Lenkawl

India hmarchhak State 8-a tun thla (November) chhunga neih tura ruahman Northeast Yatra for Lifestyle (Life) chu kar hmasa lamah Mizoram tana a hawnna hun hman a nih hnuin Serchhip District-ah pawh kalpui mek a ni a. He Yatra neih chhung hian mipuite hnenah tam zawk leh zau zawkin ‘environment’ humhalh leh venhim pawi-mawh zia zirtirna pek tura ruahman niin tunah hian In tin-a lut lawrin hemi chungchang inzirtirna neih a nih bakah thuziak te sem a ni a. Vawiin hian North Vanlaiphai-ah Mass Rally neiin hman khat daih Plastic thenfai hnatlang neih nghal a ni anga, naktuk-ah Govt. Serchhip College-ah hemi chungchang inzirtirna hi neih leh a ni ang.

Serchhip District chhunga National Highway-54 laihzauh leh siamthat hna kal meka zangna-dawmna la tawh, mahni In leh lo la thiat lo te chu an In leh lo te thiata senghawi tura hriattir an nih leh hnuah Vawiin hian Magistrate hovin an hmunah tlawh leh an ni dawn a, he hunah hian Dan leh thupek kengkawhtu Police lam pawh kalin zangnadawmna la tawh, mahni In leh lo la senghawi lo te chungah hian Dan angin hmalak tum a ni dawn a. Vawiin hian Chhingchhip-ah a bul tanna atan hmalak tum a ni ang.

Serchhip District Volleyball Association buat-saih ‘Serchhip District Volleyball Championship 2023’ chu nimin khan Serchhip Vengchung Volleyball Court-ah khelh tan niin tunkar Zirtawpni khian Final khela zawhfel a ni ang.

Mizoram Assembly Inthlanpui-a Vote tla te chhiar tura Serchhip District-a inbuatsaihna kal mekah nimin khan Election Commission of India in ruahmanna a siam angin Vote tla te chhiar chhinna,  'Full dress rehearsal' chu Encore portal hmangin neih a ni a, Serchhip DC Conference Hall leh DC Meeting Hall-a he hun hmanna ah hian Serchhip District chhung Assembly Bial pathum-a Returning Officer ten an bial chan chhunga Polling Station tina vote tla chhiar dan tur te, EVM leh Postal Ballot buaipui dan turte an tichhin a, Electronically Transmitted Postal Ballots (ETPBS)  hmanga service vote tlate chhiar dan tur tih chhin a ni bawk.

New Delhi-a cham mek Mizo Zirlai Pawl (MZP) General Hqrs. President H Lalthianghlima chuan nimin khan Union Minister of State for Minority Affairs John Barla chu a chenna ah hmuin Mizo zirlaite tana thil pawimawh hrang hrang a thlen.

Kolasib Vengthar Branch YMA chuan nimin khan an huamchhunga hmeithai pakhat chenna In tur hnatlang in an sak sak a, In an sak sak hi enkawltu nei lo, chhungkhat laina hnai pawh nei lo niin, tunhnai khan sawrkar laipui Scheme kaltlanga Insak tanpuina, Housing for All a dawng a. YMA te hnenah In sak sak tura ngenin Kolasib Vengthar YMA te hian hemi ang hian In hi an sak sak a. In sakna tur hmunhma a neih loh avangin tuna a chen mekna neitu R Pakunga, Kolasib Venglai te chuan a damchhunga a awm an phalsak thu an hrilh angin helai hmunah hian In hi an sa ta a ni.

 Rikrum thli a thlen thulha tanpuitu kohna, State Emergency Response Center hotute chuan kum 2019-a an din hnuah tangkai taka hmang awm bawk mah se mipui ten State Emergency Response Center chu an la hre tawk lo nia an hriat thu an sawi a, a biakpawh theihna number 112 chu mipuiin chhinchhiah a, tangkai taka hmang tura chahin, mi thenkhat fiamthuna atan 112 chu Call ching an awm an awm thu leh hetiang hi ti tawh lo se an duh thu an sawi a. Phone signal awm lohna hmuna harsatna tawh thulhah pawh 112 hi call theih reng tih an sawi bawk.

Tun thla ni 7-a Mizoram Assembly inthlanpui vote thlak ni-a Lawngtlai East bial, Pang khuaa vote thlaktu kum 115 vel nia sawi Famiangi chu Lawngtlai District Election Officer (DEO) Joseph H.Lalramsanga chuan Ngaihhlutna thuziak leh Rs. 2000/- a hlan a, Lawngtlai DEO aiawhin Pangkhua Booth Level Officer K. Lianhrangvela chuan chawimawina hi a hlan a ni.

Union Health Ministry-in tunhnaia ram thenawm China hmar lama naupang zinga thawkna lama harsatna nei an pun chhoh avanga State leh UT te chu vantlang mipui hriselna leh damdawi lama an inbuatsaih dante ennawn nghal tura a tih angin Mizoram sawrkar-a Health Department hotute chuan Mizoram dinhmun chu uluk taka thlithlai nghal a nih thu an sawi a, hetihrual hian hrileng hian India ala thlen loh avangin mipui tan chi-aina tur a awm lo a, hriattirna hi engemaw thulh a inralring tura tihna mai a nih thu leh sawrkar laipui atangin inkaihhruaina pawh engmah siam la ni lo mah se, an thurawn anga hmalak a nih thu an sawi.

Aizawl West-II Bialtu MLA Lalruatkima chuan Mizo mipate'n chak lo zawka kan ngaih hmeichhiate atangin kawng hrang hrangin zir tur kan ngah tih a sawi.

Sairang Joint MHIP hruaitute chu nimin khan Bairabi-ah kalin Bairabi South VC leh MHIP ten lo dawngsawngin Zero Point Bazar Shed-ah an inkawm a, Sairang Joint MHIP hruaitute chuan Sairang-ah Rel a luh dawn hnaih tawh avangin lo inven dan tur leh lo inruahman lawk tula an hriat avangin Bairabi lam lo inven dan te zirchiang tura Bairabi-a kal an nih thu an sawi a. Bairabi South VC leh MHIP hruaitute hian Bairabi lo inven dan leh tun thlenga hmalakna kalpui reng a nih dan tlangpui hrilhin, inven dan leh in ruahman dan ah sawi lawk vek theih a nih loh thu leh tawnchawp thil harsatna hrang hrang a awm thu te an sawi bawk a. Bairabi leh Sairang in harsatna emaw, ram leh hnam humhalha inven dan turah an pawimawhna chen a in an kher loh tur thu te bakah, Bairabi aia inven a theihtawpa lungrual taka tanho reng a tul dawn thute an hrilh bawk.

Bairabi leh Sairang inkar Rel kawng siam mek chu harsatna hrang hrang avangin kumin ah zawh hman a ni dawn lo a, nakum (2024) October thla khian zawhfel vek tum a ni.

Thla thar December ni 11 atanga ni 16 inkara Winter Festival ropui taka nei turin inbuatsaihna kalpui mek a ni.

Mizoram State Assembly inthlanpuia vote tla te chhiar turin District tinah inbuatsaihna kalpui mek a ni a; Election Commission of India (ECI)-in ruahmanna a siam ang chuan thla thar December ni 3 khian mi 4000 chuang ten zing dar 8:00 atangin District khawpui tinah Vote tla hi an chhiar dawn a ni.

