Posts

Showing posts from 2024

Latest News

Sazuk kaptu-a puh mi 5 te thubuai siam sak an ni

Image
Serchhip District chhung Sailulak rama Sazuk kapta a puh East Lungdar khaw mi panga te chu man an nih hnuah nimin khan Serchhip District Court-ah hruaiin Serchhip District Jail-ah khung an ni.

VC in hlawhfa rate bithliah

Image
Serchhip Town Joint Village Council (VC) thukhawm chuan hlawhfa rate bithliah tharin mipui te hnena hriatpuina lehkha pekchhuah thin man an siam thar bawk.

PYD dinchampha lawm

Image
Mizoram UPC-a Thalai pawl, Pentecostal Youth Department (PYD) Serchhip Bial chuan nimin khan an dinchampha vawi 63-na pualin Serchhip Sports Complex-ah intihhlimna hun an hmang.

Agri. Minister hnenah thlen

Image
ZPM Serchhip Block Thalaite chuan tunhnaia Serchhip-a Chapchar Kut hmanpui tura rawn kal Agriculture Department changtu Minister PC. Vanlalruata hnenah IFAD atanga sum lo kal, Chawm Kai atanga Thinglubul Zau kawng siamna tur PCC Flooring chu a rang lama siam a nih theihna tura hma lak sak turin an lo ngen tih sawiin, Minister hian hmalak thuai a nih tur thu a lo hrilh tih thuchhuah siamin an tarlang a. Zawlpui zau FMC-in Buh vuakna khawl an dil pawh pek a tum thu a sawi tih sawiin, kut hnathawktute tan theihtawp chhuah a inhuam thu a sawi thu an tarlang bawk.

LADC sawrkar fiah dawn

Lai Autonomous District Council (LADC) a V. Zirsanga kaihhruai MNF sawrkar in thlawptu a ngah tawk lo nia MDC 13 ten tunhnaia Governor hnena an thlen kal zelah LADC Chairman chuan March 7, 2024, chawhma dar 10:30-ah Special Session nei turin a ko a, Governor in Floor Test nei tura a tih angin Special Session hi koh a ni. LADC-a MNF Legislature Party Member 9  leh anmahni thlawptu BJP, INC, ZPM leh Independent MDC pakhat theuh te chuan sawrkar dinglai in thlawptu a ngah tawk lo niin an sawi a ni. 

Mibo zawn tihtawp a ni

Thla hmasa February 26 zan-a an In atanga chhuak, chin hriatloh a awm zui ta Lalropuia (39), Kolasib Salem Veng, tuna Aizawl Mau-bawk-a khawsa mek chu Mizo Dan-a ni 7 chhung khawtlang huapa zawn a nih hnuah hmuh a nih tak loh avangin khawtlang huapa zawnna chu nimin tlai khan tihtawp a ni ta a, nimin tlai khan khawtlang huapa zawn tihtawpna hun hi Maubawk Tlang Road Diversion-ah hman a ni. Lalropuia zawn hna hi tun thla ni 2 atang khan khawtlang huapa neih a ni.

Saitual MCMC thukhawm

Lok Sabha Inthlanpui neih tur atana inbuatsaihna kal mekah nimin khan Saitual-a District Level Media Certification & Monitoring Committee (MCMC) chu District Bawrhsap hovin an ‘hukhawm a, he hunah hian Bawrhsap chuan Election Commission of India (ECI)-in inthlanpui ah Candidate-te'n sum an hman theih zat bituk a siam thin tih sawiin, party tin ten Media lama an senso chhut nan Media atana an hman man chu lo endik pawh a pawimawh thu leh tanlakna tur kawng hrang hrangte a sawi bawk. 

Police Officer ten Dan zirho

Sawrkar laipui in July ni 1, 2024 atanga Criminal Law thar hman tura Gazette Notification a tihchhuah tak avangin Mizoram Police chuan heng Criminal Law thar pathum- Bharatiya Nyaya Sanhita (BNS), Bharatiya Nagarik Suraksha Sanhita (BNSS) leh Bharatiya Sakshya Adhiniyam (BSA) te zirhona chu nimin khan Aizawl SP Conference Hall-ah neih a ni a, he hun hi Mizoram DGP Anil Shukla IPS chuan hmanpuiin Training a telte chuan he Dan thar pathumte hi chiang taka hre bel tur leh Officer leh Staff dangte hnena training pechhawng thei tura thiam turin a chah a ni. He Training-ah hian District tin atangin Police Officer 55 an tel a ni.

Zirtirtu tur buaipui mek a ni

School Education Minister Dr. Vanlalthlana chuan Assembly Session neih mekah Aizawl West-III bialtu VL. Zaithanzama zawhna ziaka chhangin SEDP zirtirtute chu tun March 2024 thla tawp thleng bak chhawr chhunzawm tum an ni lo tih a sawi a, SEDP Zirtirtute aiawh tur hi contract emaw, MR emaw tala la turin proposal buaipui mek a ni tih a sawi bawk. RTI zawhna School Education Department SPIO in a lo chhan tawh danin, SEDP hnuaia zirtirtu rawih zat hi a ngai reng thei lo a, Enrollment hnuhnung berah chuan mi 1,143 an ni a, chungte chu DIET Lecturer 6, Govt. HSS 38, Govt. H/S 296, Govt. M/S 208, Govt. P/S 494, LDC 51 leh IV Grade 50 te an ni.

Assistant Professor lak dan MZP in chhui zui an tum

Mizo Zirlai Pawl (MZP) General Hqrs. chuan tunhnaia College Assistant Professor lak danah thil felhlel awm nia an hriat avangin a tul anga chhui zuia hmalak nise an ti.

Rel kawng siamna thir rukbo hmuhlet sak a tam

Kawnpui Police Station-a Duty te chuan nikum (2023) leh kumin (2024) chhung hian Rel kawng siamna hmanrua thir chi hrang hrang rukbo a nih thu leh an hmanrua ruk a nih chungchangah FIR 11 an dawng tawh a. FIR an dawn atang hian thubuai pahnih ziahluh niin thir rukbo hmuhlet sak kg 400 chuang an nei tawh.

Mizoram-ah World Hearing Day hman a ni

National Health Mission (NHM) hnuaia National Programme for Prevention and control of Deafness (NPPCD) buatsaihin nimin khan Ri hriatna lama harsatna neite ni ‘World Hearing Day’ hman a ni.

Biometric attendance-ah a hmawr bawk dawn hnai

Chief Minister Lalduhoma'n Mizoram Secretariat-a sawrkar hnathawk zawng zawng te Biometric attendance hmang tura hmalakna kal mek chu a hmawr bawkna thlen chhoh mek a ni, a ti.

Kuhva tawlhruk buaipui tur ala awm reng tih sawi

Home Minister K Sapdanga chuan tunah hian kuhva tawlhruk chu lu ti hai tham buaipui tur a awm reng tih a sawi.

