Lenkawl

PHE Department chuan mipui ten chhum lo chat lova tui an dawn theihna tur enchhinna an kalpui mek tih an sawi.

Sawrkar laipui chuan ramchhunga eirawngbawlna Gas man bur khat zelah Rs. 200/- in a tihniam a, MIZOFED Serchhip Branch chuan tunhnaia Serchhip-a eirawngbawlna Gas harsatna thleng chu a ziaawm thui an beisei tih an sawi.

Mizoram State Cooprerative Union (MSCU) buatsaihin nimin khan Serchhip District-a Society hrang hrangte tan ‘Primary Cooperative Society nihphung leh Inrelbawlna’ tih thupui hmangin Training neih a ni.

Serchhip RD Block huamchhunga khaw 26 te chu ODF Plus khuaa an inpuan hnuah 3rd Party Verification Team ten tun thla ni 29 atang khan an khua ah kalchilhin an enfiah mek.

Punjab National Bank (PNB) Serchhip Branch chuan 'Project PNB Palaash' an kalpui mek hnuaiah nimin khan Serchhip Ramthlun Veng-a Goodwill English Academy Campus-ah thingtiak an phun a, he hunah hian PNB Serchhip Branch Manager H. Buonsanglien chuan mihring te tan boruak thianghlim a pawimawh thu leh boruak thianghlim min pe theitu thingkung tangkaina hi thangthar ten kan hriatchian lehzual a pawimawh a ni, tiin “Hun lo awm zel turah thangthar te chenna tlak environment thianghlim buatsaih hi mitin mawhphurhna a ni,” a ti bawk.

Thenzawl Vengchhak-a Netaji Subhash Chandra Bose Avaslia Vidhyalaya Secondary Hostel (NSCBAVSH) chu zirlaite hman tangkai theih turin nimin khan hawn a ni a, NSCB-AVSH hi High School leh Higher Secondary School zirlai te tana Hostel niin Seat 30 awm tura ruahman a ni a, Naupang zirlai dinhmun harsa zawk te ngaih pawimawhna tur a ni.

School Education Minister Lalchhandama Ralte chuan nimin khan Pathian pa lo kawn, Upper Sakawrdai khaw thar tan Comprehensive School building sak thar a hawng a, helai hmun hi Upper Sakawrdai khawchunga mite insawn nana ruahman niin School hawn tharah hian Class I-VIII awmin Zirtirtu mi 5 an awm a, School thar hawn a ni chu lawmawm a tih thu Minister chuan a sawi a ni.

Rural Development Department Minister Lalruatkima chuan nimin khan Joint YMA Field, Vairengte-a Phullem phah chu a hawng a, Mizo thalaiten hriselna leh infiamna kawng a hmasawnna an hmuh zel theih nan Sports Department hmalakna hrang hrang chu fakawm a tih thu sawiin, Vairengte khua a infiammite tana phullem phah tharna khelmual changtlung tak hawn theih a buat-saih a ni chu lawmawm a tih thu a sawi bawk. Joint YMA Field, Vairengte-a phullem phahna hi Special Assistance to State for Capital Investment (SASCI) hnuaia cheng nuai 600 senga hmalakna a ni a, April 5, 2023-ah hna thawh tan niin August 23, 2023 khan zawhfel a ni a, phullem phah hi a dung meter 107 leh a vang meter 68 niin Pavillion leh zun In sak a nih bakah Field sir laihzauh leh a hung hna te pawh thawh a ni bawk.

Election Commission of India-a Chief Election Commissioner (CEC) Rajiv Kumar chuan Mizoram Assembly inthlanpui neih turah International leh Inter-State ramriah khauh taka duty a ni dawn tih nimin-a thuthar thehdarhtute a kawmna ah sawiin, “Zu, drugs leh pawisa ramri kaltlanga a luh lohna atan kan strict dawn hle,” tiin ruihhlo tawlhruka a hnarkaitu lam pawh man chhuah tuma theihtawp chhuah a nih dawn thu a sawi a. Campaign chungchang ah Social Media pawh uluk taka vil a ni dawn tih sawiin, “Media Ccell din a ni anga, anni hian Social Media thu post-te uluk takin an vil dawn. Dan bawhchhiate chungah chuan dan anga an chunga action lak a nih theihna atan hmalak zel a ni ang,” a ti bawk.

Working Committee on Ruihlo Do chuan nimin khan an hmalakna hrang hrang thlirletna hun Aizawl-a SAD Conference Hall-ah an hmang.

MPCC President Lalsawta chuan, “Pathian leh mipuite zarah kan sawrkar a nih chuan Mizoram hi mipuite beisei leh nghahhlelh angin kan her danglam dawn,” a ti.

Khawpui boruak (Urban Forest) tih thatna tur Scheme, Nagar Van Project chu Mizoram District hrang hrang leh Autonomous District Council pathum-a hmun 14 atan nimin khan EF&CC Minister TJ. Lalnuntluanga chuan lungphum a phum.

Social Welfare & Tribal Affairs changtu Minister Er. Lalrinawma chuan Ruihhlo do chu mitin ten kan mawhphurna a ni tih kan hriat a ngai tih a sawi.

Mizoram tlawh mektu Chief Election Commissioner (CEC) Rajiv Kumar kaihhruai Election Commission of India Team chuan nimin khan Mizoram District hrang hrang 11-a District Election Officer leh Superintendent of Police te kawmin Assembly inthlanpui neih tur atana an inbuatsaihna te an enfiah.

Serchhip-a Cable TV hlun ber ni mek TT Vision chu thla thar, September 2023 atang khian tihtawp a ni dawn a, Serchhip-a LPS pechhuaktu pakhat SCN kutah an hlan dawn a ni. TT Vision chuan thuchhuah siamin TT Vision pawh saktu zawng zawngte chungah lawmthu sawiin, “Chutih rualin mipuite huatthu leh pawi kan sawina te a lo awm palh a nih chuan in mi ngaihdamna kan ngen tel nghal bawk a ni,” an ti a ni. 

Serchhip bialtu MLA Lalduhoma chuan zan khat riakin Serchhip a rawn tlawh a, nimin khan Thenzawl a tlawh nghal bawk.

Nimin khan DIET Serchhip-ah Zonun zemawi leh Ruihhlo that loh zia inzirtirna chu neih leh a ni.