Inrinni khan Serchhip District Hospital Blood Bank-ah pawl pahnih ten damlo te hman turin a thlawnin thisen Unit 20 an pe a, Serchhip Chan-mari Branch YMA hnuaia Taitesena Section chuan thisen Unit 8 pein mipa 6 leh hmeichhia pahnih an ni a. Govt. Serchhip College NCC te pawhin thisen Unit 12 pein mipa 5 leh hmei-chhia 7 an ni bawk.

Zirtawpni kalta zan atanga Serchhip Area Baptist Council (ABC) Inkhawmpui vawi 27-na neih chu nizan khan a tiak ta.

Roman Catholic Kohhran chuan nimin, November thla a Pathianni hnuhnung ber kha ‘Krista Lalber Kut ni’ ah hmangin he ni hi Lalpa chawi-mawina leh fakna thu leh hla puanga kawngzawhna hunah an hmang thin a. Kumin hian Aizawl Diocess hnuaia Parish Bial hrang hrangah he ni pual hian hun hman niin Serchhip Parish chuan chawhma lamah mahni Biak In theuha hun an hman hnuah nimin chhun khan IOC Veng atanga Serchhp P&E Veng-a Assumption Church thlengin kawng zawhin hun an hmang a, Assumption Church-ah hian Benediction-in kawngzawh kharna an nei a, Kohhran member thahnem tak an tel a ni.

India ram Danpui pawm ni, Constitution Day chu nimin Nov. 26, 2023 khan rampum-ah hman a ni. Constitution Day hi kumtin November 26-ah hman thin niin he ni hi November 26, 1949-a Constituent Assembly in India ram Danpui a pawm ni hriatrengna atana hman thin a ni a, hemi hnu January 26, 1950 khan India Danpui hi a taka hman tan a ni. Sawrkar laipui chuan kum 2015 atang khan Hnam Dan leh kalphung tih zahawm nan leh hmasawn zelna atan kumtin November 26 hi ‘Constitution Day’ atan a puang a ni.

Mizoram-ah kum 2020-21 aiin kum 2021-22 ah Mobile Phone a tlem zawk. Economics & Statistics Department in tunhnaia a tihchhuah thar 'Statistical Handbook Mizoram 2022' a tarlan a nih danin kum 2020-2021 khan Mizoram-ah Mobile Phone 1,004,513 a awm a. Kum 2021-2022 ah chuan 865,375 awmin kum hmasa lam aia nikuma Mobile Phone tlemna hi 139,138 zet a tling a ni. 

Mizoram Assembly Inthlanpui Vote tla te chhiar hun atana December 3 (Pathianni) ruat sawn a nih theihna tura Election Commission of India (ECI) dawr tura New Delhi-a kal NGO Coordination Committee hruaitute chu naktuk, Nov. 28, 2023 tlai dar 3:00-ah Chief Election Commissioner (CEC) leh Election Commssioner dang te hmuh theihna hun siam sak an ni a. He hunah hian NGOCC hruaitute chuan an thilphut te an thlen dawn a ni.

Aizawl (Mizoram) leh Lamka (Manipur) inkara Helicopter Service chu mipui ten an chhawr tangklai mek a, Helicopter pakhat chauh a service avangin mipui ten an inchan lo hle ni thudawn a ni. Zawhna chhanga General Administration Department hnuaia Civil Aviation Wing hotute chuan Aizawl leh Lamka inkarah hian sawrkar laipui ruahmanna in Helicopter service tir a ni a, hei hi Manipur-a Zohnahthlak ten an chhawr tangkai hle a, helicopter hi tum khata mi 10 phur thei chauh a nih avangin indaihlohna a nasat avangin ticket lak lawk pawh an rem ti lo tih an sawi. Civil Aviation Wing hotute chuan, Mizoram chhunga Helicopter service pawh mipui ten an inchan lo hle tih an sawi a, tun dinhmunah pakhat chauh thlawhtir a ni a, ni tin hmun 3 ah thlawh tir a ni a, hmun 15 regular taka thlawhtir an nih thu leh Cham-phai chu passenger tamna ber a nih thu an sawi.

Lunglei leh Tlabung inkar National Highway-302 laihzauh hna thawh meka zangnadawmna an dawn zat-a lungawi lo te zualkona chhan chu a hmunah enfiah a ni.

Kum 2019 atanga kumin 2023 thlengin Mizoram-ah pawisa lem (Fake Indian Currency Note/FICN) Rs. 1,69,14,100 hu man a ni tawh a, pawisa lem man hnem ber chu Rs. 500 note a ni.

Mizoram sawrkar a Taxation Department chuan kumin April atang October (thla sarih) chhungin mipuite atangin Chhiah chi hrang hrang Rs. 6,71,11,29,777 an hmu tling tawh a, hei hi sawrkar kum kal mek 2023-24 a chhiah hmuh beisei zat (target) cheng Vbc. 1,084.29 atangin zaa 61.89% a ni.

Kumin (2023) chhungin Mizoram-ah ruihhlo vangin mi 67 an thi tawh nia chhinchhiah a ni a, kum 18 kalta chhunga ruihhlo thihpui tam ber kum thleng thei dinhmun ah kan ding mek a ni.

Tunhnai khan Director General of Health Services, Ministry of Health and Family Welfare Prof. (Dr.) Atul Goel chuan State leh UT hrang hranga National Health Mission-a Mission Director-te hnenah lehkha thawnin China-ah naupang lam thawk harsatna siamtu natna vei an tam thu sawrkarin a hriat thu a sawi a. Chi-aina tur a awm lo chungin hetiang lam hi uluk taka zirchian nise tiin State tina IDSP te’n thil awmdan vil ngun a, damdawi In-a khum leh inenkawlna lam pawh thlithlai reng nise a ti bawk.

Sawrkar kum liam ta 2022-23 chhung khan Mizoram-ah nausen kum khat hnuailam thi 363 awmin nu nau chunga thi (Raicheh) mi 18 an awm bawk a. Sawrkar laipui atanga record tihchhuah thar berah chuan nausen thi zat tehnaah Mizoram dinhmun a tha ber a ni.

Mizoram boruak chu a bawlhhlawk chak hle a. Boruak bawlhhlawh leh bawlhhlawh lo tehna, Air Quality Index-ah a san lai berin 216 a thleng a, hei hi fimkhur ngai tak, rei tak hip luha thawk tiharsa thei a ni.

Tunhnai lawka Myanmar Chin State chhimlam Lailenpi khaw chhehvel Myanmar Indo Thlawhna te'n an bomb leh avangin Siaha District-ah raltlan 298 an rawn luh belh.

Mamit District-a Nalzawl khua chu Mizoram-a Oil Palm tharchhuak tam ber khua nia hriat an ni a, Mizoram in kum khat-a Oil Palm a tharchhuah za zela 20 vel chu he khua atanga tharchhuah niin Mizoram mai bakah India hmarchhak-a khaw mal-a Oil Palm tharchhuak hnem ber nia hriat an ni bawk.

