Latest News

Bail-a chhuah chungchang HPC in sawifiah

Supreme Court thu anga Mizoram tana din, High Powered Committee chuan tunhnaia Jail tang zinga Bail-a chhuakte chu an thubuai ah an fihlim tihna a ni lo tih an sawi.

COVID-19 kaihhnawiha din High Powered Committee in thuchhuah siama an tarlan danin nikum March thla khan India rama rorelna Court sang ber Supreme Court of India chuan India rama State leh UT zawng zawngte chu High Powered Committee din vek tur tiin he Committee hian an huamchhung theuhah Jail tang laite he hripuiin a luhchilh loh nana hma la tur leh dan dinglai zulzui zela jail tang tawt lutuk te tiziaawm tura hma la turin a ti nghal bawk tih an sawi a.

Mizoram tana High Powered Committee din pawhin Jail tang lai thenkhatte chu bail-a chhuahtir lailawk tura relin, heng mite hi an thubuai ah an fihlim tihna ni lovin “Thubuai la nei rengin an mahni In leh lo atangin Court-in a koh apianga inlan tur an ni a, an chungthu la rel chhunzawm tur an nih bakah hengho te hi pawikhawihna tenau deuh avanga thubuai siamsakte chauh an ni. An thubuaiah Court-in thiamloh a chantir anih chuan a thara Jail-a lut leh mai tur an ni,” an ti. Pawikhawihna lian tham - tualthah (murder) te, pawngsual (rape) te, inrunna leh hmeichhe naupangte chunga hurherhna lam hawi pawikhawihna, POCSO dan hmanga man te erawh bail-a chhuahtir an ni ve lo tih pawh sawiin, ruihhlo tam tham man sak avanga thubuai neite pawh bail-a chhuahtir zingah hian an telloh thu an tarlang bawk.

Tunhnaiah Central Jail, Aizawl-ah COVID-19 hri kai mi engemaw zat hmuhchhuah ni mahse, anni ho hi Jail Complex chhunga CCC siam tharah dah vek an ni tih pawh an sawi a. A tul dan azira hman theih turin CCC dang pawh siam belh mek a nih thu an sawi a. Jail tang laite chhuahtir lailawk turte reng reng chu COVID-19 test vek an nih thu leh Negative te chauh chhuahtir an nih thu an sawi bawk.

Comments

Chhiar Hlawhte