Congress Party chuan Mizoram tlawha rawn zin mek Election Commission of India-a hotute hnenah MNF sawrkarin SEDP sum a sem chu inthlan puan a nih atang chuan tihtawp hmak a nihna tura hmala tur leh Inthlanna kaihhnawiha sum leh therhlo sem a reh theihna tura tan la turin an lo thlen.

Home Minister Lalchamliana chuan MNF Returnees ten leirem an rah theihna turin kum 2021-22 chhung khan mi 718 hnenah chhawm-dawlna cheng vbc. 8.77 pekchhuah a ni tih nimin-a Aizawl Press Club-a thuthar theh-darhtute a kawmna ah a sawi.

Kolasib Auto Rickshaw Drivers Union in Kolasib khawchhung ah Auto Rickshaw Permit mi 112 hnena a ruala pekchhuah duh lohna lantir nana tun thla ni 24 atanga Kolasib District Transport Officer (DTO) Pisa-a thawktute Pisa kai tur n dan chu an beisei anga chhanna an hmuh loh avangin nimin thleng khan DTO Office-a thawk te Pisa kai tur hi dan ala ni a. Kolasib Auto Rickshaw Drivers Union chuan, Auto Rickshaw Permit pekchhuah hrim hrim chu an dodal a ni lo tih sawiin, mamawh lo te hnena Permit pek chu tha an tih loh thu an sawi a ni.

Mizoram Planning, Economic & Statistical Service Association (MPESSA) chuan nimin khan Julie's Getaway Tanhril-ah General Conference vawi 15-na hmangin Mizoram State Planning Board Vice Chairman H. Rammawi chuan khuallian niin a hmanpui a. Statistics dik leh tha neih chu Ram tan lungphum pawimawh anih thu sawiin, thahnemngai tak leh taima taka hna thawk turin a fuih a, tun dinhmun ah Development Project leh Programme te Monitoring lama Planning Department thawktute indaihlohna avanga hmalak chak theih tawk lohna pawh sawrkarin a hriatpui thu sawiin, hma lak mek anih thu a sawi.

Nimin khan Higher & Technical Education Department changtu Minister Dr. R. Lalthangliana hovin Higher & Technical Education Department leh MZU hotute chuan Secretariat Conference Hall-ah Mizorama State University din dan tur chungchang sawiho in, Mizoram State University Draft Bill pawh an sawiho nghal a. Meeting chuan Bill Drafting Committee-in State University dinna tur atana Draft Bill a siam chu uluk taka zirho in an sawiho a. NEP 2020 hnuaia State University neih ngei a ngaih dawn avangin fimkhur tak leh uluk taka zirchiang chho chungin Mizoram State University din tura hmalak zel nise an ti a ni.

Tunhnaia Mamit Chhim Veng-a naupang kum 11 mi Lalremruata thihna avanga lungawiloh lantirna atan nimin khan Mamit Chhim Veng VC leh Alll NGO te bultumin mipui ten Mamit Hmun-sam tlang atanga Field Veng thlengin kawng an zawh a, Lalremruata thattu chu thuneituten a phu tawk hremna pe ngei tur te, he thihna a inhnam-hnawihte chhui chhuah an phut thu te, hetiang thil hi an khawtlang ah thleng tawh loh se an duh thu leh Vohbik naupang thihna thlentu hian Mamit Chhim Veng a rah an phal tawh loh thu bakah tualthah hmang chu an Veng-a chen an phal loh thute in an aurual a ni. Lalremruata hi August 18, 2023 khan chin hriatloh a bo in August 23 khan a ruang hmuh a ni a, a thihna a mawhphurtu a puh R. Lalrinchhana (Mamit) chu man ni tawhin a thah ngei a nih thu Police te hnenah a sawi a ni.

Sports & Youth Services Department leh Mizo Zirlai Pawl (MZP) tangkawp buatsaih ‘Youth 20 Mizoram, Meet on Nationalism, Patriotism & Development’ chu nimin khan Lunglei Saikuti Hall-ah neih a ni a, Rajya Sabha MP K. Vanlalvena chuan khuallian niin a hmanpui a ni.

Mizoram Govt. Lumpsum Aided Higher Secondary School Association (MIGLAHSSA) te chuan 'No Teaching Day' an hman hnuah sawrkar atanga thu lawmawm an dawn loh avangin nimin, August ni 29, 2023 atang khan tiamchin awm lovin an thawhna School te an khar.

National Sports Day 2023 chu nimin khan Sports Minister Robert Romawia Royte hovin SAI Training Centre, Mission Vengthlang, Aizawl-ah hman a ni.

Election Commission of India (ECI)-a Chief Election Commissioner Rajiv Kumar leh Election Commissioner pahnih bakah Official pawimawh te chuan Assembly inthlanpui neih tur atana Mizoram inbuatsaihna te enpui turin nimin khan Mizoram an rawn thleng a, ni thum chhung an cham dawn a ni.

Manipur tualchhung buaina avanga Mizoram-a sahimna zawnga rawn raltlan te tanpuina atana Mizoram-a sawrkar hnathawk te atanga vehbur khawn a atangin Rs. 81,37,271/- hmuh a ni a, Mizoram sawrkar Finance Department chuan cheng vbc. 5 a pechhuak tawh bawk.

Zoram People's Movement (ZPM) General Headquartes, Aizawl leh Hmar People's Convention (HPC) General Headquarters Sakawrdai te chuan nimin khan thawhhona thuthlung ziakin kumin a Assembly inthlanpui lo awm turah HPC Party chuan Candidate siam lovin ZPM an thlawp dawn a ni.

Home Minister Lalchamliana chuan nimin khan Aizawl Press Club-ah thuthar thehdarhtute kawmin a Department chan pathum- Home, Taxation leh Disaster Management & Rehabilitation Department te hmalakna leh hmasawnna hrang hrang a tarlang.

Serchhip-a PHE Department chuan Serchhip khawpui chawmna atana Tuikum tui an lakna a Khawtetlang-a Main Reservoir tihfai hna chu nimin khan an thawk tan a, hmun hrang hranga tuisem hna thawktu mi 40 chuang thawkin nimin khan Main Reservoir chhung hi tihfai zawh thaw-khat a ni a, hemi hnu hian Main Reservoir-ah hian Tui putruk theihna hmun a awm leh awm loh te enfiah chhunzawm a ni dawn a ni.

