Chhm Veng KTP in thisen pe; Vaccine lak hnuah thisen pek theih

Serchhip Chhim Veng Branch KTP te chuan nimin khan Serchhip Blood Bank-a dah turin thisen Unit 22 an pe.

Tunhnaiah Serchhip Blood Bank-a thisen dahkhawl sa a awm hman meuh loh avanga Serchhip Blood Bank leh AVBD Serchhip Branch ruahmanna siam angin nimin khan Serchhip Vengchung Pastor Bial KTP te aiawhin Serchhip Chhim Veng Branch KTP te hian thisen hi an pe a, thisen petute hi mipa 14 leh hmeichhia 8, an vaiin mi 22 an ni.

AVBD Serchhip Branch hruaitute chuan Serchhip Blood Bank-ah thisen mamawhna a sang zel tih sawiin, tunah hian thla tin thisen hi Unit 60 vel tal mamawh ang an nih thu an sawi a, amaherawh chu hri leng avanga thisen pe an tlakhniam avang leh thla khat-a tum hnih vel Donation Camp an buatsaih thin chuan mamawh a phuhruk zo ta meuhlo niin an sawi a, hei vang hian mi tlawmngai te chu thisen pe zel tura an sawm bakah tlawmngaia thisen pe te chungah lawmthu an sawi bawk a ni.

AVBD hruaitute chuan COVID-19 hri leng dona atana vaccine pek mekah mi tam tak ten thisen hi an pek loh phah nia an hriat thu an sawi a, amaherawh chu May 24, 2021 khan Mizo-ram State Blood Transfusion Council chuan thuchhuah siamin ‘Covid Vaccine la ten Vaccine dose an lak apiangin an lak zawh atanga ni 14 ralhnu ah thisen an pe leh thei ang’ a tih angin vaccine lak atanga ni 14 a ral chuan thisen hi pek leh nghal theih a nih thu an sawi a. Hei vang hian vaccine la te pawh thisen an pek theih huna pe zel tura an sawm bakah hri leng laka himna tura kaih-hruaina siam te zawm chungin thisen pek hi kalpui thin a nih thu an sawi bawk.