglova Hmar chuan nimin khan a bial chhunga Sawrkar School-a Zirtirtute chu Vaivakawn-a Cultural Centre cum Auditorium ah a kawm a, Zirtirtu hna chu hna zahawm leh pawimawh tak a nih thu sawiin, zirlaite nun kawng dik kawhhmuh kawng ah hunbi vawn dik ngaih pawimawh hmasak a tul thu a sawi a. Zirlaite harsatna hriatpui turin leh an mamawh ang a kaihruai tur chuan Zirtirtute leh Zirlaite chuan hun an hman ho tam a pawimawh thu a sawi bawk. He hunah hian School hrang hrang atanga Zirtirtute chuan an School dinhmun leh harsatna an neih theuhte sawi zauin hmalakna kalpui dan turte sawiho a ni bawk. He hunah hian Aizawl West-II Bial chhunga University Exam 2023-24 a Topper te hnenah chawimawina hlan an ni bawk.

Mizoram Cooperative Apex Bank Ltd. (MCAB) Board of Directors Meeting chu nimin khan an Chairman Lalnunsanga kaihhruaiin neih a ni a, Mara Autonomous District Council nena MoU an duan chu pawmin, he Memorandum of Understanding-ah hian MADC hnuaia thawk te'n Apex Bank-a Personal Loan, Education Loan leh Housing Loan-te bithliah chin awma an lak theih dan tur te leh MADC a sum awm te chu Apex Bank kaltlang zela khawih a nih dan turte thuthlung fel taka ziah a ni. Apex Bank hian Deposit a dawn atanga Loan a pekchhuah, CD Ratio chu za zelah 79.78% a ni mek a. Tun 1st Quarter-ah khan Loan cheng nuai 4,302.38 an pechhuak a ni. Tunah hian MCAB hian Branch 28 neiin ATM Booth hi 37 an nei bawk.

Aizawl Municipal Corporation (AMC) Ward No. VI-a bye-election neih turah ZPM Party chuan H. Lalremtluanga chu an Candidate tur a nih thu nimin khan Aizawl-ah an party Office-a an puang a, he Ward-a Corporator chu a boral avangin by-election hi neih a ngai dawn a ni. AMC Ward No. VI hian Canmari West, Edenthar leh Hunthar Veng te a huam a, ZPM Vice President W.Chhuanawma chuan he inthlanna neih tura an Candidate tur hi nimin khan puangin an President Lalliansawta chuan Pathian hnena hlanna hun a hmang bawk. ZPM Candidate tur H. Lalremtluanga hi Zirna lamah BA English niin MSACS hnuaiah Outreach Worker, SIPMIU ah Assistant Programme Director leh School ah Vice Principal hna te a lo chelh tawh a ni.

MNF Legal Board chuan Chief Minister Lalduhoma’n a lo tlangaupui tawh ang ngeiin CBI hnenah General Consent pe leh nghal tura ZPM sawrkar an phut thu an sawi.

Mizoram Combined Civil Services, 2023 Batch te tana Mandatory Foundation Training chu nimin khan zofelin ATI Aizawl-ah Training kharna hun hi hman a ni.

Ruihhlo dona atana Video/Reels siam intihsiakna a lawmman chu nimin khan semin Ruihhlo Do Monitoring Apps chu tlangzarh nghal a ni bawk.

Supply Minister B. Lalchhanzova hovin nimin khan a Office-ah Zomuantlang khuaa chengte Ration Card paihsak chungchang sawihona neih a ni.

School Education Minister Dr. Vanlalthlana chuan Mizo ziakmite chu Mizo history chabi kawltute an nih thu a sawi.

Social Welfare & Tribal Affairs, Women & Child Development Minister Lalrinpuii chuan nun bul tan tha leh turin tlai luat a awm loh thu a sawi.

Mizo Zirlai Pawl (MZP) General Hqrs. chuan July 31, 2024 ralhma ngeia Zirlai ten a thlawna lehkhabu an dawn tur an dawng kim lo a nih chuan na taka hmalak nise an ti.

