Latest News

Mizoram-a hralhchhuah Hand Sanitizer 'SPARASH' chu a himlo tih sawrkar in a sawi

Directorate of Health Services-a Controlling & Licensing Authority, Lalsawma chuan Hand Sanitizer ‘SPARASH’ chu a himlo tih thuchhuah siamin a tarlang.


Hemi chungchanga thuchhuah a siamah COVID-19 hripui leng laka invenna hmanraw pawimawh tak pakhat Hand Sanitizet chu India rampumah a lem (spurious/Sub-Standard) a darh nasa hle tih tarlangin. Product thalo dapchhuah hna hi Mizoram Food & Drug Administration (FDA) chuan a thawh reng thu leh hmuhchhuah pawh engemawzat an neih tawh thu a sawi a. Tunhnaiah Guwahati atanga Online hmanga mi thenkhat in an chah chhuah, Hand Sanitizer ‘Sparash’ chu Mizoram hmun hrang hrangah a darh nasa hle tih sawiin, a chah chhuaktute kut atangin engemawzat an hmuh chhuah thu a sawi a. Purabi Pharma Lab Narengi, Guwahati-a mite siam ‘Sparash’ hi Mizoram-ah 500 ml leh 5 litres chi hmuh a nih thu sawiin, “ Dan in a phut anga label siam a ni lova. Drugs Rule chuan label dik tawk lo damdawi reng reng zawrhchhuah a khap tlat a ni,” a ti.

Assam State Drug Controller hnenah thil awmzia enfiah tura an ngen thu sawiin Lalsawma chuan, anni in rang taka hma an lak nghal thu leh a siamtute pawhin thil diklo a awm tih pawmin an hralhchhuah tawh zawng zawng koh kir (Product Recall) nghal an remtih thu a sawi a, ni 7 chhungin Assam State Drug Controller hnenah recall dinhmun an report dawn tih a tarlang. Mizoram hmun hrang hranga he Hand Sanitizer (Sparash - Batch No. 9336, 9337 leh 9338) kawlte chuan an kawl zat bialtu FDA Officer hnenah report tura ngein, Bialtu FDA Officer hriatpuina in thawnlet tur a ni ang.

Hand Sanitizer hrim hrim chi hrang hrang a tam thu pawh sawiin, Natna hrik danglam tak a nih avangin WHO in Coronavirus laka kut silfai nana a recommend chu 80% Ethyl Alcohol emaw, 75% Isopropyl Alcohol emaw a ni tih a sawi a. Hripui leng kara awm kan nih avangin Hand Sanitizer hman tur thlanah mitin kan fimkhura kan duh uluk a ngai takzet tih sawiin, “Thil siamchhuah (products) reng reng kohlet (recall) ngai a nih chuan thil fel tawklo a awm tihna a ni a, chuvangin mahni hman atana kawlte pawhin hman loh a him ber tih hriat tur a ni,” a ti bawk.

Comments

Chhiar Hlawhte