Lenkawl

Inrinni khan Serchhip Tuikhuah Veng, Lei-tlahniam-ah Motor pakhat chu kawngsir-ah tlain he Motor atang hian Rakzu tam tham tak man a ni.

Vawiin June 30, 2025 hi MNF ten India laka zalenna an sual avanga kum 20 zet Mizoram in rambuai a tawh hnua India sawrkar leh MNF ten Inremna an ziahna Ni, Remna Ni a ni a, sawrkar Pisa chawlh niin Sawrkar Pisa leh Zirna In te khar a ni ang.

Mizoram Presbyterian Kohhran New Ser-chhip Pastor Bial Kristian Thalai Pawl (KTP) Members’ Meet chu nimin Pathianni hmang khan New Serchhip Kohhran Biak In-ah neih a ni a, thupui atan ‘Tho la, I Pathian ko rawh’ tih chu hman a ni bawk. Mizoram Presbyterian Kohhran New Serchhip Bial-ah hian KTP Branch 5 an awm a ni.

United Pentecostal Church (UPC) North East India-a Pentecostal Youth Department (PYD) Serchhip Town te chuan Inrinni khan Serchhip Blood Bank-a dah turin thisen Unit 22 an pe a, thisen petute hi mipa 19 leh hmeichhia pathum niin Serchhip Blood Bank-ah kalin thisen hi an pe a ni. Thisen pek hma hian Town PYD Chairman Evan H. Lallianmawia chuan hunserh hmangin thisen pek hi chhunzawm nghal a ni. 

Mizoram Rajya Sabha MP K. Vanlalvena chuan Sairang/Sihhmui atanga Myanmar ramri a Zorinpui thleng Rel kawng siam tura ruahman chu Preliminary Survey zawh a ni tawh tih a sawi.

Myanmar tualchhung buai vanga Mizorama raltlan awmte chhinchhiah hna, ‘Biometric Enrolment’ chu thla thar, July, 2025 atangin thawh tan tum a ni a. Raltlante hi Mizoram sawrkar duh dan angin Foreigners Identification Portal (FIP) System hmanga chhinchhiah tum an ni.

Mizoram University chuan kumin June 3-5 chhunga National Assessment and Accreditation Council (NAAC) endikna a hmachhawn hnuah 'A+' Grade a hmu thar a, MZU hian kum 2014 leh 2019 khan NAAC hnuaiah ‘A’ Grade a lo hmu tawh bawk a ni.

Mizoram Tipper Association (MTA) District Hqrs. Kolasib ten Kawnpui leh Sairang inkar Kawng chhe zual siamthat hna an thawh avangin Mizoram-ah tuialhthei rawn lut a khaihlak mek a, tunah hian tuialhthei phur lirthei 60 vel zet a tang-khang tawh nia thudawn a ni.

Aizawl - Thenzawl - Lunglei (ATL) Road zir-chiang tura Mizoram Sawrkarin a rawih, Central Road Research Institute (CRRI) atanga rawn kal Scientist pathum leh Technician pahnih te chuan June 26,2 025 khan Lunglei rawn thlengin Lunglei PWD-te kaihhruaina hnuaiah kawng zirchian hna an thawk a, ATL Road-a Kanghmun South leh Pukpui inkara kawngah kawng (lei) sample hmun hrang hrangah an la a ni. Lunglei PWD hotute sawi danin, kawng sample hi CRRI hmunpuiah zirchian a ni ang a, ni 45 chhungin kawng siam dan turah rawtna an siam dawn a. Rawtna an siam zulzuiin PWD chuan kawng siamna tur atan estimate an siam dawn a ni.

Food Corporation of India (FCI) Chairman Ashutosh Agnihotri chu Zirtawpni khan Mizoram Lok Sabha MP Richard Vanlalhmangaiha Office-ah lengin FCI Godown chungchang leh rang zawka Buhfai a rawn kal theih dan turte an sawidun a. Lok Sabha MP chuan OMSS(D) approval muang lutuk te, approve a nih hnu pawh a Releasing Order (RO) chhuak har lutuk thin leh RO muan lutuk avanga buhfai supply a khaihlak phah thin thu te FCI Chairman hi a hrilh a, Mizoram chhunga labour tlem avanga local transportation a muan thu te bakah Sairang-ah Relin buhfai a lo phurh luh vat theih nan FCI Godown chu a rang lamin peih vat nise tiin a ngen a. Mizoram-ah FCI Regional Ofiice din hma theih nise tiin a ngen bawk a ni. FCI Chairman chuan North East lam enkawltute ko nghalin an harsatna te pawh a rang lama lo enpui a, chinfel a nih vat theihna turin hma a lo lak tur thu alo hrilh a ni.

Mizoram Tipper Association (MTA) District Hqrs. Kolasib in National Highway No. 06 leh 306 huamchhung Kawnpui leh Sairang inkara kawng chhe zual lai siam that hnatlang kar kalta Ningani atanga an neih chu Inrinni thleng khan chhunzawm a ni a, bungraw phur lirthei dan an nih avangin harsatna a thleng mek bawk.

Mizo Zirlai Pawl (MZP) Hqrs. chuan, Mizoram-a Diploma Engineer zir theihna hmasa ber - Mizoram Polytechnic Lunglei chu Court order-a a vawi hnihna atana kalhsak leh an ni chu pawi an tih thu an sawi.

UD&PA Department changtu Minister K Sapdanga'n Tanhril daia bawlhlawh tawih thei lo paihna siam zawh a nih hunah chuan Tanhril-ah bawlhhlawh tawih thei lo chauh paihin Tuirial-ah tawih thei chauh paih a nih tur thu a sawi.

School Education Minister Dr. Vanlalthlana chuan Zirtirtu sawnchhuah chungchangah buaina a tam thin avangin Transfer & Posting Rules thar duan a nih tur thu a sawi a. Sawrkar School zawng zawngte chuan Term Exam-ah zawhna inang (common question) an chhang tawh dawn tih a sawi bawk.

Mizoram Volleyball Association (MVA) chuan tunhnaia Mizoram chhunga leimin tuarte tanpuina atana 'MVA Charity Volleyball Match & Charity Show' an buatsaih-a an sum hmuh atangin nimin khan Sub-Hqrs. YMA Serchhip hnenah Rs. 1,00,000/- (cheng nuai khat) an hlan.

Serchhip Officers’ Club (SOC) chuan Ser-chhip khawpui chhunga khuarel chhiatna avanga In leh lo chan te hnenah nimin khan tanpuina Rs. 1,70,000 an semchhuak. Tunhnaia ruahsur nasa leh leimin avang khan Serchhip-ah In leh lo chan mi engemaw zat an awm a, heng mite chhawmdawlna atan hian Serchhip Officers’ Club te chuan sum leh pai mahni remchan ang ang an thawh-khawm a. SOC member lo ni tawh thin te pawhin sum leh pai hi thawhin an sum thawhkhawm Rs. 1,70,000 chu nimin khan harsatna tawk chhungkaw 13 te hnenah kalchilhin an hlan a ni.

Serchhip District Executive Force (DEF) hnuaia Police Constable atanga Sub-Inspector te tana ni khat awh New Criminal Law pathum bakah Information & Technology leh Cyber Security chungchang zirhona chu nimin khan Ser-chhip SP Conference Hall-ah neih a ni a, he hun hi Serchhip SP, Gavit Gogna IPS chuan telpuiin he Training-a tel tura koh te chu thupui pawimawh tak tak, an hnathawhna atana tangkai tak tak tur an zirho dawn a ni tih hriaa uluk taka training turin a chah a, Training pawimawhna hrang hrang a sawi bawk. He Training-ah hian Inspr. Malsawmtluanga, Reserve Officer, Serchhip DEF chu Course Coordinator niin mithiam hrang hrang ten Training thupui tura thlanchhuah hmang hian zirtirna an pe a. Tun tumah hian mi 20 ten Training hi an nei a ni.

Health Minister Lalrinpuii’n damdawi In-a mahni sum seng lova in enkawl theihna sawrkar in a ruahman, Mipui Healthcare-ah inziahluh hun chhung June thla ralhmaa inziaklut theuh turin mipuite a sawm.

Mizoram-a Diploma Engineer zir theihna hmasa ber Mizoram Polytechnic Lunglei Building chu a tum hnih nan Court thuchhuak angin nimin khan kalh leh a ni.

Mizo Students’ Union (MSU) General Hqrs. hruaitute chuan nimin khan RIPANS Director Dr.Sanjay D.Sawant chu a Pisa-ah hmuin RIPANS a State dangin Seat Reservation pali (4) an neih chu an hnawhkhah loh chuan Mizoram atanga dilte tan dahsak thin turin an ngen a, OBC te Post dil theih chu tichhuak thuai thin turin an ngen bawk.

