Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Chanchin thar thenkhat :

World Environment Day

Vawiin June 5, 2021 hi World Environment Day Vawi 47-na a ni a, he ni puala thuchhuah an siamah Green Mizoram Network (GMN) chuan Mizoram bikah hmasawnna hna project hrang hrang thawh mek leh, thawh zel tur ten kan environment a tihchhiat loh a, hmasawnna dik leh tlo (sustainable development) kan neih theihna turin sawrkar bakah, hetiang lam thawktu zawng zawngte an ngen thar leh tih an sawi a. “Hmasawnna hna thawh a nih reng rengin a tuar nasa bertu chu, thing leh mau, nungchate bakah kan lui tuite an ni. A tawpah a chhunga cheng mihring te bawkin harsatna namen lo kan tawk leh thin tih hre thar leh ang u,” an ti bawk. World Environment Day hi kum 1974 khan thing leh mau hlut zia leh tangkai zia hriatchhuah leh ni atan te, ramngaw enkawl leh chhawr tangkai dan inzir-tirna ni leh thingphun ni atan te hman thin a ni.


CMRF-ah sum luh belh zel

Nimin thleng khan COVID-19 hrileng mek laka mipui an him theih nan leh a tul apianga hman tura mimal, pawl leh Kohhran atanga tan-puina Chief Minister's Relief Fund for COVID-19 a lut chu Rs. 23,67,82,607/- a tling tawh a, heng atang hian Rs. 23,42,56,970/- chu hman ni tawhin tunah hian hmanbang Rs. 25,25,637/- ala awm a ni. Nimin khan Vanlalfelpuia Royte, Chairman, NECS chuan CMRF-ah hian cheng nuai 2 thawhin Adviser to Chief Minister (Technical), K. Lalsawmvela chuan Rs. 30,000/- a thawh bakah MNF General Hqrs. a Secretary leh Joint Secretary te chuan sum hi an thawh leh a ni.


CADC-a Deputy Chairman thlanna neih a ni

Chakma Autonomous District Council (CADC)-a Deputy Chairman atan Anil Kanti Chakma chu nimin khan thlan a ni. Chakma Autonomous District Council-a Deputy Chairman, Mohesh Boran Chakma chuan April 21 khan banna a thehlut a, hemi hnu nimin khan chuhtu awm lovin Anil Kanti Chakma chu Deputy Chairman atan hian thlan a ni. CADC Deputy Chairman thlanna hi COVID-19 hrileng laka fimkhur taka inveng chungin Lawngtlai DC remtihna a buatsaih a ni. CADC Deputy Chairman atana thlantlin, Anil Kanti Chakma hi Bajeisora MDC Constituency-a BJP Candidate a thlantlin niin MNF Party a zawm tawh a, MDC atan tum hnih thlantlin a ni tawh a ni.


PC Party in sawrkar an phut thu an sawi

Tunhnaia Mizoram leh Assam inrina Chuhvel rama Mizote leilet siamah tumhnih ngawt mai Assam Police ten 'Assam area chin a lawm' ti a duty chhuanlama hmanga a ram neitu chan an rawn chang leh ngawt mai chu PC party chuan an ngai thiamlo takzet tih thuchhuah siamin an tarlang a. Kan ramri humhalh tha lehzual tur leh ramri-a duty Police te thuamtha lehzual turin sawrkar an phut thu an sawi bawk.

Comments

Chhiar Hlawhte