MPCC in lawmawm an tih thu an sawi

Mizoram Pradesh Congress Committee (MPCC) Media Department chuan sawrkar in COVID-19 hi Total Lockdown hmang ringawta do hneh chi a ni lo tih a hre ta chu lawmawm an ti hle tih an sawi.

Nimin a thuchhuah an siamah MPCC chuan Thutak Nunpuitu Team (TNT), Zuangtui-ah COVID-19 Positive mi 528 zet hmuhchhuah an ni chu pawi an tih thu leh an thatchhuah leh thuai theih nan duhsakna an hlan tih an sawi a. TNT result hian COVID-19 dona kawngah Sample Test tam a ngaih zia a tarlang chiang hle nia an ngaih thu tarlangin, “Test runpui nei lovin, heng positive-te hmuhchhuah ni ta lawk lo se chuan natna in a luhchilh thuk hman, ICU-a enkawl ngai, Oxygen pek ngai mi tam tak an awm anga, nunna chan pawh engemawzat an awm lo ang tih sawi theih a ni lo,” an ti.

MPCC chuan an President in Mass Detection Drive nei tura sawrkar a lo ngen tawhna ten ngaihpawimawh a hlawh chho dawn ta leh, hripui dona kawngah sawrkar a harh tan ta ni a an hriat avangin an lawm hle tih sawiin, “COVID-19 hi Total Lockdown hmang ringawta do hneh chi a ni lo tih sawrkarin a hre ta hi a lawmawm kan ti hle a ni,” an ti a. Hei bakah hian COVID-19 do hneh tak tak tur chuan tuna kan vaccine inpek dan pangngai leta chaka vaccine kan inpek a ngai tih an sawi bawk.