Posts

Showing posts from March, 2024

A hun pangngai ah Pavalai Intawhkhawmna neih tum a ni

Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.

Candidate 6 zingah INC Candidate hausa ber

Image
Mizoram Lok Sabha bial khat inthlanna chuh tura hming pe mi 6 zingah Congress Party Candidate Lalbiakzama chu a hausa ber.

Motor chuan man thar ah Consumer te chanvo

Image
Consumer te i harh ang u -XLI : Motor chuan man thar ah Consumer te chanvo - Laldinpuia Secretary, Serchhip District Consumer Assn.

Kan ram, kan hnam leh kan Sakhua himna turin Candidate atan ka lo penchhuak - K. Vanlalvena, MNF

Image
Lok Sabha Inthlanpui neih tura MNF Candidate K. Vanlalvena chuan Lok Sabha Inthlanpui-ah thlantlin a nih chuan State sawrkar chu Mizoram hmasawnna atan theihtawp a chhuahpui tur thu sawiin, “MNF party bil tana tlangau tur ni lovin, kan ram, kan hnam leh kan Sakhua himna turin Candidate atan ka lo penchhuak a ni,” a ti.

Mizoram RCS in Serchhip-a DCO a rawn tlawh

Image
Registrar of Cooperative Societies (RCS) R. Lalremsanga MCS chuan Ningani khan Serchhip a District Cooperative Officer (DCO) Office a rawn tlawh.

Kohhran ten urhsun takin Good Friday an hmang

Image
Nimin March 29, 2024 kha Kristian te ni pawimawh ‘Good Friday’ niin Kohhran hrang hrangte chuan he ni hi urhsun takin an hmang a ni.

Aizawl FC in I-League a hnehna an chan zan-ah Serchhip tlangval in record a siam

Image
Tunhnaia che fuh hlei thei lo Aizawl FC chuan I-League Season kal mekah hnehna an chang ve leh ta a, Aizawl FC Player Serchhip tlangval Lalrinzuala chuan record thar a siam bawk a ni.

Draft E. Roll tlangzarh

Siaha District chhunga awm New Siaha East-II leh College Vaih-III Village Council a by-election neih tur atan Ningani khan Draft Electoral Roll tlangzarh a ni a, New Siaha East-II ah hian VC Seat 6 hnawhkhat turin by-election hi neih tur a ni a, College Vaih-III ah hian Seat khat hnawhkhah tur a ni thung ang.

Meizuk khapna Dan zirho

National Tobacco Control Programme (NTCP), National Health Mission (NHM) te leh Aizawl Traffic Police te tangkawp buatsaihin Ningani khan Traffic Police te tan Vaihlo leh a kaihhnawih khapna dan zirhona chu Aizawl SP Conference Hall-ah neih a ni a, he hunah hian tunlai in Public transport hrang hrangah meizuk ching an la awm thin tih tarlan niin heng Taxi, Maxi Cab, City Bus etc-ah te hian meizuk khap tlat a nih thu leh meizu man an awm a nih chuan dan ang Rs. 200/- thleng pawisa chawitir a hrem theih an ni tih tarlan a ni.

Bank te hmalak dan tur duang

Khawzawl District chhunga Bank hrang hrang te hmalak dan thlirin Ningani khan District Bawrhsap K. Lalrohlua hovin DC Meeting Hall-ah neih a ni a, Khawzawl District chhungah pawisa thir (coins) a len tam theih nan Bank hrang hrang te hmalak dan tur duan niin Reserve Bank of India in ‘Clean Note Policy’ a siam thu tarlan a ni a. He policy hnuaiah hian mipui ten pawisa (note leh coins) tha an neih theih nan pawisa tha tawk lo te chu Bank ten mipuite hnena pechhuak lovin RBI hnenah an thehlut zel dawn a ni.

Nomination Paper pawm vek

Mizoram Lok Sabha Inthlanpui neih tur chuh tuma Nomination Paper thehluh te chu enfiah a nih hnuah pawm vek niin Vawiin tlai dar 3:00 thlengin inhnuhdawh theihna hun hawn a ni. He inthlanpui chuh tuma Nomination Paper thehluh te hi Ningani khan Returning Officer leh Aizawl DC Nazuk Kumar-i hovin a pisa-ah enfiah niin General Observer Dr. Nipun Vinayak chuan a telpui bawk a, Recognised National leh State Party atangin INC Candidate Lalbiakzama; ZPM Candidate Richard Vanlalhmangaiha; BJP Candidate Vanlalhmuaka, MNF Candidate K. Vanlalvena bakah Registered Political Party atangin MPC Candidate Rita Malsawmi leh Independent Candidate Lalhriatrenga Chhangte te Nomination Paper thehluh chu pawm vek a ni.

LADC-ah VC thlang turin inbuatsaih chho mek

Lai Autonomous District Council (LADC) hnuaia Village Council (VC) Inthlanpui buatsaih tur atan Electoral Roll enfiah hna chu thawh tan niin April 17, 2024-ah Final Electoral Roll tlangzarh a ni ang.

Vote tla a that theih dan tur ngaihtuah a ni

Chief Electoral Officer (CEO), Mizoram Madhup Vyas IAS hovin Ningani khan a Pisa-ah Lok Sabha MP thlan huna vote tla a that theihna tur ngaihtuahin sawrkar hotu pawimawh an thukhawm.

Campaign-na senso langtlang taka vawng turin chah

Lok Sabha Inthlanpui-a Mizoram tana Expenditure Observer pakhat zawk Arvind Sharma chuan Expenditure Agent-te chu Candidate te Campaign na atana sum dah chu dik leh langtlang taka chhinchhiah a vawng turin a chah.

MP (LS) Inthlanpui neih tur atan Political Party ten Campaign beihpui an thlak chho tan mek

Mizoram Lok Sabha Inthlanpui neih tur atan Political party hrang hrangte chuan ngawrh takin Campaign an nei chho tan mek.

MKHC in MP Inthlan thuchah an tichhuak

Mizoram Kohhran Hruaitute Committee (MKHC) chuan April 19, 2024-a Mizoram Lok Sabha Inthlanpui lo awm turah mipui hnenah inthlan thuchah siamin, Mizoram mipui, Political Party leh Kohhran te chu zawm turin an ngen bawk.

Serchhip District Miss-ah R. Vanlalawmpuii

Image
Miss Mizoram 2024 thlanna neih tura Serchhip District aiawh turin R.Vanlalawmpuii, New Serchhip Khawtetlang chu thlan a ni.

