TUTE HI NGE 'ADVOCATE' AN TIH CHU?

TUTE HI NGE 'ADVOCATE' AN TIH CHU?

- K.Remruatfela

1. Mi hausa ten thil an tisual hleithei lova. Mi retheite erawh chuan pawi an khawih hma bik hle kan ti thin a. Hei hian kan Society ah Class Division a awm tawh tih a tarlang chiang hle! Mi hausa te an pawng tual tual a, mi retheite erawh dikna an nei ve ta lo emaw tih turin neksâwr leh rahbehin an awm tial tial a. Chutiang kara mi hausa leh rethei thliar hrang miah lova, dân anga hleihbik nei lova mitinin an chanvo tur dik tak an chan ve theihna tura hma la a, rorelna hmaa dinsak thintute chu Advocate te hi an ni.

2. Kan tunlai khawvelah chuan thil tihsual inang rengah pawh a tisualtua nihna leh dinhmun hian kawng ro a su nasa hle tawh an ti thin a. Mi lian leh thil ti thei zawk ten thilsual an tih chuan zawn chawp leh dap chawp pawh ngai lovin an thlavâng hauhtu leh sawi mam tum tu kar lovah an lo inlâr tual tual thin a. Mi chanhai leh chuanhnuai zâwk ten thil sual an tih erawh chuan archuka tui lo khawpin kan in chhuah a, chhia kan chham khum fo thin kan ti a, a dikna chen pawh thui tak a awm ang. Chutiang mi chanhai leh chan chhe zâwk, rahbeha awm te dinpui a, mi thil ti thei zâwk tena an thil tih sual emaw thil tisuala an puh emaw laka dân ang thlapa thiam thu sawi chhuah ve na hun an neih theihna tura an dikna leh chanvo hai chhuah sak thintute chu Advocate kan tih te hi an ni.

3. Sawrkar hna lâk leh Sawrkar rinchhanna thil reng rengah Politician leh Officer hmelhriat tha neih leh neih loh inkar a hla hle kan ti thin a. Hmelhriat tha pawh nei ve lo, mi chhia te tan kawng a pin zia leh a beidawnthlak zia kan inhrilh châmchî thin a nih kha! Nimahsela, Sawrkar in mi chhia leh tha thliar lova, ang khat veka a en a, an thiamna phu ngeia Sawrkar laka hamthatna an neih theih nana dàn anga mi tin te dikna leh chanvo hai chhuah sak thin tu te chu Advocate tho te hi an ni.

4. Mi fa ten pawi an khawih chuan nasa takin tuar se, Police leh khawtlâng te pawhin diriam mawlh mawlh se kan duh thin a. Nimahsela, kan fa te leh kan laina hnai ten mi pawi an khawih ve thung erawh chuan Police leh khawtlangin zah ngai se kan ti hle thin a. Kut an lo tawrh emaw, diriam taka hlei an len khum a nih phei chuan kan rilru a na a, kan thin a rim takzet a, kan fa te leh kan laina hnaite dikna leh chanvo haichhuak turin nasa takin kan hmanhlel tawh thin a nih kha! Chutiang hun a lo thlen a, kan mi zawn leh kan mamawh hmasak ber te chu a hmaa mi sualte thlavâng hauhtu tia hnawk kan lo tih rûk viau thin, Advocate te tho hi an ni leh si thin.

Note : Mi rethei leh chanhai zâwk te, an dikna leh chanvo pawh hâilang theilo khawpa rahbehna awm te khâichhuak a, dàn ang thlapa an dikna leh chanvo hâilansak thin tu Advocate te hi awm lo ta se, kan ram, kan Society dinhmun hi engtiang chiah nge ni ang a, mi lian leh mi tê te inkar hi engtiang taka zau nge ni ang le? Ngaihtuah peihte tân...