Mizoram sawrkar hmalaknaa Territorial Army (TA) 'Mizo Company' din turah Lunglei a an awmna hmun tur leh mamawh hrang hrang ngaihtuah dan tur chu nimin khan Bawrhsap Navneet Mann-i hovin ngaihtuah a ni a, Territorial Army Mizo Company awmna hmun tur atan hian Lunglei Kawmzawl-a sipai luah ram chhungah hmunhma ruahman tum niin, ram acre 20-a zau lakna tur hriattirna (preliminary notification) chu June ni 4, 2025 khan Lunglei District Collector & Deputy Commissioner chuan a chhuah tawh a. Helai hmuna sipai an inbenbelna atana PHE Department atanga tui pekna tur leh P&E Department atanga eng pekna tur mamawh hrang hrang chu State sawrkarah thlenin, hmalak zui nise tih a ni.

Mizoram Amateur Taekwondo Association (MATA) chuan nimin khan Aizawl-a Taxation Conference Hall-ah ‘World Taekwondo Black Belt Awarding Ceremony’ buatsaihin he hun hi Chief Minister Lalduhoma chuan a telpui a, Black Belt chu Taekwondo technical skill chi hrang hrang nal taka mi in a thiam a, exam hautak tak a paltlang leh hnua dawn thin nia a hriat thu sawiin, “He belt hian a dawngtu chu mi tumruh, mahni inthunun thei leh inveng thei a nihna a lantir a. Dawhthei leh zaidam taka midangte zirtir a, kai-hruai thei, nun kawng dik ngaihlu mi a ni tih a ti lang a ni,” a ti bawk. MATA hi kum 1987 a din a ni a, Black Belt Awarding Ceremony hi kum 2006 atang khan an hmang tan a, kumin hi a vawi 11-na niin kuminah hian mi 60 hnenah award hi an hlan a, an zinga mi 42 hi a dawng thar an ni.

National Statistics Day vawi 19-na pualin nimin khan ramchhung hmun hrang hrangah hman a ni.

Mizoram Tipper Association (MTA), Ko-lasib District Hqrs. bultumin tunkar Ningani khan NH-06 leh 306 huamchhung kawngpui chhe zual lai thawmthat anih avangin lirthei thahnem tak an tangkhang mek.

Khawvel-a Journalism chawimawina ropui 'Emmy Awards' chu June 26, 2025 khan sem-chhuah niin 'Emmy Awards' dawngtu Team zingah Mizo pahnih an tel.

Mizoram Police hnathawh dan thlirletna chu nimin khan Mizoram Police Headquarters (PHQ) Khatla-a DGP Conference Hall-ah neih a ni a, Home Minister K. Sapdanga chuan a talpui a ni.

Chief Minister Lalduhoma chuan CSR Implementing Agency tam zawk kan neih theih nana hma la turin Chief Minister Office-ah CSR Cell an din thu sawiin, CSR atana Project thehlut te pawhin DO letter an mamawh chuan an tanpui zel tur thu a sawi bawk.

 

Serchhip-a Excise & Narcotics Department hotute leh Serchhip District MJA Member te chu nimin khan inkawmin hmalakna leh thawhhona tur hrang hrang an sawiho.

Khawvel puma Ruihhlo hmansual leh tawlhruk dona Ni, ‘International Day Against Drug Abuse and Illicit Trafficking’ chu nimin khan ram hrang hrangah hman a ni a, Serchhip-ah pawh Police Department leh Excie & Narcotics Department te chuan he ni pual hian hun an hmang a ni.

Mizoram University (MZU) Examination Department chuan nimin khan kumin a Under-Graduate Semester hrang hrang Exam result a tichhuak a, VI Semester-ah Govt. Serchhip College pawh an titha tawhkhat hle.

District Child Protection Unit (DCPU) hnuaia Jail Inspection Team te chuan nimin khan Serchhip District Jail tlawhin kum tlinglo tang an awm leh awm loh an enfiah a, tun tumah hian kumtling lo tang an awm lo a ni. Tun dinhmunah Serchhip District Jail-ah hian mi tang 66 an awm mek a, an zinga 62 te hi mipa niin hmeichhe tang 4 an awm a, tang zinga 32 te chu thubuai ngaihtuah lai niin 34 te chu thiamloh chantir tawh an ni.

Food, Civil Supplies and Consumer Affairs Department chuan Eirawngbawlna Gas chung-changah thuchhuah siamin LPG Distributor-ten LPG filled cylinder an pekchhuah/sem dawnin Marketing Discipline Guidelines-in a phut ang 'Gas bur tak awm buk dik tak chauh an phurchhuakin bukna dik thlap (correct weighing equipment) an keng tel anga, customer hmuh lai ngeiin a dik leh dik loh an buk leh tur a ni' tih chu zawm ngei tur a ni tih an tarlang a. Hei bakah hian mi thenkhat, Gas an booked tih pawh hrelo te hnenah Delivery Authentication Code(DAC) a thleng thin tih hriat niin, DAC hi Gas dawn hunah chauh Gas Distributor-te hnenah pek tur a nih thu an tarlang bawk. 

PHE Minister Prof. Lalnilawma chuan nimin khan Aizawl-a Assam Rifles chhuahsan tak, Lammual hmun thenkhata tuihna awmna te, Hunthar lei tlahniam-a tui putna leh Helen Lowry School, Seventh Day Tlang Girls Hostel-a Pipe thawmthat ngaite chu a hmunah kalin a endik a. PHE Minister chuan Assam Rifles chhuahsan tak, Lammual-a tui hna tha tak awm chu mumal taka hmalakna a awm loh chuan a bulhnaia In dinglai tan chhiatna a thlen theih thu sawiin, tui khawlkhawmna tur mumal tak siam a, vantlang tana hman tangkai theih tura ruahmanna kalpui a tul thu a sawi a. Hmundang a tuiput te pawhin harsatna a thlen loh dan tur a en bawk.

Nimin khan Mamit-ah District Agricultural Marketing Committee (DAMC) chu an Chairman leh Bawrhsap K. Laltlawmlova hova thukhawmin tun thla ni 30 khian an hmalakna kharna hun hman an rel a, Secondary Collection Centre (SCC) tinah Closing hun hi hman tur niin DAMC Member ten 1st July,2025 leh 3rd July,2025-ah SCC hmun hrang hrang tlawhkual tum a ni bawk a ni. He hunah hian an hmalakna te thlirho niin SCC tina Officer incharge te atangin hmalak tawh dan leh dinhmun bakah harsatna an neih te ngaihthlak a ni bawk.

Lunglei-a Environment Forests & Climate Change Department chuan nikum Green Mizoram Day-a Hrangchalkawn leh Thualthu inkar NH-54 kawng dunga thingtiak phunte a nun dan leh a dinhmun an zirchiang a, Department leh pawl hrang hrang 54 ten thingtiak 1,170 an phun zingah 687 (zaa 58.72) chauh a nung tawh tih an hmuchhuak a, a thi leh chhia thlak ngai 483 leh a hungna chhia siamthat ngai 301 a awm tih an hmu chhuak bawk. Thingphun thi leh chhia a tam chhan hi kawng laihna leivung leh chirh tawlh vang te, kawng sir hungna siam hna thawh vang leh Thal a rei vang te ni deuh bera an hriat thu an sawi bawk.

Mizoram Legislative Assembly Speaker leh Chalfilh Bialtu MLA Lalbiakzama chuan a Bial chhunga khaw hrang hrang fang mekin nimin khan Khawlian khua a tlawh a, Khawlian YMA Hall-ah mipuite nen hun hmangin Khawlian khua hian bialtu MLA hi chawimawina an hlan a, Bialtu MLA chuan inthlahrung taka chawimawina a dawn thu sawiin, chawimawina chuan mawhphurhna a ken tel thu leh, ram leh hnam tana a thawhna kawngah fuihtu a nih tur thu a sawi bawk. Chalfilh Bialtu MLA hian Zirlai tithate hnenah lawmpuina hlanin VC atana thlan thar te chu eng Party pawh nise inthlahrung lo tur leh ram hmasawnna turah chuan dik tak leh fel taka thawkho zel turin a chah bawk.

International Day Against Drugs Abuse and Illicit Trafficking denchhenin nimin khan Champhai District Drug Disposal Committee chuan Champhai Police te'n June 2024 atanga April 2025 chhunga ruihhlo an man, Court in halral tura phalna a pek tawh te an halral a, heng ruihhlo halral te hi a vaiin Rs. 1,17,03,45,500/- hu niin ruihhlo an halral zingah hian Heroin kg 24.841, Methamphetamine kg 249.125 leh Crystal Methamphetamine kg 25.834 te a tel a, Champhai District Hospital Complex-ah heng ruihhlo te hi halral a ni.