Serchhip District-a pawikhawihna thleng tuartute hnenah zangnadawmna sum pekchhuah a ni

Image
Serchhip District chhunga pawikhawihna thleng tuartu mi 6 te hnenah nimin khan The Mizoram Victims of Crime Compensation Scheme hnuaiah zangnadawmna Rs. 15,25,000/- semchhuah a ni a, zangnadawmna semna hun hi District & Session Judge Joel Joseph Denga chuan a hmanpui a ni.

District Bawrhsap in tlawh

Image
Serchhip District Bawrhsap leh District Election Officer David Lalthantluanga chuan nimin khan Serchhip District chhunga Polling Station thenkhat chu a hmunah tlawhina dinhmun te a enfiah.

Serchhip District-a Polling Official ten Training nei tan

Image
Lok Sabha Inthlanpui neih tura Serchhip District chhunga Vote nei ten Vote an thlak tur lo buaipuitu tur, Polling Officials te tana Training hmasa ber chu nimin khan Serchhip-ah neih a ni.

Vaihlo khapna Dan zirho

Image
National Tobacco Control Programme (NTCP) Serchhip District buatsaihin nimin khan Serchhip-a Sr. CMO Conference Hall-ah Health Department hnuaia thawk, Health Care Professionals te tan Vaihhlo leh a kaihhnawih hrang hrang khapna chungchang zirhona hun neih a ni a, he hun hi Serchhip Sr. Chief Medical Officer (CMO) Dr. LP. Malsawma chuan kai-hruaiin NTCP-a Nodal Officer leh Dy. CMO Dr. Lallawmkimi Chhakchhuak bakah K. Hmingthansangi, Consultant NTCP leh Sarah Laldintluangi, Asst. Director (FDA) ten kalkhawmte zirtirna an pe a ni.

Silai tung turin hriattir

Serchhip District Magistrate David Lalthan-tluanga chuan tun thla ni 21-a Section 144 CrPC, 1973 in thuneihna a pek hmanga ‘Mi tumah in Election puan a nih hnuah Silai an keng chhuak tur a ni lo’ tia thupek a lo tihchhuah tawh tih chakna atan District Level Screening Committee in Ser-chhip District chhung khaw panga (5) thlangchhuaka Silai tung tur an thlan thu thuchhuah siamin a tar-lang a. Hemi ang hian Serchhip, Chhiahtlang, North Vanlaiphai, East Lungdar leh Thenzawl-a mi 49 te chu thupek chhuah ni atanga kar khat chhunga an awmna hnaih ber Police Station-ah an Silai te tung turin a hriattir a ni.

North East Archery intihsiakna tan

Khelo India NTPC North East Zone Open Archery Tournament hmasa ber chu nimin khan Aizawl Republic Veng Field-ah neih tan a ni.

3rd North East Games-a Mizoram Team te lawmna nei

Nagaland-a 3rd North East Games neih zawh taka Mizoram Team te hlawhtlinna lawmpuina chu chu niminpiah khan Hawla Indoor Stadium, Republic Vengthlang-ah neih a ni.

Larsap in Home-ah thilpek sem

Larsap Dr. Hari Babu Khambampati chuan State chhunga hnuchham leh ngawlvei enkawlna In hrang hrang tan Rs. 10,87,800 a pechhuak a. Heng te hi Aizawl-a Hnuchham leh Ngawlvei enkawlna In 12, Lunglei leh Siaha-ah hmun 6 ve ve, Mamit-ah hmun 3, Kolasib-ah hmun 4, Ser-chhip-ah hmun 5, Champhai-ah hmun 5 leh Lawng-tlai-a hmun 2-ah te niin Rs. 25,250/- theuha sem a ni ang.

CADC-ah Chairman thlang

Chakma Autonomous District Council (CA-DC) thutkhawm nimin-a CADC Session Hall, Chawngte-a neih ah Parva MDC Bial atanga thlantlin Mohan Chakma chu CADC 11-na Chairman atan chuhtu awm lova thlantlin a ni a. CADC-a CEm leh MLA nilai Rasik Mohan Chakma chuan an Chairman thar chu lo lawmin, kum 1972-a CADC din a nih atang khan House member-te chuan House chu zahawm takin an vawng tih a sawi a, Chairman thar kaihhruaina hnuaiah chu zahawmna chu vawnnun chhunzawm zel a nih a beisei thu a sawi bawk.

FLAM in mipuite an ngen

Former Legislators Association of Mizo-ram (FLAM) te chuan tuihna kam zel tur ven theih nana dan siam thar chu a nihna ang taka hman anih theih nan Mizoram mipuite leh thuneitute theihtawp chhuah turin a ngen. Nimin khan FLAM hian Aizawl-a Assembly Conference Hall-ah General Body Meeting neiin Ramngaw, nungcha leh tuihna humhalh kawnga Mizoram hmalakna chu chhunzawm zel nise tiin Resolution an pass a, Mizoram Legislative Assembly in tuihna humhalhna tur ‘The Mizoram (Protection of Rivers) Act, 2023’ a pass chu lawmawm an ti hle tih sawiin, a hlawhtlin theih nan mipuiten sawrkar thlawp turin an ngen a ni. FLAM chuan Mizo-ram-ah inthlanna fel leh thianghlim a awm theih nana hma la thintu MPF alo chak chhoh zel theih nan Kohhran lian deuh la tel ve lo te an tel theih nan hmalakna chu chhunzawm zel nise an ti bawk.

ZORO in CM hnenah thlen

Zo Re-Unification Organisation (ZORO) hruaitute chuan nimin khan Chief Minister Lal-duhoma chu a Pisa-ah hmuin ZORO hmalakna hrang hrang an sawipui a, ZORO hruaitute chuan an phak ang tawk leh an theihtawpin khawvel hmun hrang hranga Zofate rorelna pakhat hnuaia kan awm theih nan leh kan insuihkhawm theih nan hma an la ve thin tih sawiin, “Kan phak tawk leh theih tawk a tam lo thin hle a ni,” an ti a. Mizoram State chu Zofate tan chuan an Jerusalem a nih thu sawiin, Mizoram Chief Minister chu Zofa zawng zawngte tan Chief Minister a nih thu leh Zofate rorelna pakhat hnuaia kan awm theih nan leh kan insuihkhawm theih nana hma lakpui turin Chief Minister hnenah thlen a. Chief Minister chuan theihtawp a lo chhuah tur thu leh thawhho a ngaih thu a lo sawi a ni.