Airport ram huamchhungah mimal ram nei an tam

Lengpui Airport ram huamchhungah mimal ram nei an tam tih Chief Minister leh GAD changtu Lalduhoma chuan a sawi.

Revenue Department-a hna thenkhat midang hlan tum

Land Revenue & Settlement Department changtu Minister B. Lalchhanzova'n Revenue Department a thawktute indaihloh avangin hna thenkhat midang hnena hlan mai tum a nih thu a sawi a, tun dinhmunah Surveyor te an indaihloh avangin anmahni hna thawhpui tur Survey Firm empanelment buaipui mek a ni a ti.

MNF hruaitu thlanna ah Official Candidate te chuhtu awm lova tling-ah puan an ni

Tun thla ni 15-a MNF General Hqrs. hruaitu thlanna neih turah Official Candidate te chu chuhtu awm lova tling-ah puan an ni.

Adviser to CM Staff hlawh ah nuai 15 vel seng

Mizoram Chief Minister Lalduhoma'n Adviser to Chief Minister panga (5) a nei mek a, chung mi 5 ten Staff 34 an neih te atana Mizoram sawrkarin thla khat (1) a sum a sen zat chu Rs. 15,27,265 a tling.

Raltlan te a theih anga chhawmdawl tum niin Sawrkar thar in Silai Licence pekchhuah ala nei lo

Home Minister K. Sapdanga’n Myanmar, Bangladesh leh Manipur atanga raltlan lolut te chu a theih ang anga chhawmdawl chhunzawm zel tum an nih thu sawiin, sawrkar tharah Home Department-in silai license pekchhuah ala neilo tih House a hrilh.

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

By-pass Road-a Lei dawh tun thla ah zawh beisei

Image
National Highway-54 laihzauh mekin Serchhip khawpui a helna tura Lei dawh hna chu tun thla chhunga zawh hman an beisei thu helai hmuna hnathawktute chuan an sawi.

Police ten Heroin man leh

Image
Serchhip Police te chuan Inrinni zan zanlai pelh hnu khan Serchhip P&E Veng-ah Heroin ni ngeia hriat Hawng hnih chuang an man leh.

END-in sawrkar sum vbc. 2 chuang chhung

Mizoram sawrkar-a Excise & Narcotics Department chuan kum kalta 2023 chhung khan Mizoram sawrkarah Chhiah chi hrang hrang Rs. 262,40,546/- an chhunglut.

Mizoram-a raltlan rawn lut 42,576 an awm

Tun dinhmunah thenawm ram Myanmar leh Bangladesh atanga sahimna zawnga raltlan lo lut bakah Manipur-a chi leh chi intihbuai avanga Mizoram-a himna zawnga lo lut mi 42,576 an awm mek.

Session chhunzawm dawn

Mizoram Legislative Assembly Budget Session neih mek chu ni thum (3) chhung chawlh lailawk a nih hnuah Vawiin hian chhunzawm a ni leh dawn a, Vawiin hian dan pangngai angin hun hmasa lam darkar khat chhung zawhna leh chhanna atan hmangin hemi hnu hian Finance changtu Chief Minister in Mizoram budget a pharh tak a tlangpuia sawihona neih leh tur a ni ang.

HM in School thar hawng

Home Minister K. Sapdanga chuan Inrinni khan Aizawl Edenthar-ah The Pathway School a hawng a, The Pathway School hi Churachandpur, Manipur-ah hlawhtling taka kalpui mek niin zirlai 1,200 vel an nei a. He School-a an Co-Ordinator Adiel Lalrihlimum chu tuna an School din tharah hian Headmistress-in a awm a, Mizorama School tha ber siam an tum a ni. He School Administrator Rita Vanlalchhanhimi chuan, “Education tha hmu lo te tana zirna pek an duh a. Chona a ni a, a dinna hmun tur tak niin kan hria a, kan duhthlan a ni,” a ti. The Pathway School-ah hian admission fee Rs 5,000 leh Monthly Fee Rs 2,500 a ni.

BJP in Campaign bul an tan

BJP Mizoram chuan Lok Sabha MP intlanpui lo awm tur atana Campaign Kick-off chu Inrinni khan Aizawl Mission Veng Bazar-ah an nei a, he hunah hian BJP Mizoram President Vanlalhmuaka chuan BJP awmzia chu Indian Peoples Party, India Mipui Pawl tihna a ni tih sawiin, MP Election lo awm turah hian BJP chuan Seat 370 la turin an inbuatsaih tih a sawi a. “India hmarchhak a MP ten an State mamawh hrang hrang an dilchhuak thei a, chutiangin Mizoram pawhin MP awmze nei, Mizoram mamawh sawi-chhuak a, Mizoram Sawrkar harsatna sawipui tur BJP MP i nei ve ang u,” a ti bawk.

Taiwan Palai leh YMA Inkawm

Aizawl-a Chapchar Kut hmanga rawn kal Taiwan Ambassador, Baushan Ger chuan Zir-tawpni tlai khan Central YMA Pisa tlawhin Central YMA hruaitute nen an inkawm a, he hunah hian Taiwan thalaite leh Mizo thalaite intlawhtawn chungchang te, Cultural Exchange chungchang te, Lo neih lam leh Skill Training lam te, hnathawk tur mihring inpek tawn theih dan tur lam te an sawiho a, Mizo thalaite hmasawnna tur Taiwan Sawrkarin a tih ve theih turte pawh sawilan a ni bawk. Central YMA hruaitute chuan YMA kalphung leh hnathawh dan te Taiwan Palai te hi hrilhin, Mizo thalaiten Taiwan thalaite nena intlawhtawn dan awm thei se an duh thu an sawi bawk a ni.

Deputy Speaker in tlawh

Assembly Deputy Speaker Lalfamkima chuan Inrinni khan Silchar khaw chhunga Mizoram sawrkar hmunhma hrang hrang - Mizoram House, State Transport Bus Terminal leh PWD hmun te a tlawh a. Deputy Speaker chuan Mizoram sawrkarin Silchar-a hmun a neih te an dinhmun hrechiang tura tlawh a nih thu sawiin, heng hmun te hi humhalha cheithat leh mipuite tana chhawr theih tura tihchangtlun a tul thu a sawi a. Mizoram PWD hmun pakhat, Circuit Road-a awm, a luahtu chhungkaw hnih te an chhuah duh loh avanga harsatna awm mek chu a tul anga hma lak a nih tur thu a sawi bawk. Deputy Speaker hi Silchar Mizoram House Asst. Residential Commissioner, Hasina Begum-i leh Silchar-a Transport Department leh PWD-a thawk ten an lo dawngsawng a ni.

