Latest News

Press Accreditation Card semchhuah a ni

Information & Public Relations Director, Lallianpuii chuan nimin khan kum 2021-2023 atan Press Accreditation Card thar chu a Pisa-ah a semchhuak.

Press Accreditation Card thar semna hunah hian I&PR Director chuan COVID-19 hripui leng karah hun harsa tak hmachhawn mek ni mahse, sawrkarin Media a ngaih pawimawh em avangin Press Accreditation Card-te chu peihfel theih hram a ni ta tih a sawi a. Press Accreditation hi kum 2 chhung a nung (valid) a ni tih sawiin, tlai lo tura chak taka hmalak ni chungin lockdown puan a nih takah chuan a hun takah tihchhuah a ni thei ta lo chu pawi a tih thu a sawi bawk.

Accreditation hian hamthatna lian tham tak tak keng hran lo mahse a hlu em em tih sawiin, Journalist nazawng hnena sawrkarin a pek duhloh a nih thu te, khawiah pawh Media mite tan chuan ‘identitity card’ nih a tlin thu leh khawvel hriatah pawh sawrkar hriatpui ngeia Accredited Journalist nihna chuan zahawmna a ken tel thu a sawi a. MJA lam pawhin journalist-te zingah mahni Accreditation Card diklo taka hmang emaw, dan phalloh thilah inhnamhnawih an awm a nih chuan a ranglama inhriattir vat turin a chah bawk. Tunhnaia Cocial Media-a lo lang Real Life MIZORAM YouTube Channel ten ‘Social Media card’ nei anga an insawi chu khawi establishment atang mahin a pekchhuah theih loh leh thil awmze neilo a ni tih sawiin, hemi chungchang hi chhui mek a nih thu a sawi bawk.

He hunah hian MJA Gen. Hqrs. President, Zonunsanga Khiangte pawhin lawmthu sawiin tunlai Lockdown boruakah Media mite tan chuan nitin awrhchhuah ngai a nih avangin Press Accreditation Card thar chu an nghakhlelh hle tih a sawi a. I&PR Department-in hrileng karah pawh beisei aia rangin Card thar a siam sak theih ta chu a vanneihthlak hle tih sawiin, Sawrkar-a Nodal Department I&PR leh MJA inkarah thawhhona tha chhawmnung reng turin theihtawp chhuah zel a pawimawh thu a sawi bawk. Nimin-a I&PR Director-in a semchhuah tak Press Accreditation Card-te hi Aizawl District huamchhung chauh a ni rih a, hrileng boruak a ziaawm veleh District dangah thawnchhuah dan tur ngaihtuah a ni ang.

Comments

Chhiar Hlawhte