Mizoram Baptist Kohhran-a Rorelna sang ber dawttu, Area Baptist Council (ABC) Rorel leh Inkhawmpui chu nizan atang khan Mizoram hmun hrang hrangah ABC 17-ah neih tan a ni a, Vawiin hian ABC Rorelna neiin ABC Executive Committee thute bakah Pastor Bial atanga Agenda lut te, ABC kaltlanga Assembly 2024-a thlen tura chhawpchhuah te ngaihtuah a ni anga. Naktuk Chawhma Inkhawm-ah Kohhran Upa Nemngheh Inkhawm (Ordination Service) neih tur niin kuminah hian BCM pumpui-ah Kohhran Upa atan mi 206 nemngheh tur an awm a, Chawhnu lamah Lalpa zanriah (Sacament) kilho a ni ang.

Assembly Inthlanpui a Vote tla te chhiar tura inbuatsaihna kal mekah nimin khan Serchhip District-a Counting Agent te tan Brilliant Higher Secondary School, New Serchhip-ah Training buatsaih a ni a, East Lungdar BDO Albert Vanlalruata, ARO ni bawk chuan vote chhiar dan tur leh Counting Agents te mawhphurhna chi hrang hrang a zirtir a. Zawhna leh chhanna hun hman niin Master Trainer leh Settlement Officer Gaston Vanlalhriatpuia chuan zawhna te chhangin a hrilh-fiah bawk a ni. Assembly Inthlanpui-a Vote tla te chhiarna turah hian Candidate tin te hian an aiawha Vote chhiarna hmuna awm tur, Counting Agent hi an ruat thei a, Vote tla chhiarna tur hian Dawhkan 8 zel a awm dawn avangin Candidate tin te hian Dawhkan tina awm tur hi an ruat thei a, nimin-a Training-ah hian Serchhip District chhunga Assembly Constituency pathum atangin Political party hrang hrang aiawh mi 78 an tel a ni.

PWD Serchhip Division-a hotute chuan an Division huamchhungah inkalpawhna kawngpui enkawllai KM 365.81-a thui an neih mek thu sawiin, heng zinga KM 337.967 te chu Blacktop tawh a ni tih an sawi a. PMSGY-III hnuaiah Khawlailung leh Hmunzawl inkar kawngpui chu Blacktop tura ruahman mek a nih thu an sawi bawk.

Mizoram Assembly Inthlanpui a Vote tla te Serchhip District-a chhiar tura inbuatsaihna kal mekah niminpiah tlai khan Counting Official 1st Randomization neih a ni a, tarlan tawh angin Serchhip District-a Vote tla te chhiar tur hian Counting Assistant-ah mi 45, Counting Supervisor-ah mi 35 leh Micro Observer atan mi 41 ruatchhuah an ni a. Heng atang hian EVM leh Postal Ballot chhiar tura Table tina Duty tur bakah thlaveng tur za zela 20 chu thlanchhuah niin Counting Assistant-ah mi 42, Counting Supervisor-ah mi 34 leh Micro Observer-ah mi 41 thlan an ni a. Thla thar December 2-ah Second Randomization nei lehin hetah hian an Duty-na tur Constituency thlan leh tur a ni dawn a. Vote chhiar ni tur December 3, 2023 zing dar 5:00-ah 3rd Randomization nei lehin hetah hian an thutna tur Dawhkan thlanfel leh a ni dawn a ni. Serchhip District chhunga Assembly Bial pathum tana Counting Hall hran theuh siamah EVM-a Vote tla te chhiarna turin Dawhkan pariat (8) theuh dahin heng ah hian Counting As

Presbyterian Kohhran chuan nimin, November thla a Zirtawpni hnuhnung ber kha ‘Kohhran Hmeichhe Ni’ atan hmangin Kohhran hrang hrang ten he ni hi urhsun takin an hmang a ni.

Mizoram Assembly Inthlanpui Vote chhiar hun tura ruat lawk sawn a nih theihna tura Election Commission of India dawr tura New Delhi a kal NGO Coordination Committee hruaitute chu nimin khan ECI Office-ah kal mah se  ECI hotute an hmu thei lo a, Vawiin hian ECI hotute hmuh tumin an kal leh dawn nia thudawn a ni.

Mizoram Pradesh Congress Political Affairs Committee (PAC) nimin-a thukhawm chuan Mizoram Assembly Inthlanpui neih zawh tak thlirletin Mizoram mipuite chuan India secularism humhim an duh zia an tilang chiang hle ah an ngai tih sawiin, Mizoram State chuan BJP leh an thawhpui te an duhlohzia an lantir chiang hle ah an ngai tih an sawi a. Congress leh INDIA Alliance chuan Secularism leh remna leh muanna humhim a nih zel nan BJP te chu an do zui zel dawn tih pawh sawiin, BJP te nena thawh-hona nei party te chuan Mizoram mipui te kalhin chet an la ah an ngai tih an sawi bawk.

MNF Party chuan nimin khan Aizawl-a Mizo Hnam Run-ah Chhung Inkhawm neiin he hunah hian MNF President Zoramthanga chuan ‘Nang malsawmna ni ang che’ tih chu MNF chuan thuthlunga an hman mek a nih thu a sawi a. Party dang te angin Vawiin-ah rinthu maia bial tina tling leh tlinglo tur lo sawi rawtui vak vak chuan awmzia a neih loh thu pawh sawiin, Vote a tla fel vek tawh a, engkim titheitu Pathian hnenah erawh tawngtai chuan awmzia a neih thu a sawi bawk.

BJP Mizoram chuan nimin khan Aizawl-a an Party Office-ah Friday Political Session neiin he hun thu sawitu MLA hlui Dr. K. Beichhua chuan kum 2023 MLA Election kan neih ah BJP tel ngei ngeina Sawrkar a piang ngei dawn niin a sawi a. “Party dang chu Sawrkar chakin an tuihal a, mahni-a Sawrkar turin an in ngai theuh a, nimahsela Neutral leh Intellectual lam te erawh chuan, a mala Sawrkarna siam an awm an rin loh thu an sawi bawk a, chuvangin keini chu a mala Sawrkarna siam thei ni lo mah ila Mizorama Sawrkar thar lo piang turah erawh kan tel ngei a rinawm a ni,” a ti bawk.

Hemophlia Society, Aizawl Chapter leh Intas Foundation te tangkawp buatsaihin nimin Nov. 24, 2023 khan Civil Hospital Aizawl Conference Room-ah Hemophilia Patient Assistance Program hman a ni a. Hemophila hi natna vang tak niin thisen tikhaltu an tlakchham avangin ngaihven ran an ngai hle a. Tunah hian Aizawl Chapter hnuaiah Hemophilia natna nei mi 27 an awm mek a, he natna nei tan hian Aizawl Chapter hian a thlawnin Hemophilia Federation of India atangin damdawi a dawng thin a ni. Nimin-a he hun an hman hi Civil Hospital Aizawl-a Senior Medical Superintendent Dr. Zoramthanga chuan khual-lian nia hmanpuiin he natna chungchang leh hriat tur pawimawh hrang hrang zirho a ni.