Vote tla a that theihna turin inrawnkhawmna nei

Mizoram in thla thar April 19-a Lok Sabha Inthlanpui a neih turah Vote tla a tam theihna tura inrawnkhawmna chu nimin khan Aizawl-a DIPR Conference Hall, Lianchhiari Run-ah neih a ni. State Media Cell for Lok Sabha General Election, 2024 bultuma inrawnkhawmna hun hi Dr. H. Lianzela, Addl. Chief Electoral Officer, Mizoram chuan kaihruaiin Kohhran hrang hrang thalai hruaitute, Tlawmngai Pawl hrang hrang hruaitute, Mizo Zirlai Pawl hruaitute bakah hnam bil zirlai pawl hrang hrang aiawhte an tel a. Addl. CEO chuan Mizoram-ah chuan Lok Sabha MP thlanna aiin MLA thlanna ah vote tla a tam sang fal hle thin tih sawiin, MLA thlanna ah India rama vote thlak tha ber te zinga mi kan nih laiin a hnu lawk thla 4 vel leka Lok Sabha MP thlanna ah erawh National Average pawh kan pha thei ngai meuh lo tih a sawi a. Mipuite a bik takin thalaite zingah vote tla a that lehzual theihnan kan zavaia kan tan tlan a tul thu a sawi a ni.

MJA General Conference vawi 50-na hman a ni

Mizoram Journalists’ Association (MJA) General Conference vawi 50-na chu niminpiah khan Aizawl Information & Public Relations (I&PR) Office Building-a Lianchhiari Run-ah neih a ni.

Mizoram Lok Sabha MP thlanna chuh turin mi 6 ten an hming an pelut

Thla thar April 19-a Mizoram Lok Sabha Inthlanpui neih tur chuh tumte tana hming pekluh hun chu nimin tlai khan a tawp ta a, he inthlanna chuh tur hian mi 6 ten Nomination paper thehlutin heng te hi Vawiin hian enfiah a ni ang.

Serchhip District Miss Mizoram-ah R. Vanlalawmpuii thlan a ni

Image
Miss Mizoram 2024 thlanna neih tura Serchhip District aiawh turin R. Vanlalawmpuii, New Serchhip Khawtetlang chu thlan a ni.

SCDTTA Season Ending Tournament khelh tan a ni

Image
Serchhip District Table Tennis Association (SCDTTA) buatsaih Season Ending Tournament chu nimin khan SCDTTA Hall, New Serchhip-ah khelh tan a ni.

Serchhip District Boxer in Gold Medal a la

Image
Greater Noida-a Sub-Junior Boys & Girls National Boxing Championship 2024 neih ah Ser-chhip District Boxer Justin M. Lalthanpuia, North Vanlaiphai chuan nimin khan Gold Medal a la.

MPF in hruaitu insiam thar

Image
Mizoram People Forum (MPF) Serchhip hruaitu chu tunhnai khan insiam thar niin Vawiin hian thutkhawm neih nghal a ni ang.

Serchhip District Miss Mizoram 2024 puang dawn

Image
Miss Mizoram 2024 thlanna neih tur atana Serchhip District aiawha tel tur thlanna MJA Ser-chhip District ten an kalpui chu zawhfel ni tawhin naktuk March 27, 2024 (Nilaini) zan dar 8:00 hian Lalro Digital Studio-ah a puanna hun hman a ni ang. Kumin a Miss Mizoram 2024 thlanna neih turah hian MJA dinna District hrang hrang ah District aiawh tur thlanna hi neih hmasak a ni a, District hrang hrang atanga thlanchhuah te hian Final Round an thlen bakah nimin-a Aizawl-a Open Audition buatsaiha tling te nen Finalist an ni nghal dawn a. Thla thar April 4 khian Final Round hi neih tan tura ruahman a ni.

Hmeichhia te tan hmalak tum

PC Party in Lok Sabha Inthlanpui-a an Candidate tur Rita Malsawmi chuan nimin khan PC Party Campaign Committee Meeting-ah thu sawiin ram hmasawn nan hmeichhia in hma an sawn a ngai tih a sawi a, “Central sawrkar hian hmei-chhia te tana eizawnna siamna tur Scheme tha tak tak a nei a. MP ka lo nih chuan heng Scheme hi hmang tangkaiin hmeichhia te tana hmasawnna ropui tak ka thlen dawn a ni,” a ti a. Hmeichhia te tana hmasawnna tur Scheme chu sawrkarin a bawhzui that loh avanga a nih dan tur anga mipuiin kan hlawkpui loh dan te sawiin, MP a nih chuan helam ah hian tan a lak tur thu a sawi bawk.

MNF Candidate fehchhuak

Lok Sabha inthlanpui lo awm tur atana MNF Party Candidate K. Vanlalvena chuan nimin khan Kolasib Press Club-ah Kolasib District MJA te kawmin Lok Sabha MP atana a in Candidate chhan a sawifiah a, MNF Party Candidate ni mahse Parliament House-ah Zoram chhung mai nilo, Zo hnahthlak te tan theihtawp a lo chhuah tawh thin avangin 'Mipui Candidate' a in tih thu a sawi bawk. Hei bakah hian K. Vanlalvena chuan Rajya Sabha MP a nih chhunga a hmalakna te pawh sawiin, “Kan ram kan hnam a him theihna turin MP ka nih zui hi a tul niin ka hria,” a ti bawk.

MZU Alumni in chawimawi

Mizoram University Alumni Association 3rd General Body Meeting chu nimin khan Education Department Conference Hall, MZU-ah neih a ni a, he hunah hian MZU zirlai lo ni tawh Minister pathum- Dr. Vanlalthlana, B. Lalchhanzova leh Prof. Lalnilawma te hnenah chawimawina hlan an ni a, he hunah hian an pawl hruaitu tur an thlang nghal bawk a ni.

Sector Officer Meeting neihpui

Lunglei District Bawrhsap leh District Election Officer Ramdinliani chuan thla thar a Lok Sabha Inthlanpui neih tur atana an District chhunga Sector Officer atana ruat mi 36 te chu Meeting neihpuiin an bial theuha Polling Station-ah Assured Minimum Facilities (AMF) a awm leh awm loh a sawipui a. Lunglei District hi nikum a MLA Inthlanpui-ah khan Sector 28-ah then niin tun tuma Lok Sabha Inthlanpui neih turah erawh chuan Sector 36-ah then a ni dawn a, harsatna thlen thulh ah pawh Polling Station tin chu Sector Officer ten rang takin an thleng zung zung thei dawn a ni.

