Hri kai hmuhchhuah tam ber ni-ah 662 hmuh an ni

Pathianni khan Mizoram-ah Sample 1877 enfiah niin heng atang hian COVID-19 hri kai 662 hmuhchhuah niin ni khat-a Mizoram-a hri kai hmuhchhuah tam ber ni ala ni a, Sample enfiah atanga za zela 35.26 te chuan hri kaiin heng zingah hian TNT Camp-a hri kai hmuhchhuah 528 an tel a ni.

Pathianni khan ZMC Laboratory-ah Sample enfiah awm lovin District hrang hranga TrueNat Laboratory-ah Sample 23 enfiah niin hri kai mi 5 hmuh an ni a. Heng hri kai hmuhchhuah te hi Hnahthial District-ah State pawn atanga rawn lut mi 4 leh Champhai District-ah Frontline Worker mi pakhat a ni a, hri a kaina hriatloh a ni thung.

Pathianni khan Mizoram-ah Rapid Antigen Test hmangin Sample 1854 enfiah niin heng atang hian hri kai 657 hmuhchhuah an ni a, Aizawl District atangin hri kai 639 hmuhchhuah niin heng zinga 528 te chu Thutak Nunpuitu Team (TNT) Camp, Muanna Veng a hri kai hmuhchhuah te an ni. Heng bakah hian Saron Veng-ah hri kai mi 9 hmuhchhuah niin Republic Vengthlang-ah hri kai mi 8 hmuh an ni bawk a, a bak hi Aizawl Veng hrang hranga hri kai hmuhchhuah te an ni.

Heng bakah hian Kolasib District-ah hri kai mi 11 hmuhchhuah niin an zinga 7 te chu Bairabi Rimawi Veng ami an ni a, Siaha District -ah hri kai mi 6 hmuh niin an vai hian Saikao ami vek an ni a, Lunglei District atangin Lunglei Venglai-ah hri kai mi pakhat hmuh a ni bawk.

Heti hian nimin thlenga Mizoram-a COVID-19 hri kai hmuh chu 17,605 an tling ta a, nimin khan hri kai 277 te chu enkawl dam leh niin hri kai zingah 13,697 te chu enkawl dam an ni tawh a, hei hi hri kai hmuhchhuah atanga chhutin za zela 77.80 a ni a, tunah hian hri kai enkawllai 3854 an la awm mek a ni.

Hri kai zingah nunna chan mi 84 an awm tawh :

Mizoram-a COVID-19 hri kai hmuhchhuah zingah nimin khan mi pahnih an boral leh a, Mizoram-a hri kai zingah mi 84 lai an boral ta a ni. Nimin zing dar 12:05 vel khan J. Ngurchhawna (88), Phullen chu ZMC-ah COVID-19 vangin a boral a, May 11-a hri kai hmuhchhuah kha niin May 17 khan ZMC-ah dahluh a ni. Nimin zing dar 6:10 khan Vanlalmuana Ngente (44), Phuldungsei Vengthar chu ZMC-ah a boral ve leh bawk a, June 1-a hri kai hmuhchhuah niin June 12 khan ZMC-ah admit a ni bawk.

Heti hian nimin thleng khan Mizoram-a COVID-19 hri kai te zingah mi 84 an boral ta a, tun thla chhungin mi 44 zet boral tawhin hri kai zinga nunna chan zatve aia tam hi tun thla chhunga boral an ni tawh a, tun thla bikah hian June 12 tihloh, nidang zawngah chuan hri kai zinga boral hi an la awm ziah a. Hri kai zinga nunna chan hri hri kai hmuh tawh atanga chhutin za zela 0.47 a ni.