Ruling MLA te chet dan MNF in beisei bo ah an ngai

Mizoram Legislative Assembly Session neih meka Ruling Party te khawsak dan chuan mipui nuih a ti zain beisei a bo hleah an ngai tih MNF chuan thuchhuah siamin an tarlang a. Mizoram rorelna sang ber zahawmna humhim hram hram tur leh inzir ve deuh tura ZPM MLA leh Minister te an ngen thu leh an chah thu tarlangin, “Opposition MLA te House zahawmna vawnhim kawngah leh an mawhphurhna hlen kawngah an fakawm kan ti takzet a. Leader of Opposition kaihhruaina hnuaia Sawrkar khalh ngil kawngah leh sawrkar kallai thlawp an tul hunah thlawp kawngah a nachang an hria in, an thawhrimna a chhuanawm kan ti takzet a ni,” tiin huai taka ke pen zel turin an ring ngam tawk tih an tarlang bawk.

National Science Day pualin Lunglei-ah hun hmang

National Science Day, 2024 lawmna chu Inrinni khan Lunglei Science Centre Auditorium-ah neih a ni. National Science Day hi kumtin February ni 28-ah India ram pumah Dr. CV. Raman-a’n ‘Raman Effect’ a hmuhchhuahna ni denchhen a hman thin a ni a, kumin hian ‘Indigenous Technology for Vikshit Bharat’ tih thupui a hmangin India ram pumah hmalak mek a ni a, chutih rual chuan Sub-Theme hrang hrang nei a hun hmangin zirlai naupangte leh mipui nawlpuite zingah he hun hi zau zawka puandarh a nih theih nan February 26, 2024 atang khan hman a ni a. Mizoram-ah chuan a lawmna pui ber hi February 28, 2024 khan,Innovation Facility Centre, MINECO, Aizawl-ah neih a ni a. District hrang hrangah thupui then hrang hrang hmangin programme hman a ni a, nimin thleng khan a lawmna hi neih tura ruahman a ni.

Tuirini Small Hydel Project tihnun leh tum

Chief Minister Lalduhoma'n sawrkar hmasa in a lo tihtawp tawh, Kawlphetha MegaWatt 24 pechhuak thei tur Tuirini Small Hydel Project chu tihnun leh tumin hma an la tih House a hrilh.

Beng tha lo mi 150 te hnenah Beng dar pek an ni

Beng tha lo te tanpui thintu, Ephatha Society of Mizoram for the Deaf and Hard of Hearing (ESOMDHH) chuan tunhnai khan Mizoam hmun hrang hranga Beng tha lo mi 150 te chu a thlawnin Hearing Aid an pe.

Nikum-a Mizoram-a Heroin man kg 177 aiin a tam

Mizoram chhunga dan kengkawhtu hrang hrang - Police, Excise & Narcotics leh Assam Rifles chuan nikum chhung khan Heroin kgs 177.808 an man.

Zu zawrh laiin kum khata chhiah hmuh Vbc. 40-70 tling; Zawrh tihtawp hnuah Zu chhiah a tlem

Mizoram-ah Dan hnuaia Zu zawrh kum li chhunga Excise & Narcotics Department (END) Chhiah hmuh chu Rs. 2,43,78,55,154 a tling a. Hetihlai hian Zzu zawrh tihtawp a nih hnu kum nga (5) chhunga Chhiah hmuh chu Rs. 21,29,71,448 a ni.

KTP in ruihhlo do ah hmalak rel

Kristian Thalai Pawl (KTP) chuan ruihhlo do kawngah nasa zawka hmalaka KTP Member mipa, ruihhlo leh a kaihhnawih vanga thi an tam lutuk chu a tlem theih nan hmalak an rel.

Meidum-a Gas hmuhchhuah tawh lakchhuahna tur hmun tha thlan fel a ni tawh

Oil and Natural Gas Corporation (ONGC) (Exploration)-a Director Sushma Rawat Sushma Rawat-i  chuan Meidum-a Gas an hmuhchhuah tawh chu a lakchhuahna tur hmun tha, hmun hnih hmun thumah an thlang fel tawh tih sawiin, Mizoram-a Oil leh Gas lakchhuah hunah Mizo thalai Geology lama thiamna neite tan hna a tam dawn niin a sawi.

Serchhip-ah Chapchar Kut 2024 Agriculture Minister hova hman a ni

Image
Chapchar Kut 2024 chu Mizoram hmundangte rualin nimin khan Serchhip-ah pawh uar taka hman a ni a, Agriculture Minister PC. Vanlalruata chuan Kut Pa niin a hmanpui a ni.

March 15, 2024 aia tlai lo ah Lo hal vek turin hriattir

Image
Serchhip District Bawrhsap chuan Serchhip District chhunga lo, huan, leipui hal turte chu March ni 15, 2024 aia tlai lova hal vek turin a hriattir.

Chapchar Kut Miss thlang

Image
Nimin-a Serchhip-a Chapchar Kut hmanna ah Serchhip Photographers Association (SPA) chuan ‘Miss Chapchar Kut 2024’ thlanna neiin R. Lalvenhimi D/o R. Lalhlira (L), Serchhip Saron Veng chu thlan a ni a, Miss Chapchar Kut hnenah hian Sash, Vakiria leh pawisafai Rs. 3000/- bakah thuziak hlan a ni.

MADC-ah MDC thar 4 lalut

Mara Autonomous District Council (MADC)-a Nominated Member mi 4 te chu nimin khan rinawmna thu tiam tira lakluh an ni a, an zinga mi pathum Delson Notlia, B. Dawpho leh B. Pari te chu hemi puala inkhawm neih ah rinawmna thu tiam tira lakluh niin N. Cracy-i erawh chu a dam loh avangin a In-ah kalchilhin thutiam hi lak tir a ni thung a ni.

Lehkhabu tha pathum thlang

Mizo Writers Association (MWA) chuan kum 2023 chhunga chhuak, Mizo tawnga Leh-khabu Lehlin tha zual pathum (3) an thlang leh ta a, heng te hi ‘My Mother; My Teacher’ (K. Siamliana) te, ‘Notre Dame de Paris’ (Lal-chhuanawma Tochhawng) leh ‘Tales of Man Singh’ (Lalzarzova Khiangte) te niin heng atang hian a tha ber thlan leh tur a ni ang.

KTP General Conf. nei mek

Mizoram-a Kohhran Thalai intawhkhawmna lian ber, Kristian Thalai Pawl (KTP) General Conference vawi 60-na chu nizan hmasa atang khan Ngopa khua ah neih tan a ni a, Palai kal  mi 12,236 zet an tling tawh a ni. Report atanga a lan danin KTP-ah hian Member 1,71,404 an awm mek a, Mizoram puma Pastor Bial 217 ah KTP Branch 904 a awm mek a ni. KTP General Conference neih mek hi naktuk Pathianni zan-a zawhfel tur niin Vawiin-ah Palai ten ro relin Central KTP hruaitu thlanna neih a ni ang.