Serchhip District-a Integrated Health Campaign neih tur chu nimin khan Serchhip District Bawrhsap David Lalthantluanga chuan a hawng a, he hmalakna hnuaiah hian thla thar September 2023 chhung khian Serchhip District chhunga khua zawng zawngah thalaite tana hriselna en runpui neih a ni ang.

Pathianni-a zawhfel tak 10th North East Zone Shooting Championship-ah Mizoram aiawha kal  Saihmingthanga Sailo, Serchhip Ramthlun Veng chuan Categfory pali (4)-ah Mizoram tan Gold Medal a la.

Kumin-a Mizoram Legislative Assembly inthlanpui lo awm tur atana inbuatsaihna kal mekah nimin khan District Level Media Certification and Monitoring Committee (MCMC) chu an Chairman leh Serchhip District Bawrhsap David Lalthantluanga hovin a vawikhat nan Serchhip DC Meeting Hall-ah an thukhawm. District Level MCMC Meeting-ah hian Election Commission of India in kaihhruaina a siam zulzuia Election kaihhnawih Advertisement leh Paid News chhuah chungchanga thu pawimawh ngaihtuah turte sawiho a ni a. Mizoram Sawrkar Print Media Advertisement Rate hmanlai te, Cable TV Rate hrang hrang hmanlai te thlirho a nih hnuah Serchhip District chhunga Advertisement rate tur siamrem a ni a, hei bakah hian Campaign-na atana sum senso chhut dan tur hrang hrangte pawh ruahman niin hemi hmang hian Candidate leh Party te inthlan Campaign senso chu chhut sak thin an ni dawn a ni.

Serchhip bialtu MLA Lalduhoma chuan Serchhip Auto Rickshaw Owners’ Association in an kum 25 tlinna, Silver Jubilee an lawmna chu nimin khan Serchhip Auditorium-ah a hmanpui.

Mizoram Mistiri Association Khawlailung Branch kaihhruaina hnuaiah Khawlailung Village Council leh tlawmngai pawl hrang hrangte chuan an khua a Zaikhuma te In sak hna chu hnatlang in an thawh chhunzawm sak a. Zaikhuma te hian an In hi RCC hmangin a sak hna bul an lo tan tawh a, hei hi an chhunzawm mai theih tak loh avangin hnatlang hian chhunzawm sak an ni a, Mistiri te hi Group pahnih-ah inthenin nimin khan Group pakhat hi hnatlang in an thawk a, Vawiin hian Group dang an hnatlang ve leh thung dawn a ni.

Chhiahtlang atanga Hmuifang panna kawng a awm, Hmuifang to Chawilung kawng PCC Cement siamthat hna thawh a nih dawn avanga Technocrats Company (P) Ltd. in chak zawka hna thawh a nih theihna tura dilna an siam angin Aizawl SP chuan Hmuifang leh Chawilung inkar kawng chu August 30, 2023 atanga Sept. 12, 2023 (ni 14 chhung) atan khar a ni dawn tih thuchhuah siamin a tarlang a. He thupek hian chhiatrupna thil, kangmei leh emergency kaihhnawih a duty, dan leh thupek pawimawh bik leh emergency-a damlo hruaitute chetvelna a huam lo ang.

Champhai District-a khua leh Veng 8 te chu Vawk hri, African Swine Fever (ASF) lenna hmun ah puan mek niin ASF hri lenna hmuna la puan loh, ASF in a luhchilh si khaw pahnih awm bawkin tunhnaiah Vawk 199 suat a ni leh tawh bawk.

Aizawl Bawngkawn Local Council huam-chhungah Dengue vei an tam tih thu an dawn avangin Health Department chuan nimin khan he Veng huamchhungah hian Thosi ur beihpui an thlak a, Health Department chhinchhiah danin, kumin January atanga August thla chhung khan Bawngkawn huamchhungah hian Dengue vei leh veilo test-na Elisa Positive mi 30 hmuhchhuah an ni tawh a. Rapid test-ah 103 hmuhchhuah an ni tawh bawk a ni. Health Department sawi danin Mizoram-ah Dengue hluar hun hi September thla vel atangin a intan thin a, Dengue laka him nan In leh a vel tihfai te, tuitlinna hmun tihfai te uar turin mipuite an chah a ni.

Mizoram sawrkar hnuaia Lumpsum Aided Higher Secondary School Association (MIG-LAHSSA)-a tel School 9-a thawktute chuan sawrkar-a an thiphut nawr nan nimin atang khan 'No Teaching Day' an kalpui tan a, School kai mah se lehkha an zirtir lo a ni. MIGLAHSSA thuchhuah chuan kum 2018 Assembly inthlanpui dawna tiam an nih tawh angin ‘Adhoc Grant-in-Aid’ a hlan ngei an phut a, tun sawrkar term reilo te la awmah hian an beisei anga tih hlawhtlinsak ngei turin sawrkar an ngen a ni. Sawrkar atanga thu lawmawm an hmuh loh chuan Vawiin, August 29, 2023 atang hian tiamchin awm lovin School Managing Board-te hriatpuinain School khara sawrhar thu ngaihchan chhunzawm an tum thu an sawi a ni. MIGLAHSSA-ah hian Higher Secondary School 9- Zawlnuam, West Phaileng, Zobawk, Farkawn, East Lungdar, NE Khawdung-sei, Phullen, Sakawrdai leh Thingsulthliah te an awm ni.

Mizo Zirlai Pawl (MZP) General Hqrs. chuan ZO FEST lo hman tawhna hriatrengna lungphun hawnna an kalpui mekah nimin khan Aizawl-a ZO FEST hman tawh hriatrengna lungphun chu Aizawl-a MZP Conference Hall-ah neih a ni a, he hunah hian Aizawl-a tum thum, kum 2004, 2006 leh 2009-a ZOFST lo hman tawhna te hriatengna lungphun pathum hawn a ni. Nimin a he hun hman hi MZP President hlui leh School Education Minister Lalchhandama Ralte chuan hmanpuiin ZO FEST chu Zo hnahthlak inpum-khatna Kut atana buatsaih a ni tih sawiin, “MZP in hetiang Kut ropui leh hnam atana hlu a lo buatsaih hi a hlu takzet,” a ti a. MZP President a nih laia buatsaih tan a nih vanga Aizawl-a ZO FEST hman tawhna hriatrengna lungphun hawngtu atana sawm a ni chu lawmawm a tih thu a sawi bawk.

