Chanchin thar thenkhat :

 Central YMA in CM-ah thlen

Central YMA Office Bearer te chuan Inrinni khan Chief Minister Zoramthanga chu a Pisa-ah hmuin June 24-a Central YMA in All Party leh NGO Joint Meeting a koh a Resolution an siam te an thlen a, tihhlawhtlin a nih ngei theihnana hma la turin an ngen bawk. Chief Minister hian All Party & NGO Joint Meeting thu chu lo enzui a tum thu a sawi nia thudawn a ni. Central YMA hruaitute hian Inrinni khan Muanna Veng-a Thutak Nunpuitu Team (TNT) Centre tlawhin tanpuina sum fai Rs. 7,94,640/- an hlan bawk a. Tunhnaia TNT-a COVID-19 kai engemaw zat an awm avangin anmahni tanpuina tur Central YMA chuan mi thahnemngai ten sum an thawhkhawm theihna tur remchang a siam a. Heta tlingkhawm hi hlan niin sum thawhtu YMA Branch, Group YMA, chhungkua leh mimal te chungah Central YMA chuan lawmthu a sawi bawk.

MLA in Lawngleng man tur pe

Mamit bialtu MLA, H. Lalzirliana chuan a bial chhunga lirthei in a tlawhpawh theihloh khua, Dilzawl chu Dapchhuah Health Sub-Centre a thawktu ten an tlawh theihna turin Dapchhuah VC te kaltlangin Lawngleng man tur Rs. 50,000 a pe. Dilzawl khua hi In 80 bawr vel awmna niin motor a la lut thei lova; Ke leh Lawngleng a kal ngai niin hriselna chungchanga tlawh ngai leh hri danna pek chungchangah thawktute’n harsatna an nei thin a, an harsatna hi Sub-Centre-a thawktu ten bialtu MLA hnena an thlen hnuah Dapchhuah khawtlang leh CMO, Mamit te nena an sawiho hnuah MLA hian a ngaihtuah sak ta a ni.

Vaccine pek mek zel a ni

Mizoram pumah COVID-19 vaccine pek hna chu ngawrh taka kalpui chhunzawm zel ala ni a, Inrinni thleng khan mi 4,91,366 te hnenah Dose 1-na pek ni tawhin mi 54,078 te chuan hri danna an lak tur (1st Dose leh 2nd Dose) an la tawh a, Inrinni khan Mizoram puma mi 9712 te hnenah Dose 1-na pek leh a ni bawk.

Khawlailung in chawhmeh pe

Serchhip District-a Khawlailung khua chuan COVID-19 hri leng avanga Containment Zone-a awm mek, Aizawl Bethlehem Veng te hnenah Inrinni khan chawhmeh chi hrang hrang an hlan a, heng chawhmeh an hlan te hi khawtlang mipui ten an thawhkhawm a ni. Chawhmeh an thawn-chhuah puala hun an hman ah Khawlailung VCP, Krosmawia chuan hun harsa tak kan tawh lai leh kan unau ten harsatna namen lo tuara ei leh bar thlenga harsatna an tawh laia a pe theitu dinhmun-a an ding chu lawmawm a tih thu a sawi a ni. Khaw-lailung khua in chawhmeh an hlan zingah hian thlai hnah leh rah chi hrang hrang bakah thei leh Kurtai te pawh a tel a ni.