Mizoram Police CID (Crime) leh Aizawl District Executive Force te chuan International Day against Drug Abuse & Illicit Trafficking denchhenin nimin khan ruihhlo an man sa te Zoram Medical College & Hospital, Falkawn-ah incinerator hmangin an halral a. Ruihhlo an halral te hi Heroin kg. 8.224 (Rs. 2,46,72,000 man) te; Methamphetamine kg. 87.07 (Rs. 11,31,91,000 man) leh Ganja kg. 23.244 (Rs. 1,16,220 man) te niin a vaiin Rs. 13,79,79,220 hu zet a ni. Ruihhlo halralna hun hi DIG (CID) Dingluaia IPS in a hmanpui a, Mizoram Police te chu ruihhlo dona kawnga n la zel turin a fuih a, Ruihhlo Do chu Mizoram Police tana hna pawimawh berte zing ami anih thu a sawi bawk.

Aizawl Vaivakawn, Zohnuai-a lei tlakhniamna hmun chu nimin khan Bialtu MLA leh Minister Lalnghinglova Hmar chuan tlawhin vengchhung mipuite kawmin sawrkar hmalakna te a hrilh a. Vaivakawn, Zohnuai lei tlahniam thin siamtha tak tak tur chuan a bulthut, luidung atanga lei tawlh tur danna Check Dam siam a ngaih thu sawiin, thil hautak tham tak a nih avangin tun dinhmuna tih theih awm chu chhiatna zualpui thleng thei laka invenna tura hmalak a ni tih a sawi a. Zohnuai lei tlahniam thawmthatna tur atan hian SASCI atangin cheng vbc. 3.84 hmuh a nih tawh thu leh tui kawng mumal zawk, Side-Drain leh Linked-Drain te, Gabion leh Retaining Wall te siama a rang thei ang bera hmalak nghal a nih tur thu a sawi a ni. He hunah hian Geology & Mining Department-a Geologist, Malsawmdawngliana chuan helai hmuna lei chet dan chu DGPS khawl hmanga an thlithlai reng thu sawiin, lei (soil) sakhat dan chungchang pawh zirin, leiverh (bore hole) pawh hmun 6-ah an neih thu te, hmun thenkhatah chuan leihnuai f...

Directorate of School Education hnuaia Adult Education Wing buatsaihin ‘Meichher’ Chanchinbu Golden Jubilee lawmna neih a ni a, he hun hi School Education Minister Dr. Vanlalthlana chuan hmanpuiin Meichher Jubilee Special Edition a tlangzarh bakah Jubilee chhinchhiahna thu tar (monument) a hawng nghal bawk.

Chief Minister Lalduhoma’n Inner Line Permit (ILP) thih hnua rei tak Mizoram-a chambang an awm thin thu sawiin, ILP chu online hmanga kalpui thuai a nih dawn thu leh ILP thi tawh te a hriat zung zung theih tawh dawn niin a sawi.

Chief Minister Lalduhoma chuan nimin khan a Pisa-ah Mizoram-a rawn zin mek Ministry of External Affairs, Protector General of Emigrants-a Joint Secretary Surinder Bhagat IFS chu kawmin Mizoram tana thil pawimawh hrang hrang an sawidun.

Social Welfare Minister Lalrinpuii'n ruihhlo avanga mipa an kiam chak chu veiawm a tih thu a sawi.

Election Commission of India (ECI)-in a buatsaih India International Institute of Democracy and Election Management (IIIDEM), New Delhi-a training tur mi 45 te chuan nimin khan Mizoram an chhuahsan a, heng zingah hian Serchhip District atangin mi pathum an tel a ni.

Serchhip Addl. DC Lalrinzuala chuan mipui hnena ngenna leh hriattirna tichhuakin Serchhip Beautification Project chu Serchhip khawpui a lo mawi zual zel theih nan a taka hmalak chhoh mek a nih thu leh hei hi a hlawhtlinna kan hmuh ngei theih nan sawrkar hmalakna thlawp tur leh thawhpui turin khawtlang mipuite a sawm a. He project hnuaiah hian hmalakna hrang hrang a awm thu leh a hmunhma thlanchhuah te pawh mimal ram ni loin vantlang/sawrkar ram hmang tangkaia ruahman a ni tih sawiin, Serchhip khawpui ti mawi tura project hmalaknate zah tur leh theihtawp chhuah tlang turin mipuite a sawm bawk a ni.

Mizo Students’ Union (MSU) General Hqrs. chuan RTI Online Mizoram Portal-ah Higher & Technical Education Directorate-a ‘College Zirlaite Student Aid Fund pekkhawm hmanralna’ an zawhna chu SPIO in a hmanna dik tak tarlang si lova a chhan avangin March 8, 2025 khan First Appeal an thehluh chu ni 108 zet a liam hnuah pawh chhan ala nih loh avangin nimin khan State Information Commission-a SPIO hnenah 2nd Appeal an thehlut leh a. MSU chuan zirlai ten Admission an tiha Students Aid Fund Rs. 50 an chawi thin chu Zirlaite tanpuina tak tak ni lo-ah hmanral ni thina an hriat thu sawiin, theihtawp chhuaha chhui an tum thu an sawi bawk.

Mizoram Pradesh Congress Committee (MP-CC) Treasurer Dr. Lalmalsawma Nghaka chuan nimin khan Aizawl Press Club-ah thuthar thehdarhtute kawmin April ni 1 atang khan Mizoram sawrkar chuan Mizoram Universal Health Care Scheme (MUHCS) pawisa pe lo (Cashless)-a Damdawi In-a inenkawl theihna chu a kalpui tan ta tih sawiin, he Scheme hi Chief Minister in March ni 19 khan a hawng tih an sawi a. “He Scheme hi Scheme tha tak mai, mi harsa zawk te tan phei chuan ‘a aia tha a awm chuang lovang’ tih tur a ni,” tiin amaherawh chu sawrkar in hetiang Scheme tha tak kalpui a tum dan hi a fuh lo hle-a an hriat thu a sawi a. “He Scheme mumal lo taka kalpui a tum hi ZPM sawrkar hian ngaihtuah tha leh se, Private Hospital te nen inremna neihpui thuai thuai se, hlawhtling takin kal se tih hi kan duhdan a ni,” a ti bawk.

Aizawl South-II Bialtu MLA Lalchhuanthanga chuan nimin khan a Bial chhunga awm Salvation Army enkawl Mualpui-a Muanna In chu tlawhin an naupang enkawl mékte tan Mualpui 3rd Battalion MAP English Medium School-ah zirlai 20 tan Admission a tihsak a, Muanna In chu pui thei tura Pathian in a hruai zelnaah lawmthu sawiin, a tul ang anga puih zel a inhuam reng thu pawh Bialtu MLA hian a sawi bawk.

Assembly Deputy Speaker Lalfamkima chuan nimin khan Kolasib DC Office Tual atangin Dharti Aaba Janjatiya Gram Utkarsh Abhiyan (DAJGUA) Tribal Empowerment Campaign nei turte a vailiam a, Sawrkar in Tribal te hma-sawnna tur atan hma a la chho zel tih a sawi bawk. Kolasib District-ah hian June 25 atanga 27 chhungin khaw 12-ah Campaign hi neih a ni dawn a ni.

Chalfilh Bialtu MLA leh Assembly Speaker Lalbiakzama chuan nimin khan MLA Fund atanga sak Phuaibuang PHC Morque House chu a hawng a, Bial chhung mipuiten hriselna lama an mamawhte theihtawpa a bawhzui reng thu sawiin, chhungkaw tinte Mizoram Universal Health Care Scheme (MUHCS)-ah inziaklut vek turin a sawm a. MUHCS chu a thlawna inenkawlna (cashless) a nih thu te, mi tam takin an chhawr tangkai mek thu te, inziaklut an pun zel thu leh sum harsatna lian tak kara sawrkarin mipui hmakhaw ngaia a kalpui thu te a sawi bawk. Assembly Speaker hian nimin khan Daido khua in Tuivai Zone & SADVA cum MLA Cup Women Volleyball Champion 2025 lawmna an neih chu a hmanpui bawk.

Ministry of DoNER-in India hmarchhak hmasawnna tura Economic Corridor hmathlir duang tura a din, High Level Task Force on North East Economic Corridor chu nimin khan an Convener leh Chief Minister Lalduhoma hovin biakhmuhtheihna hmangin an thukhawm a, he hunah hian DoNER Minister Jyotiraditya Scindia leh Meghalaya Chief Minister Conrad Sangma te bakah Assam atangin Minister leh Manipur Chief Secretary te an tel a. MoRTH-a Secretary leh sawrkar mi pawimawh dangte an tel bawk a. He Task Force hi Ministry of DoNER-in India hmarchhak hmasawnna ruhrel pawimawh thawh tur ruahmanna neia rawtna siam tura a din a ni.

Kolasib Fast Track Court chuan September 23, 2023-a Heroin gram 512 (Hawng 42) kawl avanga man Jalal Hussain Barbhyia (26), Kaptanpur Part-3, Silchar chu thiamloh a chantir a, nimin khan Kolasib Fast Track Court Judge R Vanlalena chuan hremna tichhuakin kum 10 chhung Jail-a tâng tur leh Rs. 1,00,000 chawi turin a hrem a, a pawisa chawi tur hi a pe lo a nih chuan a tan belh leh a ngai dawn a ni.