Kawng siam hna thawk zui dawn

Muallungthu-a Central Medical Warehouse panna kawng, Muallungthu - Khumtung Road kawng chunga awm siam hna thawh mek chu zawhfel ala nih loh avangin April 16, 2024 thleng atan Muallungthu - Khumtung Road-a lirthei tlan dan siam thar leh a ni a. Hemi ang hian zing lamah dar 6:00 atang dar 8:00 thleng kawng hi kharin dar 8:00 atanga dawr 10:00 thleng hawn a ni anga. Chawhma dar 10:00 atanga chawhnu dar 2:00 thleng kawng hi khar lehin chawhnu dar 2:00 atanga tlai dar 5:00 thleng hawn leh a ni anga, tlai dar 5:00 atanga zan dar 7:00 thleng kawng hi khar lehin zan dar 7:00 atanga a tuk zing dar 6:00 thleng he kawng hi hawn leh a ni ang. He thupek hian chhiatrupna thil, kangmei leh emergency kaihhnawih a duty, dan leh thupek pawimawh bik a Police leh Magistrate duty te chet velna a huam lo ang.

MRB Champhai-a sum puk tir CBI chhui tir a ni dawn

Mizoram Rural Bank (MRB) Chairman in a ngenna angin MRB Champhai Branch-a sum puktir dana thil diklo tak awm ni a hriat chu Central Bureau of Investigations (CBI) kuta hlan a ni.

Mizoram-ah leihnuai tui mcm 200 vel awmin lachhuak turin ruahmanna mumal neih tul ti

Mizoram in leihnuai tui a ngah thawkhat hle a, Central Ground Water Board leh Mizoram PHE Department chhut danin leihnuai tui (ground water) hi million cubic meter 200 vel awma ngaih a ni a. Hetihlai hian ruahmanna mumal awm lova leihnuai tui hi lakchhuah a nih chuan a hlauhawm thei tih mi thiamte chuan an sawi.

BJP in Lok Sabha Inthlana an Candidate tur puangin Candidate 6 an awm dawn niin a lang

BJP Mizoram chuan Lok Sabha Inthlanpui neih turah an President Vanlalhmuaka chu an Party Official Candidate a ni dawn tih nimin khan an puang a. Heti hian Mizoram-a Political Party ten an Candidate tur puang kimin MP candidate hi mi 6 an awm dawn niin a lang.

Bekang-ah natna hrik hmu

Image
Tunhnai a Khumtung khua mi 67 ten Bekang an eisual leh nausen pakhat thih phah chu enfiah a nih hnuah Khawsikpui (typhoid) thlen theitu natna hrik ‘Salmonella Typhi’ hmuhchhuah a ni.

Lirthei chuanman bithliah thar

Image
Mizoram State Transport Authority (STA) mipui phur chi lirthei-a chuanman tur bithliah thar a siam a, he rate thar hman tan nghal tura tih a ni.

Kohhran in Tumkau ni hmang

Image
Nimin March 24, 2024 (Pathianni) kha Kristian te Ni pawimawh, Tumkau Ni a ni a, Kohhran hrang hrang ten he ni hi urhsun takin an hmang a ni. Isua Krista Jerusalem-a ropui taka a luhna ni, Tumkau ni pual hian nimin zing khan Kohhran tam ber te chuan Tumkau chawi-a kawng zawhin, “Hosanna! Lalpa hminga lo kal chu fakin awm rawh se, Ram lo thleng tur, kan Pa Davida ram chu chawimawiin awm rawh se. Chungnung berah khian Hosanna!” tiin an aurual a, Pathian faka zai in thusawi te ngaih-thlak a ni a, chhun lama kawngzawh te pawh an awm bawk a ni. Kohhran hrang hrangte hian nizan thleng khan Tumkau ni pual hian hun an hmang hlawm a ni.

UPC (NEI) LAD Inkhawmpui nei

Image
United Pentecostal Church (UPC) North East India-a Hmeichhe Pawl, Ladies Auxiliary Department (LAD) te chuan nimin Pathianni hmang khan Pastor Bial Inkhawmpui chu Bial hrang hrangah an nei a, Serchhip Bial LAD Inkhawpui vawi 56-na pawh Electric Veng UPC Biak In-ah Zirtawpni kalta zan atang khan neih a ni a, thupui atan ‘I thuthlung ah hian a derin kan ti ngai lo’ tih chu hman niin Speaker atan Sis. K. Lalhmachhuani B/WNMD chu hman a ni a, nizan khan he Inkhawmpui hi a tiak a ni.

Tek tla in In tichhia

Inrinni zan zanlai pelh hnua ruah leh Tek thawk ah khan Sihfa khuaa H. Thanzama In, Assam Type) chu tekin a deng a, bungrua thenkhat leh an In bang leh Darthlalang engemaw zat a chhia a, mihring thli leh hliam erawh an awm lo thung. Tek tla in a tihchhiat In hi te hi nimin khan mi tlawmngai ten an thawmthat sak a ni.

Veterans Day hman a ni

Inrinni kalta khan ‘Veterans Day’ chu Aizawl a 23 Sector Assam Rifles hmunah Assam Rifles Ex-Servicemen te chuan, Sipai thihsan, hmeithai te leh an chhungte nen an hmang a, he hunah hian Ex-Servicemen, Hmeithai te leh an laichin te harsatna hrang hrang chu Assam Rifles Welfare kaltlanga tanpuina pek tum an nih thu tarlan a ni.

POCSO Act-ah thubuai pung

Mizoram-ah tunhnai kum 4 chhungin naupang chunga hursualna kaihhnawih, POCSO Act hmanga thubuai ziahluh a pun laiin, pawngsual kaihhnawih thubuai erawh a tlahniam hret. CID (Crime Branch) chhinchhiah danin, kum 2020 atanga 2023 chhung khan Mizoram-ah naupang chunga hleilenna leh thildanga naupang laka pawikhawihna, POCSO Act hmanga thu-buai ziahluh chu a vaiin 439 a awm a, kum 2020-a thubuai 110 awmin kum 2021-ah 113, kum 2022-ah 97 leh kum 2023-ah 119 a kai chho leh a. Pawngsual thubuai hi kum 2020-ah 36 a awm a, kum 2021-ah 25, kum 2022-ah 16 ah tlahniam in, kum 2023-ah 28 a awm leh a, kum 4 chhunga pawngsual thubuai ziahluh hi 105 a tling a ni.

Dan lova sumdawn titawp turin Kuhva chingtu in ngen

Vairengte leh a chhehvela Kuhva chingtuten dan lova Kuhva ro hmanga sumdawng thinte chu Mizo leh Mizo inkar-a inhmuh thiamlohna a thlen hmaa an thil tih thin sim turin an ngen.