MYC Office tlawh

Chapchar Kut hmang tura Mizoram-a rawn kal Taiwan Ambassador to India Baushuan Ger chuan nimin khan Mizoram Youth Commission (MYC) Office tlawhin MYC Chairman Malsawm-zuala Ralte leh a thawhpui ten an lo dawngsawng a, Taiwan leh India sawrkarin Labour Mobility-a inremna thuthlung an ziah hrula Mizo /halai ten Taiwan a hna an thawh theih dan tur sawiho in Taiwan sawrkar senso in Mandarin tawng zir tur Mizo thalai graduate chin mi 4 Taiwan-a tirh ni se an ti a, kum 1 Course an zir hnuah Mizoram ah Mandarin tawng zirtirtu an ni nghal ang.

Hmeichhiate Ni hmang tan

March 8, 2024-a 'Hmeichhiate Ni' lo thleng tur lawmna chawlhkar khat awh tur chu nimin khan Mizoram-ah Women & Child Development (WCD) Department hmalakna in neih tan a ni a, International Women’s Day lawm bul tanna hi nimin khan Chapchar Kut lawmna puala Stall siamah MLA Baryl Vanneihsangi Tlau chuan a hawnna hun a hmanpui a ni. He Stall-ah hian Women & Child Development Department chuan a duh apiangte’n an lak theih turin WCD Department hmalakna leh hnathawh hrang hrangte tarlanna Leaflets an sem nghal bawk a ni. International Women’s Day lawmna hawn a nih hnu hian ni tin-a hun hman dan tur ruahman sa a ni a, tun thla ni 8 khian a lawmna pui ber chu Aizawl Vanapa Hall-ah neih a ni ang.

Mizoram-ah Keite awm lo

Tunhnai khan ramchhung a Keite awm zat puanzar ah Mizoram-ah Keite pakhatmah a awm tawh lo nia tarlan a ni a, Union Environment Minister, Bhupender Yadav-a'n kum 2022-a ram chhunga Keite awm zat chhutna report ‘Leopard Status 2022’ a tlangzarh ah hian ram pumah Keite 13,874 a awm anga chhut a ni a, Keite awm zat an chhut hnuhnun ber kum 2018 aiin 1,022-in an tam zawk a, kum 4 chhungin 8%-in a pung a ni. 

Governor in ASM Annual Conference a hmanpui

Association of Surgeons of Mizoram chuan niminpiah tlai khan RB Mc Cabe Hall, Aijal Club-ah Annual Conference hmangin he hun hi Governor Dr. Hari Babu Kambhampati chuan Khuallian niin a hmanpui a ni.

Social Media-a Dan bawhchhiatna a pung chho zel

Mizoram-ah Social Media hmanga dan bawhchhiatna thubuai ziahluh tur a kum telin a pung zel a, tunhnai kum li (4) chhungin thubuai 267 ziahluh a ni a, sum lam kaihhnawih (financial crime) thubuai a tam ber.

Rajya Sabha MP in KMMTTP kawng a tlawh

Mizoram chhim tawp leh Bay of Bengal inkalpawhna tur kawngpui sial mek, KMMTTP Road chu Mizoram Rajya Sabha MP K. Vanlalvena chuan niminpiah khan a tlawh.

Tlawmngaihna hi Zofate phuar khawmtu, Hnam anga min dinchhuaktu a ni - Chief Minister

Chief Minister Lalduhoma chuan Tlawmngaihna chu Zofate phuar khawmtu, hnam anga min dinchhuaktu hringnun ze mawi tak a ni tih sawiin, chhuang taka ram dang mi te mithmuh-ah thehdarh leh nunpui chu a pawimawh thu a sawi bawk.

Environment humhalh a tul zia inzirtirna neih a ni

Image
Nimin khan Thenzawl-a Police Training School (PTS)-ah Environmental Awareness Campaign neih a ni.

Serchhip-ah ILP enfiah leh

Image
Serchhip Police te leh Serchhip District Mizo Cement Mistiri Association te chuan nimin khan Serchhip khawpui chhung hmun hrang hrangah hnamdang awm te chu Inner Line Permit (ILP) an neih dan leh anmahni sponsor-tu te hna an thawk ngei em tih an enfiah a, ILP fello leh an-mahni sponsor tu hna ni lo thawk mi 12 an man a ni. Serchhip District Mizo Cement Mistiri Association chuan mipuiten Vai Mistiri leh Helper te an chhawr duh anih pawhin dan dik thlap a sponsored tur leh ILP nung nei ngei te chauh chhawr turin an ngen a, heng hnamdangte hian Sponsor tu hna bak an thawk theilo tih hre thar leh tura ngenin, mahni hnampui Mizo Mistiri te ngei chhawr hram hram thin turin an ngen bawk.

Police ten Heroin an man

Image
Serchhip Police te chuan niminpiah tlai khan Serchhip-ah Heroin nia hriat Hawng thum manin he thil-a inhnamhnawih nia hriat mi pakhat an man nghal bawk. Thudawn danin Serchhip Police District Special Branch te hian niminpiah tlai khan Serchhip P&E Veng-ah dan lova ruihna atana hman damdawi zuar thin nia an hriat pakhat hnen atangin Heroin nia hriat Hawng thum hi an man a, heng ruihhlo lo kawltu Chanchinmawii (29), Serchhip Vengchung nia insawi chu man nghal niin thubuai siam sak a ni. Heng ruihhlo an man hi Sahbawn bawm-a dah niin a vai hian gram 40.41-a rit a ni a, tualchhunga hralhna rate a chhutin Rs. 1,21,230/- man vel nia chhut a ni.

Thenzawl DFO sawn a ni

Mizoram sawrkar chuan Mizoram-a Indian Forest Officer (IFS) engemaw zat chu an awmna hmun a siksawi a, Thenzawl Division-a Divisional Forest Officer (DFO) nilai Lalbiakchama Chawngthu hi Champhai-ah DFO hna chelh tura sawn a ni a, aiawh tur hian Forest Training School a Principal hna chelh mektu R. Lalnungrenga chu dah niin ani hian Lunglei-a Working Plan Officer (WPO) South hna chu a chelh nghal dawn bawk a ni.

Police ten Kuhva tawlh man

Saitual Police Station-a Duty te chuan nimin zing khan Dan lova Kuhva hring leh ro phurh chu Truck pariat atangin an man a, heng Kuhva te hi Buhban, Buhban (Vanzau kawng), North Lungpher leh Khanpui khua atanga man niin a vaiin bag 670 a ni a, kg. 60,100 a rit a ni a,Rs. 46,00,000/- man a ni. Heng Kuhva te hi a hring hi Bag 300 leh a ro bag 370 niin nimin vekkhan Superintendent, Custom Preventive Force, Seling hnenah hlan nghal a ni.

Inthlang turin inbuatsaih zel

Lok Sabha Inthlanpui neih tur atana inbuatsaihna kal mekah nimin khan Lunglei District-a Expenditure kaihhnawih mawhphurhna hrang hrang chelhtu- Assistant Expenditure Observer, Video Surveillance Team, Video Viewing Team, Flying Squad Team leh Accounting Team te tan Training buatsaih a ni a, nimin vek khan Sector Officer leh Sector Magistrate te tan pawh an hnathawh tur leh mawh-phurhna hrang hrang zirhona neih a ni bawk.