Saitual District chhung Tualbung khuaa Tomato chingtute chuan khuarel chhiatna, ruahtui tam lutukin an Tomato ti lawngin, a rah seng tur engemaw zat a tichhia nia sawiin, an mangang hle tih an sawi. Tualbung khuaah hian eizawn nana Tomato chingtu chhungkaw 30 vel awmin tunah hian Tomato hi thar mekin a tihralna tur an zawng mek a. Tomato rah hralhna lamah an buai thu sawiin, man man zawka an hralh ve theih beiseiin Tender chhuahin an lilam a, chhangtu mimal an hmu zo si lo chu an manganna tizualtu a nih thu an sawi a, Aizawl lamah kg-a Rs. 35 vela pekna tur zawn an tum thu an sawi bawk.

Khawzawl District chhunga awm Sialhawk khua chuan nikum aiin kumin hian Lakhuihthei thar tam an inbeisei.

Aizawl Tennis Court leh a chhehvela Inrinni-a chawhmeh zuara inpho thin te chuan June ni 21, 2025 (Inrinni) a lungawi lohna lantir nana motor kawng an dân tuartu zawng zawng chungah ngaihdam an dil.

Mizoram-a NGO leh Corporate Social Responsibility (CSR) Implementation Agency-te hnena CSR chungchang inhrilhhriatna hun chu nimin khan Aizawl-a I&PR Auditorium-ah neih a ni.

Handholding Scheme hnuaia Loan Component-ah dilna lut 588 te chu Line Department ten an pawmsak.

Mizoram sawrkar-a Information & Communication Technology (ICT) chuan an server host-na thin ‘Ctrl-S Data Center’ atangin a aia tha zawk leh secure zawka ngaih ‘Google Virtual Private Server’ (VPS) lamah insuan tura hmalak mek a nih thu an sawi.

School Education Department-a Adult Education Wing-ten thlakip chhuak Magazine an tihchhuah thin 'Meichher' Golden Jubilee pualin nimin khan ‘Zoram Entu Meichher Seminar’ chu School Education Directorate Conference Hall-ah neih a ni a, he hun hi School Education Director Angela Zothanpuii chuan hmanpuiin Meichher Golden Jubilee lawm kum takah Mizoram chu ziak leh chhiar thiam, Full Literacy-a puan a ni ta chu Meichher thiltum hlawhtlinna ropui tak a ni tih a sawi a. A tirte atanga buaipuitu R. Lalrawna chu Literature & Education huangah Padma Shree Award hlan a lo ni leh pawh Meichher Chanchinbu hlutna tarlangtu a ni tih a sawi bawk.

Information & Communication Technology (ICT) Department changtu Minister Dr. Vanlalthlana chuan chak zawk leh langtlang zawka sawrkar file-te a kal theihna turin eOffice hman a nih thu sawiin, eOffice hmang hian file 6,492 kaltir a nih thu leh heng file-te hi vawi 63,565 khawih chet tawh a nih thu a sawi.

Sawrkar Laipui-a Ministry of Culture bultumin nimin, June 25, 2025 khan ramchhungah ‘Samvidhan Hatya Diwas’ (Constitution Murder Day) hman a ni a, Mizoram-ah pawh Chief Minister Lalduhoma hovin he ni hi hman niin Chief Minister chuan Democracy tundin leh ram Danpui humhalh a tulzia hriat thar nan he ni hi hman a nih thu a sawi a ni.

Serchhip Police te chuan nimin khan Chhingchhip khua ah Rakzu litre 640 zet manin a neitu nia hriat mi pakhat leh Zu phurhna atana hman Motor leh a khalhtu an man bawk.

Serchhip-a dawrkar leh sumdawngte telna pawl, Chamber of Commerce Serchhip chuan kum 2025-2026 chhunga an hruaitu tur thlanna neiin President-ah K. Tlangthanmawia (Bazar Veng); Vice President-ah F. Lalthlamuana (Bazar Hnuai); Secretary-ah PC. Zosangliana (Bazar Veng); Asst. Secretary-ah C. Lalnunsanga (Field Veng); Treasurer-ah B. Rokima (Tuikhuah Veng) leh Fin. Secretary-ah H. Lalhlimpuia (Bazar Veng) te thlan an ni.

Sawrkar laipui in ruahmanna a siam angin National Food Security Act (NFSA) hnuaia hamthatna dawng te tana a thlawna buhfai an dawn thin chu thla thum (3) chhung atan sem lawk mek a ni a. Tun tumah hian ruahman lawk angin June, July leh August thla atan Ration buhfai hi sem niin Card Eng (AAY) leh Card Pawl (PHH) nei te tan Ration buhfai hi sem lawk a ni a, Ration buhfai la turte tan hian e-Poss Machine ah tum thum hmeh ngaiin Retailer thenkhat ah chuan khawl lam thatlohna avangin sem theih loh ala awm nia thudawn a ni bawk.

Serchhip khawpui chhunga lirthei lian (HMV) tlanluh phal lohna thupek chhuah chuan Serchhip khawpui chhunga bungraw dah te a huam lo nia thudawn a ni. Tun thla ni 4 khan Serchhip SP chuan thuchhuah siamin khawchhia avanga leimin leh kawng chhia a tam avangin Kikawn leh Sailiam atanga Serchhip khawpui chhung lut tur Motor lian (HMV) chin tlanluh phal a nih loh thu a tarlang a. Hei vang hian Serchhip-a sumdawng thenkhat te chuan bungraw phurhluh kawngah harsatna an neih thu an sawi a. Hemi chungchang hi nimin khan District thuneitute hnenah thlen niin District Bawrhsap chuan Serchhip SP a be nghal a, SP chuan Serchhip-a bungraw dah turte chu Serchhip-ah hian tlanluh phal an nih thu a lo sawi a ni.

Thla khat kalta, May 24, 2025 atanga nimin June 24, 2025 chhung khan Mizoram hmun hrang hrangah leimin avanga In chhia leh In chim 281 zet chhinchhiah awmin heng chhiatna thleng kaihhnawih ah hian mi 5 an thi a ni.

Mizoram Board of School Education (MB-SE) chuan nimin June 24, 2025 khan Higher Secondary School Leaving Certificate (HSSLC) leh High School Leaving Certificate (HSLC) Compartmental & Improvement Exam results chu a tichhuak.

Excise & Narcotics Department-a Commissioner Z. Lalhmangaiha chuan Mizoram-ah ruihhlo a hluar chhan ber chu State thenawma Golden Triangle atanga Mizoram-a awlsam taka ruihhlo a luh vang a ni tih sawiin, kumin ah May ni 31 thleng khan END chuan Heroin kg. 16 leh gram 17 zet an man tawh a ni.

Nimin chawhnu dar 2:15 vel khan Ngopa Chhim Veng-a Samuel T. Zothanmawia te chenna In leh Furniture Workshop atana an hman In dang pakhat chu leimin in a hnawl a, kar hmasa lamah helai vel hi a lo min tawh avangin In neitute hi an chhuak lailawk tawh a, an bungrua erawh engmah an chuh hman lo thung a ni. He leimin hian Ngopa tlangdung atanga Manipur panna kawng pawh a hnawh bawk a ni.

Nimin khan Saitual-ah Foreigner Identification Portal-a biometric leh demographic hmanga raltlante chhinchhiah dan tur relin District chhunga Officer te an thukhawm.

Mizoram Universal HealthCare Scheme (MUHCS) chu tluang taka kalpui a nih theih nan April ni 14, 2025-a 12th Preliminary Commitee thukhawm in ruahmanna a siam hrang hrang bawhzuina pakhat atan MUHCS zawmtu Hospital ten chatlak lo-a sum an hmuh theih nan Finance Department in advance in sum a sanction thin dawn a. He thu hi nimin khan Finance Department chuan Office Memorandum in a chhuah a. Quarter khat (thla tum) ralhmain Mizoram State Health Care Society in anticipated claim amount a chhut zat anga sanction thin a ni dawn a ni.

Ministry of Home Affairs chuan Mizoram Director General of Police (DGP) atan Sharad Agarwal IPS a ruat a, niminpiah khan thupek tihchhuah a ni. Sharad Agarwal hi Delhi Police-a Special Commissioner (Economics Offences Wing) hna chelh mekin IPS (AGMUT 1997 Batch) a ni a, Mizoram DGP nilai Anil Shukla IPS (AGMUT 1995 Batch) chu a thlak dawn a ni. Mizoram DGP kalchhuak tur Anil Shukla hna zawm tur hi tihchhuah a la ni lo a, amaherawhchu Delhi lamah a awm dawn nia thudawn a ni bawk.

