Latest News

Mizoram-ah hri kai 13,064 zet an awm tawh

Mizoram-ah COVID-19 hri kai hmuhchhuah an la awm belh zel a, niminpiah khan Mizoram-ah Sample 2978 enfiah niin hri kai 205 hmuh an ni.

Niminpiah khan ZMC Laboratory-ah Sample 904 enfiah niin heng atang hian hri kai 61 hmuhchhuah an ni a, an vai hian Aizawl District chhunga sample lak vek an ni a, Aizawl Saron Veng-ah hri kai 24 zet hmuhchhuah leh an ni. Mizoram District hrang hranga TrueNat Laboratory-ah niminpiah khan Sample 233 enfiah niin heng atang hian hri kai mi 8 hmuh an ni bawk a, Champhai leh Mamit District atangin hri kai mi 3 ve ve hmuh niin Lunglei District atangin hri kai mi 2 hmuh an ni bawk a, an zingah hian hri kaina hriatloh mi pakhat a awm a ni.

Rapid Antigen Test hmangin niminpiah khan Mizoram-ah Sample 1841 enfiah niin hri kai mi 136 hmuhchhuah an ni bawk a, an zinga 96 te chu Aizawl District-a hri kai hmuhchhuah niin an zinga mi 51 te chu hri kaina hriatloh leh chhui ngai an ni. Lawngtlai District-ah hri kai mi 17 hmuh niin Lunglei District-ah hri kai 16 hmu an ni a. Champhai leh Saitual District-ah hri kai 3 ve ve hmuh niin Siaha District-ah hri kaina chhui ngai mi pakhat hmuhchhuah a ni bawk.

Heti hian nimin thleng khan Mizoram-a COVID-19 hri kai hmuh tawh chu 13,064 an tling ta a, nimin khan Mizoram-a hri kai enkawl mi 214 te chu hri lakah fihlimin anmahni enkawlna hmun atanga chhuahtir an ni ve leh bawk a. Heti hian nizan dar 10:00 thlenga Mizoram-a hri kai enkawl dam chu mi 9816 niin hei hi hri kai hmuhchhuah atanga chhutin za zela 75.13 a ni a, tunah hian hri kai enkawllai 3197 an la awm mek bawk a ni.

Hri kai zingah nunna chan mi 50 aiin an tam ta :

Mizoram-a COVID-19 hri kai hmuhchhuah zingah nunna chan mi 51 zet awm tawhin nimin khan mi 5 an boral leh bawk. ZMC-a hri kai enkawllai zing ami Lalremsiama (44), Sairang chu nimin zing dar 12:30 vel khan  ZMC-ah a boral a, amah hi May 25-a COVID-19 hri kai hmuhchhuah niin May 30-ah ZMC-ah hian admit a ni a, Zunthlum nei sa a ni. Nimin zing dar 9:55 khan Anil Kumar Rai (55), CRPF, Lengpui Airport Security, Zemabawk chu COVID-19 vangin ZMC-a a boral ve leh bawk a. Nizan dar 7:10 khan K. Lalchhanhimi (69), Saron Veng Aizawl chu ZMC-ah a boral ve lehin ani hi May 23-a hri kai hmuhchhuah a ni thung.

Nizan dar 9:30 khan B. Lallawmzuali (27), Ramhlun South chu ZMC-ah a boral leh bawk a, May 19 khan hri a kai tih hmuhchhuah niin May 20-ah ZMC-ah admit a ni a, May 22 khan a naupai zaichhuah niin May 30 khan a dinhmun a hniam avangin ICU-ah dahluh a ni a, nizan khan a boral zui ta a ni. Nizan vek dar 10:20 khan Hmingthanzuala (34), Dawrpui chu ZMC-ah boral bawkin May 19-a hri kai hmuhchhuah a ni.

Comments

Chhiar Hlawhte