Mizoram Cooperative Apex Bank Ltd. in mipuite hman theih tura Rupay Platinum Debit Card an siam chu nimin khan Apex Bank Chairman Lalnunsanga chuan a tlangzarh a, he Card hian hamthatna chi hrang hrang a keng tel a. Rupay Debit Card pangngai aiin nikhata ATM atanga lakchhuah theih zat a tam zawk a, POS/Online Transaction atan pawh a hman theih chin a sang zawk dawn a ni. Heng bakah hian Life & Accidental Insurance a kengtel a, India ram Airport hrang hrangah Airport Lounge Access a keng tel a, Amazon-Pay hmang tan za zela 20 thleng discount a keng tel bawk ni. He Card hmang duh tan Apex Bank Branch hrang hrangah a dil theih a ni a. Hemi rual hian Sumdawng leh mimal tan pawha hman theih turin QR code Generation a tlangzarh tel bawk a ni.

Mizoram Assembly Inthlanpui-a Duty tura rawn kal Assam Police Constable pakhat bo ta chungchang ngaihvenin Assam Police IGP Akhilesh Kumar Singh chuan Mizoram a rawn tlawh.

India hmarchhak State pariat-a November thla chhunga neih tur Northeast Yatra for Lifestyle (Life) hawnna chu nimin khan MPCB Conference Hall, Aizawl-ah neih a ni.

Mizoram Assembly Inthlanpui-a Vote tla te chhiar huna Chanchinthar lakhawmtute hriat tur pawimawh hrang hrang sawihona chu nimin khan neih a ni.

Mizoram Legislative Assembly Inthlanpui neiha Serchhip District chhung Bial pathum a Vote tla te December 3, 2023 zing dar 8:00 atanga chhiar tura ruahmanna siam mek zel niin nimin khan Vote tla chhiar turte tan hian Training neih a ni.

National Highway-54 laihzauh leh siamthat hna Serchhip District-a thawh mekah zangnadawmna la tawh zinga mahni In leh lo la thiat lo te chu karleh kartir lam atang khian an In leh lo te thiah sak tum an ni a. Hetianga In leh lo la thiat lo te hi IPC Section 188 hmangin thubuai siamsak an ni bawk ang.

Baptist Church of Mizoram (BCM) Rorelna sang ber dawttu, Area Baptist Council (ABC) Inkhawmpui chu tun Pathianni lo awm tur hmangn hian neih a ni dawn a, Serchhip Area Baptist Council Inkhawmpui vawi 27-na chu BCM Biak In New Serchhip-ah zanin atang hian neih a ni ang. Serchhip ABC Inkhawmpui-ah hian ‘Tho la, I Pathian ko rawh’ (Jona 1:6) chu thupui ah hman a ni dawn a, zanin hian Pathian biak inkhawm neiin naktuk-ah BCM Biak In, Maranatha (IOC Veng)-ah ABC Rorel neih a ni ang.

National Highway-54 laihzauh leh siamthat hna thawh meka Serchhip District chhunga ram lak sak, zangnadawmna la pek loh te chu pek tan mek an ni a, tarlan tawh angin NH. 54 in Serchhip a helna turah hian zangnadawmna la pek fel loh mi 19 leh Chhiahtlang a helna turah mi pakhat awmin heng mi te tan hian tun thla ni 3 khan cheng vbc. 162 chu hmuh a lo ni tawh a. Hei hi buaipui ngai ang ang te buaipui a nih hnuah lehkha tihfel tawh te chu Bank-ah sum pechhuak tura tih ni tawhin chawlhkar khat chhunga pe hman tura beisei a ni a. Heng bakah hian by-pass road ni lo hmundang a zangnadawmna la pek loh mi 70 te tan pawh tun thla tir lam khan cheng vbc. 4.4 hmuh ni tawhin heng te pawh hi lehkha tifel tawh te chu Vawiin hian Bank lamah thehluh fel vek hman tura beisei a ni bawk.

Mizoram Public Service Commission (MPSC) chuan Mizoram Civil Services (Combined Competitive) Main Examination, 2023 chu nimin khan tichhuakin thla thar December 8 atanga 15 chhungin Personal Interview neih a ni ang.

Nizan hmasa khan Lawngtlai leh Siaha inkar Tuipui ferry-ah mi 5 chuanna lawng chesualin an zinga mi pakhat chu tui-ah a tlahlum a, nimin khan a ruang hmuh a ni. Thudawn danin nizan hmasa khan Chhimtuipui lui kam, Tuipui Ferry-a cheng mi 5 te chuanna Lawng hi Lei hlui ban a sut avanga chesualin Lawng-a chuang hnamdang mi pathum leh Mizo pahnih te chu tui-ah an tla a, Mizo leh hnamdang pahnih ve ve te hi him taka chhanchhuah an nih laiin hnamdang pakhat, Nayaj Uddin (22) chu chhan hman a ni lo a, nimin chawhnu lam khan  an chetsualna bulah Lawng chesual hian Lei hlui banah a lo nek bet chu hmuh a ni. Thudawn danin he Lawng-a chuang hnamdang te hi unau vek niin an pa a boral avanga Karimganj lama haw tum nia sawn an ni.

Hnahthial-a Health Department thawktute chuan tunlai hian Hnahthial hmun lun laiah thuin kum 30 chin chunglam te hriselna dinhmun a thlawna endik sakna, Non-Communicable Diseases (NCD) checking an nei thin a. Thawktue hian khawlai a kalte chu a remchan angin an thisen a san leh san loh, Zunthlum an neih leh neih loh bakah Ka chhung leh Hnute Cancer an neih leh neih loh te an endik sak thin a ni.

Lunglei Sub-Hqrs. YMA chuan nimin khan an kum 50 tlinna, Golden Jubilee lawmna hun Lunglei Convention Centre-ah hmangin Central YMA Vice President Prof. Lalnuntluanga chuan khuallian niin a hmanpui a, YMA-ah mitin, Kohhran, pawl zawng zawng leh Party zawng zawng an leng vek tih sawiin, huap zo pawl a nihna chhawmnun a ni zel em tih ngaihtuah turin YMA hruaitu kalkhawmte chu a chah bawk.

New Delhi-a cham mek Sports Minister Robert Romawia Royte hnenah Aizawl Multipurpose Hall sakna tur cheng nuai 450 sanction order chu niminpiah khan Ministry of Youth Affairs & Sports hotuten an hlan a, he Hall hi Volleyball leh sports discipline dangte pawh khelh theihna tura ruahman niin, Durtlang North khawtlang in MSSC kuta ram an pekah sak tum a ni. Sports Minister Robert Romawia Royte chuan Indoor Hall indaihlohna avangin State Level Competition duh anga neih theih a ni lo fo tih sawiin, an lo ruahman anga Hall thar thalaite tana sanction a ni leh ta chu a lawmawm a tih thu a sawi a, he Hall hi Khelo India Scheme atanga funding dawn a nih thu a sawi bawk. Dan dinglai angin he project atang hian Mizoram Sawrkarin GST leh Labour cess cheng nuai 40 chuang a chang dawn a ni.

School of Nursing Thingdawl (SONT), Ko-lasib chuan nimin khan an School Auditorium-ah General Nursing & Midwifery (GNM) 7th Batch zirlaite lukhum khumtirna leh khawnvar chhi-a thutiam lakna hun (Capping and Lamp Lighting Ceremony) hmangin SONT 4th Batch zirchhuak te Certificate hlanna hun (Graduation Ceremony) an buatsaih a. He hun hi Mizoram Sawrkara Health & Family Welfare Department Principal Director, Directorate of Nursing Director ni bawk Dr. Vanlalsawma chuan hmanpuiin Damlo enkawltu te'n damlote tana an tih theih sang ber chu tawngka leh chetziaa hmangaihna lantir a nih thu a sawi.