Saitual Forest Range a thawktute chuan Tual-bung Branch YMA hnen atanga report an dawn bawhzuiin niminpiah khan Tualbung-a Tuikhau ram-a Sazuk kaptu nia hriat mi pali an man a, heng mite hnen atang hian Sazuk sarep, a kawchhung leh a ke bakah Silai (Ulhbun) pali mansak an ni a. Wildlife Protection Act, 1972 Section 9 leh Section 39 an bawhchhiat avangin thubuai siam sak an nih hnuah Aizawl District Court-ah hruaiin nimin khan Central Jail ah dahluh nghal an ni. Sazuk hi The Wildlife Protection Act, 1972 hnuaiah Schedule-1 hnuaia humhalh bik a ni a, Dan bawhchhia chu kum 3 atanga kum 7 thleng Lung In tan theih an nih bakah Rs. 25,000/- aia tam chawi tir theih a ni.

Ruihhlo ngai leh awmna hmun neilote lo enkawl lailawkna tura ruahman, Hulhliap (Short Stay Centre) chu niminpiah atanga khan kalpui tan a ni ta a, mi 200 dahluh an ni.

PWD changtu Minister Vanlalhlana leh PWD-a thawktute chuan nimin khan Chief Minister Lalduhoma hmaah Aizawl khawpui chhung kawngpui pengthuam thenkhat siam dan tur an rawtna an thlen.

Kumin-a YMA Inkhawmpui Lian neih tur chu October 21-23, 2025 chhung khian neih a ni dawn.

Mizoram State Commission for Protection of Child Rights (MSCPCR) Chairperson Jimmy Laltlanmawia’n tunhnaia naupang khawih chhetu Lalrampana leh midang hetianga inhnamhnawih ten an phu tawk hremna hmu ngei se an duh tih a sawi.

Food, Civil Supplies & Consumer Affairs Department chuan thla thum (3) daih Ration buhfai sem tur chu FCI atangin phurhchhuah kim vek a nih tawh thu sawiin, hemi atana hma an lakna leh harsatna awm hrang hrangte sawiin, semchhuah tan theih a nih tawh thu an sawi bawk.

Lawngtlai District chhung Pangkhua a Village Council leh NGO hrang hrang thukhawm chuan an khaw ramchhunga dan lova zangnadawmna lak tumna chu an duh loh thu an sawi.

Mizoram chhunga Private damdawi In awm zawng zawng atanga 40% velin Mizoram Universal Health Care Scheme (MUHCS) an zawmfel tawh.

Serchhip-a Thlasik thlai chingtu pawl, Serchhip Agriculture and Horticulture Cooperative Society Limited chuan raltlan te avanga Thlasik thlai chingtu ten harsatna an tawh lohna turin hmalak an tum thu an sawi.

Mizoram Board of School Education (MBSE) chuan HSLC & HSSLC Compartmental Exam leh Improvement Examinations, 2025 a buatsaih result chu Vawiin, June 24, 2025 chhun dar 12:30 hian tihchhuah a tum a, Result hi MBSE Office, Chaltlang leh MBSE Regional Office, Lunglei bakah Website www.mbse.edu.in leh www.mbseonline.com-ah te hian en theihin a awm ang. A mamawh tan result bu lei theihin a awm bawk ang. Heng bakah hian a duh tan Phone No. 9863883041 leh 9863722521-ah te Whatsapp leh Phone Call hmangin Office hun chhungin ngaihven theih a ni bawk ang.

Rualbanlo (PwD) leh kum upa (Senior Citizens) te Electoral Roll-ah kim taka thun an nih theih nan leh awlsam zawka Vote an thlak theih dan tur ngaihtuahin nimin khan Hnahthial-ah District Monitoring Committee on Accessible Election (DMCAE) chu an thukhawm a. Election Commission of India chhinchiah danin 29-South Tuipui A/C ah hian tun dinhmunah voter 16,437 an awm a. PwD hi mi 61 awmin kum 85 chunglam vote nei, Senior citizens mi 78 an awm bawk a. Polling Station 27 awmah PwD awm lohna 8 leh Senior Citizens awmlohna 7 a awm a ni.

Mizoram Tripper Association chuan nimin khan Kolasib-ah thuthar thehdarhtute kawmin tunkar Ningani atangin National Highway-306 leh 06 Kawnpui-Sairang inkar kawng siamthat hnatlangpui an nei dawn tih an sawi a, kar hmasa Ningani khan Mizoram PWD leh NHIDCL te hnathawh dan a hmunah an enfiah thu leh an hnathawh hi a chak lovin an thawk muang hle niin an sawi a. Mizoram châk lâkna kawngpui ber chu lirthei tana zawh hlauhawm leh chhiatna nasa zawk thleng thei dinhmunah a awm mek nia an hriat thu an sawi bawk.

Niminpiah (Pathianni) tlai atanga ruah nasa taka sur vangin Champhai-ah chhiatna thleng a tam hle a, Champhai Electric Veng-a Thangruma In chu tuihawkin hawrhin a In lungrem a chim a, In hi tlusawp vek lo mah se an bungrua zawng zawng thiarchhuah nghal a ni a, Champhai Bethel Veng-ah Gozakama In chu dinhmun hlauhawm ah awm bawkin a kawmthlanga chhungkaw pahnih te an chhuak bawk. Heng bakah hian Veng hrang hrangah leminin in kawng a hnawh bawk a, Aizawl atanga Champhai panna kawng pawh Chhungte khaw hnuaiah lemin vangin a tlang lo a, kawnghlui lam pawh leimin in hnawh mah se nimin khan lirthei kal theih tura thenfai nghal a ni.

Mizoram Sawrkar, Mizoram Synod leh Tlawmngai pawl te tangho a buatsaih ‘Hulhliap Short Stay Centre’ Batch 1-na chu chu nimin khan Synod Revival Camping Centre, Neihbawih Sihphir-ah kalpui tan a ni a. Central YMA kaih-hruaina in Central YMA Office, Tuikhuahthlang leh Bawngkawn YMA Hall atangin Bus hmangin Hulhliap Short Stay Centre-a awm duh te chu phurh an ni a, mi 150 chuang Batch hmasa ber ah hian lak an ni. He hunah hian Social Welfare Minister Lalrinpuii chuan Kohhran leh Tlawm-ngai pawl te chungah lawmthu sawiin, “Hulhliap Short Stay Centre hi kan unau ruihhlo bawih a tang mek te tan nunthar an neih theihna hmun anih ngei theihna turin tawngtaina lamah kan hriat zui zel a pawimawh,” a ti a. Mizoram Synod-a Executive Secretary Rev. Dr. K. Lallawmzuala chuan Pathian hnenah a hlan bawk a ni.

Chawngtlai-a Sapthei chingtute chuan Sapthei an chinna, Bualpui Zau leh Zosang Zau panna kawng chu Inrinni leh nimin khan hnatlang in an siamtha a, Chawngtlai khuaah hian Sapthei ching chhungkaw 135 vel awmin Bualpui Zau leh Zosang Zau-ah hian Sapthei chingtu chhungkaw 70 vel an awm a, Fur-ah kawng a chhiain Sapthei phurhchhuah kawngah harsatna an neih thin avangin hnatlang hi an nei a ni.

Mizoram Pradesh Congress Committee (MPCC)-a General Secretary leh MLA hlui R. Lalrinawma chuan an MLA, C. Ngunlianchunga thubuai chungchangah thudik hailan a nih ngei an duh thu a sawi.

MNF Sr. Vice President Dr. R. Lalthangliana chuan Mizo hnam hmangaih tak takte tan MNF ah hmun a awm reng tih a sawi.

Agriculture & Farmers Welfare Minister PC. Vanlalruata chuan June ni 21, 2025 thlenga Sawhthing lak tawh zat belhkhawm chu Qtl. 2,15,900 zet a tling tawh tih sawiin, “Sawhthing rate chhiat ber kumah pawh sawrkarin cheng vbc. 85 chuang a seng tawh a ni,” a ti.

Prime Minister Narendra Modi kaihhruai sawrkar kum 11 chhunga hmalakna hrang hrang zingah Mizoram-ah pawh khualzin hip kawngah ruahmanna engemaw zat siam mek a ni.

Sawrkar Laipuiin hriak ei chi (Edible Oil) a intodelhna tura hma a lakna kalzelah Mizoram-ah pawh hriak thlitfimna hmunpui, Oil Refinery din a ni dawn tih Godrej Agrovet Ltd. Mizoram hruaituten an sawi.

Mizoram Olympic Association buatsaihin ‘Olympic Day Run’ chu nimin zing khan Aizawl-ah neih a ni a, he hun hi Chief Minister Lalduhoma leh Sports Minister Lalnghinglova Hmar te chuan an telpui a ni.

Land Resources, Soil & Water Conservation Department changtu Minister Lalthansanga chuan tun sawrkar chu kuthnathawktute tana ding tlat an nih thu a sawi.

