Kan mamawh hmasa thliar thiam turin duh

Congress Thalaite chuan Mizoram sawrkar chu COVID-19 avanga harsatna lian tak kan tawh laiin kan mamawh hmasa thliar thiam tura an duh thu an sawi.

Mizoram Pradesh Youth Congress Committee hian thuchhuah siamin COVID-19 in Mizoram na takin min nuai mek thu an sawi a, “Tum hnih na takin min nuai tawh a ni. A tum thumna erawh na tak a nih leh dawn avangin kawng hrang hrangin invenna chikim a ngai a, Covid-19 'third wave' lo thleng ngei tur kan lo hmachhawnna tur hian Sawrkar hian tih tur tul tak tak a nei a. Chu'ng zinga a pawimawh hmasa; Laboratory Technicians, Health Workers, Nurses leh Doctor-te a rang lama Sawrkarin a hnathawk turin a sengluh a ngai a, rang taka a lak kan phut a ni,” tiin tun dinhmunah Mizoram chauh ni lo, khawvelin a mamawh chu hriselna lama kan mithiam leh inpe tak takte an ni tih an tarlang bawk.

MPYCC thuchhuah chuan, Sawrkar in pawisa a neihloh thu leh harsatna nasa tak kan tawk a tih reng laiin tul hmasa em em rih lovah Zirtirtu thahnem tawk tak lak a tum leh chu hriatthiam har an tih thu an tarlang a. “Sum hmanna tam tak en hian kan Sawrkar hian hripui do hi hna takah a nei lo niin a lang, Rawmi chi atana sum tam tak sen te, Airport Cute ber siam tum vanga sum khawhralte hi thil pawimawh hmasa ber niin a lang lo,” an ti a. “Mahni sahimna leh chhungte dinhmun hlauhawma siam mek Volunteer zawng zawngte hi sawrkar hian duhsak se kan ti, Covid hri len tirh ang a ni tawh lova, tuna tlawmngai tak takte dinhmun hi hriatchian a ngai a, duhsak an phu hliah hliah a ni,” tiin “Third Wave lo thlen hma hian sawrkar hian kan mamawh dik tak hre rawh se,” an ti a ni.