Ministry of Health & Family Welfare, Central TB Division atanga Joint Supportive Supervisory Mission lokal te leh Mizoram State-a TB lam buaipuitute chuan nimin khan Aizawl-a DHS Conference Hall (Old building)-ah inkawmna an nei.

Mizoram-ah Sangha Dil 16,587 a awm mek a, Sangha Dil zawng zawng belhkhawm zau zawng hi Hectare 5527.08 a ni a, hei hi Sqkm 55.27-a zau ang a ni.

Mara Autonomous District Council (MADC) Thlasik thutkhawm nikhat awh chu nimin khan MADC Session Hall, Siaha-ah tluang taka neih a ni.

Mizoram Secretariat Service Association (MSSA) General Conference vawi 18-na chu nimin khan Tourist Lodge, Chaltlang-ah neih a ni a, Chief Secretary Dr. Renu Sharma IAS chuan khuallian niin a hmanpui a ni.

Mizoram Chief Electoral Officer (CEO) Madhup Vyas IAS chuan Mizoram Assembly Inthlanpui-a Vote tla te chhiar tura inbuatsaihna kal mekah nimin khan Mizoram chhung District 11-a District Election Officer (DEO) te chu inpuahchahna an kalpui tawh dan leh hmachhawp an neih te Video Conference kaltlangin a sawipui.

Lengpui Airport-a Indigo Airlines-a Executive Security hna thawk hmeichhe pakhat chu Crystal Meth tam tham tak manna ah leh .22 silaimu man chhuah kawnga a thawh hlawk avangin Mizoram Police te chuan chawimawina an hlan.

Serchhip District Bawrhsap leh NH. 54 laihzauh leh siamthat hna thawh mekah Competent Authority for Land Acquisition (CALA) David Lalthantluanga chuan nimin khan NHIDCL te hmalak dan enfiahin, zangnadawmna dawng tawh zingah In leh lo la thiat lo te chu an thiah loh chhan te a hmunah tlawhin a endik bawk.

PWD Serchhip Division chuan sawrkar kum kal mek 2023-2024 ah Maintenance Action Plan atanga cheng nuai 54 an hmuh hmangin hmun hrang hrang 6-ah kawngpui siamthat hna an thawk tawh.

India Skills Competition 2023 leh World Skill Competition 2024 a tel duh te tan registration tih theih a nih thu sawrkar thuchhuah chuan tarlangin, Skill India Digital platform kaltlanga in register tur a ni a. www.skillindiadigital.gov kaltlangin emaw, LESDE Office, Skill Wing, Earth day road, MINECO, Aizawl-ah emaw registration hi tih theih a ni. Hemi chungchanga zawhna nei te tan phone number 9856735845/9612883303-ah te biak pawh theih niin Registration hi November ni 30, 2023 thleng hawn a ni.

Serchhip District-a awm Thenzawl East Handloom Society chuan tunkar Thawhtanni atang khan Khawzawl Vengthar-a MUP Run-ah Handloom Exhibition buatsaihin nimin khan zawhfel a ni a, he Handloom Exhibition-ah hian Mizo puan leh thuam chi hrang hrang a duh apiangte lei theih tura phochhuah niin Thenzawl East Handloom Society Member te hian cheng nuai thum man vel an hralhchhuak niin an sawi a ni. Thenzawl East Handloom Society-ah hian Member 20 vel awm mekin khaw hrang hrangah an puantah te zuarin an kal chhuak thin a, Khawzawl-a Handloom Exhibition an neih hma hian Champhai-ah pawh an lo nei tawh a ni.

Assembly Inthlanpui-a Serchhip District chhung Assembly Bial pathum-a Vote tla te chhiar tura inbuatsaihna kal mekah Vawiin hian Vote chhiar tura ruat te tan Brilliant HSS-ah Training buatsaih a ni dawn a, Tarlan tawh angin Serchhip District chhunga Assembly Bial pathum tan hian Counting Hall hran theuh siamin Counting Hall tinah hian Dawhkan 8 zel dah a ni dawn a, Dawh-kan tinah hian Counting Supervisor leh Counting Assistant te bakah Vote chhiar enpui tura ruat, Micro Observer pakhat theuh an awm dawn a. Naktuk-ah 1st Randomization neiin thlaveng tur thlanchhuah leh an ni dawn a ni.

Nimin khan Khawzawl-ah District Bawrhsap K. Lalrohlua hovin dan phal loha ruihhlo leh thil dang tawlh tihtawp a nih theih nan Sumo (Maxi cab) Counter-a CCTV vuah chungchang leh thil thawn dan chungchang chu Maxi Cab neitute leh Counter neitute nen sawiho a ni a. Maxi Cab Counter te chu November ni 27, 2023 (Thawh-tanni) atangin thil thawntu leh dawngtu tur te nihna bakah thawnna motor neitu leh khalhtute nihna kimchang tak chu format duan sa hmanga chhinchhiah turin tih an ni a. Sumo/Maxi Cab-a thil thawn tur reng rengin Counter kaltlangin thawn vek tawh tur niin Khawzawl Tuisenphai-ah thil thawn te hi a khat tawkin Police ten Sumo Counter te chhinchhiah nen a inmil em tih cross-checking an nei thin dawn bawk a ni.

Nimin Nov. 22, 2023 chawhma dar 10:00 vel khan Bairabi leh Sairang inkar Rel kawng siam mek-a Kawnpui Rel Station tur bulah lei a min a, hnathawktu pahnihin nunna an chan a ni. Thudawn danin Kawnpui Rel Station tur bula hnathawh mekah hian khawl (Hitachi) hmanga hnathawh niin laih rem ngai deuh te chu mihring tha hmanga laih a ni a, hetihlai hian lei hi min thutin Railways Ministry hnuaia RL Construction Pvt. Ltd. hnathawk mi pahnih Dipak Datta (27) leh Durga Prasad Passi (53), Machak, VTC Mosaka, Nagoan District, Assam-te chhilhin, an nunna an chan phah a ni. Vanduaina thlenga boral mi pahnih te ruang hi Kawnpui Damdawi In-ah postmortem niin an khaw lamah an ruang hi lak a ni.

Mizoram Assembly Inthlanpui neih meka Kolasib District chhung Assembly Bial pathum a Vote tla te chhiartu tura ruat, Counting Supervisor leh Counting Assistant te bakah Vote chhiar enpui tura ruat, Micro Observer-te tan nimin khan Training buatsaih a ni a, Bial tin tan Counting Hall pakhat theuh siamin Dawhkan 10 zel dah tura ruahmanna siam a ni.

Nimin khan Aizawl-ah District Bawrhsap Nazuk Kumar IAS hovin ruihhlo do chungchang a hmalakna chi khat, Nasha Mukt Bharat Abhiyaan, Aizawl District hnuaia Sub-Committee on Drug Prevention in Schools and Colleges chu an thu-khawm a, an hmalakna leh hmachhawp te thlirin ruahmanna sawiho zingah College zirlaite atangin Master Volunteer te ruata, training pek an nih hnuah an rualpui thalai/zirlaite zingah ruihhlo thatloh zia leh a invenna te an zirtir dan tur te sawiho a ni a. College hrang hrangah hian zirtirtute kaihhruaina hnuaiah Anti-Drug Club te din tha an ti bawk. Kum kalta lamah Nasha Mukt Bharat Abhiyaan hmalakna in Master Volunteer te kaltlangin zirlaite zingah ruihhlo chungchang zirtirna hi pek a lo ni tawh bawk a ni.