Solar Plant atana tam dilna hnukkir turin ngen

Environment and Social Justice (CESJ) chuan Mizoram-a Solar Power siamchhuah tuma hmalakna chu sum leh paia hlawkna awm lo leh leilung tana thil thalo nia an hriat avangin sawrkarin khaw hrang hrang VC-te Solar Plant hmun tur a dilna hnuhkir an ngen.

Ainawn Veng-a sawrkar quarters te thiah tum a ni

Aizawl Ainawn Veng (Govt. Complex tia hriat thin)-a sawrkar building leh quarters-te chu mihring chenna atan a him tawk tawh lova hriat a nih avangin thiah tura ruahman a ni a. Building thiah hmasak tur pawh ruahman fel a ni tawh.

Thlantlin chuan NDA Seat-ah thuin Ram leh Hnam leh Sakhaw himna atan theihtawp chhuah inhuam

Lok Sabha Inthlanpui neih tura MNF Candidate K. Vanlalvena chuan thlantlin a nih chuan NDA Seat-ah a thu dawn tih sawiin, ram leh Hnam leh Sakhaw himna turin theihtawpin Parliament chhung leh pawnah a tul apiang ti turin a inhuam tih a sawi.

Tuichawng bialtu MLA insawifiah turin hriattir

Mizoram Legislative Assembly Speaker chuan Tuichawng Bialtu MLA Rasik Mohan Chakma chu MLA atanga ban a nih loh chhan tur April 15, 2024 hmaa insawifiah turin a hriattir.

MINECO-ah Biometric attendance hmangin Department dangah pawh hman zel tum a ni bawk

Sawrkar hnathawkte Office kai chin hriatna tur, Biometric Attendance chu Mizoram New Capital Complex (MINECO)-ah hman a ni tawh tih Chief Minister Lalduhoma chuan sawiin, sawrkar Department pisa hrang hrangah dah belh a nih dawn thu a sawi bawk.

Lok Sabha Inthlanpui-a Expenditure Observer-in Serchhip rawn tlawhin thawktute a kawm

Image
Lok Sabha Inthlanpui neih tura Serchhip District tana Expenditure Observer Anita Ritesh-i chuan nimin khan Serchhip rawn thlengin tun tum Lok Sabha Inthlanpui neih tura Serchhip District-a Expenditure Monitoring Team hrang hranga Member te nen Serchhip DC Meeting Hall-ah an thukhawm.

MUP Serchhip District Headquarters Assembly vawi 13-na Serchhip-ah neih a ni

Image
Mizoram Upa Pawl (MUP) Serchhip District Headquarters Assembly vawi 13-na chu nimin khan Serchhip Auditorium-ah neih a ni a, he hun hi Zaithiam leh Padma Shri dawng tawh Dr. KC. Runremsangi chuan Khuallian niin a hmanpui a ni.

Serchhip-ah World Water Day hman a ni

Image
Khawvel hmundangte rualin nimin khan Serchhip-ah ‘World Water Day 2024’ hman a ni a, he hun hi Serchhip Addl. DC James Lalnithanga chuan khuallian niin a hmanpui a ni.

Sponsorship & Foster Care Fund dawng turte kokhawm

Image
Serchhip-a District Child Protection Unit (DCPU) Office chuan kumin a Serchhip District chhunga Sponsorship & Foster Care Fund atanga sponsorship an pek naupang 125 te leh an nu leh pa te chu nimin khan Serchhip Kawnpui VC Hall-ah kokhawmin he ruahmanna leh naupang humhalhna Dan leh hriattur pawimawh hrang hrangte an hrilhfiah.

Lung lakna hmun enfiah leh

Image
Serchhip leh Thenzawl inkar Mat Lei chhaka kawng siamtu Company ten Lung an lakna hmun chu nimin khan Geology & Mining Department chuan a hmunah an rawn enfiah a, hemi chung-changa YMA in rawtna hrang hrang an siam te chu Company lam hian tih hlawhtlin an intiam a, karleh Thawhlehni-ah a hmuna enfiah leh tura tih a ni. Nimin vek khan Serchhip leh Keitum inkara leivung paihna pawh enfiah nghal a ni bawk.

MIMA in ILP Board din rawt

Mizoram Merchant Association (MIMA) hruaitute chuan nimin khan Chief Minister Lalduhoma chu a Pisa-ah hmuin Mizo ram leh hnam tan ILP Board din rawtna an thlen a. ILP pek danah leh pek tawht en an ngaihsak zui loh thin avang te, an ILP dam leh dam loh ngaihtuah zui a nih loh bakah Sponsor-tute lahin an ngaihtuah zui bawk si loh chungchangte thlenin, ILP Board din tul an tih chhan hrang hrangte an thlen bawk.

Jail tang tan training buatsaih

District Legal Services Authority, Kolasib buatsaih ‘Skill Development Training for Undertrial Prisoners’ chu nimin khan Kolasib District Jail ah hawn a ni a, he Training hi chawlhkar khat chhung kalpui tur niin Jail-a awm mek te tan Puanthui, Pangpar khawi, Lu meh, Ei siam leh Carpentry-ah te training hi kalpui a ni ang.

MHSSP-ah inrawnkhawm

Health and Family Welfare Department hnuaia Mizoram Health Systems Strengthening Project (MHSSP) buatsaih, Stakeholder Consultation (inrawnkhawmna) vawi hnihna chu nimin khan Aizawl-a Directorate of Health Auditorium-ah neih a ni a, he inrawnkhawmna ah hian MHSSP hotute chuan hePproject thiltum zinga langsar zual chu vantlang hriselna lam enkawlna tur ruangam tha zawk te, a hun taka enkawlna pe thei tura in ruahmanna te, Health Insurance Scheme leh thawktu lam tihphuisui te a ni tih an sawi a. Mipuite hnena natna inkaichhawn theih loh chi langsar zual, Non-Communicable Diseases (NCDs) chungchang zirtirna uar zawka kalpuite, NCDs Service kaltlanga mipui hriselna tha zawk a awm theihna atana vantlang theihna hman tangkai te pawh an ngaipawimawh thu an sawi a ni.

State Media Cell thukhawm

Lok Sabha Inthlanpui lo awm tura Media kaihhnawih thil pawimawha mawh latu tura ruat, State Media Cell for General Election to the Lok Sabha, 2024 chu nimin khan an Chairman Dr. H. Lianzela, Addl. CEO hovin State Media Centre, Aizawl-ah an thukhawm a. Lok Sabha inthlanpui lo awm turah vote a tlak that theihna tura hmalak dan tur chi hrang hrang an duang a, NGO/Civil Society te bakah tlawmngai pawl, Hnam bil zirlai pawl hrang hrang leh Kohhran hrang hrang thalai hruaitute nen thawhhona kawng zawn nise an ti a, hei bakah hian Media te nena thawhho dan tur te, Social Media platform hrang hrang hman tangkai dan turte leh mipui vantlang hnena zirtirna beihpui thlak dan tur te an sawiho a ni.