Commerce & Industries Department changtu Minister Dr. R. Lalthangliana chuan nimin khan W. Phaileng-ah Market Building lungphum a phum.

Nimin khan Aizawl-a Synod Conference Centre-ah ‘Zakapa, Fanai Lal’ tih thupui hmangin Seminar neih a ni a, Social Welfare & Tribal Affairs Minister Er. Lalrinawma chuan a hmanpui a ni.

Mizoram Lok Sabha MP C. Lalrosanga chuan BSNL in Mizoram puma inbiakpawhna titha tura hma an lak mekte leh ruahmanna an neihte chu tipuitling thuai se a duh thu a sawi.

Rampum huap-a Zirtirtu tha chawimawina, National Award to Teachers 2023 dawng turin Lalthianghlima Teacher Govt. Diakkawn H/S chu thlan a ni.

Rozgar Mela (Job Fair) tum 8-na nimin khan 2nd AR Gajraj Hall, Lakhimpur Battalion, Aizawl-ah buatsaih a ni a, he hun hi Union Minister of State for Minority Affairs John Barla chuan hmanpuiin Indian Government hnuai Central Armed Police Forces (CAPF) hrang hranga hna hmu thar mi 68 leh thalai dang, an vaiin mi 85 te hnenah Appointment Letter a hlan a ni.

Serchhip Sub-Hqrs. YMA chuan Manipur a tualchhung buaina avanga harsatna tawk mek te tanpuina atan Manipur YMA te hnenah cheng nuai thum (3) hlan nise an ti.

Serchhip-a PHE Department in Inrinni kalta a Khawtetlang-a PHED Main Reservoir tihfai an tum chu khua in a zir loh avangin thulh leh a ni a, harsatna dang a awm loh chuan Vawiin, August 28 -30, 2023 chhung hian tihfai tum niin hemi hun chhung hian mipuite hnena tui sem pawh a khaihlak hlek rih dawn a ni.

Nimin August 27, 2023 kha Diocese Catholic Hmeichhe Pawl (Aizawl Diocese) dinchampha vawi 10-na niin Serchhip Parish Catholic Hmeichhe Pawl chuan Inrinni khan Assumption Chuch-ah an dinchampha lawmna hun hi an hmang a, Rev. Fr. Daniel Lalmuanzela, Asst. Priest chuan Mass Thianghlim hlanin intihhlimna hrang hrangte nen hun an hmang a, Sakhi One Stop Centre-in Hmeichhiate humhimna leh dikna chanvo chung-changah zirtirna an pe bawk a ni.

Serchhip Auto Rickshaw Owners Association chuan Inrinni khan Assembly neiin hruaitu tur thlanna an nei. Serchhip Auto Rickshaw Owners Association hian Bukpui P&E Rest House-ah Assembly hi hmangin an President Malsawmtluanga kaihhruaiin Report hrang hrang ngaihthlak a nih bakah an member boral te sunna hun hman a ni a. Chawhnu lamah hruaitu thar thlanna neiin President-ah H. Lalsawimawia (New Serchhip); Vice President-ah Malsawmtluanga (Chhim Veng); Secretary-ah Liansangpuia (New Serchhip); Asst. Secretary-ah Lallawmsiama (Vengchung); Treasurer-ah Lalbiakmawia (Bazar Hnuai) leh Fin. Secretary-ah Romalsawma (Vengchung) te thlan an ni.

Kumin chhungin Mizoram-ah damdawi hmansual avanga thi mi 49 zet chhinchhiah an ni tawh. Excise & Narcotics Department chhinchhiahna atanga a lan danin kumin January atanga August 23, 2023 thlenga Mizoram-a ruihhlo hmansual vanga thi mi 49 zinga 40 hi mipa niin midang 9 te chu hmeichhia an ni thung a, heng ruihhlo hmansual vanga thi te hi Heroin (No. 4) kaihhnawiha thi vek an ni. Excise & Narcotics Department in kum 1984 atanga an chhinchhiah dan chuan Mizo-ram-ah damdawi hmansual vanga thi hi mi 1785 an awm tawh a, an zinga 1571 hi mipa niin 214 chu hmeichhia an ni. Kum 2020 kha Mizoram-ah damdawi hmansual vanga kum khat-a thi an tam ber kum a niin hemi kum hian mi 67 an thi a ni.

Kolasib District Bawrhsap John LT. Sanga chuan Local Administration Department (LAD) hmalakna hnuaia Kolasib College Veng-a Semi Indoor Stadium Volleyball Court sakna tur lungphum chu Inrinni khan a phum a, he hun hi Kolasib DLAO ST. Lalhmingmawia chuan a kaihruai a ni. College Veng Semi-Indoor Volleyball Court hi cheng nuai 28 senna tur niin a dung meter 26 leh a vang meter 17-a zau tur a ni a, kumin chhunga zawhfel tura ruahman a ni.

Kumin-a Mizoram Assembly inthlanpui chungchanga hmalak tawhnate leh hmalak zel dan tur enfiah turin tun thla ni 29 leh 30 khian Chief Election Commissioner of India Rajiv Kumar hovin ECI Senior Official te chuan Mi-zoram an rawn tlawh dawn a, heng mi pawimawh te lo dawnsawn dan tur, Press Coverage leh Press Conference buatsaih sak dan tur hrang hrangte chu Inrinni khan Mizoram CEO hnuaia Media Cell member-te chuan an sawiho a ni.

Mizoram-a sawrkar hnathawk ten an DA chungchang avanga sawrkar kar nana naktuk atanga hna thawk lova Pisa kai an tum chu Chief Minister hova inkawmna an neih hnuah an tulh leh ta.

Mamit Comercial Vehicles Association ten tun thla ni 21 atanga National Highway 44A kawngpui an dan chu Inrinni tlai dar 4:00 khan an titawp ta a, Inrinni zing khan PWD Highway CE, SE leh PWD hotute nen inbiakna neiin Teirei Lei thuam chak dan tur leh kawngpui chhe zual lai siam dan tur an en ho hnuin PWD IB-ah inbiakna neih chhunzawm a. Mizoram PWD nen inremna ziakin tlai dar 4:00 khan kawngpui dan hi tihtawp a ni. An inremna ah hian Teirei Lei metric tonne 15 aia rit phur lirtheiin an zawh theih nana thuam-chak dan turte, NH44A kawngpui chhe lai siamthatna tur atana sum dahte, he kawng siam hna tihtawp a nih tak hnu hnathawh hmabak thawh a nih theihnan tun thla chhung ngeia MORTH ah estimate thehluh a nih theihnana hmalak dan turte, Dampui hnuai leimin kumhlun siamthat leh Bairabi kawng siamna atana sum dah te a tel a ni.