Mizoram Rajya Sabha MP K. Vanlalvena leh Human Resources Development Board Vice Chairman Dr. L.Thangmawia MLA te chuan niminpiah tlai khan Union Secretary of DoNER Chanchal Kumar chu New Delhi-a a Office-ah kawmin Mizoram mamawh thenkhat an thlen a. Central sawrkarin sum sanction order a tih-chhuah tawh si, a taka pawisa pek kan la nih si loh Aizawl by-pass road, PM Devine Scheme harsatna tawh te leh Tuichangral kawngpui thenkhat laihna tur NESID Scheme harsatna thenkhat te bakah Lengteng bial chhung thil pawimawh thenkhat te an thlen a. DONER Secretary Chanchal Kumar chuan a rang thei ang bera bawhzui sak a tum thu a lo hrilh a ni.

Lengteng Bialtu MLA Dr. L. Thangmawia chuan nimin khan New Delhi-a NHIDCL Hqrs. Office tlawhin Mizoram lam bialtu NHIDCL-a General Manager (Technical) M. Khalid chuan a lo dawngsawng a, Dr. L. Thangmawia hian a bial kaihhnawiha NHIDCL hmalakna te sawipuiin a zawtfiah bawk.

I rin aiin MPF a hlu a nia aw! - Vanlalrema Vantawl Mission Veng

Serchhip Branch Young Mizo Association-in YMA Golden Jubilee a hman dan tlangpui - F. Lalawikunga, Secretary

Nimin khan Saitual-ah Tung kawr khehna khawl bun thar chu hawn niin he khawl hi Ruala & Sons, Serchhip te siam a ni.

Mizoram-ah Heroin a hluar zel niin a lang a, kumin hi kum khat chhunga Mizoram-a Heroin man tam ber kum ni mekin kum 2021 leh kum 2022 chhunga Heroin man zawng zawng aiin kumin chhunga Heroin man hi a tam tawh zawk a. Mizoram-a man tam tham erawh State pawn lam a mi tur a ni tlangpui thung nia hriat a ni.

Election Commission of India in Mizoram Assembly Inthlanpui neih tur a puan hnuah dan phalloh thil chi hrang hrang cheng vbc. 49.96 hu man a ni tawh.

Siaha Officers' Club (SOC) leh PHE Department tangkawp chuan Association for Voluntary Blood Donation (AVBD) Siaha ten tangkai taka an hman turin nimin khan Khum thleh theih (folding bed) an hlan a, Siaha-a Sr. Chief Medical Officer Dr. Lalnunziri chuan Siaha Officers' Club ten nachang hriaa, thisen petuten tangkai taka an hman tura Folding Bed an pe chu lawmawm a tih thu a sawi a. Siaha-a AVBD Secretary Lalmaka Tluangneh pawhin SOC te thilpek chu Blood Donation Camp an buatsaih ah tangkai taka an hman thin dawn thu sawiin, SOC te chungah lawmthu a sawi bawk.

Nizan hmasa dar 8:30 vel khan Saitual District chhunga Saichal khaw dai-ah buhfai phurtu Truck pakhat chu chesualin Motor neitu leh khalhtu S. Lalhmudika (42) chu vanduaina thlenna hmunah hian a boral. Thudawn danin he Motor hi Churachandpur-a dah tur FCI buhfai phur niin Tuivawl leh Saichal inkarah a che-sualin kawngthlang lamah metre 30 vel a thui a lum a, Motor hian S. Lalhmudika hi delhin nizan hmasa dar 12:00 vel khan a ruang hi an lachhuak thei chauh a. Nimin khan Truck in a phurh buhfai quintal 150 vel chu Saichal khawtlangin hnatlangin an thiarchhuak a ni.

Krismas leh Kumthar vuak veta halpuah leh puakthei hal thinin boruak bawlhhlawh, mihring tana hlauhawm a siam thin avangin kumin a hetiang halpuah leh puakthei chi hrang hrang khap dan tur chungchang chu nimin tlai khan Chief Secretary Dr. Renu Sharma hovin Secretariat Conference Hall-ah sawiho a ni a. Heng hunpui ah hian ruihtheih thil te pawh khauh taka khap a tul thu leh halpuah leh puakthei thil dang hal hian mihring hriselna atana thil pawi a thlen thin avangin mitin hal lo tura ngen nise an ti a. Hemi kawnga hmalakna a hlawhtlin theih nan Chief Secretary chuan mitin thawhhona a pawimawh thu sawiin, mi zawng zawng tang tlang turin a ngen bawk.

Mizoram Assembly Inthlanpui 2023 neih zawh hnua Mizoram sawrkar thar lo awm tur lakluhna Inkhawm, ‘Swearing-in-Ceremony of Chief Minister and Council of Ministers’ neih dan tur chu nimin khan Chief Secretary Dr. Renu Sharma hovin CS Conference Hall-ah a kaihhnawih Department-te nen sawiho a ni a. Chief Secretary chuan Swearing-in-Ceremony chu programme pawi-mawh tak anih avangin he thilah chanpual leh mawhphurna nei Department ten an tih tur an chian bakah an mawhphurhna te tha tak leh zo taka an hlenchhuah a tul tiin Department aiawhte chu a tha thei ang berin inbuatsaih lawkna te ruahman turin a ngen bawk. He Meeting-ah hian Department hrang hrangte mawhphurna tuk niin an tih tur te thlirho leh sawiho a ni.

Myanmar Sipai Mizoram-a raltlan pakhat chu kum 10 chhung tang tur leh pawisa chawi turin Champhai Addl. District & Sessions Judge, Sylvie Zomuanpuii Ralte chuan a chungthu a rel sak. Thudawn danin thiamloh chantir tak Min Aung hi nikum khan Myanmar Sipai atangin Silai nen a rawn tlan bo a, Champhai Zote-a raltlante dahkhawmna hmunah awmin, nikum September thla khan raltlan zing a mi ve tho Lalmuanpuia leh a nupui chu an awmna pindan-ah luhchilhin Zu lei turin a tir a, Camp-ah hian zu leh ruihtheih thil lakluh phal a nih loh avangin Lalmuanpuia nupui Malsawmsangi chuan an kal theih loh thuin a chhang a, Min Aung-a thinrim chuan a chempui in Malsawmsangi hi a nghawng leh a malpui-ah a sat a, a nupui chhan tumtu Lalmuanpuia chu a khup dinglamah a sat zui a. Min Aung hi  tlanbo zuiin, Hmunhmeltha phai-ah man a ni ta a ni. Court chuan Min Aung tualthah tum avangin kum 7 tang tur leh Rs. 3000 chawi tura hremin na taka mi a hliam avangin kum 3 tang tur leh Rs. 1000 chawi turin a hrem ta a

Kolasib District chhung khaw pakhat a School Headmaster pakhat chu a School naupang pawngsual a puh a nihna ah Fast Track Court, Kolasib chuan nimin khan thiam loh chantirin tun thla ni 29-ah hremna puan a ni ang. Kolasib District khaw pakhat a nu pakhat chuan Kawnpui Police Station-ah FIR thehlutin a fanu kum 17 mi chu an School Headmaster in a pawngsual thin niin a sawi a, hemi bawhzui hian kum 31 mi he School Headmaster chu man a ni a. Fast Track Court chuan pawngsualtu a puh hian January 15, 2022 khan kum 17 mi hi a pawngsual ngei a ni tih finfiahna chu chiang tawkah ngaiin thiamloh a chantir ta a ni. Thiamloh chantir tak hi nimin khan Kolasib District Jail-ah dahluh nghal a ni.