MADC Budget Session zawhfel a ni

Ni thum chhung awh ara Autonomous District Council (MADC) Budget Session chu nimin khan Siaha-a MADC Session Hall-ah zawhfel a ni ta a, nimin thutkhawm ah hian kum 2024-25 atana MADC Budget CEM M. Laikaw-a’n a pharh tak, cheng nuai 21736.21 chu sawiho a nih hnuah pawm a ni.

Bihar Diwas lawmna nei

Mizoram Governor Dr. Hari Babu Kam-bhampati chuan nimin khan Raj Bhavan Durbar Hall-a Foundation Day of Bihar (Bihar Diwas) hman chu khuallian niin a hmanpui a, he hun hi Bihar State, Bengal Presidency nena March 22, 1912-a then hran lawmna anih thu sawiin, Bihar chu 1947-a India-in Independence a neih hnu pawhin Republic of India hnuaia a awm chhun-zawm zel thu a sawi bawk. He programme hi ‘Ek Bharat Shrestha Bharat’ hnuaia hman niin Bihar history leh culture te tarchhuah a ni.

ZPM Candidate tur in Nomination file hmasa ber

Lok Sabha Inthlanpui neih tura ZPM Candidate Richard Vanlalhmangaiha chuan he inthlan chuh tur hian nimin khan Nomination a thehlut.

MNF Candidate-ah K. Vanlalvena ruat a ni

Mizo National Front (MNF) Party chuan Lok Sabha inthlanpui lo awm turah Rajya Sabha MP nilai K. Vanlalvena chu an Party Candidate tur a nih thu an puang.

MHIP Sub-Hqrs. Serchhip Silver Jubilee lawmna Serchhip DIPRO hovin neih a ni

Image
Mizo Hmeichhe Insuihkhawm Pawl (MHIP) Sub-Hqrs. Serchhip kum 25 tlinna, Silver Jubilee lawmna chu nimin khan Serchhip Auditorium-ah neih a ni a, he hun hi Serchhip DIPRO Lalnunmawii MIS chuan khuallian nia hmanpuiin, MHIP Member te chu midangte tana malsawmna ni zel turin a chah bawk.

Serchhip Mipa Team in Final lut

Image
Nimin khan 20th Inter-District Volleyball Championship 2024 Semi Final khelh a ni a, Mipa lamah Serchhip District in Final lutin Hmeichhe lam erawh Final lut zo lovin an tla thung.

Serchhip-ah EVM 1st Randomization neih a ni

Image
Lok Sabha Inthlanpui neih tur atana Serchhip District-a Vote thlakna khawl hman tur thliarfelna hmasa ber, 1st Randomization chu nimin khan neih a ni.

Govt. Serchhip College-ah International Day of Forests pualin Seminar neih a ni

Image
Nimin March 21, 2024 kha ‘International Day of Forests’ a ni a, he ni pual hian Govt. Serchhip College-ah ‘Seminar in Observance of International Day of Forests’ neih a ni.

PYD Day vawi 55-na hmang

Image
Nimin March 21, 2024 kha United Pentecostal Church of North East India (UPC-NEI) hnuaia thalai Pawl, Pentecostal Youth Department (PYD) dinchampha vawi 55-na a ni a, he ni hi hmun hrang hranga PYD dinna hmunah uar leh urhsun taka hman niin hmun thenkhat te chuan Vantlang tana thil tha tihna hun atan te hman a ni a, General PYD in ruahmanna a siam angin nizan khan kumin a PYD Member thar te lawmluhna hun hman a ni bawk. Kum 1969 March ni 21-a Executive Board rorel inkhawm hmasa ber, Shillong-a neihah United Pentecostal Church of North East India pumpui huapin General Youth Department hi din a ni a, he ni hi PYD Day atan hman chhunzawm a ni ta zel a ni.

Sub-Hqrs. YMA Zaipawl Video thar tlangzarh

Image
Serchhip Sub-Hqrs. YMA Zaipawl ten Music Video an siam thar ‘Aw Zoram Nuam’ tih chu nizan khan Serchhip Sub-Hqrs. YMA President PC. Vanlalluna chuan mipuite ngaihthlak theih turin a tlangzarh.

Silai kenchhuah khap

Election Commission of India in Lok Sabha Inthlanpui 2024 neih turah inthlan felfai taka neih a nih theih nana ruahmanna a tihchhuah angin Ser-chhip District Magistrate David Lalthantluanga chuan Section 144 CrPC 1973-in thuneihna a pek hmangin mi tumahin Inthlan puan a nih hnuah Silai a kengchhuak tur a ni lo tih thupek a tichhuak a. He thupek hi tihchhuah a nih atanga thla hnih (2) chhung huam turin niin thupek zawm lo te chu Section 188 IPC hmanga hrem an ni ang. He thupek hian dan kengkawhtu, Sipai leh Police te a huam dawn lo thung a ni.

Expenditure Observer ruat

Mizoram Lok Sabha Inthlanpui neih tura Political Party leh Candidate te sum hman dan endik turin Expenditure Observer mi pahnih ruat an ni a, Serchhip District chhunga Assembly Bial 3-a Expenditure Observer tur hian Anita Rinesh chu ruat niin Serchhip District bakah hian Khawzawl, Champhai, Hnahthial, Lunglei, Siaha leh Lawng-tlai District chhunga Assembly Bial te a enkawl dawn a ni. Serchhip District tana Expenditure Observer hian Vawiin hian Serchhip a rawn tlawh dawn a, Inthlanpui kaihhnawiha thawktu hrang hrangte a kawm nghal dawn a ni.

MIPOTY Book Award hlan

Mizo Poetry Society (MIPOTY) buatsaihin ‘World Poetry Day, 2024’ lawmna chu nimin khan Aizawl-a I&PR Auditorium-ah neih a ni a, he hun hi Art & Culture Department Director Carol VLMS. Dawngkimi chuan khuallian nia hman-puiin Mizo kutchhuak poetry bu chhuak zinga tha ber-a thlan ‘Thingthlavar’ tih ziaktu Nununa Renthlei hnenah ‘MIPOTY Book Award’ hlan a ni bawk. He hunah hian thangtharte Poetry hrang hrang dahkhawmna bu ‘Zaikung Thar’ Vol 6 chu tlangzarh niin chawhnu lamah Poetry Workshop neiin thu leh hla lama hmasawnna tur hrang hrang sawihona neih a ni bawk.