Mizo Language Development Board (MLDB) bultumin Information & Public Relations, Printing & Stationary Department chuan nimin khan Aizawl-ah thuthar lakkhawmdan leh Mizo tawng ziah dan chungchanga zirhona, Media workshop for Journalists an buatsaih a, he hun hi IPR&PS Minister Dr. Vanlalthlana chuan a hmanpui a ni.

Directorate of Women & Child Development hnuaia State Hub for Empowerment of Women (SHEW) buatsaihin nimin khan ‘State Level Beti Bachao Beti Padhao Plantation Drive, 2025’ chu neih a ni.

Tunhnaia ruahsur avanga Serchhip Tuikhuah Veng-a lei tlahniam, lirthei tan pawha kal harsa a awm mek chu Serchhip District Truck Owners Association te chuan Inrinni zing khan hnatlang neiin lirthei tana kal awmsam tura siamthat hna an thawk a. Helai hmun, ‘Lei tlahniam’ tia hriat thin hi kumin April thla khan siamthat ni mah se May thla tawp lama ruahsur nasa avang khan ft. khat vel zetin a tlahniam leh a, hei vang hian lirthei tan tlan a harsat phahin mipui ten harsatna an tawh phah a, SDTOA te hian hnatlang neiin a siamthat hna hi an thawk a ni.

Inrinni khan Baktawng Bial Kristian Thalai Pawl (KTP) te chuan Serchhip Blood Bank-a dah turin thisen Unit 30 an pe a, thisen petute hi mipa 27 leh hmeichhia pathum niin Serchhip Hospital Blood Bank-a thawktute Baktawng-ah hian kalin mi tlawmngai te thisen hi an lak sak a ni.

Thenzawl Police Station-a Officer Incharge leh a thawhpuite chuan dan lam hriatna ah mipui ten hma an sawn zel theih nan tunhnai khan an Bial chhunga khaw hrang hrangah Dan inzirtirna, Legal Awareness an buatsaih a, Kanghmun South, Zote South leh Thenzawl khawchhung ah te SI Lalzidinga Colney, ASI Michael Lalremsanga leh an thawhpui ten POCSO Act, ND&PS Act, Mototor Vehicle Act leh Cyber Crime chungchang te an zirtir a ni.

Presbyterian Serchhip Vengchung Pastor Bial Kristian Thalai Pawl (KTP) Intawhkhawm vawi 21-na chu nimin Pathianni hmang khan Serchhip Bazar Kohhran Biak In-ah neih a ni a, thupui atan ‘Pathian Hmangaihna’ tih hmangin Speaker atan Rev. Jonathan Pachuau, Councellor, Family Guidance & Counselling Centre (FG&CC) Serchhip chu hman a ni.Serchhip Vengchung Pastor Bial KTP Intawhkhawmna hi Zirtawpni zan atang khan neih a ni.

Mizoram State Commission for Protection of Child Rights (MSCPCR) chuan tunhnai khan Chhingchhip-a Sainik School chu tlawhin naupangte dikna leh chanvo humhalhna kawnga hma an lakna hrang hrangte chu lawmawm an tih thu an sawi.

Mizoram-a Myanmar raltlan mi 32,000 chuangte mit naute leh kutze thlalak hna tan thei turin ruahmanna peihfel thawkhat a ni tawh a. Hetihlai hian Myanmar atanga Mizoram-a raltlan awm chu tunhnaiah tlem hretin raltlan thenkhat te chu an ramah an kir leh tawh a ni.

Aizawl Mayor Lalrinenga Sailo kaihhruaiin Zirtawpni khan Aizawl Municipal Corporation (AMC) leh Zotrek Adventure Club aiawhten Mayor Office-ah Aizawl khawpui chhunga rikrum thila hmalak dan tur ruahmanna an sawiho a, Aizawl Mayor chuan Chhiatrupna alo thlena chhanchhuah hna leh a tul angte thawh chu AMC kuta dah ni chiah lo mah se AMC leh Corporator-te tel ve loh theih lohna thil tam tak a awm thu sawiin, AMC tan Emergency Response Team neih a tul ve tawh tih a sawi a. State sawrkar hnuaia Disaster Management thuneitute nen insu buai lovin ruahmanna siam a tul thu te a sawi bawk.

India ram Parliament Estimates Committee-in kum 75 tlin lawmna chu vawiin leh naktuk hian neih a ni dawn a, he hun hi Maharastra Assembly-in a thleng a ni. He hun hmang tur hian Mizoram atangin member panga kal tura ruat niin an zinga mi pali te chuan Inrinni khan Maharastra an pan a, tun tuma kal te hi Acting Chairman Lalmuanpuia Punte chuan hovin Hachhek bialtu MLA Robert Romawia Royte, South Tuipui bialtu MLA Jeje Lalpekhlua leh Lunglei West bialtu MLA T.Lalhlimpuia te an kal a, an Chairman, W.Chhuanawma chu damlohna avangin a kal ve thei lo thung.

Mizoram University Vice Chancellor Prof. Dibakar Chandra Deka chuan Zirtawpni khan a Office-ah mi pathum Lalhmachhuana Zofa, C. Lalaudinga leh K.Lalhmingmawii te hnenah Honorary Doctorate Degree a hlan a. Lalhmachhuana Zofa leh C. Lalaudinga te hi Literature & History hnuaiah degree hi hlan an ni a. K. Lalhmingmawii hian Cosmetologist & Permanent Makeup Artist (PMU) hnuaiah Degree hi a dawng a ni.

Lunglei-a Agriculture Department hmalakna in Agro Forestry hnuaiah Mualthuam North a loneitute hnenah Inrinni khan Kuhva tiak phun tur chhungkaw 89 hnenah bul 6000 semchhuah a ni a, heng te hi Lunglei atangin Account & Treasury Department Joint Director Lalremtluangi chuan vailiamin Kuhva chu lian thama ching a, hralh tur tam tawk tharchhuak turin a chah a, sawrkar in a sem chu a bultanna ang lekah ngai turin a fuih bawk. Kuhva tiak hi District Agriculture & Farmers' Welfare Department hnuaia sem niin Mualthuam North VCP V. Lawmkima chuan kuthnathawktute an phurin beiseina sang tak nen Department lam pawh an thlir niin a sawi.

Khawzawl District-a khaw 3- Vangtlang, Chalrang leh New Chalrang khuaa Loneittute chuan tunlai hian an Lo-ah Buh eichhetu, Hnahkhawr Pangang a puang mek nia an sawi avangin Inrinni khan Khawzawl District Agriculture Office atangin ADAO Lalrammuana hovin Agriculture mithiam 3 ten an Lo-ah kalchilhin an enfiah a, Chalrang leh New Chalrang khua te hian Lo atan ram theh inang neiin chhungkaw 210 te Lo-ah Hnahkhawr Pangang hi hmuh tur a awm a, an zinga chhungkaw 70 te Lo-ah a puang nasa a. Vangtlang-ah chhungkaw 80 te Lo-ah Hnahkhawr Pangang hi hmuh tur awmin chhungkaw 10-ah a puang nasa a ni. Agriculture mithiamte hian loneitute hnenah damdawi semin damdawi hman dan a takin an zirtir nghal bawk a ni.

Tunlai-a Electric Bill chungchanga sawi neuh neuh awm chung-changah Zirtawpni khan Power & Electricity Department Officer te leh Mizoram Consumer Union Headquarters, Aizawl Office Bearers te chu P&E Engineer-in-Chief Office-ah an inkawm.

Aizawl Venghlui leh Tuikual South huamchhung a kawngkama thilzuar thin ten Inrinni khan Aizawl Tennis Court kawtah kawngpui dangin Aizawl Municipal Corporation (AMC) chunga an lungawilohna an lantir.

Mizoram-in a remna leh muanna a neih champhaphak vawi 39-na, ‘Remna Ni 2025’ chu June 30 khian Mizo Zirlai Pawl (MZP) chuan Aizawl-a Lammual-ah hman leh an tum.

International Day of Yoga vawi 11-na chu Inrinni, June 21, 2025 khan khawvel hmun dangte rualin Mizoram-ah pawh hman a ni.

Kilometre 51 leh metre 38-a thui Bairabi leh Sairang inkar Rel kawng chu Prime Minister Narendra Modi-a'n a hawn rin a ni.

Zoram Poultry Development Society hnuaia Tanhril-a INDBRO Poultry Hatchery Farm-ah kum 2015 atangin Artui 33,61,320 tharchhuah ni tawhin Ar note 21,24,869 tharchhuah a ni tawh bawk.

Aizawl khawpuia hmeichhe inzuar thin, ‘Female Sex Worker’ (FSW) chhinchhiah zinga 80% vel chu Aizawl khaw pawn, thingtlang lam mi an ni.

UD&PA Department hotute chuan nimin khan Serchhip rawn tlawhin District thuneitute nen Serchhip-a bawlhhlawh sawngbawlna tur ruahmanna chungchang an sawiho.