World Fisheries Day denchenin nimin khan Mamit-ah District Level Fisheries Conservation Board thutkhawm neih a ni a, he thutkhawm hi District Bawrhsap VL. Remliana chuan kaihruaiin October 10 atanga December 18 thleng luidung nungcha humhalh a nih angin mipuite pawhin kan zah a tul thu a sawi a, Mizoram luidung-a Sangha khawi chi zirchianna awm lova duh duh a chhuah a ni thin chu a pawi thu leh River Ranching chung-chang kan hriatchian lehzual a tul thu a sawi bawk.

Tourism Department buatsaih ‘Winter Festival 2023 Cum Mega Exhibition’ chu thla thar December ni 11 - 16 chhung khian Aizawl Lammual-ah neih leh a ni dawn. Winter Festival 2023 Cum Mega Exhibition neih tur chungchang hi nimin khan Tourism Department Officials te chuan MINECO Building-I ah an sawiho a. Ruahmanna siam a nih dan chuan Winter Festival 2023 Cum Mega Exhibition hi December 7, 2023-ah a khuhhawn nan Elle Media (Supported by Mizoram Tourism) te'n an chahchhuah tur Vengaboys te'n AR Ground-ah Concert an nei dawn a. Winter Festival Cum Mega Exhibition-ah hian Stall hrang hrang buatsaih a ni dawn a. Mit leh beng titlai tak tak Live Concert, Cosplay bakah Variety Programme nuam tak tak awm tura ruahman a ni a. Hemi hun atana mawhphurhna chanvo hrang hrangte Meeting-ah hian inpek nghal a ni bawk. He hun hi Zoram mipui a tam thei ang berin hlut saka chhim theuh turin Committee chuan an sawm bawk a ni.

Nimin khan Saitual District Planning Committee chu District Bawrhsap Dr. Lalngura Tlau hova thukhawmin Saitual District hmasawnna atana hmachhawp pawimawh te an sawiho.

Mizoram sawrkar-a Taxation Department chu sawrkar kum kal mekah Chhiah cheng vbc. 1000 chhunglut tura beisei niin tunah hian cheng vbc. 670 chuang an chhunglut tawh.

Serchhip District-ah Two Wheeler Taxi Permit dilna 211 lut tawhin Permit 162 pek a ni tawh a, Two Wheeler Taxi Permit dilna thehluh hun hi a hran a siam a ni lo thung.

Election Commission of India (ECI) in Mizoram Assembly Inthlanpui a Vote tla te chhiar hun tur a la sawn loh avangin thla thar December 3-a Vote tla te chhiar turin inbuatsaihna kalpui mek zel a ni a. Serchhip District-ah pawh Vote chhiar turte hi ruat ni tawhin tunkar Ningani khian Training buatsaih a ni ang.

MNF Adviser leh Health Minister Dr. R. Lalthangliana chuan tun tum MLA te anga mahni bial vil tha leh ngaihsak an la awm lo hiala a hriat thu a sawi.

ZPM Working President K. Sapdanga chuan ZPM party chu ZPM sawrkar siam tura piang a ni lo tih sawiin, “Mipui sawrkar siam tura piang a ni,” a ti.

All India Cooperative Week vawi 70-na kharna hun chu nimin khan Lunglei District Cooperative Union Ltd. Hall-ah neih niin he hun hi MIZOFED Chairman K. Rothangpuia chuan khuallian niin a hmanpui a, MIZOFED hnuaiah Share holder 400 vel an awm thu sawiin, Mizoram sawrkar atangin tanpuina sum an dawn tawh ngai loh thu leh, chutihlai chuan kumtin Mizoram sawrkar ah cheng vbc. 25 lai Chhiah a chhunglut zawk thin niin a sawi bawk.

Mizoram Pradesh Congress Committee (MPCC) chuan Mizoram inthlanpui vote chhiar ni atan Pathianni ruat a ni chu an ngai thutak hle tih nimin khan thuchhuah siama tarlangin, Kohhran leh NGO te ngenna ngaihpawimawh loh te chu Mizote sentiment ngaih pawimawh lohna lian takah an ngai tih an sawi a. Election Commission hian Mizoram vote chhiar ni hi sawn ngei se tih chu Congress party duhdan leh dinna a ni tih Mizoram mipuite hnenah an puang leh bawk.

Central YMA chuan Manipur, Myanmar leh Bangladesh-a buaina chhuak avanga Mizo-ram-a raltlan rawn lut Zohnahthlak te tanpuina atan cheng nuai 225.85 an dawng tawh tih nimin a MJA member te nen an inkawmna ah an sawi a. Heng te hi mimal, Pawl leh Kohhran atanga an dawn te niin Mizoram chhung bakah State dang leh rampawn atangin tanpuina hi an dawng a. An sum dawn atang hian cheng nuai 165.8 chu hmang tawhin hman loh cheng nuai 69 vel ala awm a, a tul anga hman zel tur a ni.

Mizoram Larsap Hari Babu Kambhampati chuan nimin khan kum 2024 chhunga Mizoram chhunga Bank leh Financial Institution te chawlh neih hun tur a puang a, nakum-ah chawlh hi ni 22 a awm dawn a ni. April ni 1-ah chuan Bank te chu in hawng mah se mipui nawlpui tan dawr theih an ni dawn lo tih tarlan niin, anmahni chhunglam hna pawimawh an thawk ang. Kalphung pang-ngai neih sa tawh angin thla tin Inrinni vawi hnihna leh vawi linaah te pawh mipui tan Bank dawr theih a ni dawn lo bawk a ni.

School Education Department Joint Director R. Lalnunthari chuan nimin khan Keifang VFDC Hall-ah kutthemthiam thiil chi hrang hrang zirna tur, Critical Life Skills & Occupational Skill Development Model Centre a hawng a, he Centre-ah hian Chhang ur, Sam leh hmel cheina (Beauty Culture), Pickle leh Jam siam, lumeh leh pheikhawk leh nihliap chhe siamte zir theih a ni dawn a, Critical Life Skill huangah bakah Bank kalphung leh Electronic Transaction, Disaster Management, Dan leh hrai zir theih tura ruahman a ni bawk. Heng Course hrang hrangte hi ni 15 atanga ni 60 chhung zir tur niin, training turte chu Local Level Board in an thlang fel tawh a. Training chhuakte hnenah hian Certificate pek an nih dawn bakah an zir chhungin Stipend pek an ni dawn bawk a ni.