Leilet neitute buhhum tharchhuah leisak kawnga hmalakna 'Paddy Procurement Programme' chungchanga pawimawhte inhrilhhriatna hun chu nimin khan Agriculture and Farmers Welfare Minister PC. Vanlalruata hovin neih a ni.

Serchhip District chhunga Veng leh Khua 9 ah nimin khan African Swine Fever (ASF) vanga Vawk thi 51 a awm leh a, Thenzawl-ah Vawk 18 thiin Serchhip Chhim Veng-ah 14 leh North Vanlaiphai-ah 10 an thi a, East Lungdar-ah 3, Serchhip Hmar Veng-ah 2 leh Leng, Chhingchhip, Chhiahtlang leh New Serchhip South-ah pakhat theuh a thi bawk. Nimin vek khan Veng leh khua 12-ah Vawk 67 suat leh a ni bawk a, Lung-chhuan khua ah Vawk 17 zet suat leh a ni. Heti hian nimin thleng khan Serchhip District-ah ASF vang hian Vawk 1525 thi tawhin Vawk 4020 suat a ni tawh a, khaw 29 in ASF avang hian harsatna an tawk tawh a ni.

Serchhip District-a ri hriatna lama harsatna nei mi 51 te chu nimin khan a thlawnin Bengdar pek an ni.

Thenzawl leh Chalkhan inkar-a leimin chu Vawiin hian thenfai hna thawh chhunzawm leh a ni dawn a, hei vang hian lirthei tlan tlang theih hun tur ruahman a ni.

India hmarchhak-a Autonomous District Council sawm (10) hotute chu nimin khan New Delhi ah an inhmukhawm.

July 20-22, 2024 chhung khan New Delhi a Pragati Maidan-ah ‘International Agriculture & Horti Expo, 2024’ neih niin Horticulture Department chuan lawmman pakhatna an dawng a. He Expo-ah hian Horticulture Department chuan Mizoram chhunga thei leh thlai hrang hrang bakah thlai leh thei atanga thil siamchhuahte kengin an phochhuak a, mipuiin an hlut hle a ni. Horticulture Department hi Expo a tel ho zingah Horticulture lam thil nei tha ber a thlan niin lawmman pakhatna an dawng a, Horticulture Minister leh Officer ten he Expo hi an tlawh bawk a ni.

Mizoram Legislative Assembly Speaker Lalbiakzama chuan Chalfilh Bial chhunga Cyclone Remal avanga chhiatna tuartute hnenah nimin khan chhawmdawlna a hlan a, Speaker Office-a he hun hman ah hian khaw pasarih - Khawlian, Suangpuilawn, Hmunnghak, Sesawng, CTI, Phullen leh Tualbung-a Cyclone Remal in chhiatna a thlen kaihhnawiha an chenna In rauhsan mi 78 te hnenah chhawmdawlna ‘Hygiene Pack’ a hlan a, Hygiene Pack-ah hian nitin mamawh tlachawp chi 7 dahkhawm niin Formosa Foundation kaltlanga hlan a ni.

Labour, Employment, Skill Development & Entrepreneurship (LESDE) Department-ah Employment Registration ti mi 2,11,728 an awm tawh. LESDE Department in January ni 31, 2023 atanga hman tan theih tura a siam Employment Exchange (EmpEx) Portal-a chhinchhiah a nih danin Employment Registration ti mi 13,638 an awm tawh a, chung zinga 8135 chu mipa niin hmeichhia 5503 an awm bawk. LESDE hi Mizoram sawrkar hnuaia thalaite tha tihchakna (Youth empowerment) lama hmalatu a ni a, thalaite eizawnna tlak thiamna pek (Skill Training) te, Skill Competition te, Innovation leh Entrepreneurship Fair leh intihsiakna te an buatsaih thin a ni. EmpEx Portal hi Mobile application niin IOS leh Android hmangte tana download theih tura chhawpchhuah a ni.

