Latest News

Chanchin thar thenkhat :

June 30 thleng Lockdown

Mizoram sawrkar chuan COVID-19 hri leng avanga karleh Thawhtanni, June 21, 201 zing dar 4:00 thleng Total Lockdown kalpui tur a lo tih tawh chu hri kai thar tam tak an la awm zel avang leh hri kai zat (positivity rate) chhutin inkhuahkhirhna kalpui mek hian nasa takin min veng a ni tih a lantir avangin June 30, 2021 zing dar 4:00 thleng Total Lockdown kalpui leh turin a ti a, hemi atan hian nimin khan inkaihhruaina thar tur pawh tihchhuah nghal a ni bawk.

Building sakna tur enfiah

Lunglei Civil Hospital Compound-a Laboratory Building sak hna thawh tan tak chu nimin khan Lunglei HPC Vice Chairman Lawmawma Tochhawng MLA hovin enfiah a ni a, Laboratory Building/Block hi Lunglei Civil Hospital-a Trauma Centre sak mek bul chiah, H&FW Department Staff Quarter hlui awmnaah sak tum niin helai hmunah hian niminpiah atangin a laih hna thawh tan a ni a. Laboratory Building ruahman mek hi a dung meter 30.8 tur niin a vang zawngin a zau lai berah meter 13.65 ni tura ruahman a ni bawk. He hunah hian HPC Vice Chairman chuan Lunglei Civil Hospital Compound-ah Laboratory changtlung tak, Mizoram chhim lam District pali te tana rotling tur sak hna bul an tan thei ta chu a lawmawm takzet tih a sawi bawk.


SRDC in bungrua semchhuak

Sialkal Range Development Council (SR-DC) chuan Saitual District Hospital, Mimbung PHC leh Lengteng bial chhung VLTF thenkhat te hman turin COVID-19 dona hmanrua hrang hrangte nimin khan Aizawl-a an Office atangin an thawnchhuak a. He hunah hian SRDC Chairman, L. Thangmawia MLA chuan Mizoram sawr-kar-in SRDC area chhung mipuite mamawh engemaw chen phuhruk thei tura SRDC a thuam-chak chu lawmawm a tih thu a sawi bawk. heng bungrua te hi Ngopa thlenpui a nih hnuah Saitual, Mimbung, Teikhang, Hrianghmun leh Kawlkulh-ah te pekchhuah leh nghal a ni.


FAW in Vaimim tichhe nasa

Nimin khan Agriculture Department leh Irrigation & Water Resources Department hotute chuan loneitute hamthatna tura hmalakna an neih te sawihona an nei a, he hunah hian kumin hian Mizoram-a Vaimin chinna hmun  Hectare 3441 atangin Hectare 1318-a zau chu Fall Army Worm (FAW) in khawih tih Agriculture Department hotute chuan an sawi a. Thlai a tihchhiat dan, Infestation chu za zelah 37 vel niin loneitu chhungkaw 6834 hi FAW in a tibuai a ni.


Mizoram-ah Delta Strain awm

Nikum December thla a India a hmuhchhuah SARS-CoV-2 Delta Variant Strain, Delta Variant B.1.617.2 chu Mizoram-ah a awm tawh thu nimin khan National Centre for Disease Control (NCDC), Delhi chuan Dr. Pachuau Lalmalsawma, IDSP Surveillance Officer, State Nodal Officer on COVID-19 hnenah an rawn hriattir a ni. Mizo-ram-a hri leng mek ah Variant Strain a awm tawh em tih hriat nan Sample te hi National Institute of Biomedical Genomics (NIBMG), Kalyani, West Bengal-ah thawn thin a ni a, tunhnaia Sample thawn zinga 4-ah Variant Strain hmuhchhuah an ni a, B.1.617.2 (Delta Strain) vek an ni. Delta Strain hi Strain dang te aiin za a sawmnga (50%) laiin inkaichhawn a awlsam bik bakah a let thum deuhthaw in damdawi In-a awm ngai an tam bawk a ni.


MZP in Zirlai titha chawimawina buatsaih

Mizo Zirlai Pawl (MZP) General Hqrs. chuan kumin a pawl 10, High School Leaving Certificate (HSLC) Exam result chhuaka Top 10 a lang Mizo zirlaite chawimawina hun nizan hmasa khan Ignite Studio, Aizawl-ah an buatsaih a, School Education Minister, Lalchhandama Ralte chuan a telpui a ni. HSLC Top 10-a tling te hi Chawimawina thuziak, Pawisafai Topper tan Rs. 10,000/- leh a dangte tan Rs. 5000/- theuh leh ‘Mizoram Zalenna Sualtu L Malsawma Colney’ tih lehkhabu bakah ‘MZP ZOFEST SOUVENIR’ te hlan an ni.

Comments

Chhiar Hlawhte