Hospital sak mek tlawh

Kolasib bialtu MLA leh Deputy Speaker Lalfamkima chuan nimin khan Kolasib District Hospital sak mek chu a hmunah a tlawh a, Hospital sak hna thawktute chuan Block A chu May thla hian luah luh nawk nawk theih a peih hman an tum thu an lo hrilh a ni.

Ruihhlo do sawihona nei

Nimin khan Khawzawl-ah District Narco Coodination Center (NCORD) thutkhawm chu an Chairman leh District Bawrhsap K. Lalrohlua hovin a Pisa-ah neih a ni a, he hunah hian Ruihhlo dona kawnga hmalakna leh hmalak zel dan tur te sawiho niin Khawzawl SP Lalchhuanthanga chuan March thla atang chuan chak lehzuala ruihhlo do turin an inpuahchah mek tih a sawi a. Hma-chhawp an neih mek zingah checkgate tih changtlun leh ngawrh zawka Vehicle Checking neih te chu a langsar zual a nih thu a sawi bawk.

Postal Service sawipui

North East Postal Circle-a Chief Postmaster General, Mariamma Thomas-i chuan nimin khan Governor Dr. Hari Babu Kambhampati chu Raj Bhavan-ah kawmin State chhunga Postal Service tihchangtlunna tura hmalakna hrang hrang awm mekte a sawifiah a. An hmalakna kawng thenkhatah Governor thlawpna a dil bawk. He hunah hian Governor chuan State mipui tana rawngbawlna pawimawh tak tak thawktu, a bik takin thingtlang khua te tana tangkai tak Postal Department-te chungah lawmthu sawiin, Speed Post-a service chu ennawna, siamthat ngai niin a sawi a. He Service pawimawh tak hi tih hmasawn dan dap turin a chah bawk. Postal facilities kaltlanga mipuiin an chhawr theih tura Centrally Sponsored Scheme hrang hrang awm mek te chu beneficiary ten an lo hriat theih nan awareness campaign nasa zawka kalpui turin a fuih a. Thingtlang lama postal banking service la awm lohna hmun tlem te Mizoramah a la awm thu sawiin hengah te hian postal banking kalpui thuai a ngai tih a sawi bawk.

MPSC Member thar atan PB. Lianthangpuii lalut

Mizoram Public Service Commission (MPSC) Member atana ruat thar PB. Lianthangpuii MIS (Rtd) chu nimin khan rinawmna thu tiam tira lakluh a ni. MPSC Member thar lakluhna hun hi Raj Bhavan Durbar Hall-ah neiin Home Commissioner leh Chief Secretary charge la mektu H.Lalengmawia chan a kaihruai a, Governor Hari Babu Kambhampati chuan PB. Lianthangpuii hi rinawmna thu tiam tirin a lalut a ni.

Smart City hnuaia khelmual siam a te hlawm niin sawi

Sports Minister Lalnghinglova Hmar chuan Smart City sum hmanga khelmual siam an enfiah zingah meter 105-a thui leh meter 68-a zau tling pakhat chiah a awm tih House a hrilh a, cheng vaibelchhe tam tak senna tur a Ground tling lo lutuk ruahman a ni chu a pawi a tih thu a sawi.

LADC-a MNF hruai sawrkar dinhmun a chiang lo

Lai Autonomous District Council (LADC)-a Chief Executive Member (CEM) V. Zirsanga chuan a tul chuan CEM dinhmun kiansan a hreh lo tih a sawi.

Stamp duty zaa 3-a tihsanna tur ‘The Indian Stamp (Mizoram Amendment) Bill, 2024’ a pass a ni

Nimin-a Mizoram Legislative Assembly thutkhawm ah ram lei, hralh leh dahkhamna a mipuite Chhiah chawi tur ennawnna, The Indian Stamp (Mizoram Amendment) Bill, 2024 chu pawm a ni.

Raltlante Biometric identification ti dawn lo

Sawrkar lapuiin Myanmar leh Bangladesh raltlante Biometric Identification ti tura a tih chu kalpui a ni dawn lo tih a sawi.

SASCI hnuaia Work Order hum tawh te an hna thawh tir vek an ni dawn

PWD Minister Vanlalhlana chuan SASCI hnuaia Contract hna thawh tur Work Order hum tawh zawng zawngte chu an thawh tir vek dawn tih a sawi a, Chief Minister Lalduhoma chuan SASCI sum hmanga hnathawk, a hun chhunga zo hman lo te chu Utilisation Certificate pek an tum loh thu a sawi bawk.

Science & Mathematics Olympiad neih a ni

Image
Nimin khan Serchhip-ah Class VI atanga Class IX zirlai naupangte tan Science & Mathematics Olympiad neih a ni.

Serchhip Town in Khawpui Fai ber lawmman a lak lawmna Bawrhsap hovin neih a ni

Image
Kum 2023-a Mizoram Khawpui Fai inelna, Mizoram Cleanliness Competition 2023-a District Hqrs. zinga Fai ber lawmman Serchhip Town in a dawn lawmna chu nimin khan neih a ni a, he hun hi Serchhip District Bawrhsap David Lalthantluanga chuan hmanpuiin Town chhunga VC hrang hrangte hnenah lawmman a hlan bawk.

Jail-a tang mek te eizawnna neih dan tur zirtir an ni

Image
Serchhip District Jail-a tang mek te tana ‘Skill Development Training’ buatsaih chu nimin khan a hawnna hun hman a ni.

Pawl 12 zirlai ten HSSLC Exam an nei tan

Image
Mizoram Board of School Education (MBSE) buatsaihin kumin-a pawl 12 zirlaite tana Higher Secondary School Leaving Certificate (HSSLC) Exam chu nimin khan Mizoram hmun hrang hranga Exam Centre-ah te neih tan a ni a, Serchhip District-ah pawh HSSLC Exam Centre hi 9 awmin HSS 13-a zirlai ten Exam hi an bei a. Arts-ah zirlai 440, Science-ah zirlai 110, Commarce-ah zirlai 3 leh Vocational Education-ah zirlai 278 ten Exam hi an hmachhawn a ni.

SDC mi 2 in hna zawm thar

Image
 Mizoram Civil Service (MCS) Junior Grade atana lak thar te an awmna tur siamfal a nih hnuah Serchhip DC Office-a Sub-Deputy Commissioner (SDC) hna chelh tura ruat Dr. Marilyn Lalruatkimi leh Dr. C. Vanlalchhanhimi te chuan an hna an rawn zawm ta a, heti hian Serchhip DC Office-ah SDC mi pathum an awm ta a ni.

