Latest News

Doctor sawn tur insawn rihlo tura tih niin SDNCC leh STP ten lawmthu an sawi

Serchhip District Hospital atanga Dr. Lalnunhlima Khiangte sawnna tura Order lo siam tawh chu la ngaihtuah nawn leh tura tih niin amah pawh Serchhip-a awm zui rih tura tih a ni.

Serchhip District Hospital atanga Civil Hospital, Lunglei-a Dr. Lalnunhlima Khiangte sawn tur chungchangah hian nimin khan Health & Family Welfare Department-a Secretary, R. Lalramnghaka chuan thuchhuah siamin May 28-a thuchhuah lo siam tawh chu la ngaihtuah leh tura tih a ni a, thu leh a awm hma chu Dr. Lalnunhlima Khiangte hi Serchhip District Hospital-a awm rih tura tih a ni bawk. Tarlan tawh thin angin Dr. Lalnunhlima Khiangte hi Serchhip District Hospital atangin Civil Hospital-a sawn turin May 28 khan sawrkar chuan Order a chhuah a, Dr. Lalnunhlima Khiangte sawn tur chungchangah hian Serchhip District NGO Coordination Committee leh Serchhip Thalai Pawl te chuan a thiamna te Serchhip District in ala mamawh nia hriain, a aiawh tur dah tur emaw, a nih loh chuan he Transfer Order hi sut leh turin sawrkar chu an ngen bawk a ni.

Hetianga sawrkar in nimin-a thuchhuah a siam leh tak chungchangah hian Serchhip District NGO Coordination Committee Chairman, Kawlthuama chuan an hmalakna ah an hlawhtling ah an in ngai tih sawiin, Mizoram sawrkar leh Health Minister, Dr. R. Lalthangliana chungah an lawm hle tih a sawi a. Hei bakah hian hemi kawnga hma la tu MNF East Block Serchhip President, C. Vanlalsiamthara leh a thawhpui te, an party Hqrs. hruaitute bakah Serchhip bialtu MLA, Lalduhoma te chungah pawh an lawm hle tih a sawi bawk.

Nimin vek khan Serchhip Thalai Pawl te pawhin thuchhuah siamin tun tuma Doctor sawn chungchangah Health Minister hnenah a thiamna ang nei, a aiawh dah a nih loh chuan sawn lo tur leh Order sut leh tura an ngenna ah thu dang a awm a nih loh chuan Serchhip a awm rih tura thuchhuah siam a ni chu an lawm hle tih sawiin, ‘Health Minister chungah hian thinlung takin lawmthu kan sawi a ni,” an ti a. Hemi atana hmalatu te chungah lawmthu sawiin, Dr.Lalnunhlima Khiangte pawh Serchhip-a a awm chhunzawm thei tur chu an lawmpui thu leh, mipui tan theihtawp chhuah zel tura an ngen thu an tarlang bawk a ni.

Comments

Popular News (Last 30 Days)