Hri kai thar 8, enkawl dam 9

Niminpiah-a Serchhip District-a Sample enfiah zingah COVID-19 hri kai hmuh belh awm lovin nimin-a hri kai 8 hmuh an ni a, nimin khan hri kai zingah mi 9 te chu enkawl dam leh an ni.

Niminpiah khan Serchhip District-a TrueNat Laboratory-ah Sample 9 enfiah niin Rapid Antigen Test hmangin Sample 44 enfiah a ni bawk a, heng zingah hian hri kai hmuhchhuah thar an awmlo a ni. Nimin lamah Sample enfiah chhunzawm niin Thenzawl-ah hri kai mi 3 leh Chhingchhip-ah hri kai mi 5 hmuh belh leh an ni bawk.

Hetihlai hian Serchhip District-a hri kai enkawllai mi 9 te chu nimin khan anmahni enkawlna hmun atanga chhuahtir an ni ve leh thung a, heng hri kai enkawl dam te hi Nursing School CCC atangin mi 5 leh Keitum-a 4C atangin mi 4 te an ni a, Nursing School atanga chhuahtir te hi Keitum khua a hri kai hmuhchhuah leh SGI Pvt. Ltd. hnuaia thawk te an ni.

Heti hian nizan thlengin Serchhip District-a COVID-19 hri kai hmuhchhuah chu mi 646 an la ni a, an zinga 540 te chu enkawl dam ni tawhin tunah hian hri kai enkawllai 103 an la awm mek a, hri kai zingah nunna chan mi 3 an awm tawh bawk a ni.