Hming pelut dang awm lo

March 15, 2024-a MNF General Hqrs. hruaitu thlanna neih turah nimin chawhnu dar 2:00 khan chuh tumte tana hming pekluh hun chu a tawp ta a, he inthlanna chuh tum hian Official Candidate tura chhawpchhuah te chauh hming pelut awmin heng te hi Vawiin hian enfiah a ni anga, chuhtu awm lova tling-a puan theih an ni ang.

ZPM Vice President-ah ruat

ZPM General Hqrs. hruaitu thlanna neih a nih hnuah President atana thlan thar Lalliansawta chuan Vice President atan VL. Zaithanzama (MLA) leh C. Lalnunnema te chu a ruat a, ZPM Inthlanpui-ah khan Vice President-ah W. Chhuanawma chu thlantlin niin heti hian ZPM-ah Vice President pathum an awm ta a ni.

Supplementary Demand pawm

Nimin-a Mizoram State Assembly Inkhawm ah sawrkar kum kal meka sum indaihlohna phuhrukna tura sum dil belhna, Supplementary Demand for Grants for the year 2023-2024 chu sawiho tura pharh a nih hnuah pawm a ni a, Chief Minister Lalduhoma chuan ‘The Mizoram Lokayukta (Amendment) Bill, 2024’ chu pharhin pawm a ni bawk. Nimin a Assembly thukhawm ah hian Agriculture Minister PC. Vanlalruata chuan zawhna chhangin kum 2024-2025 (Financial Year) chhungin kuthnathawktute tan sawrkarin ruahmanna chi hrang hrang a siam tih a sawi a. Sports Minister Lalnghinglova Hmar chuan, sawrkar hmasa a PMJVK hnuaia Sports Infrastructure lo din tawh, a ziak ang ngei a tha a ni em tih endik turin amah ngeiin hnathawh hrang hrangte tlawh a tum thu a sawi bawk a ni.

PRI – CBO Convergence zirho

Nimin khan Khawzawl-ah Panchayati Raj Institutions- Community Based Organisation (PRI-CBO) Convergence chungchang inhrilhhriatna neih niin District Bawrhsap K. Lalrohlua chuan a kaihruai a, PRI – CBO Convergence hian Village Council te leh Community Based Organi-sations (CBO) ten khawtlang hmasawnna leh thanna kawnga thawhhona tha an neih theih nana kaihhruai chu a tum ber a ni a. He Convergence hnuaiah hian CBO (Village Organisation, Self Help Group etc) ten Gram Panchayat Development Plan (GPDP) an buatsaih hnuaia Village Poverty Reduction Plan (VPRP) an siam chu ngaih pawimawh tur a ni bawk. Mizoram State Rural Livelihood Mission (MzSRLM) chuan National Research Organisation, Kumdumbashree te nen thawkhoin PRI-CBO Project hi Serchhip leh Mamit District-ah te a lo kalpui tawh a. Tunah hian RD Block 15 – Khawzawl, Serchhip, East Lungdar, Reiek, West Phaileng, Zawlnuam, Cham-phai, Khawbung, Hnahthial, Thingdawl, Bilkhaw-thlir, Tlangnuam, Thingsulthliah, Aibawk leh Kawrte-thawvengah te

Lawngtlai District-ah Malaria dinhmun thlirho a ni

Nimin khan Lawngtlai-ah District Task Force on Malaria Elimination leh District Level Task Force on Immunization thutkhawm neiin an District chhunga Malaria tih tlem dan turte sawiho a ni a. He huna tarlan a nih danin kum 2023 chhung khan Lawngtlai District-ah mi 47811 endik atangin Malaria vei mi 7915 hmuhchhuah an ni a, Malaria vanga nunna chan mi 6 awmin kumin chhung hian an District-a khaw 143-ah Thosi hlo kapin damdawi-a chiah sa Thosilen 1,05,537 sem tum a ni bawk.

RG Stadium-a Artificial Turf phah MSSC in hriatpui lo

Nikum-a Rajiv Gandhi Stadium, Mualpui-a Artificial Turf phah thara sum sen zat Mizoram State Sports Council in a hriatpui lo tih Sports Minister Lalnghinglova Hmar chuan Assembly House a hrilh.

Civil Hospital, Aizawl tihchangtlunna tur hawng

Health Minister Lalrinpuii chuan nimin khan Civil Hospital, Aizawl-ah Biometric Attendance, Medical Record Digitalization, CCTV, Hospital Pharmacy, Jan Aushadhi, Hospital Website, Online OPD Registration & UPI Payment, SMS Lab. Report, OPD Ticket Counter leh HIV Viral Load Machine te a tlangzarh.

District Council te chungchanga State sawrkar inrawlhna Assembly House-ah sawifiah a ni

District Council & Minority Affairs Minister C. Lalsawivunga’n Autonomous District Council (ADC) pathumte inrelbawlna chungchang ah Governor thupek ni lovin District Council & Minority Affairs Department a inrawlh hriat a ni lo tih a sawi.

Kawlphetha leina atan vbc. 33-37 vel hmang thin

P&E Minister F. Rodingliana chuan sawrkar in thla khat-ah kawlphetha leina atan cheng vbc. 33 atanga 37 vel a sen thin thu a sawi.

Myanmar ramri hung tumna leh FMR tihtawp duhlohna Official Resolution House-ah pawm a ni

 Nimin-a Mizoram Legislative Assembly thutkhawm ah Home Minister K. Sapdanga Official Resolution putluh, Myanmar ramri hung tumna leh Free Movement Regime (FMR) tihtawp duhlohna te chu lungrual taka pass a ni.

Mental Health Camp buatsaih

Image
Nimin khan Serchhip District Jail-ah Mental Health Camp neiin a thlawna inentirna buatsaih a ni.

Consumer Awareness nei

Image
Administrative Institute (ATI) leh Mizoram Consumer's Union tangkawp buatsaihin nimin khan Serchhip DC Conference Hall-ah Consumer Awareness Programme neih a ni a, he hunah hian MCU General Secretary Hmangaihzuala chu Resource Person atan hman niin Consumer Protection Act 2019 chhunga Consumer te dikna leh chanvo bakah Consumer ten harsatna hrang hrang an tawha thuneitute hnena an thlen dan tur te a zirtir a, kalkhawm te atanga zawhna awm te chhan nghal a ni bawk.

District Wildlife Crime Control Sub-Unit thukhawm

Image
Serchhip District Wildlife Crime Control Sub-Unit chu nimin khan an Chairman leh Serchhip SP MS. Dawngkima hovin a Pisa-ah an thukhawm.

Lirthei tlan hun bithliah

Image
Serchhip Sailiamkawn leh Serchhip District Park, Dawngzawl inkar-a lirthei tlan theih hun tur leh tlan theih loh hun tur ruahman thar a ni.

