Kangmei venna kawnga hma la tha lawmman pahnihna Serchhip District in a dawng

Information & Public Relation Minister, Lalruatkima hovin nimin khan Mizoram College of Nursing (MCON), Falkawn-ah ‘Green Mizoram Day, 2021’ pualin hun hman a ni a, he hunah hian kangmei venna kawnga hma la tha District te hnenah lawmman hlan niin, Serchhip District chuan lawmman pahnihna a dawng a ni.

Green Mizoram Day, 2021 puala hun hman ah hian I&PR Minister chuan COVID hripui lengin Mizoram a luhchilh avangin Green Mizoram Day pualin programme lian tham buatsaih theih a ni lo tih sawiin, mahni awm hmunah theuh mahni remchan dan angin kumin-a thupui ‘Tuihna leh Boruak tha siam nan thing i phun ang u’ tih chu tihlawhtlin tum turin mipuite a sawm a. Mizoram-in kuminah ramkang leh tuihna kangchat chu kumdang aia nasa in a tuar tih pawh sawiin, heng thil thleng te hian ramngaw tihchereu pawizia, ramngaw humhalh tulzia leh thingphun uar pawimawhzia Mizoram mipuite thinlungah tuh se a duh thu a sawi a, ramngaw chereu leh tuihna kangchat venhim kawngah tan la lehzual turin mipuite a sawm nghal bawk.

Minister chuan a Department enkawl- Land Revenue & Settlement leh Rural Development te chuan EF&CC Department nen tang tlangin ramngaw humhalh leh tuihna humhalh leh siamthat kawngah theihtawp an chhuah thu a sawi a. Ramngaw leh nungcha humhalh kawnga hma kan sawn chho zel nia a hmuh thu pawh sawiin, humhalhtu leh vengtute ngaihsan nachang kan hre thar a, hei hi hmasawnna pawimawh tak nia a ngaih thu a sawi a. Kan tu leh fate chenna tlak ram kan hnutchhiah theih nan ramngaw humhalh kawngah mitinin kan ngaihtuahna kan sen mai bakah a taka hma kan lak theuh a tul hle a ni, a ti bawk.

He hunah hian kumin chhunga kangmei venna kawnga hma la tha te hnenah lawmman sem niin Mamit District chuan lawmman pakhat dawngin Serchhip District in lawmman pahnihna a dawng bawk a, Siaha District chuan lawmman pathumna an dawng bawk a ni. Serchhip District in kangmei venna kawnga hma la tha lawmman a lak hi Serchhip District aiawhin F. Lalnisai, SDC chuan a dawng a ni.