Latest News

Chanchin thar thenkhat :

MIDA in thilpek an hlan

Mizoram-a Company Distributor/CNF/Super Stockiest te intelkhawmna, Mizoram Distributors’ Association (MIDA) chuan nimin khan ZMC-a COVID-19 hri kai enkawl dam, in khulchhuahna neilo te tan Rs 50,000/- hlanin Aizawl Veng 8-a Local Task Force te hnenah Rs. 75,000/- an semchhuak bawk. MIDA-ah hian member mi 700 vel awm mekin an Staff te zingah hri kai an awm a nih chuan chhawmdawlna tur pawh ruahman bawk a, hei bakah hian Gu-jarat Mizo Zirlai Pawl hnenah Rs. 20,000/- an lo pe tawh bawk a ni. MIDA hian nikum lam khan Mizoram Sawrkar ruahmanna in Supply Chain buailo turin theitawp an lo chhuah tawh tih pawh sawiin, tuna Second Wave-ah pawh hian theih-tawp an chhuah leh mek thu an sawi bawk.


Lunglei-a ram kanna tlawh

Kumin-a Mizoram hmun hrang hranga kang-mei chhuak chhuichiang tur leh hemi kaihhnawih a dan dinglai awm mek te zirchiang a, a tul anga hmalak dan tur rawtna siam tura Mizoram sawrkar in a ruat State Level Special Investigation Team (SIT) on Fire Outbreak te chuan nimin khan Lunglei an tlawh a, kangmei tuar nasa ber Zotlang VC area tlawh hmasa berin hemi hnu hian Chanmari leh a chhehvel tlawhin District thuneitute nen inkawmna an nei nghal bawk a ni.


MNF in thawhpui ah sawm

MNF Party chuan tunlai hian Telecom Service Provider hrang hrangte hrui thlun (Optical Fibre Cable) tihchhiat leh tihbun a hluar hle tih hriat a ni tih thuchhuah siama tarlangin, hei vang hian Internet tha tawklo a awm thin tih an sawi a. ICT Department chuan theihtawpin mipuite'n Internet tha kan neih theihna turin an bei mek zel tih pawh sawiin, kan ram chhung lam leh pawn lam atanga thil thalo thleng thin avanga mipui leh sawrkar a buaina thin tam tak hi mi awm tha duhlo tlemte-te vang a ni fo thin tih an sawi a, hemi ven kawnga thawhpui ah Zoram mipuite an sawm bawk.


Pu Ziona vuina nei dawn

Pathianni kalta tlai dar 3:00-a Doctor ten a boral thu an puan Lalruat Chhuanthar te hruaitu Zionnghaka (Pu Ziona tia hriat) chu Vawiin chawhma dar 10:45 hian Chhuanthar Run, Chhuanthar Tlangnuam-ah vui a ni dawn ta. Pu Ziona hi kum 76-a upa niin a ruang hi Chhuanthar Tlangnuam-a ‘Hmun Thianghlim’ an tih ah zalh tur niin Thlan khur-ah phum lovin Thlan In sak-ah an zalh dawn nia thudawn a ni. Pu Ziona hi khawvel-a chhungkaw lian ber dintu a ni.

Comments

Chhiar Hlawhte