Prime Minister Narendra Modi chuan Inrinni khan Beng-aluru-a ISRO Scientist-te kawmin Thla leilung-a Chandrayan-3 tum ni, August ni 23 chu ram pumah ‘National Space Day’ atan hman a nih tur thu a puang a, Thla leilunga Vikram Lander leh Rover Pragyan tumna hmun chu Shiva Shakti Point tia vuah anih tur thu leh Chandrayan-2 tum sualna hmun chu Tiranga Point tia vuah anih tur thu a puang bawk.

 Home Minister Lalchamliana chuan July 26, 2021-a Vairengte dai-a Mizoram Police leh Assam Police an inkah hnu khan Police silai keng awmna hmun Border Outpost nghet leh Police Duty Post nghet lo hmun tam takah dah a nih thu leh a panna kawngte pawh a remchan dan anga laih/siam a nih thu a sawi.

The Ayushman Bharat Digital Mission (ABDM) hnuaia India ram puma Health Care System te ziahluhna (digitization) kalpui mek a niin he Project hnuaiah hian Mizoram chu Microsite Project din hmasakna ber State a ni a. ABDM hnuaiah hian damlo te natdan chi hrang hrang chhinchhiah anih dawn avangin a tangkai hle dawn niin Health Department chuan an sawi.

Health & Family Welfare Minister Dr. R. Lalthangliana chuan Inrinni khan Shillong-a North East Indira Gandhi Regional Institute of Health & Medical Science (NEIGRIHMS) tlawhin NEIGRIHMS hotute chu ZMC-a Cardiology Department bultan tur chungchang a sawipui.

Tun thla (August 2023) chhungin Mizoram hmun hrang hrangah ruahsur avanga leimin leh tuilian vangin tum 196 chhiatna a thleng a, chhiatna hian chhungkaw 1000 dawn chenna hmun a khawih chhia a ni.

Comptroller and Auditor General of India (CAG) chuan Mizoram sawrkar chu Darlak leh Sihthiang inkar kawng siam chungchanga tul hauh lova cheng vbc. 4.88 hman avangin a khak a. He kawng sial thawk zui lova tihtawp a nih thu sawrkar pawhin a pawm a ni.

Kum 1973-a din Govt. Serchhip College chuan an kum 50 tlinna, Golden Jubilee chu nimin khan lawmin he hun hi bialtu MLA Lalduhoma chuan khuallian niin a hmanpui a, he hunah hian Govt. Serchhip College-a lo thawk tawh leh he College atanga zirchhuak mi thahnem tak an tel a ni.

Kumin kumtawp lama Mizoram in Assembly inthlanpui a hmachhawn tur atana Serchhip District-a inbuatsaihna tur hrang hrang thlirin nimin khan Serchhip-a sawrkar Department hrang hrang botute chu District Bawrhsap hovin an thukhawm.

Electoral Roll 2nd Special Summary Revision neih meka Serchhip District tana Observer Dr. Lalzirmawia Chhangte IAS chuan nimin khan Serchhip rawn tlawhin Serchhip District-a Electoral Roll buaipuitu Officer te leh Political Party hrang hrang hruaitute a kawm.

Serchhip khua in thla thar-a Mizoram UPC General PYD Conference a dawn tur atana P&E Veng Leisekawt Mual-a Pandal sak hna chu tluang taka thawh mek zel niin tunah hian a chung leh a bang te chu peihfel thawkhat a ni tawh a ni.

Tunhnaia Social Media lama hmeichhe nau-pang kum tlinglo kut inthlakna darh chungchang ah thuneitute chuan hma la zui zelin kutthlakna a inhnamhnawiha tel ve nia hriat mi 6 te chu Observation Home-ah dah lailawk leh an ni a, heng bakah hian midang pakhat pawh thu zawhfiah tur a la awm nia thudawn a ni bawk. Thuneitute chuan tuna Observation Home-a dah te hi Counseling te pek an nih dawn thu sawiin, an khawsak phung te en zui zel a ni dawn tih an sawi a, a tul anga an awm zel dan tur pawh la ngaihtuah tur a nih thu an sawi bawk.

Kum 2019-a Champhai-a Hmeichhe naupang kumtling lo khuaikhemtu a puh Vanlalhreluaia (30) chu Champhai District Special Court chuan thiam loh chantirin kum 20 chhung lung In tang tura hrem a ni.

India ram Zalenna kum 75-na lawmna Azadi Ka Amrit Mahotsav (AKAM) kum hnih chhung kalpui tawh kharna atana Campaign, Meri Maati, Mera Desh (Ka leilung, Ka ram) State Level Prog-ramme chu nimin khan Mizoram New Secretariat Complex-ah neih a ni a, he hun hi RD Minister Lalruatkima chuan khuallian nia hmanpuiin Chief Secretary Dr. Renu Sharma IAS pawhin thu a sawi bawk. Meri Maati, Mera Desh hi August 9, 2023 atang khan rampumah kalpui a ni.

ZPM General Hqrs. chuan nimin khan Executive Meeting neiin kum 2023 Mizoram Legislative Assembly inthlan lo awm turah BJP an thawhpui dawn lo tih an puang a, ZPM General Hqrs. hruaitu term ding lai September thlaa tawp tur chu pawhsei tha tiin, hruaitu thar thlan hun atan March 2024 nise an ti a. “Pathian leh mipui zarah sawrkarna kan lo chang ve hlauh te a nih chuan sawrkarin Zofate himna leh inpumkhatna tur atan nasa zawkin hma a la ang,” an ti bawk.

Mizoram-a sawrkar hnathawk inzawmkhawm ten sawrkar thuchhuak anga DA lak ve phutna atana karleh Thawhtanni atanga lungawilohna lantir an tum thu Mizoram Civil Pensioners’ Association (MCPA) chuan an thlawp thu an sawi.