National Muaythai Championship 2025 neih zawh takah Mizoram aiawha kal Phoibi Malsawmtluangi chuan Gold Medal a la.

Niminpiah khan One Stop Centre, Women & Child Development Serchhip chuan Chhiahtlang Co-ordination MHIP te tan hmeichhiate humhimna Dan chungchang ah ‘Awareness Campaign’ an buatsaih.

ZPM Thalaite chuan niminpiah khan Chhing-chhip-a MIFCO Fruits Juice Concentrate Plant leh Zemabawk-a MIFCO ZO MEAT Product te chu a hmunah an tlawh.

Mizoram Pradesh Congress Committee (MPCC) chuan nimin khan Aizawl-a Congress Bhavan-ah Friday Political Session neiin he hunah hian MPCC President Lal Thanzara chuan Congress mi leh sa hmun danga peng tawh te hnenah ngenna siamin, “Kan ram siamtha a, NLUP din thar leh a, ram hmaswnna tluantling thlen turin Congress ah rawn let leh turin tih takzetin ka sawm che u a ni,” tiin an party zawm an awm zel chu lawmawm a tih thu a sawi bawk.

Mizo Zirlai Pawl (MZP) Khawzawl Headquarters chuan nimin khan Khawzawl Zaingen YMA Hall-ah kumin a HSLC leh HSSLC pass tharte lawmpuina leh chawimawina hun an buatsaih a, Assembly Speaker Lalbiakzama chuan a hmanpui a ni. He hunah hian HSLC pass thar mi 142 leh HSSLC pass thar mi 72 te hnenah lawmpuina leh chawimawina hlan a ni a, MZP General Hqrs. Vice President Dr. C. Lalremruata pawhin a telpui bawk a ni.

Health & Family Welfare Minister Lalrinpuii chuan nimin khan Sairang Dinthar Health Clinic Building thar sak chu a hawng a, Sawrkar chuan Health Clinic Centre thar hawn mai bakah Sub-Centre atanga District Hospital thlenga tihchangtlun a tum thu a sawi bawk.

Central YMA chuan nimin khan Aizawl-a Central YMA Hall-ah Myanmar atanga raltlan hruaitute kokhawmin infuihtharna hun an hmanpui a, Central YMA General Secretary Prof. Malsawmliana chuan tun dinhmunah Myanmar atanga sahimna zawnga awm mek te hi mi 27,751 an nih thu sawiin, raltlante chu an awmna khua leh veng in inkaihhruaina an siam te leh Sawrkar thuchhuah te ngaipawimawh a zawm theuh turin a chah bawk. He hunah hian Aizawl Bawrhsap Er. Lalhriatpuia, Sr. SP CID (SB) Stephen Lal-rinawma, END-a Asst. Commissioner VL. Vura Ralte bakah Central YMA President Lal-hmachhuana ten thu an sawi a ni.

Set Free Ministry, India-in Central Jail, Aizawl-a Graduation Programme a buatsaih chu nimin khan Home Minister K. Sapdanga chuan khuallian niin a hmanpui a, Set Free Ministry, India buatsaihin Jail-a awmte hi lehkhabu pahnih ‘Nunkawng dik’ leh ‘Krista zalenna kailawn’ hmang te in zirtirna pek an ni a. An zinga mi 163 exam hmachhawnte hnenah hian Graduation Certificate cho Home Minister hian a hlan a ni. Home Minister chuan khawvel hmun hrang hrangah Jail chu ‘Prison & Correctional Centre’ ti a hming thlak mek a nih thu tarlangin, Jail chu inhremna hmun ai mahin insiamthatna hmun a nih thu a sawi a. Jail-a awm mekte chu an thil tihsualin a delh behna atanga an thawhchhuah theih ngei nan, Jail chu insiamthat nana hman tum theuh turin a fuih a. Jail-a awmte chu midang aia inngai hniam bik mai lova, nitin kawng khat tala insiamthat tum zel turin a chah bawk.

State Agricultural Management & Extension Training Institute (SAMETI), Aizawl chuan Saitual District-a kuthnathawktute tan Rashtriya Krishi Vikas Yojana (RKVY) Scheme hnuaiah nimin khan Human Resource Development training chu Kei-fang Zawlbuk-ah an buatsaih a, he hun hi Saitual Bawrhsap Dr. Lalngura Tlau chuan a hmanpui a ni. SAMETI hian Mizorama hmun hrang hrangah te Pa khawi, Khuai khawi, Pickle siam, Bawng-hnute atanga siamchhuah theih chi siam dan, Sa sawngbawl dan leh thil dangah te training an pe thin a. Tuna Human Resource Development Training pawh hi Mizoram chhunga District hrang hranga neih tura ruahman niin, Lawngtlai, Siaha leh Khawzawl-ah te neih a ni tawh a ni.

Nimin khan Rural Development & Administration Department changtu Minister Prof. Lalnilawma hovin MGNREGA-ah mipuite tana tangkai leh awmze nei zawka kalphung thar neih a nih theih nan DRDO Project Director leh BDO te chuan sawihona an nei.

Kum 5 kalta chhung khan Mizoram-ah Sikserh (Malaria) natna vei mi 59,119 hmuhchhuah niin an zingah mi 46 in an thih phah a, nikum chhung khan mitthi 7 an awm a ni.

Prison Department hnuaia Jail Warders te tana Basic Training Course Training Batch 14-na chu zawhfel niin nimin khan Passing Out Parade neih a ni a, Home Minister K. Sapdanga chuan a hmanpui a ni.

Nimin khan Chief Secretary H. Lalengmawia hovin Mizoram-a PM Vishwakarma Scheme kalpui dan thlirletna neih a ni.

India ram-a kawng kaihhnawiha hnathawktu Engineer leh pawl hrang hrang aiawh mi thiam inzawmkhawmna pawl, Indian Road Congress (IRC) Mid-Term Council Meeting vawi 233-na chu nimin khan MZU Auditorium-ah neih \an a ni a, Chief Minister Lalduhoma leh Union Minister of State for MoRTH Harsh Malhotra te chuan an hmanpui a ni.

Kumin August thla atang khian Serchhip-ah bawlhhlawh thliar hran chu kalpui tan tum a ni a, Pilot Project angin New Serchhip North leh South VC huamchhungah kalpui tum niin Bawlhhlawh tawih thei (Wet) leh tawih thei lo (Dry) te chu bawm hrangah dahin mahni In theuhah thliar hran tur a ni tawh ang.

Mizoram-a Tuikhawhthla sang ber Vantawngkhawthla panna kawng tunhnaia PWD ten Cement hmanga an siamthat avanga hun engemaw chen lirthei-a kaltlang theih loh chu Vawiin, June 20, 2025 chawhnu lam hian hawn a ni dawn ta a, mipuite tan Vantawngkhawhthla hi a en theih leh tawh dawn a ni. Tunhnaiah ruahsur nasa avangin Vantawngkhawhthla-ah hian tui a tam leh tawh hle nia thudawn a ni a, hei vang hian a thlawhtute tan pawh hmuh a nuamin mipuite tana tlawh hun tha a nih thu kan thudawnna chuan a sawi bawk a ni.

Govt. JM High School Serchhip-a Eco Club te chuan tunkar Thawhtanni khan Serchhip leh Keitum inkarah thingtiak thahnem tak an phun a, NH. 02 Serchhip leh Keitum inkar kawngpui sir hmun hrang hrangah thingtiak thahnem tak phunin he hunah hian zirlaite leh Zirtirtute an thawkchhuak a ni. Govt. JM H/S Eco Club te hian Vawiin hian Serchhip Vengchung atanga Eklavya Model Residential School (EMRS) panna kawngah thingtiak an phun leh ang.

Serchhip Beautification Committee-in Ser-chhip cheimawina tur ruahmanna a siam hrang hrang zingah thingkung engemawzat phun tura hmalakna chu kalpui chhoh tan mek zel a ni a, niminpiah lama VEC panga ten NH. 02-a thing an phun hnuah nimin khan New Serchhip area chhung - National Highway 2 kawngkam, New Serchhip Venglai Gate bulah Bawrgsap Paul L. Khuma, Addl. DC Lalrinzuala, DRDO Project Director Dr. Malsawmtluanga Fanchun leh Officer dang ten Palm tree engemaw zat an phun leh a ni. Thingphun beihpui hi ni 8 chhung neih a ni dawn a, District thuneitute ruahmanna hnuaiah MGNREGS nena kaikawpin Serchhip khawchhung Village Council ten thingphun hna hi an thawk dawn a ni.

Ahmedabad-a Air India thlawhna tlaa Cabin Crew thi Manipur State mi Zohnahthlak nula, Lamnunthem Singson ruang chu nimin chawhnu khan Dimapur (Nagaland) thlenpui a ni a, mi thahnem takin ruang an lo hmuak a ni.