Lok Sabha Inthlanpui neih a nih hnua Parliament Budget Session hmasa ber chu nimin khan neih tan a ni a, he thutkhawm neih tur atana inbuatsaihna atan hian niminpiah khan All Parliamentary Leader Meeting neih a ni a, he hunah hian Mizoram Lok Sabha MP Richard Vanlalhmangaiha chuan thu sawiin North East State te tana NLCPR 10% reserved thin a ni ang hian Corporate Social Responsibilty (CSR) Fund hi North East tan 10% reserved a nih theih nan tun Budget Session-ah hian sawiho tura chhawpchhuah ve ni se a duh thu a sawi a. Rajya Sabha MP K. Van-lalvena pawhin Cyclone Remal in May ni 28, 2024-a Mizoram a nuai avanga Aizawl khawpuia mi 30 thihna leh chhungkaw 40 chuang chenna In hloh an awm thu te, Quarry chim avanga mi 14 thihna te, July ni 2 a leimin avanga mi 3 thihna te bakah Monsoon ruah sur nasa avanga Mizoram hmun hrang hranga leimin in motor kawng a tihchhiat nasat thu te sawiin, Disaster Management & Rehabilitation (DM&R) Mizoram tana Fund pek belh a tul thu te a sawi bawk.

Nimin khan Nu pual thing pakhat phun beihpui thlakna, 'Ek Ped Ma Ka Naam and Plant4Mother Campaign' chu Sakawrhmuituai Tlang-ah neih a ni a, Social Welfare, Tribal Affairs, Women & Child Development Minister Lalrinpuii chuan a telpui a ni.

Aizawl khawpui chhunga P&E Department hmun pawimawh thenkhat leh hnathawh mekte chu Inrinni zing khan P&E Minister F. Rodingliana chuan a tlawh a. Minister hian Chite-a 33 Kv Sub-Station siam mek chu en in, chak zawka hnathawh anih theih dan tur Engineer te leh Contractor te a sawipui a. Kumin September thla ralhma a zawh hman tum turin a chah a ni. He Sub-Station siam mek hi NESIDS atanga hmuh niin transformer lian 10 MVA pahnih dah tur a ruahman a ni.

Excise & Narcotics Department changtu Minister Lalnghinglova Hmar hovin nimin khan Mamit-ah Ruihhlo Do beihpui thlaka thawhho dan tur sawiho a thutkhawm neih a ni.

Mualkhang Bottling Plant din thar lehna tur atana sanction order chu nimin July 22, 2024 khan Indian Oil Corporation Ltd. (IOCL) Dy. General Manager Z. Lumding chuan Supply Minister B Lalchhanzova hnenah a hlan.

Governor Dr. Hari Babu Kambhampati chuan nimin khan Aizawl-a Regional Institute of Paramedical and Nursing Sciences (RIPANS) tlawhin an dinhmun te a enpui.

Mizoram State Income Tax Officer Remthanga Gangte chuan Mizo mipuite tan Aizawl Income Tax Office chu kumin June ni 3 khan Bawngkawn Brigade hmunah hawn a nih thu sawiin, Tribal nih avanga sawrkar a thil tihfel ngai tifel si lova Income Tax pek loh rikngawt chu chhuanlam a tling pha lo tih a sawi.

Kawthalo titawp tura inzirtirna, Stop Diarrhoea Campaign kalpui mekah naupang kum 5 hnuailam awmna In tinah ORS leh Zinc damdawi sem a ni.

