Health Minister hovin COVID-19 hri kaite enkawl dan chungchang sawihona neih a ni

Nimin khan Health Minister Dr. R. Lalthangliana hovin Mizoram-a COVID-19 hri kaite enkawl dan chungchang sawihona neih a ni a, he hunah hian Zoram Medical College (ZMC)-a Doctor te chuan nunna a tam thei ang ber chhanhim chu a pawimawh ber a nih thu an sawi.

SAD Conference Hall-a he sawihona hunah hian Health Minister Dr. R. Lalthangliana chuan India rama COVID-19 hrik thar Delta Variant chu kar hmasa khan Mizoramah ngei a rawn lut ve ta tih finfiah a nih thu National Centre for Disease Control, New Delhi atangin hriattirna an dawng tih sawiin, hei hian Delta Variant hi kan kawl ve ni a hun engemawchen an lo rinhlelh rilruk tawh chu a rawn nemnghet ta tih a sawi a. Tunhnaiah hri kai kan neih ten nunna an chan zing ta bawk nen, damlo kan enkawl dante uluk zawka thlirho a, a tul ang anga hmalak chhunzawm dan turte ngaihtuah a tul thu sawiin, ZMC-a damlo enkawltute inpekna a chhuanawm tih a sawi a. Hetih rual hian ZMC Doctor ni lo, Doctor dangte, Retired tawhte thlenga an ngaihtuahna, tha leh zung senga theihtawp chhuahtute chungah lawmthu a sawi bawk.

Health Minister chuan COVID-19 damdawi, damloten an dampui tak takna tur bik liau liau hmuhchhuah la ni lo mahse, damlo enkawlna kawnga tangkai thei ni a kan hriat damdawi chi hrang hrangte hi engtin nge kan hmuh theih ang a, kan lakluh zung zung theih ang tih pawh ngaihtuah a tul thu a sawi bawk.

He hunah hian ZMC Doctor te chuan damlo an enkawl dan leh an buaipui dante sawiin, hri inkaichhawnin hniam lam a pan theih loh rual hian nunna a tam thei ang ber chhanhim chu a pawimawh ber a ni tih an sawi a. Damlote an enkawlna kawnga damdawi an hman chi hrang hrangte sawiho niin, damlote tanpui theitu damdawi hriatchian tawhte chu mamawh ang zat a rang thei ang bera lei tha tih a ni a, a lei theih dan tur leh a leina turte ngaihtuah nghal tura hmalak tum a ni. Damlote an enkawlna (treatment protocol) chungchangah sawrkar laipuiin inkaihhruaina a siam tharlam ber dungzuia kalpui a nih thu tarlan a ni bawk.

Home Isolation, CCC leh CCCC atanga damlo na zual deuh ZMC-a an phurh thlen te chu an dinhmun a lo thalo hman viau zel tih he hunah hian sawilan niin, heng hmuna awmte chu mahni uluk taka a khat tawka inchik (self-monitor) reng turin an chah a. Oxygen level (SPO2) 94% hnuai lam a nih chuan rang taka Doctor te hnena in report nghal thin tura ngenin, mithiamten COVID-19 Third Wave lo thleng turah nau-pang te, a bikin kum 10 - 18 inkarin an tuar na lehzual dawn ni a an sawi avangin anni ho hi tun atanga ngaihtuah lehzual an tul tih he hunah hian tarlan a ni bawk.