Pandal hlanna Inkhawm nei

Mizoram-a Kohhran Thalai intawhkhawmna lian ber, KTP General Conference vawi 60-na chu naktuk zan aang khian Ngopa Public Playground-ah neih tan a ni dawn a, he khawmpui neihna tur atana Pandal sak chu nizan khan a hlanna Inkhawm neih a ni. Presbyterian Kohhran-a thalai pawl, Kristian Thalai Pawl (KTP) General Conference hi Pathianni lo awm tur thleng khian neih tur a ni a, Thu leh hla hmanga inpawlhonate, Jubilee Concert te a awm dawn a. Khawmpui hmanna tur pandal hi a dung ft. 280 leh a vang ft. 180 a zau a ni a, mi 10,000 chuang leng tura ruahman niin hriat theih chinah Inkhawmpuia kal tur mikhual in report hi 20,967 an tling tawh a ni.

Police in mipuite thu rawn

Mizoram Police chuan tunhnaiah Delhi leh a chhehvelah hna leh sum kaihhnawiha inbumna a hluar hle tih sawiin, Delhi Mizo Zirlai Pawl pawhin January ni 30, 2024 khan mipuite hnenah thurawn an lo pe tawh tih an sawi a. Hetiang inbumnaah hian Mizo thalaite an inhnamhnawih tih hriat a nih thue leh hna tak tak hmuh hmain hna diltute'n cheng nuai 1 atanga nuai 2 inkar an pek lawk a ngai thin a, an thawhna tura an sawi chu Company pangngai tak ang thei turin ruahmanna pawh siam thin tih sawiin, Mizo thalai lehkha thiam hna zawng mekte an bitum nia hriat a nih thu an sawi a. Hetiang kawngah hian mipuite fimkhur turin thu an rawn bawk.

Supplementary Demands pharh

Nimin-a Mizoram Legislative Assembly Budget Session-ah Finance changtu Chief Minister Lalduhoma’n sawrkar kumthar atana Mizoram sawrkar budget a pharh rualin Financial Year kal laia sum indaihlohna avanga ruahman belhna, Supplementary Demands for Grants 2023-2024 cheng vbc. 3,287.93 chu a pharh nghal a, hei hi Vawiin hian sawiho a pawm turm a ni ang.

Inthlanpui atan training nei

Lok Sabha Inthlanpui neih tura inbuatsaihna kal zelah nimin khan Saitual District chhunga Sector Officer/Magistrate leh Sector Police Officer te tan Saitual DC Conference Hall-ah an hnathawh dan tur zirhona neih a ni a. ECI in kaih-hruaina a siam angin Saitual District-a Assembly Segment (Constituency) pathum chu Sector 15-ah then niin Sector khat hi Sector Officer/Magistrate pakhat-in a vil anga, Magisterial Power pek an la ni bawk ang.

Governor in hun hmanpui

Ephatha Society of Mizoram for the Deaf and Hard of Hearing leh Ali Yavar Jung National Institute of Speech & Hearing Disabilities (Divyangjan) te tangkawp buatsaih, Diagnostic & Fitment Camp for Hearing Impaired chu nimin khan Ephatha Special School, Kulikawn West-ah neiin Governor Dr. Hari Babu Kambhampati chuan khuallian niin a hmanpui a. Mimal thahnem ngai leh pawl thenkhat, mi harsa zawkte dikna leh chanvo humhalhna tura thawktute chungah lawmthu sawiin, Ephatha Society chu Beng hriatna lama harsatna nei te tanpuina kawngah rawng-bawlna zahawm tak tak an thawh avangin fakawm a tih thu a sawi bawk. Governor chuan pian-phunga mi dangte phak lo te pawhin zahawm tak leh mawihnai taka khawsak an phu vek tih sawiin, “Kan chhehvela kan hmelhriatte zingah pianphunga harsatna tawk an awm chuan tanpui kan inhuam tlang tur a ni,” a ti bawk. He hunah hian Governor hian beneficiary-te leh zirlaite hnenah Hearing Aids a sem a ni.

Champhai-a Experiential Learning Centre (ELC) din tur chungchang sawihona nei

Sawrkar Laipui-a Ministry of Information & Broadcasting sum cheng nuai 100 senga Champhai-a ‘Experiential Learning Centre’ (ELC) din tur chungchang chu nimin khan nimin khan District Bawrhsap James Lalrinchhana hovin sawiho a ni.

Sawrkar inrelbawlna ah hman tur zaa 82.97 tling

Kum 2024-2205 Mizoram sawrkar Budget pharh takah Budget pumpui atangin hmasawnna hna thar thawhna tur, Capital Expenditure chu zaa 17.03 a ni a, sawrkar inrelbawlna senso Revenue Expenditure chu zaa 82.97 ni tura chhut a ni.

Ban-a kaih Policy chungchang CM in sawifiah

Chief Minister Lalduhoma chuan Ban-a Kaih Policy chu thalai ten sem ni lovin Thawhrimna chu hlawhtlinna a ni tih an hriat theih nan hman tum a nih thu a sawi.

Budget-ah hmasawnna hna thawhna tur a pung

Chief Minister Lalduhoma chuan kum 2024-2025 chu sum renchem, sum dinhmun insawh nghehna kum a ni tih sawiin, chuti chung chuan hmasawnna hnathawh tur erawh a pun tho thu a sawi.

Langtlang leh rintlak taka sum leh pai enkawl ngaih pawimawh hmasak a ni dawn - Chief Minister

Chief Minister Lalduhoma chuan langtlang leh rintlak taka sum leh pai enkawl an ngaih pawimawh hmasak dawn thu a sawi.

Kum 2024-2025 atana Mizoram Budget ruahman cheng vbc. 14,412.12 chu House-ah pharh a ni

Assembly Budget Session neih mekah nimin khan Finance changtu Chief Minister Lalduhoma chuan kum 2024-2025 chhunga Mizoram sawrkar budget cheng vbc. 14,412.12 chu a pharh a, kum kal mek 2023-2024 a Mizoram Budget aiin cheng vbc. 202.17 (1.42%) in a tam zawk a. Revenue surplus cheng vbc. 564.95 awm tura beisei a ni.

ILP-ah thuchhuah siam thar

Image
Serchhip Police te chuan Serchhip District chhungah Inner Line pass (BERF Act, 1973) tha taka kenkawh a nih theihna turin mipuite hnenah thuchhuah an siam.

HSLC Exam neih tan a ni

Image
Kumin-a pawl 10 zirlaite tana High School Leaving Certificate (HSLC) Exam chu nimin khan neih tan a ni. Kumin a HSLC Exam hi Serchhip District chhungah chuan Exam Centre 11-ah neih niin Exam tura inziaklut zirlai 948 an awm a, heng zirlaite hian kar hmasa Nilaini khan Science Subject-ah Practical Exam nei tawhin nimin khan Theory Exam neih tan a ni a. Nimin khan Mizo Subject Exam in tun thla ni 29-ah English, March 4-ah Science, March 8-ah Social Science leh March 13-ah Mathematics te an Exam dawn a ni.