Serchhip Chanmari Vengthar-a cheng kum 4 mi, Isak Zodintluanga chu tuisa in a kan avangin nizan khan a boral a, Vawiin hian vuiliam a ni ang. Isak Zodintluanga s/o Anthony Lallawmkima te hian Zirtawpni khan Vawk talhin Vawk kawchhung an chhumna Bel-ah hnung zawngin Isak-a hi a tla lut palh a, Bel chhunga tui sa hian a taksa hnunglam chu nasa takin a kang a, Serchhip damdawi In panpui a nih hnuah ZMC panpui leh ni mah se nizan dar 6:40 vel khan a boral zui ta a ni. Isak-a taksa hi za zela 80 vel zet tui sa hian a kang nia thudawn a ni a, a kaiza leh a nghawng inkar bakah a ban vel te a kang nasa hle a, a ruang hi lumen a nih hnuah Vawiin hian vuiliam a ni ang.

Zirtawpni zan dar 11:00 vel khan Ramengmawia (21) chu a boral a, a thiante nen an insualna ah vanduaina tawkin a boral nia thudawn a ni.

Serchhip District chhungah kumin chhungin ASF vangin kumin hian Vawk 1490 zet a thi tawh a, Serchhip-a VC Area hrang hrangah ASF vang hian harsatna a thleng tawh a ni.

Serchhip District-a Keitum khua chuan Mizoram tana Weigthlifting Medal pathum latu an khaw nula, Zosangzuali d/o Lalrotlingi, Sikulpui Veng Keitum chu Inrinni khan Keitum-ah ropui takin an lo hmuak.

Serchhip Pastor Bial Kristian Thalai Pawl (KTP) te chuan kumin-a Bial Inkhawmpui-a an thurel tih hlawhtlinna atan Inrinni khan Serchhip District Hospital Blood Bank-ah thisen Unit 23 an pe a, thisen petute hi mipa 21 leh hmeichhia pahnih an ni. Serchhip Pastor Bial KTP hian thawh thum in thisen hi an pe dawn a, tun tumah hian Serchhip Kawnpui Branch leh Hriangtlang Branch KTP ten thisen hi an pe a ni.

Vantawng Group YMA hnuaia Vigilance & Monitoring Committte te chuan Inrinni khan Thenzawl Tualvungi Veng atanga Zote South panna kawng PCC-a siam hna thawh chu a hmun ah an enfiah leh a, helai hmuna hnathawh hi thla hmasa June 25 khan lo enfiah tawhin hnathawh chu a tha lo nia an hriat thu an sawi bakah siamthat ngai lai nia an hriat te siamtha leh turin thawktute chu an ngen a. Hemi ang hian Inrinni khan helai hmuna hnathawh te chu enfiah lehin kawng siam tawh chhe zualpui lai siamthat hna thawh mek te chu hna a tha in lungawithlak an tih thu an sawi a. An ngenna te ngai pawimawha kawng siam tha tawk lo nia an hriat te siamthat leh a ni chu lawmawm an tih thu an sawi bawk a ni.

Mizoram District hrang hranga Tan In 10 zinga Tan In 5-ah tang thei zat bituk aia tam an tang mek.

Tunlai hian Champhai District chhim lam, East Tuipui Assembly Bial chhunga khaw engemaw zat a tlangram loneitute chu Pangang puangin a timangang hle.

Zirtawpni zan dar 11:50 vel khan Darlawn Lungverhkawn-ah kangmei chhuakin chenna In pali a kang a, vanneihthlak takin mihring thi leh hliam an awm lo. He vanduaina thlenga In kang hi Assam Type pahnih leh Concrete building pahnih a ni a, kangmei hi Zadailova In (Assam Type), a hnuai lam mi pakhat luahlai atanga intan nia hriat ni a, he In luahtu hi a awm loh avangin kangmei chhuah chhan hi chiang taka hriat a ni lo bawk. Darlawn Lungverhkawn hi Darlawn khawchhung laili a awm a ni a, In sak pawh a in hnaih hlawm avangin kangmei chhuak hian a man chak hle a, darkar khat hnu velah In dang kang kai tur dangin an thelh mit a, bungrua cheng nuai 91.7 hu vel a kangchhia nia chhut a ni.