Tunkar Nilaini-a Bairabi leh Sairang inkar Rel kawng siam hna thawh mek chim avanga thi te ruang chu hmuh kim niin ruang hmuh hnuhnung ber chu nimin chhun dar 1:04 vel khan hmuh a ni a, heti hian he vanduaina thlenga thi nia hriat mi 23 te ruang chu hmuh kim a ni ta a ni. Tarlan tawh angin tunkar Nilaini zing dar 9:30 vel khan Bairabi leh Sairang inkar Rel kawng siam mekah Bridge No. 196, Sairang Zero Point bul-a ban Number 102 leh 103 inkara Lei dawh lai chu a chim a, he Lei chim hian mi 26 chim puiin mi 3 te dam-a an chhuah laiin mi 23 an thi a, vanduaina thlen ni hian ruang 16 hmuh niin a tuk-ah ruang 3 hmuh leh a ni a, nimin khan ruang dang pakhat hi hmuh a ni leh ta a ni.

Mizoram Civil Service Association (MCSA) Conference vawi 47-na chu nimin khan Aijal Club-a McCabe Hall-ah neih niin Deputy Chief Minister Tawnluia chuan khuallian niin a hmanpui a, Mizoram Civil Service Association Member te chu Sawrkar kutke pawimawh tak an nih avangin Sawkarin an tana hamthatna leh tul dangte a ngaih-pawimawh sak thin thu sawiin, MCS te chu ram neitu nihna thinlung pu tlat tur leh Public Service nihna zawnah mipuite rawngbawl hna thahnem ngai taka thawk zel turin a fuih bawk. Nimin-a he hun hmanna ah hian Honorary Member chatuan ram pan ta mi 6 sunna hun hmangin MCS Officer thar 15 te lawmna hun hman nghal a ni a, chawhnu lamah rorelna hun hmangin an pawl member IAS a kaisang mi 4, Zorammuana, Ramdinliani, David Lalthantluanga leh Maria CT. Zuali te lawmpuina hun an hmang a, hruaitu thar an thlang nghal bawk.

Aizawl Municipal Corporation (AMC) chuan Aizawl khawpui faina atana hma a lakna kal zelah In-a bawlhhlawh khawn, 'Door to Door Collection' chu a kalpui tan a, he hmalakna hi Aizawl Mayor Lalrinenga Sailo chuan hawngin Veng 17 ah bultan phawt a ni dawn tih a sawi. 'Door to door Collection' bultanna leh enchhinna, Pilot Project atan Corporator-ten an Ward-a Veng pakhat theuh thlangin Veng 17-ah bultan a ni a, bawlhhlawh khawn tur hian hnathawktu mi 72 an awm nghal dawn a. Kawngpui an-a cheng lo te chu an In-ah bawlhhlawh khawnsak an ni anga. An khawnsak te hi hnathawktu hlawh ah lo la tang ve tura beisei an ni thung a. He hmalakna avang hian kawr-a bawlhhlawh paih leh Aizawl tui tlan lui-a bawlhhlawh te tlem chho hret hret tura beisei a ni.

Tunhnaia Bairabi leh Sairang inkar Rel kawng siam mek a Lei dawh lai chim chhan chhui turin Ministry of Railways chuan High Level Committee a din.

Kolasib District chhunga Bairabi Civil Sub-Division thar chu nimin khan Chief Minister Zoramthanga chuan a hawng.

Serchhip District chhunga National Highway-54 kawng laih zauhna atana zangnadawmna la tawh, an In la thiat lo te chu niminpiah, August 23, 2023 khan Eviction Notice pe in an In te thiat nghal tura tih an ni.

Tunhnaia hmeichhe naupang kut inthlakna thlenga kut thlaktu chungchang chu nimin khan Juvenile Justice Board (JJB) in an ngaihtuah dawn nia hriain nimin khan MHIP Sub-Hqrs. huaihawtin mi thahnem tak chu JJB thutkhawmna tur, Observation Home tual-ah an pungkhawm a, he hunah hian MHIP hruaitute chuan an punkhawm chhan te sawiin, he naupang kut tuartu hian a chanvo dik tak a chan theih nan leh thlavang hauhtu mi tak an awm a ni tih lantirna atan he hun hi hmang an ni tih an sawi a. Naupang ve ve, nun la sim thei, nakin a mi tha tak la ni thei turte an nih thu an sawi bawk. He hunah hian mi za chuang zet pungkhawmin buaina leh harsatna awm lovin chawhnu lamah pungkhawm te hi an tin darh a ni.

Northeast Initiative Development Agency (NEIDA) chuan nimin khan Khawlailung khuaa Vawk vuilhtute kawmin Vawk damdawi te an sem nghal bawk. Serchhip District-a NEIDA te hian nimin khan Serchhip District chhung Khawlailung khuaa Vawk vulhtu mi 116 te chu Khawlailung Community Hall-ah kawmin an hmalakna hrang hrangte an sawipui a, NEIDA Account Manager Shilu-a leh Account & Admins J Sangte te chuan Vawk vulh lama tan lak dan tur an hrilhfiah bakah District Programe Officer Jacob Lalrammawia chuan Ran enkawl dan a zirtir bawk a, he huna kal te hnenah hian Ran damdawi chi hrang hrang a thlawna pek nghal a ni bawk.

Social Welfare Minister leh Tuikum bialtu MLA Er. Lalrinawma chuan nimin khan a bial chhunga hmasawnna hnathawh thenkhat te a hmunah kal a enfiahin khawtlang hruaitute nen an hmalak zel dan turte an sawiho bawk.

Kolasib Auto Rickshaw Drivers' Union (KARDU) chuan tunhnaia sawrkarin Kolasib khawchhung bik atana Auto Rickshaw permit 112 zet a pekchhuah chu eizawnna atana Auto Rickshaw hmang mektute tan in tamchhuah theihna tur khawpa tam ni a an hriat avang leh Permit pekchhuah tharte hi cancel tura Transport Minister hnena an thu thlen ah chhanna an hmuh loh avanga lungawilohna lantir nan nimin chawhma atang khan tiamchin awm lovin Kolasib DTO leh a Staff te pisa kal tur an dang a. Permit pek hrim hrim chu an dodal lo tih sawiin, tuna pek chu a tam thu leh Permit hmutu tam takin aan permit chu an hralhchhawng leh thin nia an hriat thu an sawi bawk a ni.

