COVID-19 thawh hnihna-a Lockdown chhungin Mizoram-ah hri kai 14,187 hmuh an ni tawh

Mizoram-ah COVID-19 Thawh hnihna avanga kumin April 20-a Lockdown kalpui leh a nih atangin Inrinni kalta, June 26, 2021 thleng khan Sample 196,889 enfiah ni tawhin COVID-19 hri kai 14,187 hmuhchhuah an ni tawh a. Tun thla hman mek hi hri hmuhchhuah tam ber thla a ni mek bawk a ni.

COVID-19 hri leng avanga April 20, 2021 atanga Lockdown kalpui hian Hapta 10-na a hmang tawh a, hemi chhung hian Mizoram-ah Sample enfiah 196,889 awm tawhin heng atang hian hri kai 14,187 hmuh an ni a, heng zingah hian tualchhunga inkaidarh tam berin 12,926 (91.11%) niin rampawn atanga rawn pu lut mi 1,261 (8.88%) an awm bawk. Tualchhunga hri inkai mi 12,926 zingah 4352 (33.66%) chu kaina hriatloh an ni a. Inkhuahkhirh puan April ni 20 atanga Inrinni kalta result thlenga belhkhawmin RT-PCR, TrueNat leh Rapid Antigen Test Sample 196,889 lak hman niin positivity rate chu 7.20% a ni bawk a ni. Mi 9,795 (69.04%) discharge an ni bawk. June thla chhung khan Mizoram-ah hri kai 6692 hmuh niin Mizoram-a hri kai hmuhchhuah tam ber thla a ni mek bawk a ni.

Medical Operation Team leh State Contact Tracing Team te chuan hripui kai zingah dan pumpelh tum leh thu diklo sawi leh an awm thin avangin an hna thui takin a tih khaihlak thin tih an sawi a. “Contact Tracing kan han ti a, inlenpawh avanga kai tih kan hriatchian te pawhin midang an pawh lo niin an in sawi fo mai a, quarantine peihloh vanga sawi tello tura inchah te pawh an awm a, hei hian hnu chhui a tibuai thlak thin a, an sawi duhloh tlat chuan kan tan tih theih a awm bawk si lo a, mipui lam hian thu dik sawi thin se kan duh hle a ni,” tiin Lalbiakthanga Khiangte IPS, State Contact Tracing Team hotu chuan a sawi.

Hetihlai hian Medical Operation Team hotute pawhin “COVID-19 positive zingah an kaina awm hre lo tak tak an awm rualin thenkhat chuan an kai theihna awm an sawi mai duh lo a, Containment Area atanga a ruka chhuak te an awm lehzel a, quarantine peihloh vanga dan pumpelh dan zawng te pawh an awm a, heng te hi a thehdarhtu an nih zel theih avangin ngaihtuahna a ti thui duh hle a, invenna lamah fimkhur a ngai lehzual a ni,” an ti bawk.