ZPM Thalaite chuan Zirtawpni kaltaa MNF Thalai ten Aizawl-a‘Dawt Bawm’ halna hun an hmang chu MNF President leh Chief Minister hlui Zoramthanga, MNF President atana an rintawk tawh loh zia leh a dawt sawi avanga MNF Party chu Zoram mipuite hnawl an nih zia an lantirna ah an ngaih thu an tarlang.

Lunglei District Bawrhsap R. Lalthazuala chuan Inrinni khan Civil Hospital Lunglei tlawhin an dinhmun a enfiah a, Civil Hospital Lunglei-a Ward hrang hrang leh Department/room hrang hrang te fanpuiin, khawl leh hmanraw chi hrang hrang dinhmun te, thawktu dinhmun leh damdawi In inrelbawlna kaihhnawih thil hrang hrang bakah an mamawh leh harsatna te Bawrhsap hnenah hian an lo thlen bawk a ni. Civil Hospital Lunglei-ah hian tun dinhmunah Senior Medical Superintendent hovin Doctor 33 an awm mek a. Psychiatrist tih loh chu Department zawng zawngah Doctor an awm kim a; Psychiatry Department pawh Clinical Psychologist hovin pangngai taka kalpui a ni bawk.

Chief Minister Lalduhoma hovin Zirtawpni khan Finance leh ZIDCO Officials pawimawh ten Chief Minister Office-ah sawrkar sum enkawlna chungchanga thil pawimawh an sawiho a. Chief Minister chuan hun reilote chhungin Mizoram sawrkar sum dinhmun a ziaawm chho viau nia sawiin, a lawmawm thu leh hei hi Finance Department thawktute inpekna vang a nih thu a sawi a. “Hmasawn zel tumin kan bei ang a, chumi atan chuan Vawiin-a kan sawi te hi a pawimawh dawn a ni,” a ti bawk. He hunah hian sawrkarin hnathawhna tur sum leh pai hun reilote chhunga pung awma Financial Institution lama dah theih dan (Overnight investment) chungchang te, Department tin Financial Data base neih thu te, sum leh pai vawn kawnga sawrkar thuchhuakin zawm a hlawh leh hlawh loh chungchang te sawiho a ni bawk.

Manipur (Churachandpur) leh Mizoram (Ai-zawl) inkara Helicopter Service chu kar hmasa Zirtawpni khan thlawh tan tir a ni leh ta.

Sports and Youth Services Minister Lalnghinglova Hmar chuan Union Sports Minister hnenah sawrkar laipui puihna a dil.

Lawngtlai District Bawrhsap Cheemala Siva Gopal Redd chuan Zirtawpni khan Mizoram chhimtawp-a awm Zorinpui tlawhin Zorinpui atanga Paletwa kawngpui laih hna thawk mek enkawltu IRCON International Ltd. hmalakna leh hnathawh chinte a hmunah a enfiah.

Bawngkawn Shalom Vengthar Welfare Committee chuan an Veng huamchhung Bawngkaw leh Durtlang inkar leimin vanga harsatna an tawh belh zel loh nan hmun hlauhawm laia ram neite License cancel sak turin sawrkar an ngen tih an sawi.

Industries ram huamchhunga dan lova awmte leh Allotment anga hma la lo te chu insasengna hun pek an ni dawn.

Hun engemaw chen Central Young Lai Association ten Myanmar-a bungraw lut tur an dan hnuah Zirtawpni atang khan bungrua thawnluh an remti a, Petrol, Diesel leh leitha erawh khauh takin an dan chhunzawm zel a ni.

Mizoram leh Manipur ten Electric ngaihtuahtu tur intawm an neih thin, Joint Electricity Regulatory Commission (JERC) for Manipur & Mizoram chu then a ni ta a. Er. Benjamin L.Tlumtea chu MERC Chairperson hna lo chelh lailawk turin tih a ni.

Serchhip Chanmari Vengthar-a cheng kum 4 mi, Isak Zodintluanga chu tuisa in a kan avangin zanin (July 21, 2024) khan ZMC-ah a boral.