Sports Minister Robert Romawia Royte hovin nimin khan Mizoram atanga National Cadet Corps, NCC Republic Day Camp, New Delhi-a telte lawmpuina hun buatsaih a ni a, he huna lawmpuina hlante hi 1 (One) Mizo Air Squadron NCC hnuaia Cadet Under Officer Kenny Lalrin-awma Singh leh Laltlansangi, PUC-te bakah Care Taker Officer hna thawk tha 2, Lalrinsangi Nghinglova (Govt. Zirtiri Residential Science College) leh Sanju Karwar (Govt. Diakkawn High School, Kolasib)-te an ni.

Kumin October 1-a kum 18 tling chin te laa Electoral Roll enfiah hna thawh meka Khawzawl District tana Observer Lalzarmawii IAS hovin nimin khan Khawzawl DC Conference Hall-ah Electoral Roll enfiah hna thawh mek chungchang sawiho a ni a. Electoral Roll Observer chuan inthlan hlawhtling taka neih a nih theih nana Electoral Roll mumal leh felfai tak neih a pawimawh thu sawiin, Khawzawl District-a inthlan buai-puitute chu tha thlah lova thahnemngai taka thawk zel turin a chah bawk. Observer hian Polling Station thenkhat chu aa tlawh nghal bawk a ni.

Bairabi leh Sairang inkar Rel kawng siam meka Lei dawhlai niminpiah a chim-a thi zingah ruang 22 hmuh ni tawhin he thu buatsaih lai hian ruang pakhat zawn mek ala ni a, tarlan tawh angin Railway Bridge No. 196-a lei dawhlai hi niminpiah chawhma dar 9:58 khan a chim a. Helai hmuna hnathawk hnamdang 23 ten nunna an chan a, hliam tuar mi pahnih awmin lei dawhna ban a tang pakhat chhanchhuah a ni bawk. He chhiat tawh avanga nunna chan, an ruang lak chhuah tawhte chu postmortem niin ruang hi tawih theilo tura buatsaih a nih hnu ah Railway Department hnenah an chenna khua theuh thlen turin hlan an ni ang. Tun dinhmun ah chhanchhuah hna hi ngawrh taka thawh zui zel a ni a, Mizoram Police, BSF leh NDRF te thawk hovin theihtawp chhuah a ni.

Mizoram sawrkar-a Tourism Department chuan kumdang-a a lo huaihawt tawh angin Cycle hmanga intlansiakna, Tour De Hmuifang 2023 chu buatsaih leh a tum a, nimin khan Sports Minister Robert Romawia Royte hovin Tourism Department Officers te leh Mizoram Cycling Association hruaitute chuan hemi chungchang hi an sawiho a ni. Tour De Hmuifang hi September ni 23, 2023 (Inrinni) ah neih tum a ni a, category hrang hrang panga ah inelna neih tur niin Aizawl Veng laili atanga flag-off in Hmuifang-ah zawh a ni ang a.  Mizoram pawn atangin Cyclist tam tham tak he inelnaah hian tel tura beisei an ni a, registration hi Ph. No. 9862325060/9612170219/ 9862846264-ah te tih theih a ni. Tour De Hmui-fang hi kum 2021 atang khan neih thin a ni.

Pradhan Mantri Aadi Adarsh Gram Yojana (PMA-AGY) kalpuina atan Mizoram-a khaw 344 thlanchhuah an ni tawh.

Family Oriented SEDP kalpui mek chu a thawh thumna ah chhungkaw 60,000 huam leh tura kalpui tum a ni.

Nimin khan Chief Minister Zoramthang hovin Mizoram-a Bamboo Value Chain Development in Northeast kalpui dan tur inrawnkhawmna neih a ni.

Mizoram sawrkar-a Transport Department-ah Post ruak 303 awm mekin Transport Minister TJ. Lalnuntluanga chuan Staff indaihlohna nasa em em hi tun atanga reilote ah sutkian a nih a beisei tih a sawi.

ZPM Party chuan kum 2023 inthlanpui lo awm tur atan Campaign khuhhawnna hun nimin khan hmangin, ZPM Leader Lalduhoma chuan, “Sawrkar se min ti lo te pawhin kan sawrkar min rinpui ta,” a ti a. “Mihring lam inbuat-saihnaah chuan kan inbuatsaih fel thawkhat niin kan inhria,” a ti bawk.

Serchhip bialtu MLA Lalduhoma chuan nimin-a Mizoram Legislative Assembly thutkhawm ah NHIDCL in National Highway 54 an laihna leivung-in Serchhip Zawlpui Phai-a harsatna a thlen sawichhuakin, Chief Minister Zoramthanga chuan he harsatna hi sawrkar in enzuiin hma a la dawn tih a sawi.

Kum 2021-a Serchhip District Hospital-a nau nei tur Hmeichhe pakhat leh a fa hrin boral thu ah Gauhati High Court chuan sawrkar chu zangnadawmna cheng nuai 5 pe turin a ti.

Tunhnaia Social Media hrang hranga Mizo Hmeichhe naupang kum tling lo kut inthlakna darha kut tuartu hmeichhe naupang chhungte chuan he thil thleng ah hian dikna in ro rel se an duh thu sawiin, hetiang thil hi Mizoram-ah thleng nawn tawh lo se an duh thu an sawi bawk.

Serchhip-a Excise and Narcotics Department chuan nizan hmasa khan Serchhip leh Thenzawl inkarah Rakzu litre 500 zet manin hemi kaihhnawih ah hian mi pathum leh Zu phurhna atana hman lirthei pakhat an man bawk.

Niminpiah chawhnu lama Bungtlang khuaa nu pakhat pawngsualtu a puh K. Rozuala, Ser-chhip P&E Veng chu nimin khan Serchhip District Jail-ah dahluh a ni.

Mamit-a lirthei hmanga eizawngtu ten an District chhunga inkalpawhna kawng thenkhat leh Lei dawh mek te siamthat an phut avanga tunkar Thawhtanni atanga National Highway 108 an dan chah chu thuneitute nen inremna an la neih theih loh avangin nimin thleng khan chhunzawm zel a la ni a, Vawiin hian sawrkar hotute nen inbiakna an nei leh dawn nia thudawn a ni.

Lawngtlai District chhung, Paithar MDC bial-a Saizawh East khua ah damlo an tam avangin niminpiah khan Lawngtlai Chief Medical Officer Dr. David Zothansanga hovin Medical Team ten an tlawh a, damlo mi 160 chuang enin heng damlo te hi Tlang hrileng, khawsik leh hritlang an ni ber a, damdawi te pawh a theih anga pek nghal an ni bawk.