Rabung kawng sawiho a ni

Nimin khan Khawzawl-ah District Bawrhsap K. Lalrohlua hovin KM 33-a thui Khawzawl leh Rabung inkar kawngpui siamthat dan tur sawiho a ni. Rabung kawng hi kum 1987 vel a laih niin 1994 velah blacktop a ni a, hemi hnu hian mumal taka siam that a ni zui ta lo a ni. Rabung VC te chuan kawng hi tum hnih khat kawng chhe zual lai (pot holes etc) han hnawh zeuh zeuh a awm tih loh chu kum 30 vel zet enkawl mumal loh niin an sawi a. PWD lam chuan a theihna ang ang ah a siamna tur sum an zawn thu an tarlang a, NABARD-ah te pawh project siam a an thehluh thu leh a tlang loh thu an sawi thung a ni. He hunah hian Khawzawl DC chuan NABARD lam hotute a lo sawipui tur thu leh PWD chu Project lo siamtha tura in ruahman turin a chah a, he kawng siam thatna tur hian a theihna apianga hmalak a tum thu a sawi a ni.

GST Dan siamthatna tur Bill Assembly in pass

Mizoram-a Goods and Services Tax (GST) Dan hman mek siamthatna tur Bill chu nimin khan Assembly House-ah pawm a ni.

Inthlan atan hming pelut

Thla thar March 15-a MNF Genral Hqrs. hruaitu thlanna neih tura party Official Candidate te chuan nimin khan he inthlanna neih tura Returning Officer hnenah Nomination an File a, tun thla ni 28 tlai dar 5:00 thlengin he inthlan chuh tumte tan hian Nomination hi File theih a ni ang. He inthlanna chuh tura Nomination File te hi President-ah Zoramthanga; Sr. Vice President-ah Dr. R. Lalthangliana; Vice President-ah Lalchhandama Ralte leh Vanlalzawma bakah Treasurer-ah Lalruatkima te an ni. He inthlanna chuh tura hming pelut te tan hian Feb. 29 thlengin inhnuhdawhna hun hawn a ni a, chuhtu dang an awm dawn em tih erawh hriat a ni lo thung.

CM in Charkos hotute kawm

Chief Minister Lalduhoma chuan nimin tlai khan a Pisa-ah Mizo Nurse te UK leh Germany-a thawk tura training pe-a thawn thin Charkos hotute kawmin an hnathawh dan te a sawipui a. Chief Minister chuan Mizo Nurse, OET Eexam tuma beitu, sum lama harsatna neite chu Mizoram Youth Commission kaltlanga Hand Holding Policy hmanga sawrkarin a tanpui theih a rin thu a lo hrilh a. Hemi thila zirlaite harsatna hi ziaka a hnena thehlut turin a lo chah a ni. Charkos te hi Mizoram OET Coaching Hub (MOCH) ten an thawkho mek a, Charkos Co-founder Dr. Seema Baliyan chuan an hna-thawh dan hrang hrang CM hi a hrilhfiah a ni.

Ruang zawn tihtawp rel

Mamit District Disaster Management Authority nimin-a thukhawm chuan nikum kumtawp lama West Phulpui bul quarry chima tun thlenga ruang pakhat la hmuh zawhloh chu Official-a zawnna chu tihtawp nise an ti a, SLT Company lam chuan an remchan dan ang angin ruang hi la zawn chhunzawm zel se an ti. Hei bakah hian kumin Fur lo thleng tur atana inruahman lawkna'n District chhung mamawhna ang anga hman theih turin silpaulin lei ni se an ti bawk.

Skill Development for Prisoner

Siaha District Jail-a tang ten kutthemthiam thil an zirna tur, ‘Skill Development for Prisoner’ chu nimin khan District Legal Services Authority bultumin Siaha District-a Additional District and Sessions Judge leh Fast Track Court-a Judge Lalngaihmawia Zote chuan a hawng a, he Skill Development programme hi Siaha District Jail a an neih vawi khatna tur niin he programme atan hian Trade 4- Arts, Handicraft, Barber leh Electric Wiring-te thlan a ni a. Zirtirtu tur atan Jail Staff, Tang Convict tawh leh pawnlam mi te thlan an ni a. Jail tang te an chhuah hnua mahni ke-a an din theihna tura thiamna pek chu he hmalakna in a tum ber a ni.

Assam Rifles sawn thu ah MHA thu ngaichang mek

Home Minister K. Sapdanga chuan ZPM Member VL. Zaithanzawma zawhna chhangin Assam Rifles-te Zokhawsang-a an insawnchhuah chungchangah Ministry of Home Affairs (MHA) chhanna nghah mek a nih thu nimin-a Assembly Inkhawm ah a sawi a, Home Minister chuan, “Assam Rifle-te Zokhawsang-a an insawn-chhuahna tur atana tihtur zawng zawng hi Mizo-ram Sawrkar chuan a ti zo vek tawh a, Assam Rifles lam hian insawnna atan MoU sign nise an ti. Draft MoU an siam hi MHA-ah an thehlut a, chu pawh chu Mizoram Sawrkar chuan Comment hi ni 8.9.2023 khan a thawn thla tawh. MHA lam chhanna hi nghak mek a ni,” a ti.

Pu Zoramthanga uapna kan la mamawh - Tawnluia

MNF Sr. Vice President Tawnluia chuan, “Tun dinhmunah chuan Pu Zoramthanga uapna kan la mamawh,” a ti.

ZIDCO in Hand Holding hman tangkai an tum

ZIDCO Chairman JK. Dawngzuala chuan ZPM Policy, Hand Holding chu ZIDCO chuan tangkai taka kalpui an tum thu a sawi.

Tun sawrkar-ah Kuhva tawlhruk bag 2868 man tawh

Tun sawrkar kal mekah dan lova kuhva tawlh ruk bag 2868 man a ni tawh.

Mizoram-ah Police hna ruak 4268 a awm mek

Home Minister K. Sapdanga chuan tun dinhmunah Mizoram-ah Police hna ruak hnawhkhah loh 4,268 a awm tih a sawi.

PM-in Railways project Sairang-ah lo hmanpui a ni

India ramchhung hmun hrang hranga Rrailways Project hrang hrang 2,054 hna bultanna tur lungphum phumna leh hna thawh zawh tawh hawnna chu nimin khan Prime Minister Narendra Modi chuan neiin he hun hi Sairang Station-ah pawh lo zawm a ni.

India Vice President in Mizoram University Convocation vawi 18-na a hmanpui

Mizoram University Convocation vawi 18-na chu nimin khan neih a ni a, he hun hi India Vice President Jagdeep Dhankar chuan khuallian nia hmanpuiin MZU-a Chief Rector leh Governor Dr. Hari Babu Kambhampati bakah Chief Minister Lalduhoma leh Babasahep Bhimrao Ambedkar University-a Chancellor ni thin Prof. Prakash Bartunia te chu khualzahawm an ni.

Mizoram-a rawn zin India Vice President in Mizoram Assembly Member te hmaah thu a sawi