Serchhip Teachers’ Association (STA) chuan nimin khan zirlai titha mi pathum te hnenah ‘STA Award’ an sem a, he Award hi Mizoram University Examination, 2024 a Govt. Serchhip College atangin Department of Chemistry a palina (4th rank) hauhtu K.Lalrindiki lehHSLC exam a Mizoram puma pasarihna Zomuansanga, Goodwill English Academy te hnenah hlan a ni a, STA Award hian pawisafai Rs. 1000/- leh thuziak a kengtel a ni.

Serchhip District chhunga Middle School zirlai naupang ten Science zirna tha zawk an neih theih nana ruahman ‘Mission Lab Wave’ chu nimin khan Serchhip DIET-ah School Education Minister Dr. Vanlalthlana chuan a hawng.

School Education Minister Dr. Vanlalthlana chuan nimin khan Serchhip-ah ‘Educator Enhancement Workshop’ hmanpuiin Zirna siamtha turin sawrkar chuan an theih ang tawkin hma a la dawn tih a sawi a. Zirtute pawh theihtawp chhuaha sawrkar hmalakna te thlawp turin a sawm bawk.

Nimin khan Serchhip District chhungah ASF avanga Vawk thi 32 chhinchhiah leh niin Vawk 101 zet suat leh a ni thung.

Serchhip Chhim Veng Village Council leh New Serchhip North Village Council-ah te by-election neih tur atana inbuatsaihna atan Electoral Roll siamthat hna chu thawh a ni dawn.

July 3, 1978-a Hreipui hmanga Keipui (Bengal Tiger) chekhlumtu Zadingi, Buarpui khua chu nimin khan kum 72 mi niin Cancer vangin a boral a, Vawiin hian vuiliam a ni ang. Zadingi hian a thing phurhna ah Sakei hi a chekhlum a, hei vang hian Huaisen lawmman, Shaurya Chakra dawngin a chanchin hi zirlaibu ah dah a ni.

Nimin khan Foundation Training for Combined Civil Service Probationers, 2023 Batch chuan Chief Secretary Renu Sharma chu Chief Secretary Conference Hall-ah an kawm a, Chief Secretary chuan ram tana thahnemngai leh rinawm tak a thawk tura lo fuihin, Mipui tan a hnathawk an ni tih hre reng turin a fuih bawk a ni. 

Labour, Employment, Skill Development & Entrepreneurship Minister Lalnghinglova Hmar chuan nimin khan New Delhi-ah Union Minister of Skill Development & Entrepreneurship Jayant Chaudhary chu hmuin Mizorama Skill Development hmasawnna tur kawng hrang hrang a sawipui a. Ministry hnuaia Skill hnathawh theih hrang hrang chu Mizoram nena inmil lo a tam thu Central Minister hi hrilhin, Mizorama hnathawh leh Skill chhawr theih mila Skill hmasawnna tur duansak turin a ngen a, Union Minister hian sawrkar laipui inhawnna te a lo hrilh bawk a ni.

Mizoram Legislative Assembly-a Committee on Government Assurances chu nimin khan Assembly House Annexe Building Committee Room-ah thukhawmin an Chairman, V. Malsawmtluanga chuan a kaihruai a, Committee on Government Assurances mawhphurhna; Assembly Session-a Minister-te’n assurance an neihte bawhzui a nih dan zirchiangin rawtna siam ngai ni a an hriatte an siam bawk. Committee on Government Assurances-ah hian Chairman bakah member dang panga an awm a ni.