Mizoram sawrkar Health & Family Welfare Department hnuaia Directorate of Ayush hmalakna in nimin khan ‘World Ayurveda Day’ vawi 8-na pualin Kolasib-a TS Luaia M/S-ah hun hman a ni a, he hunah hian Senior MO Dr C. Vanlalhlimpuia chuan Ayurveda chungchang leh hriselna kawnga hriat tur pawimawh hrang hrangte sawiin, zirlai kal khawmte chu rilru leh taksa hrisel nei tura an nunphung leh ei leh in uluk turin a chah a. District Hospital Kolasib-a Physical & Stress Management Instructor R. Lalhmangaih-zuala chuan zirlaite chu taksa sawizawi pawi-mawhna leh taksa sawizawi dan tur (basic yoga exercise) a zirtir bawk. He hunah hian a thlawna inentirna (free clinic) buatsaih nghal a ni a, mi 98 hriselna dinhmun enfiah niin, a thlawnin damdawi engemaw zat sem a ni bawk.

Kolasib District MJA te chuan nimin khan Bawktlang Power Sub-Station tlawhin helai hmuna thawktute chuan an hnathawh dan an lo hrilhfiah a. P&E Department-a thawktute chuan helai hmunah hian Badarpur, Serlui leh Tuirial atangin Power Supply an dawng thin a, chu chu Kolasib District chhung hmun hrang hrang bakah Aizawl lamah te an pek thin thu an sawi a. Mizoram-a Power Sub-Station thenkhat chu Mizoram sawrkar hnuaia awm an nih avangin a chhiat a thatah pawh thu an neih laiin, Bawktlang Sub-Station chu Shillong-a North Eastern Regional Load Despatch Center (NERLDC) thuhnuaia awm a nih avangin a chhiat a thatah pawh siam tha turin phalna zuk lak zel a ngai a. An duh hun hunah Shutdown pawh an lak theih hoh thu an sawi.

Kum 13 kalta chhunga kum tin-a Mizorama thihna thlengah Hmeichhia aiin mipa an thi an tam zawk zel a, chawhrualin kumtin hmeichhe let hnih thuak mipa thi ziah ang a ni.

Kolasib District chhunga hriselna dinhmun enfiahna leh inentirna (Clinical Establishment)-te dan anga chhinchhiah leh khuahkhirh tura din, District Registering Authority (DRA) chu nimin khan an Chairman leh Kolasib District Bawrhsap John LT. Sanga hovin an thukhawm.

Central YMA President Lalhmachhuana chuan Mizoram run mektu ruihhlo do kawngah Central YMA in theihtawp a chhuah dawn tih a sawi.

Sawrkar kum kal mek kumin April thla atanga September thla thleng khan Serchhip District Hospital Blood Bank-a thisen pek zawng zawng atanga za zela 93.82 chu a thlawna pek niin hei hi Mizoram puma a thlawna thisen pek zat aiin a sang zawk a ni.

Baptist Church of Mizoram (BCM) chuan nimin Pathianni kha ‘Naupangte N$’ atan hmangin ‘Tho la, naupang kha kaitho la, i kutin chelh rawh’ (Gen. 21:18) tih thupui-ah hmangin BCM Kohhran hrang hrangah he ni pual hian hun hman a ni. India ram leh khawvel puma Naupangte ni hman a nih thin angin Mizoram Baptist Kohhran chuan Kohhran p<m huapa naupangte ngaih pawimawh na lantirin, Kohhran mipuite inzirt$rna hun at^n ‘Naupangte N$’ hi kum 2016 atang khan November thla Pathianni vawi thumna ah an hmang thin a, he ni hi Tisa leh Thlarau-a naupangte zirt$r leh enkawl that pawimawhna inzirt$rna n$ at^na hman thin a ni.

Serchhip Sub-Hqrs. YMA leh Serchhip District Boxing Association (SEDBA) tangkawp buatsaih Inter-Branch YMA Boxing Championship 2023 chu thla thar December 6 atang ni 8 chhung khian Serchhip Boxing Hall-ah khelh a ni dawn a, he inelna ah hian Mipa leh Hmeichhia tan inelna buatsaih tur a nih bakah Boxing khel thin te leh la khel ngai miah lote a hranpa a then hran an ni dawn a, kg. 30 atanga 85 thleng tan inelna hi buatsaih a ni dawn a ni. He Championship-ah hian kum bithliah awm lovin a duh apiang tel theih a ni a, mahni awmna Branch te hriat-puina erawh a ngai dawn thung a, inhnek tam zawk hi zan lama neih tura ruahman a ni.

NABARD leh World Vision India tangkawp hmalakna hnuaiah Zirtawpni khan Lawngtlai Press Club-ah Gram Dukan Management Committee thutkhawm vawi hnihna neih a ni a. Intodelhna kawng zawnga intelkhawm Self Help Group te’n awmze nei zawka an thil thar leh siamchhuahte an zawrh chhuahna tur dawr siam chu Gram Dukan Project in a tumber niin, he Project hnuaiah hian Lawngtlai District chhungah hmalakna kalpui mek a ni a. NABARD chuan he Project atan hian Rs. 3,74,000/- a ruahman a, Thingkah khua-ah dawr hi hawn a ni tawh a ni.

Salvation Army Central South Division SAY Rally chu nimin Pathianni hmang khan Hliappui Corps-ah ‘Chhandam tura Chhandam’ tih thupui-a hmangin neih a ni a, nizan khan a tiak a ni. He SAY Rally-ah hian an Division huam-chhunga SAY dinna Corps 70 awm ah Palai 1,200 vel an tel a, Rally hi Zirtawpni zan atanga neih tura ruahman kha ni mah se ruah sur nasa avanga tan thei lovin Inrinni khan tan theih a ni ta chauh a, Rally neih chhung hian Salvation Army Officer-te hnen atangin thupui thlansa hmangin Pathian thuchah ngaihthlak thin a ni.

Mizoram-a awm Assam Rifles te chuan kar kalta Ningani atang khan Manipur dep Saitual District-a Mimbung khua-ah hmeichhiate pualin Pa khawi dan zirna an buatsaih a, hmeichhia mi 30 in Pa khawi dan hi ni 10 chhung an zir dawn a, Pa khawi dan zirte hian mahni kutkawiha eizawnna an neih theih dawn bakah anmahni ke a din leh midangin hnathawh tur an lo neih theihna atana mi tangkai an ni thei dawn nia sawiin, ramri depa awm hmeichhia te chu ei leh bar zawnna kawnga an intodelh thei niin Assam Rifles thuchhuah chuan an tarlang. Pa khawi zirna a tel te hian an zirchhuah hunah Pa khawina atana hmanrua leh bungraw pawimawhte chu an dawng nghal dawn a ni.

Ningani kalta tlai-a Tuiruang lui-a chesuala tla Lalrosema (57), Sakawrdai chu nimin zing dar 5:30 vel khan a ruang hmuh niin nimin vek khan vuiliam nghal a ni. Thudawn danin Lalrosema te hi Tuiruang lui-a Sangha man tura kal niin hetah hian chesual palhin tui-ah hian a tla a, tui tla zawn hna hi Sakawrdai leh a chhehvel khua Vaitin, Khawpuar, Tinghmun leh Zokhawthiang Branch YMA member-ten thawkin nimin zing dar 5:30 vel khan a tlakna atanga KM khat pawh tling lo ah a ruang hi hmuh a ni ta a ni.