Mizoram Chief Secretary Dr. Renu Sharma chuan nimin khan Aizawl-a Mizoram State Archives chu a tlawh. Chief Secretary hian thla thar September ni 6 leh 7, 2023-a The Heritage Consortium, Patna, HDFC Bank leh Art & Culture Department-te tanghov n Mizoram State Archives Hall-a an buatsaih tur, ‘Workshop on Preventive and Curative measures of Archival records along with the latest methods of its storage’ chungchangah a hmun leh hma turte endikin hmalak dan turte thawktute a kawhhmuh a. State Archives-a records vawn that mek dinhmun te endikin, State Archives-in records an vawnthat mek chu beitham hle-a a hriat thu leh Record pawimawh vawnthat kawngah Mizoram Sawrkar hnuaia Department hrang hrangte chu tan an lak a ngai hle-a a hriat thu a sawi. Dr. Renu Sharma hi Mizoram Chief Secretry zinga Mizoram State Archives tlawh hmasa ber a ni.

Mizoram Legislative Assembly 8-na thut-khawm vawi 12-na chu nimin khan tiamchin awm lova tihtawp a ni. Mizoram Legislative Assembly dinglai a thutkhawm hnuhnung ber ni tura ngaih ni 2 awh he thutkhawm nimin-a chhunzawm ah hian House-ah zawhna pathum chhan hman niin House dawhkan-ah lehkha pawimawh 10 dah a ni a, Report 7 pharh a ni bawk. Sawrkar kum liamta kum 3 chhunga Department thenkhatin pawisa an lo hman pûk siam remna leh heng sum te hman remtihna Bill pass a ni a. Hei bakah hian Bill thar 2 leh Dan hman lai siamthatna tur Bill 2 pass a ni bawk. Heng bakah hian Deputy Chief Minister Tawnluia’n Dan thar siamna tur Bill a putluh, ‘The Mizoram Ground Water (Control and Regulation) Bill, 2023’ chu pharh a ni a, he Dan hi lei hnuaia tui awm, a duh duhin an pump chhuah ngawt loh nana venhimna tur a ni a. Dan awmsa siam danglamna tur Bill, ‘The Mizoram Municipalities (Amendment) Bill, 2023’ pawh pulutin heng te hi House-ah pass a ni.

Niminpiah-a Mizoram hmun thenkhata Village Council leh Local Council bye-election neih result chu hriat kim theih a ni tawh. Niminpiah khan Lai Autonomous District Council huam-chhung VC 7-a Seat ruak hnawhkhahna tura bye-election neih Kakichhuah-a Seat khat leh Kawnkhua-a Seat 2-ah MNF candidate te chuhtu awm lovin an tling a, Nghalimlui, Dumzautlang, Chamdurtlang-II leh Lawngtlai Bazar-a Seat khat theuh ah MNF candidate thlantlin an ni a, Lawngtlai Electric Veng-a VC Seat khat aah ZPM Candidate thlantlin a ni thung. Aizawl Municipal Corporation (AMC) hnuaia Local Council pahnih a bye-election neih ah erawh ZPM Candidate thlantlin an ni ve ve a, heng bye-election neihna te hi Luangmual leh Salem Veng LC-a Seat ruak pakhat ve ve a ni.

Mizoram Legislative Assembly dinglai, Mizoram State Legislative Assembly pariatna kum 5 chhunga thutkhawm (Session) neih ah ZPM Member Lalduhoma chu House a ding ngun ber a ni.

Higher & Technical Education Minister Dr. R Lalthangliana'n Lunglei-a MZU Southern Campus din turah Union Finance Ministry-in thawktu lak remtihna a la pek theih loh avangin tihfel theih a la ni rih lo tih a sawi.

Bairabi leh Sairang inkar Rel kawng siam hna thawh meka Lei dawhlai pakhat, Sairang Zero Point bul a mi chu nimin khan chimin helai hmuna hnathawktu mi 20 chuangin nunna an chan nia hriat niin ruang 18 lakchhuah a ni tawh.

Zirna kalphung thar, New Education Policy 2020 in kalphung tur a ruahman angin Mizoram sawrkar chuan Serchhip DIET chu 4 Years Integrated Course B.Sc, B.Ed zirna atan phalna a pe a, a taka ti hlawhtling turin hmalak mek a nih thu School Education Minister Lalchhandama Ralte chuan tunhnai khan a sawi a. Serchhip DIET Hostel Building tur cheng nuai 215-a sak hna pawh chak taka kalpui mek niin tunah hian hna thawh tur zaa 90 vel thawh zawh a ni tawh bawk.

Thla thar September 5-a Zirtirtute Ni (Teachers Day) Serchhip-a hman dan tur chu nimin khan Serchhip District Bawrhsap David Lalthantluanga hovin Serchhip DC Meeting Hall-ah ngaihtuah a ni.

Urban Development & Poverty Alleviation Department, Serchhip District chuan Serchhip District-a Shelter/Home hrang hrangte hnenah nimin khan Refurbishment Item an hlan.

Nimin khan LM M/S Serchhip-ah ‘Zonun zemawi leh Ruihhlo that loh zia inzirtirna’ neih a ni. Serchhip Sub-Hqrs. YMA Training & Youth Affairs Committee leh Govt. Serchhip College-a NSS Unit te chuan Serchhip khawpui chhunga Middle School chin chunglamah ‘Zonun zemawi leh Ruihhlo that loh zia inzirtirna’ hi neih tumin nimin khan a bul tanna atan LM M/S-ah he hun hi hman a ni a, he hun hi Sub-Hqrs. YMA T&YA Committee Chairman C. Lalramliana chuan kaihruaiin K Lalrinchhana, Asst Prof. Govt. Serchhip College chuan ruihhlo thatloh zia zirtirin SEDAL atangin Upaa T. Romama chuan Zonun zemawi thupui hmangin thu a sawi bawk a ni.

Kumin July thla thlenga Mizoram sawrkarin Mizoram State Health Care Scheme hnuaia damlo bill a bat zat chu Rs. 62,89,53,598 a tling tih Assembly Session neih mekah Health Minister Dr. R. Lalthangliana chuan Lalchhuanthanga zawhna ziaka a channa ah a tarlang a, Policy year April 1, 2022-March ni 31, 2024 thlenga inziaklut 26,569 awmin, hemi hun chhung a registration fee hmuh zat chu Rs. 3,36,79,860 a tling tih a tarlang bawk.