Latest News

Mizoram-ah hri kai 228 hmuhchhuah belh leh an ni

Niminpiah khan Mizoram-ah Sample 3267 enfiah niin heng atang hian COVID-19 hri kai 228 hmuhchhuah leh an ni a, Sample enfiah atanga za zela 6.97 te chuan hri an kai a ni.

Niminpiah khan ZMC Laboratory-ah Sample 1279 enfiah niin heng atang hian COVID-19 hri kai 23 hmuh an ni a, heng hri kai hmuhchhuah te hi Aizawl District-a Sample lak te vek niin hri kai hmuhchhuah zinga a tam zawk te hi hri kai nen inkawm-hnaihna neih avanga inkhunghrang lai an ni a, CCC-a hri kai awmpuitu mi pakhat leh ZMC-a Frontline Worker in Volunteer pakhat a tel bawk.

District hrang hranga TreuNat Laboratory-ah niminpiah khan Sample 358 enfiah niin heng atang hian hri kai 21 hmuhchhuah an ni leh bawk a, an zinga mi 10 te chu Kolasib District atanga hri kai hmuh niin an vai hian Bairabi khua vek an ni a, hri kai tawh nen inkawmhnaihna nei an ni. Siaha District-ah hri kai mi 6 hmuh niin Mamit District-ah 3 hmuh an nih bakah Lunglei leh Lawngtlai District-ah hri kai pakhat ve ve hmuh an ni bawk.

Niminpiah khan Mizoram-ah Rapid Antigen Test hmangin Sample 1630 enfiah ni bawkin heng atang hian hri kai 184 hmuh leh an ni a, heng zinga 145 te chu taksa-a hri kai lanchhuahna nei an ni. RAgT hmanga hri kai hmuhchhuah zinga 130 te hi Aizawl District atanga hmuh an ni a, Sairang Dinthar Veng-ah hri kai 45 zet hmuh an awm a, hri kai hmuh-chhuah zinga a tam zawk chu hri kai hmuhchhuah tawh te nen inkawmhnaihna nei an ni a, hri kaina hriatloh leh chhui ngai mi 27 an awm a ni.

Lunglei District-ah hri kai mi 24 hmuhchhuah niin an zinga 23 te chu Lunglei khawpui chhung ami an ni a, Lawngtlai District-ah hri kai mi 20 hmuh niin Kamalanagar-II ah mi 12 zet hmuh an ni leh bawk. Kolasib District-ah hri kai mi 7 hmuh niin an zingah hian Mualkhang khuaa VLTF member mi 3 an tel a, Mamit District-ah hri kai mi pahnih leh Champhai District-ah hri kai pakhat hmuh an ni bawk.

Nimin khan Mizoram-a hri kai hmuhchhuah zinga mi 108 te chu enkawl dam an ni leh a, heti hian Mizoram-a hri kai hmuhchhuah chu 12,859 ni tawhin an zinga 9602 te chu enkawl dam an ni tawh a. Hei hi hri kai hmuhchhuah atanga za zela 74.67 niin tunah hian hri kai enkawllai 3211 an la awm mek a ni.

Hri kai zingah nunna chan mi 46 an awm tawh :

Mizoram-a COVID-19 hri kai hmuhchhuah zingah nunna chan mi 46 zet an awm ta. Nimin zing dar 7:15 khan JH. Chungliana, Bawng-kawn chu ZMC-ah COVID-19 vangin a boral a, May 12 khan hri a kai tih hmuhchhuah niin May 14-ah ZMC-ah admit a ni. Heti hian nimin thleng khan Mizoram-a hri kai hmuhchhuah zingah nunna chan mi 46 awm tawhin June thla chhungin nunna chan mi 6 lai an awm tawh a ni.

Comments

Chhiar Hlawhte