Central YMA Kumpuan Committee leh Mizo-ram Police te chuan dan lova sumdawng dapchhuah hna an thawk. Central YMA Kumpuan Committee leh Mizoram Police te tangkawp hian Aizawl khawpui chhung hmun thenkhat ah hnamdang dan lo-a sumdawngte dapchhuah beihpui an thlak a. He hunah hian ILP fello te enfiah pahin a fello te thuneitute kutah hlan an ni. Central YMA Vice President leh Kumpuan Chairman Prof. Lal-nuntluanga chuan Mizoram-ah danlo a sumdawng Mizo hming hawhtir an awm thin thu leh Mizo mipuite tanrual a tul thu sawiin, Dan leh thupek keng-kawhtute, Police te thawhpui thiama tanrual a tul takzet thu a sawi a. A tul ang zela thuneitute nen dan lo a sumdawngte endik chhunzawm an tum thu sawiin, ram leh hnam himna atan Mizo mipuite nrual a tul thu a sawi bawk.

Mizo Zirlai Pawl (MZP) Hqrs. Mamit chuan nimin khan Mamit Chhim Veng YMA Hall-ah zirlai tithate chawimawina hun an buatsaih a, he hun hi Minister Prof. Lalnilawma chuan khuallian niin a hmanpui a ni. Nimin-a Zirlai tithate chawi-mawina hunah hian Mamit atanga kumin-a HSLC leh HSSLC Distinction a pass mi 14, Institution Topper mi 2, MES tling mi 3 leh MBBS Graduate mi pakhat te hnenah chawimawina hlan a ni a, Best School Award pawh hlan nghal a ni. Nimin a he hun hman hi MZP General Hqrs. atangin an President H. Lalthianghlima pawhin a hmanpui bawk.

Mizoran Universal Health Care Scheme (MUHCS) chu Faith Hospital, Lunglei leh DM Hospital, Champhai te chuan hmang turin MoU an ziak leh nia thudawn a ni a, Nazareth Hospital, Ramhlun North pawhin hman an tum bawk nia thudawn niin heti hian Aizawl khaw pawn Private Hospital te zinga Hospital 3 deuh chauh in MUHCS hi an la zawm lo niin a lang. Tun dinhmunah sawrkar damdawi In hrang hrang ah MUHCS hi kalpui niin damdawi In tam takin an zawm tawh bawk a, la zawm lo hi Mizoram pumah damdawi In 18 vel an la awm a ni.

Nimin khan Lunglei-ah Saikuti Hall Managing Committee chu an Chairman, Lunglei District Bawrhsap Navneet Mann-i hovin Lunglei DC Conference Hall-ah an thukhawm a, Mizoram sawrkar hnuaia Saikuti Hall Managing Board atangin Saikuti Hall hi LMC kut-ah hlanchhawng turin ruahmanna a awm thu he hunah hian tarlan a ni. He hunah hian hemi atana terms & conditions duan chu thlirho a ni a, siamthat ngai laite siamthat dan tur rawtnate sawiho a ni. Saikuti Hall hi Management of Saikuti Hall Rules, 2003 hmangin RD Secretary kaihhruaina hnuaiah Managing Committee in an enkawl a ni.

Nimin khan Kolasib-ah Bawrhsap Robert C. Lalhmangaiha hovin Oil Palm chungchang sawiho a ni a, he hunah hian Godrej Agrovet Ltd. a Senior Development Office Lalruatkima chuan nikum chhung khan Godrej Agrovet Ltd. te hian Farmer te tharchhuah FFB (Oil Palm rah) Metric tonne 5335 an leisak thu leh cheng nuai 700 man vel anih thu a sawi a, kumin hian cheng nuai 900 man vel lei theih an beisei thu a sawi a. Kumin chhungin Godrej Agrovet Ltd. chuan Oil Palm Refinery din an tum thu leh Packaging thlenga tih theihna hmun tur anih thu a sawi bawk.

Lunglei Municipal Council (LMC)-a Property Tax pekna tur Apps chu nimin khan LMC Executive Councillor Zorinsanga Hmar chuan LMC BoC Hall-ah a tlangzarh a ni a, Mobile application hmanga Property tax pe thei lo tan Local Council-ah emaw, LMC Office-ah emaw pek dan tur ruahmanna siam a ni ang. Thuneitute sawi danin Property Tax hi za zela 5% chu LMC-ah a lut dawn a, a bak 95% chu Ward chhunga hmasawnna hnathawh nan a kal dawn a, Chhiah lut tur beisei zat hi kumkhatah cheng vbc. 1.05 vel niin Surveyor 24 ten Local Council 24-a In tinah survey an kalpui dawn a, August thla atang khian Property Tax hi khawn tum a ni.

Mizoram University (MZU) Yoga Centre Co-ordinator Prof. Sanjay Kumar chuan International Day of Yoga atan MSU chu kawng hrang hranga an inbuatsaih thu a sawi. Akashvani-in nimin-a a kawmnaah Prof. Sanjay Kumar chuan International Day of Yoga pualin hun hrang hrang buatsaih a nih thu a sawi a. Tun thla ni 7 atanga tan khan Yoga Training cum Workshop Prog-ramme (Shivir) in Common Yoga Protocol chu International Day of Yoga pualin Inrinni thleng awh turin MZU-a Yoga Centre-ah buatsaih a nih thu a sawi a. Nimin khan International Day of Yoga pualin Elocution Competition buatsaih a nih thu a sawi a, Hei bakah hian tun thla ni 21, International Day of Yoga vawi 11-na chu MZU Multipurpose Hall-ah zing dar 6:15 atangin hun hman a nih dawn thu a sawi bawk.

Mizoram sawrkar-a Minister of State Prof. Lalnilawma chuan nimin khan a Mamit-a Department chan hrang hrang PHE, DRDO leh LAD Office te tlawhin, thawktute'n lo dawngsawngin hna kal mek leh hmachhawp awmte Minister hnenah hian an lo thlen a ni.

Russia MP, Dmitry Kuznetsov chuan Mizoram Lok Sabha MP Richard Vanlalhmangaiha chu New Delhi-a a chenna In-ah a kawm.

MNF Party chuan Zirtirtu sawn kual avanga harsatna awm mek chu pawi an tih thu sawiin, chinfel thuai an duh thu an sawi.

Mizoram State Health Care Society (MSHCS) chuan Non-Government Hospital Association, Mizoram (NGHAM) in an dinhmun hrang hrang tarlanga thuchhuah an siam chu an sawifiah.

Cooperation Department changtu Minister PC. Vanlalruata’n Tung leh Sapthei chin lamah hmalak chho mek a nih thu a sawi.

Mizoram-ah ruihhlo khawih, inchiu thin 14,378 awmin heng zingah hian kum 28 atanga kum 32 inkar an tam ber.

Chief Minister Lalduhoma chuan sawrkar in a chhiatpui loh tur leh an duhdan MoU an ziahpui theih chauh inremna siampui an duh thu a sawi.

Serchhip mipuiten khawtlang tana hnawksak leh tha lo an hmuh te awlsam taka a thlalak nena thuneitute hnena an report zung zung theihna tur, ‘Vantlang Viltu Mobile Application’ chu nimin khan Chief Minister leh Serchip Bialtu MLA Lalduhoma chuan a tlangzarh.

Mizo Zirlai Pawl (MZP) Hqrs. Serchhip chuan kumin-a HSLC, HSSLC leh MPSC exam-a tithate lawmpuina hun nimin khan buatsaihin Serchhip Bialtu MLA leh Chief Minister Lalduhoma chuan khuallian niin a hmanpui a ni.

Thenzawl-a College of Horticulture chuan nimin khan an dinchamphaphak vawi 9-na an lawm a, Agriculture Minister PC. Vanlalruata chuan a hmanpui a ni.

LPS Youth Icon 2024-a Top 10- te chuan tunhnaia ruahsur nasa avanga Serchhip-a chhiat tawkte tanpuina atan nimin (June 18, 2025) khan Sub-Hqrs. YMA Serchhip hnenah cheng nuai thum (3) hlanin nimin khan semchhuah nghal a ni.

Serchhip DC hmalakna a ‘Serchhip Beautification Project’ kal zelah Environment Forest & Climate Change leh District Rural Development Office Serchhip te thawhhona hnuaiah nimin khan Serchhip By-pass-in a paltlang VC panga - New Serchhip North, New Serchhip South, P&E Veng, Chanmari leh Chhim Veng hnuaia Job Card Holder te chuan Serchhip By-pass Road, NH-02 ah thingtiak an phun a, he hunah hian thing tak 700 chuang phunin Puipui Enterprise, Serchhip chuan leitha an thawh bawk a ni.

Sub-Hqrs. YMA Serchhip hruaitute chuan nimin khan Chief Minister Lalduhoma hnenah Serchhip khawtlang tana pawimawh hrang hrang an thlen.