Khaw 4 in Apple ching mek

North East Initiative Development Agency (NEIDA) hnuai atangin Mizoram-a khaw pali Khuangleng, Leisenzo, Lianpui leh Vangchhia te chu Apple chinna atan thlan niin kum 2021 atang khan heng khua ah te hian chhungkaw 220 in Apple chin hna hi an kalpui mek a, kum 2025 atang chuan Apple hi Mizoram chhung ngeia tharchhuaka hralhchhuah theih tura buat-saih mek a ni a, heng Apple tharchhuah te hi Pure Organic vek an ni bawk. Heng Apple chingtute tan hian nimin khan Khawzawl KVK hmunah Changpar hamnga leitha siam dan zir-hona neih a ni bawk.

Mi 18 te Lung zai sak tawh

Health Minister Lalrinpuii hmalaknaa Lung lam thalo zai ngai te Chennai-a a thlawna zai tura ruahmanna siam kal mekah Batch hmasa ber atan mi 19 atangin mi 18 te chu hlawhtling taka zai an ni tawh. Kumin February thla khan ZMC-ah Cardiac Camp buatsaih niin heta tang hian Lung zai ngai hmuhchhuah mi engemawzat te chu Sri Ramachandra Medical Center, Chennai-ah a thlawna zai tura ruahmanna siam a ni a; Batch hmasa ber atan Lung lam thalo zai ngai mi 19 te chu hlawhtling takin mi 18 zai an ni tawh a, pakhat erawh inenkawl deuh a la ngaih avangin zai theih a la ni lo thung. Chennai-a Lung zai zawh tawh thenkhat lo haw te chu niminpiah khan Lengpui Airport-ah lo hmuah an ni a, anmahni In lama an haw hmain an hriselna dinhmun te enfiah sak leh vek an ni. Heng damlo zai te hi Chennai an panna tur mahni intum sakin a bak zawng chu damdawi In lam hian senso an tum sak a ni.

BRO hotu in Governor kawm

Niminpiah tlai khan Border Roads-a Director General (DG) Lt. Gen. Raghu Srinivasan chuan Mizoram Governor Dr. Hari Babu Kambhampati chu Raj Bhavan-ah hmuin Mizorama ramri hrula kawngpui siam kawnga Border Roads Organisation (BRO) hmalak tawhte a sawipui a, kawngpui siam hna thawh meka hmasawnna leh hmachhawp awm mekte an sawidun bawk. He hunah hian Governor chuan DG Border Roads kaihhruaina hnuaia BRO-in ramri hrul leh hmun kilkhawra kawngpui pawimawh tak tak siamna kawnga an hmalakna ah lawmthu a sawi a. Ramri hung leh enkawlna kawnga thil pawimawhte a sawipui bawk a ni. BRO-a DG chuan BRO-te chu tlangram chhengchhe tak taka hnathawka kawng siam thin an ni tih sawiin, heng ah te hian Lei te dawhin, Leiverh hautak tak takte pawh an thawk tawh thin tih a sawi a. Mizoram in a mamawh phawt chuan heng an thiamnate leh an tawnhriatte hi chhawr tangkai theih turin an inhuam reng a ni tih a sawi bawk.

Mi pathum man an ni tawh

Vairengte Forest Range Staff leh Excise & Narcotics Department tangkawp ten tun thla ni 5-a Saphu kawr kg. 98 vel an man chhuizuina kal zelah mi pathum man an ni.

Lok Sabha Inthlan-a Congress Candidate-ah Serchhip SP hlui Lalbiakzama ruat a ni

Mizoram Pradesh Congress Committee (MPCC) chuan kumin a Lok Sabha inthlanpui lo awm turah an Party Candidate tur chu MPS atanga Pension ta, Lalbiakzama a nih thu nimin khan an puang.

Volleyball-ah Serchhip la chak

Image
Aizawl-a 20th Inter-District Volleyball Championship 2024 khelh Serchhip District aiawha kal Mipa leh Hmeichhe Team te chuan Semi Final lut ve ve in Vawiin hian Champhai District an hmachhawn ang.

MHIP Sub-Hqrs. Serchhip Conference vawi 12-na hmangin Vawiin ah Silver Jubilee lawm a ni ang

Image
Mizo Hmeichhe Insuihkhawm Pawl (MHIP) Sub-Hqrs. Serchhip Conference vawi 12-na chu nimin khan New Serchhip YMA Hall-ah neih niin Vawiin hian Serchhip Auditorium-ah MHIP Sub-Hqrs. Serchhip Silver Jubilee lawmna neih chhunzawm a ni ang.

Expenditure Monitoring Team in hna thawk tan

Image
Mizoram in Lok Sabha Seat khat (1) a neih hnawhkhahna tura Inthlanpui neih hun tur puan a nih hnuah Serchhip District-ah pawh Expenditure Monitoring Team hrang hrang te chuan an hnathawh tur ang te an thawk tan ta.

Bawrhsap in MCPA Conference a hmanpui

Image
Mizoram Civil Pensioners’ Association (MCPA) Serchhip District Hqrs. General Conference vawi 12-na chu nimin khan Serchhip District Bawrhsap David Lalthantluanga hovin neih a ni.

Serchhip-ah Anaemia Test Treat Talk neih a ni

Image
Poshan Pakhwada 2024 hman mek pualin nimin khan Serchhip-ah Anaemia Mukt Bharat hnuaiah ‘Anaemia Test Treat Talk’ neih a ni a, hemi denchhen hian a duh apiang tan Anaemia Test neih nghal a ni bawk.

Kawng siamtute Motor chesual ah hnamdang thi

Image
National Highway-54 laihzauh leh siamthat hna thawk mektu BIPL Company hnuaia thawk Truck pakhat chu nizan hmasa khan Serchhip leh Thenzawl inkarah chesualin he Motor khalhtu chu chetsualna hmunah hian a boral.

YMA in CM hnenah thlen

Image
Serchhip Sub-Hqrs. YMA hruaitute chuan nimin khan Chief Minister leh bialtu MLA Lal-duhoma chu a Pisa-ah hmuin YMA Sub-Hqrs. Rorel Inkhawm in Serchhip Chawmkai leh Zote South inkar kawng siam a nih theihna tura hmalak leh Serchhip Kikawn atanga Sailam panna kawng siamthat an lo rel tawh chungchang te ziakin an thlen a. Hei bakah hian Lungpho-a Forest Range Office dah a nih theihna tura hmalak an lo rel tawh bawk CM hnenah hian an thlen bawk a ni.

