Latest News

Serchhip-a Veng hrang hrang te tan COVID-19 Vaccine lak hun siam a ni dawn

Serchhip District chhunga COVID-19 Vaccine pek hna kalpui mek chak zawka thawh a nih theih dan tur chu nimin khan Serchhip-ah District Bawrhsap hovin sawiho a ni a. Bawrhsap chuan COVID-19 laka kan inven theihna tha ber chu Vaccine a ni tih sawiin, vaccine la thei chin te chu Vaccine la theuh turin a sawm bawk.

Serchhip DC Meeting Hall-a awihona hunah hian District Bawrhsap, Kumar Abhishek chuan COVID-19 hrileng mek laka mipuite kan himna tura hmalakna pawimawh ber pakhat chu vaccine lak a ni tih sawiin, Serchhip District mipui, vaccine la thei chin zawng zawngten kan lak zawh vat chuan he hri lakah hian kan him duak (herd immunity) thei dawn tih a sawi a. Tunah hian nitin Serchhip-a Main Centre leh District chhunga Centre dangah te Vaccine hi pek reng a nih thu leh District te zingah a la tha ber pawl pawh kan niin a lang tih a sawi a. Amaherawh chu tun aia chak hian Vaccine hi la semchhuah theih a ni tih sawiin, “Thawktute pawh an inpeiha, hmanrua pawh kan nei a. Vaccine pekchhuah hi COVID-19 dona kawnga hna pawimawh tawpkhawk a nih avangin Vawiin-ah chutianga kan kal theih nan chuan ruahmanna kan neih a ngai a ni,” a ti.

He thutkhawm a tel te hian Serchhip Town chhunga Village Council 14 te chu ni indawtin Serchhip Main Centre-ah Vaccine lak theihna hun hawn sak nise tiin Vaccine la turte Online Registration chu vengchhung VLTF leh YMA ten a tul ang zelin lo puibawm se an ti a. Vaccine la turte hian Online Registration an tih tawh chuan Online bawka a hun tur hauh lawk (Time Schedule) chu vaccine pekna hmunah pawh lo tihsak mai nise an ti a. Veng tinten an Veng vaccine lak ni-ah an VLTF leh YMA te chu Centre puitu tur nei thei tura beisei an ni bawk.

Veng indawt-a Vaccine lak hi June 24, 2021 (Ningani) atanga kalpui tan tur a ni a, Veng indawt dan tur hi duan el a nih hnuah puanzar tur niin Vaccine la tha ber VLTF te hnenah lawm-puina hlan ni se tiin rawtna an siam bawk.

He hunah hian District Surveillance Officer, Dr. Lalhlunpuii chuan Vaccine pek mek kalpui dan leh Online Registration kalpui a ngaih dan te a sawi a. District Bawrhsap chuan mipui, hri danna la thei chin te chu mahni Veng lak hun theuh ah lak ngei tum vek turin a chah bawk.

Comments

Chhiar Hlawhte