Mizoram Legislative Assembly-a Public Account Committee (PAC) members te chuan niminpiah tlai khan an Chairman Lalchhandama Ralte hovin Mamit District Court an tlawh a, a dinhmun hrang hrang Building, Staff dinhmun, materials dawn leh Quarters-te a nih tur anga hman leh sak a ni em tih enfiaha kal niin Court Building duhthusama a len tawk loh thu sawichhuah a ni a, PAC zawhna hrang hrang an neih te chu Chief Judicial Magistrate (CJM) H. Lalduh-sanga chuan chhangin sawifiahna a nei nghal a,  PAC Members te'n Spot Visit neia an rawn tlawh chu lawmawm a tih thu a sawi bawk. PAC hian Mamit District Court  Office kal dan leh bungrua te a nihna tur anga hman leh enkawl a ni chu lawmawm an tih thu an sawi a ni.

MNF Thalaite chuan nimin khan Aizawl Vanapa Hall kawt-ah ZPM sawrkar hotuten dawt chi hrang hrang 100 an sawi nia an sawi chu lakhawmin an halral.

Aizawl Bawngkawn leh Durtlang Leitan inkar kawng huamchhung bika lei laih leh In sak phalna pek chungchanga AMC thuneihna chu Gauhati High Court, Aizawl Bench chuan a tihtawp sak rih.

Gauhati High Court, Aizawl Bench chuan Myanmar atanga kuhva rah tawlhruk thubuai chungchang chu Central Bureau of Investigation (CBI) chhuitir turin thutlukna a siam.

Lunglei Sazaikawn-a District Museum Lunglei sak thar chu nimin khan Art & Culture Minister C. Lalsawivunga chuan a hawng.

Mizoram Pollution Control Board (MPCB) leh State Medicinal Plants Board Mizoram, Directorate of AYUSH tangkawp chuan nimin khan Govt. J. Thankima College Northern Campus, Durtlang hmunah ‘Eco-Herbal Garden’ an din a. He hunah hian Govt. J. Thankima College Eco-Club zirlaite chu ramhmul damdawi thatna leh chin uar a pawimawhna zirtir an ni.

Assembly Deputy Speaker Lalfamkima chuan nimin khan NH-54/6 Sairang to Kolasib kawng thawmthat mek chu tlawhin, NHIDCL hotute leh Contractor te chu chak zawka hna thawk turin a chah.

Power & Electricity Minister F. Rodingliana hovin nimin khan a Pisa-ah chhimlama kawlphetha pek kawnga harsatna hrang hrang leh a chinfel dan tur bialtu MLA-te leh Power & Electricity Department Official-te chuan an sawiho.

Chief Minister Lalduhoma chuan sum leh pai an hmuh chhun chhun te fel fai leh daihzai taka hman an tum thu a sawi.

Mizoram Governor Dr. Hari Babu Kambhampati chuan KM 51.38-a thui Bairabi - Sairang New Line Project chungchang ah nimin khan Northeast Frontier Railway (NFR) Engineer-te chu Raj Bhavan-ah Review Meeting a neih pui.

Nimin July 18, 2024 thleng khan Serchhip District-ah African Swine Fever (ASF) vangin Vawk 1407 a thi tawh a, ASF vanga Vawk thi tamna ber Thenzawl-ah 441 a thi tawh a ni.

Power & Electricity Department-a thawk Lalmuansanga (55), Model Veng, Aizawl chu nimin khan thiin Electric Current-in a man avanga thi nia hriat a ni. Kan thudawn danin Lalmuansanga hi a thawhpui nen mimal hnen atanga complaint an dawn siam turin nimin khan Saikhamakawn-ah an kal a, a thianpa in Varanda light a that leh that loh a en laiin current-in lo manin a thi ta nia hriat a ni. Mit-a hmutu an awm loh avangin current-in a man dan chiah hriatchian a ni lo thung. Lalmuansanga hi damdawi In panpui nghal ni mah se damdawi In thlenpui a nih hi chuan a lo boral hman tawh a, nizan khan lumen a nih hnuah Vawiin hian vuiliam a ni ang. Lalmuansanga hi P&E Department-ah Muster Roll-a thawk a ni.

Mizoram-a rawn zin mek Union Minister of State for Agriculture and Farmers Welfare Bhagirath Choudhary leh BJP Mizoram State President Vanlalhmuaka te chu nizan hmasa khan Aizawl-a State Guest House-ah an inkawm.

