Chanchin thar thenkhat :

Myanmar ramri-ah duty rel

Nimin khan Champhai-ah District Bawrh-sap, Maria C.T Zuali hovin Champhai DC Conference Hall-ah ramri kaltlanga hri inkaidarh ven dan tur chungchang ngaihtuah a ni a. Meeting hian ramri kaltlanga hri kaidarh thei veng turin ngawrh lehzuala ramri venghim tura hmalak tha tiin a theih chen chenah Indo-Myanmar ramri dep khua ah te COVID-19 duty post siama ngawrh taka duty leh nise an ti a, Police ten tul leh mamawh dan ang zelin duty post-te tlawhkualin vil thin dawn a ni. VLTF kaltlanga ramri veng tura inpe te chu YMA hruaitute leh VC ruahmanna in mumal taka ziahfel hnuah BDO hnenah Volunteer list thehluh nise tih a ni bawk. Hei bakah hian Hnahlan tlangdung leh Tuipuiral ramri dep khuaah te ramri kaltlang hri inkaidarh tur ven chhunzawm zel a nih thu tarlan a ni bawk.

Driver chawlhna siam rel

Kolasib District huamchhunga COVID-19 hri kai thar te zirchianna ah khaw chhung hmun thenkhat a lirtheite an chawlh thin vang anih theih avangin hemi chungchang hi nimin khan Kolasib DC hovin Thingdawl, Bualpui, Kawnpui, Kham-rang leh Bilkhawthlir VLTF hruaitute leh Zonal Executive Magistrate-te chuan an sawiho a. Heng nitin mamawh lirthei khalhtute chawlhna hmun tur hi Vairengte leh Bilkhawthlir inkar, Gosen Veng bul, Bualpui dai leh Kawnpui leh Kham-rang inkarah siam tura ruahmanna siam a ni.

Ramngaw humhalh tha thlang

Nimin khan Siaha-ah District Level Committee on Green Mizoram Day chu an District Bawrhsap, Kesavan R IAS hovin an thukhawm a, he hunah hian kum 2020-2021 chhungin an District-ah kangmei hmun 496-ah chhuakin, ram hectare 1050.05-a zau a kangchhia tih tarlan a ni. He hunah hian kum 2020-2021 chhunga an District chhunga ramngaw humhalh tha khua thlanchhuah niin Amobyu 'B' chu lawmman pakhatna dawng tura thlan niin New Laty leh Khopai ten lawmman pahnihna leh pathumna an dawng bawk.

SMATEE hriattirna

Mizoram State quota Professional Course hrang hrang (JEE leh NEET in a huam ve loh) zir tumte chuan Mizoram State Medical and Technical Entrance Examination (SMATEE, 2021) Higher & Technical Education website https://dhte.mizoram.gov.in-ah June 8, 2021 atanga form download-in fill up hunah Technical Wing, H&TE Office, Chaltlang Lily Veng-ah June 21, 2021 atangin documents ngaite thil telin thehluh tur a ni a, hemi rual hian Fee ngai zat pek nghal tur a ni a. Information Brochure pawh lakchhuah nghal tur a ni.

ZMC bawlhhlawh paihna en

Zoram Medical College-a bawlhhlawh paihna hmun chu nimin khan MLA pahnih- Dr. ZR. Thiamsanga leh bialtu MLA, F.Lalnunmawia ten an tlawh a. ZMC hian bawlhhlawh sawngbawlna hmun an neih that tawkloh avangin tunhnaia an bawlhlawh paihna chu sawiselna a awm avangin ruahmanna tha leh mumal zawka siam dan tur an enfiah a ni.