Lok Sabha Inthlanpui neih tur atan hriattirna tichhuakin hming pekluhna hun hawn a ni

Image
Mizoram in Lok Sabha-a Seat pakhat (1) a neih hnawhkhahna tur atana Inthlanpui neih tur atan nimin March 20, 2024 khan hriattirna tihchhuah a ni ta a, he inthlanna chuh tumte tan hian Nomination Paper thehluh theihna hun hawn nghal niin tun thla ni 27 tlai dar 3:00 thlengin Nomination Paper hi thehluh theih a ni ang.

ASF lenna ah puang leh

Champhai District chhung Vanzau khua a tunhnaia Vawk thi te chu an Sample enfiah a nih hnuah African Swine Fever (ASF) vanga thi an ni tih finfiah a nih avangin Vanzau khua hi nimin atang khan ASF hri lenna hmunah puan leh a ni. Thudawn danin Vanzau khua ah hian tunhnaiah chhan hriat lohin Vawk 17 lai an thi a, heng te hi enfiah a nih hnuah ASF vanga thi an ni tih finfiah niin he khua ah hian Vawk 18 lai suat a ni leh tawh bawk a ni.

MADC Budget Session tan

Mara Autonomous District Council (MA-DC) Budget Session chu nimin khan Siaha-a MADC Session Hall-ah neih tan a ni a, ni thum chhung a awh ang. Nimin-a MADC Budget Session hi Chairman N. Viakhu chuan kaihruaiin tunhnaia MDC Ruat Seat (Nominated Seat) luah tura lakluh mi pali te lawmna hun hman a ni a, hemi hnu hian zawhna leh chhanna hun hmangin Finance changtu CEM, M. Laikaw chuan kum 2024-2025 atan Budget Estimate chu a pharh a, CAG Report kum 2016- 2017, leh 2017-2018 te House-ah a pharh bawk.

World Oral Health Day hmang

World Oral Health Day chu nimin, March 20, 2024 khan khawvel hmun hrang hrangah hman niin National Oral Health Programme bultumin Aizawl-ah pawh MINECO-ah he ni pual hian Ka chhung hriselna chungchang inzirtirna hun hman a ni a, he hun hi Health Department Director Dr. Vanlalsawma chuan hmanpuiin thangtharte zingah ka chhung faina ngai pawimawh, zuk leh hmuam a fihlim an tam tial tial tih a sawi. He hunah hian Civil Hospital Aizawl Dental Department HOD Dr. Zothantluangi chuan tunah hian khawvel pumah mipui vbc. 3.5 ten ka chhung lamah harsatna an tawk mek tih sawiin, Mizoram-ah pawh zuk leh hmuam tih nasat avang te, ei leh in uluk tawk loh avangte in nasa takin ka chhung natna hrang hrang vei an tam thu a sawi bawk. Oral Health Prog-ramme hi Mizoram District 11-ah kalpui mek a ni a. Nikum April leh kumin February thla inkar chhung hian Mizoram-a Oral Health Programme hnuaiah Ka chhung natna chi hrang hrang enkawl chu mi 17,066 an tling tawh a ni.

Chenna In thiat duh lo te thiah sak zel an ni

National Highway-54 laihzauh hna thawh mekah zangnadawmna pek tawh zinga mahni In leh bungrua la senghawi lo te senghawi sak hna chu thawh zel niin nimin khan Lunglei leh Siaha District-ah chenna In thenkhat te chu thiah sak leh an ni.

Political Adrvertisement dilna lut ngaihtuah a ni

State-Level Certification Committee (SLCC) chu nimin khan State Media Centre-ah thukhawmin Lok Sabha inthlanpui lo awm tur kaihhnawiha Political Adrvertisement Pre-Certification dilna lut hrang hrang te an thlirho.

Mizoram Police in CEIR hmang tangkai turin chah

Mizoram Police te chuan Central Equipment Identity Registry (CEIR) hmang tangkai turin mipuite an chah.

Science leh Technology lama ngaih pawimawh thlen

Science Teachers Association (STAM) Mizoram chuan nimin khan Chief Minister Lalduhoma chu a Pisa-ah hmuin Science leh Technology lama Zoramin hma a sawnna tura an ngaih pawimawh thenkhat te an thlen.

Kawng siamtu lirthei chesual ah hnamdang a thi

Image
NHIDCL hnuaia National Highway-54 laihzauh leh siamthat hna thawktu BIPL Company hnuaia thawk Truck pakhat chu nizan khan Serchhip atanga Thenzawl panna kawng, Mualvawm kawr bulah chesual in kawngthang ah a tlanliam a, he Motor ah hian a khalhtu hnamdang pakhat chuangin vanduaina thlenna hmunah hian a boral a ni.

Thinglian pan Pik-Up chesual-ah nausen a thi

Image
Serchhip atanga Thinglian pan Pik-Up Truck pakhat chu nimin tlai khan Khawlailung leh Tuichang lui inkar-ah chesualin he Motor-a chuang mi 7 zingah nausen chawlhkar hnih mi vel chu vanduaina thlenna hmunah a boral a, hliam tuar zingah naute nu leh midang pakhat chu Serchhip a enkawl tura rawn lak an ni.

Serchhip District Team ten hnehna chang ve ve

Image
Mizoram Volleyball Association (MVA) buatsaih ‘20th Inter-District Volleyball Championship’ ah nimin khan Serchhip District aiawha kal Mipa leh Hmeichhe Team ten an match hmasa berah hnehna an chang ve ve.

Complex kawng laizau tan

Image
Serchhip Hmar Veng-a Sports Complex panna kawng, V. Lalhminghlua huan peng (Leisang Veng panna) leh Sports Complex inkar laihzauh hna chu SASCI sum hnuaiah thawh tan a ni ta a. He kawng laihzauh hna thawh mek hi tha tak leh tluang taka thawh anih theih nan Serchhip Addl. SP Saidingliana Sailo chuan helai kawnga lirthei tlan dan tur ruahmanna thar a siam a, he kawng laihzauh hna hi zing dar 7:00 atanga zan dar 7:00 thleng thawh tur niin zing lamah dar 9:00 atanga dar 10:00 thleng leh tlai lamah dar 4:00 atanga 5:00 thleng he kawng hi hawngin a bak zawngah chuan kawng hi khar a ni dawn a ni. He thupek hi March 18, 2024 atanga March 30, 2024 thlenga hman tur niin thupek hian rikrum thil leh emergency duty dang avanga phalna la te a huam lovang.

Serchhip District mipui ten harsatna nei lova Vote an thlak nan ruahmanna siam a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek zel a ni a, mipui ten harsatna nei lova Vote an thlak theih nan ruahmanna siam mek a ni bawk.