Karleh-a NITI Aayog Governing Council thutkhawm New Delhi-a neih tur atana inbuat-saihna atan nimin khan Chief Minister Lalduhoma hovin CM Conference Hall-ah sawrkar mi pawi-mawh te an thukhawm a, he hunah hian NITI Aayog Governing Council hnuhnung berin a rel, Mizoram sawrkarin a bawhzui ngai te a bawhzui dan sawifiahi tun Council lo awm tura inpuah-chahna an neih dan a sawilan a ni a, Line Department ten an hmalakna an sawifiah bawk a ni. NITI Aayog hi Union Cabinet in kum 2015-a a din niin Prime Minister chu Chairman a ni.

Lengpui Airport kal zel dan tur ngaih-tuahtu ‘Working Committee to look into the Maintenance and Management of Lengpui Airport’ chuan an Chairman TBC. Lalvenchhunga, Adviser to Chief Minister (Finance & Planning) hovin Lengpui Airport an tlawh a, hmalak zel dan tur an sawi ho bawk. Working Committee hian July 31, 2024 ralhmain Sawrkar ah Lengpui Airport kal zel dan tur rawtna (recommendation) an thehlut ang. Adviser to Chief Minister hian Lengpui Airport-a hnathawh kal lai te a enfiah nghal bawk a ni.

Cooperation Department kaltlanga Kuhva Skop-na Darlak Cooperative Society-te tana siam chu niminpiah khan Mamit District Cooperative Officer (DCO) Lalthangfala chuan a tlawh a, helai hmunah hian kuhva bag khat Rs. 1200/-a leiin a Skop hnu hian bag khat Rs. 4200/- in an hralh leh thin a. Tunah hian Darlak Cooperative Society Ltd. hian kuhva bag 2000 vel skop tawhin a zatve vel an hralhchhuak tawh a ni.

Govt. T. Romana College, Aizawl chuan nimin khan Aizawl Vanapa Hall-ah Graduation Day-cum-Freshers’ Day hmangin LAD Minister C. Lalsawivunga chuan a hmanpui a, Zirlai pass chhuak thar te chu College atanga Pass leh Degree neih ringawt a tawk tawh lo tih hre tura chahin, “Thiamna tak tak (skill) kan neih a hun tawh a ni,” a ti a. “Keimahni tan, kan chhungkaw tan leh kan ram tana ti a, taimakna leh tumruhna nena kan beih a ngai a ni,” a ti bawk. Minister chuan an College Annual Magazine tlangzarhin Zirlai titha (Meritorious students) 17 hnenah Incentives Cash Award a sem nghal a ni.

Mizoram Legislative Assembly-a Public Account Committee chuan Law Department kaih-hnawiha CAG Report 2018-19 chungchang ah nimin khan Kolasib District Court an tlawh a, PAC hi an Chairman Lalchhandama Ralte chuan hovin MLA 5 an kal a, Kolasib District Bawrhsap Robert C. Lalhmangaiha leh SP David Lalthangliana bakah R. Vanlalena Kolasib District Judge ten an lo dawngsawng a. Kolasib District Court Conference Room-ah thawktute nen inkawmin an thu hriatfiah duh hrang hrangte an zawt a, hemi hnu hian Fast Track Court sak lai mek pawh an en nghal a, Engineer leh Contractor te nen an hnathawh dan leh an hna ti muangtu leh chak zawka hna a kal theih dan tur an sawiho bawk a ni. PAC te hian nimin chawhnu lam khan Mamit an pan leh nghal a ni.

Khawzawl District chhunga Lakhuihthei chingtu intelkhawm pawl, Tuichangral Organic Farmer Producer Company Ltd. te Lakhuithei thar zawrhchhuah runpui 'Pineapple Bonanza 2024' chu nimin khan Aizawl a Millennium Centre kawtzawl-ah neih a ni.